Oukanga su?
Buakinyi bibaadi buwa bukile pabaadi Yehowa mukumiine’shi, bena Isaleele balambule makutshi na nkudimba bu milambu?
MU MUIYA, Yehowa baadi mukumiine bioso bibidi, nkudimba na makutshi bu mulambu. Tuno tooso tonyi tubidi tuilekeene, mbetuteemune pamune mu muiya pabitale milambu na babaadi abetushintula, su tue na ekutshi otuusha nkudimba. (Lv. 1:14; 12:8; 14:30) Buakinyi bino bibaadi buwa bukile? Kabingilo kamune nka’shi, makutshi ta abaadi bumuekiemuekie nya. Buakinyi ta abaadi bumuekiemuekie?
Ekutshi
Makutshi, ntonyi tubaadi atufiluka, tuendanga mu kushaala mu nsenga ya bena Isaleele kipungo kia kibobo. Mu mueshi ooso w’ekumi, makutshi abaadi aafiluka endanga mu maumbo e kibobo, e kuushi ku’eumbo dia Isaleele bua nkaluka nka mu kipungo kia printemps, (kipungo kipushene na mueshi wa kananka.) (Ll. 2:11, 12; Yel. 8:7) Bino abilesha’shi, mu mafuku a kala bibaadi bukopo bua bena Isaleele kutuusha makutshi bu mulambu mu kipongo kia hiver.
Nkudimba
Ku lungi lupese namu, nkudimba tayibaadi ayifiluka nya, bibaadi bibofule bua kuiyipeta kipua kioso mu Isaleele. Na muanda wi na muulo ukata, nkudimba babaadi abeyimunu paasha. (Puandikisha na Yowano 2:14, 16.) Muyile ungi mukanda, awisambila pabitale mitshi na nyema biabadi bateemune mu Bible aulesha’shi: “Mu bibundi bioso bikata na bipeela bia mu Palestine, babaadi bamune nkudimba. Muntu ooso sha nshibo, baadi na kashibo ka nkudimba, sunga’shi baadi atubula ka kibelo ka nkudimba ku mudimba bua’shi, nkudimba ishalele muamua.”—Puandikisha na Yeeshaya 60:8.
Nkudimba mushaale mu kashibo kaye
Pabaadi Yehowa mukumiine milambu ya tuno tonyi, tua bipaso bibidi bilekeene tubaadi tubofuile bena Isaleele kupeta ku kipua kioso, baadi muleshe’shi e na kifulo, na e na nkatshinkatshi.