Myaluulo ku nkonko yenu

◼ Balungudi mbalombeene kufuba na Internet bwa kulungula mukandu wibuwa sunga kulonga Bible na bantu bashale mu dingi eyumbo su?

Bangi balungudi mbafube na Internet bwa kupeta bantu ba kulonga nabo Bible mu ma mbalo mwabadi beele mikalo pabitale mudimo wetu sunga mwi balungudi bapeela. Ingi nsaa nkutuukye bipeta bibuwa. Kadi, kwi masaku nsaa i balungudi abalungula bantu benyi mukandu wibuwa ku Internet. (Tala Mudimo wetu wa Bufumu wa 7/2007 esk. 3, mu Fwalanse.) Sunga mbyabidi shi atukimbi bya kukuma basha mashimba alulame na mukandu wa Bufumu, ino miisambo ngilombeene nkafwisha bakwetu mu kwikala mu kupwano na bantu babi, mpa na bantu basumbule lukumiino. (1 Kod. 1:19-25; Kol. 2:8) Na dingi, mu mbalo yabadi bakandjikye mudimo wa Bufumu, bakata ba mbulatadi mbalombeene kulondoola ma mesaje ooso. Kwisamba mu wawa mushindo na baaba bantu abakimbi bya binyibinyi nkulombeene kutweshakasha bakwetu be mu yaaya mbalo. Nyi bwakinyi, balungudi ta mbalombeene kukimba bantu ba mu dingi eumbo bwa kwibalungula mukandu wibuwa ku Interet nya.

Su twalungula muntu afiki mu dingi eumbo mukandu wibuwa mu mpukapuuka, tatwi balombeene kutungunuka na kukimba bya kutamisha lukalo lwaye nsaa y’aluka mu eumbo dyabo su biro bya filiale ta mbitupe matalwa. Pamutwe pa byabya, twi kumuleesha byadya kutwela mu jw.org bwashi aukye ingi myanda sunga kumuleesha byadya kukimba biro bya filiale bi mwiumbo dyabo. Twi balombeene kumunyingisha dingi bwadya kwenda ku Nshibo ya Bufumu i peepi naye. Kadi, mu angi maumbo, takwi Mashibo a Bufumu nya. Su akumiina shi bamutembele kwi Batemwe kwakwa kwadi, twi balombeene kuusha kasaki ka Veuillez suivre l’intérêt (S-43) na kwikapa mufundji a komite a kasaka ka bakulu, akyebe kwikatuma ku bukwashi bwa jw.org. Biro bya filiale bikwete kukunkusha mudimo wa bulungudi mu dyadya eumbo dishaale yawa muntu ndjo bilombeene kumukwasha kalolo na myanda ya mu kikudi.—Tala Mudimo wetu wa Bufumu wa 6/2014 esk. 7 na Mudimo wetu wa Bufumu wa 11/2011 esk. 2, mu Fwalanse.

Su muntu atwisambaa naye bakatuka bende mu dingi eumbo sunga shi su twi na muntu atulongaa naye e mu dingi eumbo atwiukeena naye nka penda ku Internet, abitungu tulonde bino bibabakatuka mu kwitulungula. Byabya, twi balombeene kutungunuka na kutamisha lukalo lwaye mpa na apamweka balungudi ba mwiumbo dyabo balombeene kutungunuka naye. Kadi, su mmushaale mu mbalo yabadi bakandjikye mudimo wetu sunga kwiwelela mikalo, abitungu budimu bwibungi nsaa y’anwisamba myanda ya mu Bible ku bukwashi bwa kwifundjisheena mikanda, bwa telefone, sunga mu ungi mushindo.—Mat. 10:16.