Kwasha ba mpofu bwashi balongye pabitale Yehowa
1. Mbikunyi bibaadi Yesu muleeshe lusa kwi ba mpofu?
1 Kubashaala mafuku apeela bwashi Yesu afwe. Aye taadi atuuku mu kibundji kya Yeeriko, ba mpofu babidi abaadi abatekye kapalusa nkubanga kwela misaase shi: “Etufwiile namu lusa, Nfumu!” Sunga mbibaadi Yesu anangusheena pabitale nkalakasho ibaadi ayimutengyela, bayimeene aye nkutuma eyi dya kwitamina baaba bantu, na aye nkwibapaasha. (Mat. 20:29-34) Mbikunyi byatudi balombeene kwambula lusa lwa Yesu bwa ba mpofu?
2. Nkinyi kyatudi balombeene kukita bwa kulambukisha mpofu atufumankana naye mu mbalo i bantu be bungi?
2 Ikala okwashana: Su ofumankana na mpofu pangi mu mbalo i bantu be bungi, elubule kwadi na omulungule shi okyebe kumukwasha. Bu byabidi shi bantu be bungi abataa ba mpofu bintu, mpofu mmulombeene kutshiina kutambula muntu ash’auku. Byabya, ngakwilo oobe a kalolo na kwitatshisha koobe bwaye mbilombeene kumukaasha wawa moo. Lamiina bino shi, ba mpofu mbelekeene, na bino mbilombeene kwitutakula bwa kutala bukwashi bwi nabo yawa muntu lukalo. Kunyima kwa kumukwasha, pangi we mulombeene kuleesha shi okumiina kwisamba na bantu myanda ya mu Bible. Mutekye bwa kumubadikila ma verse bu Misambo 146:8 sunga Yeeshaya 35:5, 6. Su e na mushindo wa kubadika mikanda yabadi bafundjile ba mpofu, mwipushe su akumiina kupeta mukanda wabadi bafundjile ba mpofu ulombeene kumukwasha bwa kulonga myanda ibungi ya mu Bible. We mulombeene kumukwasha dingi bwadya kupeta myanda yabadi bakobole penda mayi i mu jw.org. Su ordinatere aaye e na écran e na mushindo washi yawa mpofu abadikila mikanda kwanka, mmulombeene kusangeela kubadika miisambo i mu jw.org mpa na mikanda yaadi mulombeene kwata ku Internet mu format a RTF (Rich Text Format).—Tala kashibo kabadi bafunde shi: “P’okyebe kukwasha mpofu . . .”
3. Mushindo kinyi watudi balombeene kukimba ba mpofu mu teritware eetu?
3 Kimba kwi ba mpofu: T’atukambaa kwimonena na ba mpofu nsaa y’atudi mu bulungudi bwa ku nshibo na nshibo mwanda be bungi ba kwabadi t’abakuminaa kwisamba na benyi abafiki ku bibelo byabo nya. Byabya, abitungu kwitatshisha ngofu bwa ‘kukimba’ baaba bantu bwa kwibalambukisha. (Mat. 10:11) Kwi mwina mudimo noobe sunga mulongi noobe mwikale mpofu? Ata mpàngo ya kwisamba naye. Su mu teritware eenu mwi kalasa ka ba mpofu, ebape ingi mikanda yeetu ya ba mpofu bwashi beyituule mu biblioteke byabo bya kalasa. Oshinguula muntu e na mukwabo mpofu? Mu teritware enu mwi ndumbulwilo ayikwasha ba mpofu sunga ibakye mashibo a kulamina ba mpofu su? Esambe na mwina kifuko naye, yawa akukilaa bantu abafiki ku mbalo yabadi batuule ba mpofu, sunga mukata a kalasa ka ba mpofu. Omupatulwile shi Batemwe ba Yehowa be na lukalo lukata lwa kukwasha ba mpofu na omutekye bwa kwibalekyela mikanda sunga bande yabadi bakite bwa ba mpofu. Muleeshe mulayilo wa mu Bible aulesha shi Efile Mukulu akyebe binobino kushimisha bu mpofu losoo. We mulombeene dingi kumuleesha video a mu jw.org amba shi: “Sans elle, je serais perdu,” alondo mwanda wa ungi mpofu baadi mupete bukwashi p’abo kumupa Bible a ba mpofu. Nsaa y’omupatulwila bwakinyi bofiki yaaya mbalo, mbilombeene nkufungwila eshinda dyashi wemonene na ba mpofu.
4. Elango kinyi dyatupete ku kileshesho kya Janet?
4 Janet ungi mukwetu mukashi mpofu baadi mwende mu kutemba mu lungi lupango lubaadi lushaale ba mpofu. Aye nkubanga mwisambo na ungi nsongwakashi. Janet nkumulungula shi: “Yesu baadi mupaashe ba mpofu bwa kuleesha shi akyebe kupaasha ba mpofu booso.” Abo nkubadika pamune Bifumbulwe 21:3, 4, na Janet nkumupatulwila abikyebe Bufumu bw’Efile Mukulu kulombasha wawa mulayilo. Yawa nsongwakashi nkumiina na aye kwamba shi: “Kasha ntampushishe ungi mpofu e na yawa mweneno a myanda nya. Bantu be bungi bashi ba mpofu abamba shi bantu mbekale ba mpofu pa mwanda wa myanda ibabadi bakite kwi bankabwa baabo.” Janet nkutumina yawa mwana mukashi mesaje abaadi alombeene kumutwesha mu mbalo yadya kupeta mukanda wa Akilongyesha Bible, na binobino bakwete kulonga Bible naye misusa ibidi ku lubingo.
5. Sunga byatudi shi tatwi balombeene kupaasha ba mpofu bu bibakitshiine Yesu, kwipaana kwetu bwa ba mpofu nkulombeene kufwisha myabi kinyi?
5 Binyibinyi, tatwi balombeene kupaasha bantu ku maladi aabo a bumpofu bu bibakitshiine Yesu nya, kadi twi balombeene kukwasha baaba booso abashinguula shi efile a uno ndumbulwilo mmwibayikashe ba mpofu mu kikudi, mpa na ku mbidi, bwabadya kupusha bya binyibinyi bya Mwiyi dy’Efile Mukulu. (2 Kod. 4:4) Yesu baadi mupaashe ba mpofu babidi peepi na Yeeriko mwanda baadi ‘mwibapushiishe lusa.’ (Mat. 20:34) Su atuleesha lwalwa lusa lumune bwa ba mpofu, twi balombeene kusangeela mwabi wa kukwasha bangi bantu bwa kulonga pabitale Yehowa, yawa akyebe kufudiisha bu mpofu losoo.