Ngono ipya bwa kulangwila!
1 Mu kikongeno kya ku kipwa kya Watch Tower Bible and Tract Society of Pennsylvania kikitshikile mu 4/10/2014, abekalanga baukishe kutuuka kwa mukanda wetu upya wa ngono. Kuno kuukisha akwikalanga kusangashe bantu bikashaa! Ooso muntu ekalanga mwamwa mmutentekyeshe mbalo ya muulo i nayo ngono yeetu ya Bufumu mu lulangwilo lwetu.—Mis. 96:2.
2 We mulombeene kwiyipusha shi: ‘Bwakinyi bi na muulo wa kutuusha ungi mukanda upya wa ngono?’ Mbwa myanda ibungi. Wa kumpala, mpushisho eetu a Bifundwe kikwete kwenda na kulumbuluka, na bino mbilombeene kwikala na bukitshi ku ngono. (Mye. 4:18) Ungi mwanda mpabitale kwambuula: Bishima bibungi na ingi myaku yatukwete kutumikisha mu uno mukanda wa ngono watudi nawo bi peepi na yawa Bible a kumpala a Traduction du monde nouveau. Abitungu kulumbuula yaaya ngono mu mushindo wa shi ipusheene na ngakwilo a mu Bible mupya. Byabya abitungu mudimo wi bukopo bwashi bishima bya ngono bikale bipusheene na Bible mupya; nkwatshibwe dingi mpàngo ya kukumbasha ingi ngono ipya mu mukanda wa ngono.
3 Abitungu tutengyele mpa na patupetala mukanda upya wa ngono bwashi tubangye kwiyiyimba? Nyaa. Twi na muloo wa kwinuukisha shi mu myeshi ayilondo, atukyebe kwela ngono ipya mu jw.org, site eetu a Internet. Nsaa y’atwele ngono ipya, akwikala programe ku nfudiilo kwa Kisangilo kya mudimo abadi bafunde shi “loono lupya.”
4 Mushindo wa kulonga ngono ipya: Kulonga ngono ipya nkulombeene kwikala bukopo. Byabya, anka bu mwimbi a misambo, atukumiina kuyimba n’eyi di bukopo mu bisangilo bya tukongye na ‘kushii kushâla nyâ.’ (Mis. 30:13, EEM) Bwa kulonga loono lupya, londa ano mayele apeelepeele.
Teemesha misango ibungi ngono yabadi bakobole ku piano, beyeela mu site eetu a Internet. Bu byoteemesha yaaya mizike misango ibungi, wekala na mushindo wa kwiyitentekyesha.
Longa bishima bya loono, na otompe kwibilamiina.
Imba byabya bishima pamune na mizike. Webikite kumpala kwa kulamiina loono.
Imbayi yaaya ngono ipya nsaa ipeela nsaa ya Lulangwilo lwenu lwa mu kifuko mpa na apalamiina kifuko kyenu yaaya ngono.
5 Mu myeshi ayifiki kumpala nsaa yabadi baleeshe ku programe a Kisangilo kya mudimo shi akifudiila na loono lupya, kakongye akakyebe kubanda kuteemesha musango umune loono lupya lwabadi bakobole ku piano. Akupu, bantu booso abakyebe binobino kuyimba pamune nsaa yabalondo mizike ya lwalwa loono lupya, nka bu byatukitaa na ingi ngono.
6 Nsaa y’onangusheena pa bitale yaaya ngono ipya, kuyimba kwa mu bisangilo byetu akwitupa muloo wa kubunga mayi eetu bwa kutumbisha Yehowa. Byabya, tabitungu shi twikale na kyubishi kya kukatuka mu ma mbalo eetu nka bisumanga nsaa ibatubanga kuyimba loono mu bisangilo byetu bya bwina Kidishitu.
7 Kwi ungi mushindo watudi balombeene kuleesha byatusangeela ngono yetu i selele. Mu bikongeno byetu bikata na bipeela, mizike ya ku mbangilo ayibanga kuyimba kumpala kwa kipindji kyooso. Misango ibidi ku kipwa, bakwetu balume na bakashi belambule abatuukila mpese yooso ya nsenga batuushe makuta aabo’bo banabeene bwa kwenda ku Patterson, mu New York, bwa nkatuusha mizike i buwa bukile bwa kufuba nayo bwa lulangwilo. Nyi bwakinyi, nsaa ikeele mukunkushi mwitutekye bwa kushaala kalolo na kuteemesha by’abekalanga betulumbulwile kwi baaba be mu kasaka ka ngono, twi batumikile nka byabya byetutekyele. Kukita kwetu kwa byabya nkwitukwashe bwa kulumbuula mashimba eetu bwa yaaya myanda ayilondo.—Esd. 7:10.
8 Atukyebe kufudiisha bisangilo byetu bya leelo na loono lupya lwina mutwe wa mwanda awamba shi: “Bufumu bukwete kumunana—Bufikye!” Luno loono, lwabekalanga baleeshe mu kino kikongeno kyetu kya ku kipwa kya uno musango, abekalanga belutuushe nka pa kuleesha kipwa kya 100 kya kutandjikwa kwa Bufumu.
9 Ngono ipya ngikale binyibinyi “bintu biibuuwa” abifiki kwi Yehowa. (Mat. 12:35a) Twateyi kitshibilo kya kulonga yaaya ngono ipya na kwiyiyimba mu mashimba eetu, pa kutumbisha na kupa Efile Mukulu eetu ntumbo!—Mis. 147:1.