Matalwa enao bakulu mu kakongye

1. Bwakinyi kifuko kya Yehowa ki mu buumune?

TWI na muloo wa kwikala mu kifuko kya Yehowa. Bwakinyi mu kino kifuko mwi butaale na buumune? Kabingilo kamune nka’shi, oso akwatudi akitshi mwaye moso bwa kunemeka baba babadi bape matalwa kwi Yehowa. P’atupusha kalolo mudimo wabo, atunyisha kunyingisha buumune bwetu.

2. Nkonko kinyi y’atwalula mu uno mwisambo?

² Mu uno mwisambo, atwisambila baba be na matalwa mu kakongye. Dingi atwalula ku ino nkonko: Bakwetu bakashi be na mudimo kinyi mu kakongye? Mukwetu mulume oso, ena matalwa kwi mukwetu mukashi oso mu kakongye su? Bakulu be na matalwa kwi bakwetu balume na bakashi mu kakongye bu bi nao mfumu a kifuko kwi mukashi na bana baye su? Binobino, tutaluleyi byatudi balombene kumona bakwetu bakashi.

MUSHINDO KINYI WATUDYA KUMONA BAKWETU BAKASHI?

3. Nkinyi akinyisha kwitutakula bwa kwikala na lutumbu bwa mudimo aukitshi bakwetu bakashi?

³ Atusankilaa bakwetu bakashi abafubu ngofu bwa kupasukila bifuko byabo, kulungula mukandu wibuwa na kukwatshishena kakongye. Atunyisha kulesha lutumbu bwa byabakitshi p’atunangushena ku mushindo awibamonaa Yehowa na Yesu. Atulongo dingi bya kukitshina bakwetu bakashi myanda, ku mushindo ubadi Mpoolo akitshina bakwabo bakashi myanda.

4. Mushindo kinyi aulesha Bible’shi Yehowa ataa bana bakashi na muulo nka bu bana balume?

⁴ Bible alesha’shi Yehowa ataa bana bakashi na muulo nka bu bana balume. Bu kileshesho, Bible alesha’shi mu siekele a kumpala, Yehowa badi mupe balume na bakashi kikudi kiselele na kwibapa bukome bwa kukita bilengyeleshi bu: kwakula ingi ndimi. (Bik. 2:1-4, 15-18) Boso bwabo, abadi bedibwe mwimu ku bukwashi bwa kikudi kiselele na abakamunana na Kidishitu. (Nga. 3:26-29) Balume na bakashi, abakapete efuto dya kwikala na muwa wa loso pa nsenga. (Kibaf. 7:9, 10, 13-15) Na boso bwabo mbapebwe mudimo wa kulungula na kulongyesha mukandu wibuwa. (Mat. 28:19, 20) Bu kileshesho, mukanda wa Bikitshino awisambila mukwetu mukashi abetamina bu Prisile. Aye na mulume aye Akila abadi bapatulwile Apolose bya binyinyi mu mushindo utokane, aye muntu badi mulongye kalolo.​—Bik. 18:24-26.

5. Mukanda wa Luka 10:38, 39, 42, aulesha naminyi’shi Yesu badi anemeka bana bakashi?

⁵ Yesu badi anemeka bana bakashi. Ta badi mwambule kileshesho kya bafadise, abadi abapwandikisha’shi bana bakashi mbashadile, na’shi ta be kwisamba nabo pe bantu be bungi sunga kwisamba nabo myanda i mu bifundwe. Anka, Yesu badi esamba na bana bakashi myanda ya mu kikudi nka bu bi badi esamba na bana balume.b (Badika Luka 10:38, 39, 42.) Badi ende na bangi bana bakashi mu kulungula mukandu wibuwa. (Luk. 8:1-3) Badi mwibape kinemo kya nkalungula batumiibwa baye’shi, basanguka.​—Yo. 20:16-18.

6. Mushindo kinyi ubadi Mpoolo muleshe’shi anemeka bana bakashi?

⁶ Mpoolo mutumiibwa badi mutentekyeshe Timote bwadya kunemeka bana bakashi. Mpoolo badi mumulungule bwa kumona ‘bakashi bakulu bu ba nyin’aye’ na ‘basongwakashi bu ba nkashan’aye.’ (1 Tim. 5:1, 2) Mpoolo badi mukite mwaye moso bwa kukwasha Timote bwa’shi ekale munyingye mu kikudi, anka badi auku’shi, nyin’aye na Timote na nyina’aye-kulu nyi ababadidile kumulongyesha bifundwe biselele. (2 Tim. 1:5; 3:14, 15) Mu mukanda ubadi mufundile kakongye ka mu Loma, Mpoolo badi mwimune na mutemune bakwetu bakashi mu mashina abo. Mpoolo badi mumone bibadi bikite bano bakwetu bakashi na badi muleshe lutumbu bwa mudimo wabo wi buwa ubabadi bakite.​—Lom. 16:1-4, 6, 12; Fid. 4:3.

