Mu ano mafuku a Kitentekyesho, okumiina kwambula kinsukunsuku kya Yehowa na kya Yesu su?
1. Bwakinyi Batemwe ba Yehowa abetashisha ngofu mu mafuku a Kitentekyesho?
1 Yehowa alombasha mpàngo yaaye na kinsukunsuku kyooso. P’aaye kunangusheena ku ingi myabi ya Bufumu bw’Efile Mukulu, Yeeshaya 9:6, (EEM) akula bino shi: ‘[Kinsukunsuku] kya Yehowa sha matalwa akikakitshi byabya.’ Bi mumune, pabaadi Mwana a Efile Mukulu pano pa nsenga, baadi muleeshe kinsukunsuku kikata bwa lulangwilo lwa binyibinyi. (Yo. 2:13-17; 4:34) Kipwa kyooso mu mafuku a Kitentekyesho, midiyo ya balungudi ba mukandu wibuwa mu nsenga ishima abetatshisha bwa kwambula kinsukunsuku kya Yehowa na Yesu p’aabo kutamisha mudimo wabo mu bulungudi. Okumina kwikala umune a kwabadi su?
2. Kinsukunsuku akitutakula bwashi tukite kinyi kubanga mu 14/3/2015?
2 Kwabila kwa masaki a lwitamino lwa ku Kitentekyesho: Kwabila kwa masaki a lwitamino bwa kuukisha bantu pabitale Kitentekyesho kya kino kipwa, a kubanga mu dya Mpooso 7/3/2015. Elumbuule binobino bwa kwikala na kinsukunsuku kya kutamisha mudimo oobe. Tukongye atukyebe kwipaana ngofu bwabadya kwitamina bantu booso be mu teritware yabo su kwi mushindo. Epaane ngofu bwa kwitamina bantu bolongaa nabo Bible, bantu boteembelaa, beena mudimo noobe, bakwenu na beena kalasa noobe; we mulombeene kwibapa masaki a lwitamino sunga kufuba na jw.org.
3. Mushindo kinyi watudi balombeene kutamisha mudimo wetu wa bulungudi mu mweshi wa Kasatu na wa Kananka?
3 Bu mbaala-mashinda mukwashi: Kinsukunsuku akikyebe kwitutakula dingi bwa kutamisha mudimo wetu. Kushii mpaka, bantu bebungi abekala na bya kukita mudimo wa bu mbaala-mashinda mukwashi mu mweshi wa Kasatu na wa Kananka, mwanda twi na mushindo wa kusangula bwa kukita nsaa 30 itekibwe. Mu lulangwilo lwenu lwa mu kifuko sunga mu kwilongyela kwa pa bupenka, taluulayi mu luteko mushindo wanudi balombeene kwibikita. (Mye. 15:22) Muloo oobe wa kwabila ano masaki a lwitamino ngulombeene kutakula bangi bwa kukita mudimo wabo na kinsukunsuku. Su oshintuula ingi myanda mu nshalelo oobe bwa kukita bi bungi, okyebe kwambula kinsukunsuku kya Yesu.—Mak. 6:31-34.
4. Efuto kinyi dyatupete nsaa y’atwambula kinsukunsuku kya Yehowa na Yesu?
4 Kwambula kwetu kwa kinsukunsuku kya Yehowa na kya Yesu mu mafuku a Kitentekyesho akwitupetesha myabi ikata. Bantu bakile bungi be mu teritware abalungulwa mukandu wibuwa. Atukyebe kutompa muloo autuukila mu kufubila Yehowa na kukwasha bangi. (Bik. 20:35) Kikile muulo ngofu, atukyebe kusangasha Efile Mukulu eetu sha kinsukunsuku na Mwan’aaye.