Muntu w’eyibakishena naye, wekala naye mu muwa obe oso

Bena Kidishitu bobeshe muiyibakishi abatumbisha Yehowa, na mulume na mukashi abekalaa na muloo. (Mak 10:9) Bua kupeta eyibakishi adiyisha na di na muloo, abitungu’shi bena Kidishitu, bafubishe mayi a kulonda a mu Bible nsaa y’abasangula muntu a kuiyibakishena naye.

Bibuwa obangie kuiyilena na muntu kunyima kobe kukisha “kipungo kia buwa bua bu nsongua,” muanda kino kipungo akikala lukalo lui bukopo lua kuipetena na mulume sunga mukashi, kilombene kuntakula bua kuata kitshibilo ki bubi. (1Kod 7:36) Fubisha kipungo kiobe kiodi bukupi bua kunyingisha kipuano kiobe n’Efile Mukulu na kudima nyikasi ya bena Kidishitu. Paapa wekala na mushindo wa kukita bi bungi bua kobesha muiyibakishi diobe.

Kumpala kua’shi weyibakishene na muntu, ata nsaa ya kuuka “muntu a mund’eshimba mufuame.” (1Mp 3:4) Su bobanga kuialashena, esambe na muntu okiebe kuiyibakishena naye. Nka bu mu bukuku na bantu, muiyibakishi abitungu otule binangu biobe ku kiokakitshina muina dibaka nobe, pe kiakakukitshina. (Fid 2:3, 4) Su kumpala ku’eyibakishi otumikilaa mayi a kulonda a mu Bible, kunyima kua kuiyibakishena, okatungunuka na kukita nka biabia, na bino abinupa muloo.

TALA VIDEO AMBA’SHI ELUMBUULE BUA DIBAKA​—KIPINDI 3: “ELA MAKUMI BUA NFUALANGA AYITUNGU,” AKUPU NUALUULE INO NKONKO AYILONDO:

• Kuiyidishena kua mukuetu mukashi na Shane kubaadi akuende naminyi?

• Pababaadi abatungunuka na kuiyilena, kinyi kibaadi kimone mukuetu mukashi?

• Baledi baye abamukuashishe naminyi, na kitshibilo kinyi ki buwa kibaadi muate?