Banambutuile​—Kuashayi bana benu buabadia kufula Yehowa

1-2. Patuula mushindo ulombene mayi a kulonda kuikadika na muulo ukata kuatudi nsaa ayishintuluka nshalelo eetu.

EFUKU di’eyibakishi diabo, mulume na mukashi abakiebe kuiyibakishena abekalaa buwa bukile, na abapushaa buwa bua kuteemesha muisambo wa mu Bible awakuila pabitale eyibakishi. Mayi a kulonda abesambilaa mu wawa muisambo, t’aekalaa enyi kuabadi nya. Anka diadi’efuku, bino bioso Bifundue abikalaa na muulo ukata kuabadi. Bua kinyi? Muanda abebitumikila muiyibakishi diabo.

² Bi mumune nsaa ayifiki bena Kidishitu beyibakishene, bu banambutuile. Munda a bipua bi bungi, abapushaa miisambo i bungi ayakuila bia kukusha bana. Anka binobino, aa ooso malango abafiki na muulo ukile kuabadi. Abakealungula muana aabo’bo banabene. Nyi mbushito bukata! Mu binyibinyi, nshalelo mupia ashintulaa mpushisho eetu a kiukilo ki buwa kia mayi a kulonda a mu Bible. Kano ngi kabingilo kamune ka bua kinyi balanguidi ba Yehowa ababadikaa Bifundue, na nka bu bibaabadi balungule bamfumu ba mu Isaleele bua kuibikita, na kunangushena ku bianka “mafuku ooso” a miuwa yabo.​—Miy. 17:19.

3. Nkinyi ki’atuisambila mu uno muisambo?

³ Banambutuile, nui na kingi kineemo kia ku bineemo bikata bi nabio bena Kidishitu, nyi nkineemo kia kulongiesha bana benu pabitale Yehowa. Anukumiina kuibikita ngofu nsaa y’anuibalongiesha mianda kampanda pabitale Efile Mukulu eetu. Anukumiina kukuasha bana benu buabadia kumufula ngofu. Nkinyi kianudi balombene kukita bua kukuasha bana benu bafule Yehowa? Mu uno muisambo, atuisambila mayi a kulonda a mu Bible ananka alombene kuinukuasha bu bianudi banambutuile. (2 Tim. 3:16) Atukamono dingi mushindo wi bangi banambutuile bena Kidishitu, mbakuashibue p’abo kutumikila malango a mu Bible.

MAYI A KULONDA ANANKA ALOMBENE KUKUASHA BANAMBUTUILE

4. Eyi kinyi dimune dia kulonda dilombene kukuasha banambutuile buabadia kukuasha bana baabo bua’shi bafule Yehowa mu mashimba aabo? (Shake 1:5)

⁴ Eyi dia kulonda 1: Kimba bukunkushi bua Yehowa. Teka Yehowa akupe binangu biodi nabio lukalo, bua kukuasha bana boobe bua’shi batamishe kifulo kuadi. (Badika Shake 1:5.) Aye ngi muntu mulombane bua kutusha malango. Kui tubingilo tui bungi tua bua kinyi atuakula bino. Tubandeyi kutala tubidi. Ka kumpala, Yehowa e na kiukilo kikata kia kuikadika bu nambutuile. (Mis. 36:9) Ka kabidi, elango dia binangu di’etupeyaa aditukuashaa nsaa yoso.​—Yesh. 48:17.

5. (a) Ndumbuluilo a Yehowa kuete atusha bintu kinyi bua kukuasha banambutuile? (b) Nka bu biabadi balesha mu vedeo, nkinyi kibanulongiela ku mushindo wi mukuetu mulume na mukuetu mukashi Amorim bakushe bana baabo?

⁵ Kukiila kuiyi diaye na ndumbuluilo aaye, Yehowa kuete atusha bidibua bi bungi bia mu kikudi abitukila mu Bible, bilombene kuinukuasha bua kukusha bana benu na buabadia kufula Yehowa. (Mat. 24:45) Bu kileshesho, nui balombene kupeta malango e buwa e mu miisambo ayamba’shi “Bukwashi bwa bifuko,” itayibapuile kutuka munda a bipua bi bungi mu ma Réveillez-vous! Na mu Kitenta kia Mulami, bikuete kutuka lelo uno na mu site eetu a jw.org. Dingi, ma video e bungi e mu jw.org a kuela bantu nkonko na a drame, ngalombene kukuasha banambutuile buabadia kutumikila elango dia Yehowa, bu biabakuete kukusha bana baabo.b​—Nki. 2:4-6.

6. Mmushindo kinyi aupushaa ungi nshe bana na mukashi aaye pabitale bukunkushi buabapetaa kukiila kui ndumbuluilo a Yehowa?

