Nfudilo ayikafiki mafuku kinyi? Bibakuile Yesu

TALULA MIANDA IBIDI IBAKUILE YESU PABITALE NFUDILO:

“Byaabya buulaayi meeso, mwanda taanuuku efuku sunga nguba.”​—MATEO 25:13.

“Dimukaayi, shaalaayi babuule meeso mwanda taanuuku’shi nguba kinyi akumbana kyaakya kipungo.”​—MAAKO 13:33.

Biabia takui muntu su ngumune pano pa nsenga auku binyibinyi nsaa ayikafiki nfudilo. Anka, Efile Mukulu mmutshibe “kipungo” kuamba’shi “efuku na nsaa” ayikafiki nfudilo. (Mateo 24:36) Bino abilesha’shi takui mushindo wa kuuka su nfudilo tayidi pepi? Tabi biabia nya. Yesu balunguile balongi baye buabadia kutala mianda ibungi ibadia kulesha’shi nfudilo tayidi pepi.

KITUNDUILO

Yaya mianda ibadi na kia kuikala bu kitunduilo kia ‘nfudilo a uno ndumbuluilo.’ Yesu bambile’shi: ‘Milo aikebwela ingi milo ngoshi, mafumu aakebwela angi mafumu ngoshi. Akukekala bipupa bya nsala na kutshikatshinka kwa nsenga mu mambalo elekenelekene.’ (Mateo 24:3, 7, EMM) Bambile dingi’shi akukekala “bipupa bya mikumbo.” (Luka 21:11) Okuete kumona mianda ibatemukile Yesu su?

Lelo uno, bantu bakuete kukienga muanda wa ngoshi, nsala, kutshinkatshinka kua nsenga mpa na bipupa bikile bungi. Bu kileshesho, kutshinkatshinka kua nsenga kubadi kukitshikie mu 2004 mu Océan Indien kubadi kuushe mema abadi aipee bantu bafikie ku 225 000. Mund’a kipua kimune na kipindi, kipupa kiabetanyina bu COVID-19 nkiipee bantu bafikie ku midiyo 2,6. Yesu bambile’shi mianda i bino ibadi na kia kulesha’shi nfudilo a uno ndumbuluilo tadi pepi.

“MAFUKU A KU NFUDILO”

Bible aitanyina kipungo kia kumpala kua nfudilo bu “mafuku a ku nfudilo.” (2 Mpyeele 3:3, 4) 2 Timote 3:1-5 alesha’shi mu mafuku a ku nfudilo bantu abakekala na muikelo wi bubi. (Tala kashibo akamba’shi: “Kipungo kia kumpala kua nfudilo.”) Okuete kumona bantu beful’ebo banabene, be na luabi, bukielo na bashi na kifulo bua bangi su? Ino mianda yoso namu ailesha’shi tubefubuila ngofu pepi na nfudilo a uno ndumbuluilo.

Kipungo kia mafuku a ku nfudilo akikakitshi mafuku bungi kinyi? Bible amba’shi akikakitshi penda “mafuku apeela.” Akupu, Efile Mukulu akabutula ‘baba abalwisha nsenga.’​—Kibafumbwilwe 11:15-18; 12:12.

BINOBINO NSENGA AIKALA MPALADISO!

Efile Mukulu mmupue kutshiba efuku na nsaa yakafuisha nfudilo a uno ndumbuluilo a mianda e bubi. (Mateo 24:36) Ungi mukandu wibuwa ngua’shi Efile Mukulu “takumina’shi muntu su ngumune ashimine [kubutudibua].” (2 Mpyeele 3:9) Kuete kuetupa mushindo wa kulonga pabitale kikiebe ki’eshimba diaye na kumukokiela. Buakinyi? Muanda akumina’shi tupande ku nfudilo ya ino nsenga bua kuikala na muwa mu nsenga ipia aikafiki mpaladiso.

Efile Mukulu kuete kuitatshisha bua’shi bantu boso ba mu nsenga ishima balongieshibue bua’shi bamone bia nkatuela mu nsenga ipia ayikakunkushibua na Bufumu buaye. Yesu bakuile’shi mukandu wibuwa wa Bufumu bu’Efile Mukulu aukalungudibua “pa nsenga yoso yishaadibwe.” (Mateo 24:14, Kilombeno kipya 2014) Mu nsenga ishima, ba Temwe ba Yehowa abekalanga bakishe nsaa ikile pa midiyala ibidi mu 2019 bua kulungula bantu na kuibalongiesha mukandu wibuwa wa mu Bible awibapa lukulupilo. Yesu bakuile’shi uno mukandu wibuwa ubadi na kia kulungudibua mu nsenga ishima kumpala kua’shi nfudilo ifikie.

Kipungo kia kumunana kua bana ba bantu takidi ku nfudilo. Kadi mukandu wibuwa ngua’shi, we kupanda ku nfudilo kua uno ndumbuluilo na kutuela mu Mpaladiso pa nsenga badi Efile Mukulu mulee. Muisambo aulondo, aukalesha biodia kuikala na muwa mu nsenga ipia.