7. Nkonko kinyi itatwalula binobino?

⁷ Nka bu byatubebimono mu bikoso bi bashala, ta kwi kifundwe su nkimune akilesha’shi, bakwetu bakashi mbashadile pe bakwetu balume. Bakwetu bakashi basha kifulo na kalolo, bakwete kukwasha kakongye ngofu, na bakulu mbebakulupile p’abakwasha bwa kulama buumune na butaale mu kakongye. Byabya, twaluleyi ingi nkonko: Bwa kinyi Yehowa atekye bakwetu bakashi bwabadya kwibwikila ku mutwe ingi nsaa? Bu byabidi’shi, penda bakwetu balume abatulwa bu bakulu na bafubi ba midimu mu kakongye, bino abipushisha’shi mukwetu mulume oso ena matalwa kwi mukwetu mukashi oso mu kakongye su?

MUKWETU MULUME OSO ENA MATALWA KWI MUKWETU MUKASHI OSO MU KAKONGYE SU?

8. Muyile Bena-Efeso 5:23, mukwetu mulume oso ena matalwa kwi mukwetu mukashi oso mu kakongye su? Patuula.

⁸ Mukwetu mulume oso ena matalwa kwi mukwetu mukashi oso mu kakongye su? Nya! Anka Kidishitu. (Badika Bena-Efeso 5:23.) Mu kifuko, mulune ndyo mfumu a mukashi. Mwana mulume sunga ekala mubatshishibwe, ta mfumu a nyin’aye. (Ef. 6:1, 2) Mu kakongye, matalwa a bakulu kwi bakwetu bakashi na balume, ena mikalo. (1 Tes. 5:12; Eb. 13:17) Bakwetu bakashi baki bukupi, bashi’ki bashale na baledi babo abatununguka nka na kwibanemeka, na kunemeka bakulu mu kakongye. Anka, nka bu bakwetu balume mu kakongye, nabo namu be na penda mfumu umune, Yesu.

9. Bwakinyi abitungu’shi ingi nsaa bakwetu bakashi bebwikile ku mutwe?

⁹ Eyendo’shi, Yehowa mutule bakwetu balume bwa kukunkusha kakongye, matalwa a shi mupe bakwetu bakashi. (1 Tim. 2:12) Bwakinyi? Bwa kabingilo kamune kadi mutule Yesu bu mfumu a mulume​—bwa’shi kakongye kekale kalumbulwe. Pa mwanda wa kabingilo kampanda, bikutunga’shi mukwetu mukashi akite mudimo aukitaa bakwetu balume, yaya nsaa Yehowa amutekye bwa’shi ebwikile ku mutwe.c (1 Kod. 11:4-7) Yehowa ebatekye bwa kukita bino, ta mpa mwanda wa’shi mbashadile, anka ebapa mushindo wa kulesha kanemo ku mayi a kulonda pabitale matalwa a kukunkusha adi mutule. Na ino myanda mu binangu, twaluleyi ku luno lukonko: Matalwa kinyi enao ba mfumu ba bifuko na enao bakulu mu kakongye?

MATALWA ENAO BA MFUMU BA BIFUKO NA BAKULU

10. Bwakinyi ingi nsaa mukulu, ekwelela kakongye miiya?

¹⁰ Bakulu mbafule Kidishitu na “mikooko” yabadi bebape kwi Yehowa na Kidishitu bwa kwiyipasukila. (Yo. 21:15-17) Bu bi mukulu apasukila be mu kakongye, ekupwandjikisha’shi bu bi nshe-bana na matalwa kwi kifuko kyaye, naye namu ena matalwa kwi kakongye. Ekupwandjikisha’shi bu bi mfumu a kifuko ena matalwa a kwelela kifuko kyaye miiya bwa kwikikalwila, naye namu ena matalwa akwela miiya bwa kukalwila mikooko y’Efile Mukulu. Na bangi bakwetu balume na bakashi be kwikasha bakulu bu ba mfumu babo ba mu kikudi, pa kwibatekanga bwa’shi bebatshile bitshibilo. Byabya, bakulu mu kakongye na ba mfumu ba bifuko bena matalwa e mumune su?

11. Mu mushindo kinyi mwikale matalwa enao ba mfumu ba bifuko na bakulu mumune?

¹¹ Mutumiibwa Mpoolo alesha’shi, ba mfumu ba bifuko na bakulu mu kakongye be na matalwa e mumune mu ingi myanda. (1 Tim. 3:4, 5) Bu kileshesho, Yehowa akumina’shi bena kifuko bakokyela mfumu a kifuko. (Kol. 3:20) Na akumina’shi, bena kakongye bakokyele bakulu. Yehowa atengyela’shi ba mfumu boso na bakulu boso bapasukile nkalo ya mu kikudi ya baba be ku matalwa abo. Na’shi, bepushe bu bafudibwe. Nka bu ba mfumu ba bifuko be buwa, abitungu bakulu bashinkamishe’shi boso be ku matalwa abo, abapete bukwashi nsaa yabadi na nkalakashi. (Shak. 2:15-17) Na dingi ebadimusha’shi ‘ta mbalombene kusambuka mudyanyino wa badi bele kwi bifundwe.’​—1 Kod. 4:6, EEM.

