Nkonko ya bantu ababadikaa

Nyikashi i mu Beena-Ngalatea 5:22, 23 ndjo yooso ya ku “kikuba kya kikudi” su?

Ino verse ayitemuna penda ngikashi kitema: ‘Anka kikuba kya kikudi nyi kifulo, muloo, butaale, lwishinko, kalolo, buuwa, lukumiino, kupopeela, butontshi bwa mbidi.’ Tatumonanga’shi kikudi ky’Efile Mukulu ki kwitukwasha bwa kupeta penda ino ngikashi kitema ibuwa nya.

Lamina bifunde Mpoolo mu verse i kuunundu’shi: ‘Bikitshino bya mbidi . . . nyi mbino: lukyebanokyebano, [mianda] yi butete, bukitekite, lulangwilo lwa mankishi, malenganyi, kwikutwena, tuleo, mikao, suungu ikile, kwipikeena, kwitshibuula, bisaka bisaka, biutu, kwipayisheena, bunkolwenkolwe bwa malofu, budiafi, na yingi mianda yi biabia.’ (Nga. 5:19-21) Mpoolo badya kutemuna bingi “bikitshino bya mbidi” bu bino bi mu Beena-Kolose 3:5. Mu mushindo umune, kunyima kwaye kutemuna ngikashi kitema ibuwa, baadi mukumbashe’shi: “Takwi mwiiya wikutweene na bintu bi biabia nya.” Mpoolo ta mutemune ngikashi yoso ibuwa yatudi balombene kupeta kubukwashi bwa kikudi kiselele.

Atupusha bino nsaa y’atupwandikisha kikuba kya kikudi na kikuba ky’etaata kibaadi Mpoolo mufundjile kakongye ka Beena-Efeso’shi: “Kikuba ky’etaata naamu nyi nkalolo, bululame, biinyibiinyi.” (Ef. 5: 8, 9) Eyendo’shi “kalolo” pamune na bululame na binyibinyi nyi kipindji kya ku “kikuba ky’etaata.” na dingi, nyi kipindji kya ku “kikuba kya kikudi.” Mwanda, sunga Mpoolo ta mutemune ‘bululame na binyibinyi’ mu Beena-Ngalatea 5:22, 23, baadi nka mulombene kwibitemuna.

Mu mushindo umune, Mpoolo baadi munyingishe Timote bwadya ‘kukimba bululame, [kulamata Efile Mukulu], lukumiino, kifulo, kunyingiila, kupopeela’​—ngikashi isamombo ibuwa. (1 Tim. 6:11) Nka penda nyikashi isatu (lukumiino, kifulo, na kupopeela) dyo imune ya ku “kikuba kya kikudi.” Timote baadi dingi na lukalo lwa bukwashi bwa kikudi bwa kudjima ingi ngikashi yabadi batemune bu: “Bululame, kulamata Efile Mukulu, kunyingiila.”​—pwandjikisha na Beena-Kolose 3:12; 2 Mpyeele 1:5-7.

Byabya mukanda wa Beena-Ngalatea 5:22, 23 tautemuna ngikashi yoso ayitungu’shi bena Kidishitu badjime nya. Kikudi ky’Efile Mukulu ki kwitukwasha bwa kudjima ngikashi yabadi batemune bu “kikuba kya kikudi.” Anka, kwi ngikashi ibungi ayitungu’shi tudjime bwa kunyinga mu kikudi na ‘kufwala muntu mupya mupangiibwe ku kifwatulo ky’Efile Mukulu, mu kululama na bulamate bw’eyendo.’​—Ef. 4:24.