12-13. Muyile Bena-Looma 7:2, nkwilekena kinyi kwi pankatshi pa mudimo wi nao ba mfumu ba bifuko na bakulu mu kakongye?

¹² Anka, kwi kwilekena kukata pankatshi pa mudimo wi nao bakulu na ba mfumu ba bifuko. Bu kileshesho, Yehowa mupe bakulu mudimo wa bu nsushi, na dingi mwibape matalwa akutusha ba nkitshishi ba bubi bash’abelanga mu kakongye.​—1 Kod. 5:11-13.

¹³ Ku lungi lupese, Yehowa mupe ba mfumu ba bifuko matalwa a shi mupe bakulu. Bu kileshesho, mwi bape matalwa a kwelela bena bifuko byabo miiya na kushinkamisha’shi abeyitumikila. (Badika Bena-Looma 7:2.) Bu kileshesho, mfumu a kifuko ena matalwa akutshibila bana baye nsaa yabadya kwalukila ku nshibo. Na dingi, ena matalwa a kwibanyoka su bapela kukokyela ku wawa mwiya. (Ef. 6:1) Eyondo’shi mfumu a kifuko sha kifulo esamba na mukashi aye kumpala kwa kwelela kifuko kyaye mwiya, mwanda bubidi bwabo be “mbidi imunenka.”d​—Mat. 19:6.

NEMEKA KIDISHITU MWANDA AYE NYI MFUMU A KAKONGYE

14. (a) Muyile Maako 10:45, bwakinyi Yehowa musangule Yesu bu mfumu a kakongye? (b) Mudimo kinyi wi nao Kasaka ka Bakunkushi-Bakulu? (Tala kashibo akamba’shi: “Mudimo wa Kasaka ka Bakunkushi-Bakulu.”)

¹⁴ Ku bukwashi bwa nkuulo, Yehowa mmule muwa wa muntu oso mu kakongye, mpa na wa yawa oso alesha lukumino mwi Yesu. (Badika Maako 10:45; Bik. 20:28; 1 Kod. 15:21, 22) Nyi bwakinyi badi musangule Yesu bu mfumu a kakongye, aye badi mutushe muwa waye bu nkuulo. Bu byadi mfumu, Yesu ena matalwa akwela miiya na kulondesha’shi muntu oso, kifuko kyoso mpa na kakongye koso, abeyitumikila. (Nga. 6:2) Yesu ta mwimene nka penda pakwela miiya nya. Kwete kwitudisha na mufule oso a kwatudi.​—Ef. 5:29.

15-16. Bolongyela kinyi ku mayi a mukwetu mukashi Marley na mukwetu mulume Benjamin?

¹⁵ Bakwetu bakashi abalesha’shi abanemeka Kidishitu, pa kulonda bukunkushi bwa bantu badi mutule bwa kwibapasukila. Bakwetu bakashi be bungi, abakumina mweneno a mukwetu mukashi Marley mushale mu États-Unis amba’shi: “N’ataa na muulo mbalo yandi nayo mu kifuko na mu kakongye. Nakitaa mwande moso bwa kunemeka matalwa abadi bape mulume ande na bakulu kwi Yehowa. Byabya, mulume ande na bakwetu mu kakongye mbabofwishe myanda, pabo kwikala abanemeka na kulesha lutumbu bwa bya nkwete kukita.”

¹⁶ Bakwetu balume abalesha’shi abapusha kalolo matalwa abadi bebape pa kunemeka bakwetu bakashi. Ungi mukwetu abetaminaa bu Benjamin, mushale mu Angleterre amba’shi: “Ne mulongye bi bungi ku myalulo ayitushaa bakwetu bakashi mu bisangilo, na ku mayele abo a bya kulongyesha na kukita mudimo wa bulungudi kalolo. Namono’shi mudimo wa bakwete kukita wi na muulo ngofu.”

17. Bwakinyi abitungu tukokyele mayi a kulonda pabitale matalwa?

¹⁷ Nsaa i boso mu kakongye​—balume, bakashi, ba mfumu ba bifuko na bakulu​—abapusha kalolo na kutumikila mayi a kulonda pabitale matalwa, kakongye koso akekala mu butaale. Na kintu ki na muulo ngofu, atutumbisha Nshetu sha kifulo e mwiyilu, Yehowa.​—Mis. 150:6.