⁶ Banambutuile be bungi, be na lutumbu lukata bua bukuashi buabakuete kutusha kui Yehowa kukiila kui ndumbuluilo aaye. Ungi nshe bana abetanyina bu Joe amba’shi: “Kukusha bana basatu mu bia binyibinyi, ta mudimo ubofulole nya. Ami na mukashi ande, atutekaa Yehowa bukuashi misuusa yoso. Na atupushaa ke bungi’shi muisambo na video, abifikaa pa nsaa ilombane bua kuitukuasha bua’shi tunyingiile ku muanda wetu watudi nao. Kukimbanga bukunkushi bua Yehowa ngi kupashibua kuetu.” Joe na mukashi aaye mbasangane’shi miisambo i bungi na ma video, bikuete kukuashanga bana baabo buabadia kuifubuila kui Yehowa.

7. Bua kinyi bi na muulo bua banambutuile kukita muabo mooso bua’shi balekie kileshesho ki buwa kui bana baabo? (Bena-Looma 2:21)

⁷ Eyi dia kulonda 2: Longiesha pa kuikala kileshesho ki buwa. Bana ababandilaa baledi baabo ngofu na abebambulaa ke bungi. Sunga mbiabia, ta kui nambutuile mupuikie nya. (Lom. 3:23) Kadi sunga mbiabia, banambutuile be na binangu, abekitshishaa muabo mooso buabadia kulekiela bana baabo kileshesho ki buwa. (Badika Bena-Looma 2:21.) Kuisamba bua bana, ungi nshe bana bambile’shi: “Bana be nka bu enyuka adikakaa kintu kioso.” Bambile dingi’shi: “Abetulungulaa nsaa ish’ayipushena kileshesho kietu na ki’atutompo kuibalongiesha.” Su atukumiina’shi bana betu bafule Yehowa, abitungu kifulo kietu’tue banabene bua aye kikale kinyingie na kimuekie patooka.

8-9. Nkinyi kibolongo ku mayi abadi bakule kui Andrew na Emma?

⁸ Kui mishindo i bungi ilombene banambutuile kulongiesha bana baabo bua kufula Yehowa. Ungi mukuetu mulume e na bipua 17 abetanyina bu Andrew bakuile’shi: “Baledi bande babaadi abandongiesha nsaa yoso’shi bi na muulo bua kutekanga. Bufuku booso papa baadi atekie n’ami, sunga ntshinaadi muilumbuule buandia kuela luande luteko. Baledi bande, babaadi abetutentekiesha nsaa yoso’shi: ‘Nui balombene kuisamba na Yehowa misuusa i bungi yaya y’anukumiina.’ Kuno kundongiesha kua kuteka, nkuikadikie na bukitshishi bukata kuandi, binobino ntandi natekaa Yehowa kalolo na namumonaa bu Nshami sha kifulo.” Banambutuile, tanukumanga kubepuula bukitshishi bukata bui nabo, kifulo kienu’nue banabene bua Yehowa kui bana benu.

⁹ Tutaluuleyi dingi kileshesho kia Emma. Nsaa ibaadi nshaye musumbushene kifuko, balekiele nyinaye na mabaasa e bungi. Emma amba’shi: “Kubaadi misuusa i bungi ibaadi mama mukutue makuta, kadi baadi nka akula pabitale Yehowa bi’apasukilaa bafubi baye na kuibalombesha nkalo. Ne mumone bi lukumiino lua mama mu nshalelo aaye. Mama atumikilaa kiakia ki’alongiesha.” Dilongiesha, banambutuile nui balombene kulongiesha kukiila ku bileshesho sunga nuekadika mu nshalelo e bukopo.​—Nga. 6:9.

10. Mmishindo kinyi ibaadi nayo banambutuile ba mu Isaleele bua kuisamba na bana baabo? (Miiya Ikituulwe 6:6, 7)

¹⁰ Eyi dia kulonda 3: Esambe na bana boobe nsaa yoso. Yehowa baadi mulungule bakulu ba mu Isaleele, buabadia kulongiesha bana baabo pabimutale nsaa yoso. (Badika Miiya Ikituulwe 6:6, 7.) Booso banambutuile, be na mishindo i bungi kuifuku yabadia kuisamba na bana baabo, na kuibakuasha buabadia kufula Yehowa mu mashimba aabo. Bu kileshesho, nsongualume a mu Isaleele, baadi mulombene kukisha nsaa i bungi na nshaye mu kuwumbula kua biumbuluanga na kuibituala. Nsonguakashi namu, baadi mulombene kukisha nsaa i bungi na nyinaye kuifuku, mu kutela bilamba, mu kuanya nyene, na mu kukita ingi midimo ya mu nshibo. Bu bi banambutuile abafubu pamune na bana, mbalombene kuisamba miisambo i bungi i na muulo. Bu kileshesho, mbalombene kuisambila pabitale ngikashi ya Yehowa ya kalolo na kutaluula mushindo wa kuete kukuashanga kifuko.

11. Banambutuile bena Kidishitu be na mushindo kinyi umune wa kuisamba na bana baabo?

¹¹ Lelo uno, nshalelo mmuilekeene na akala. Mu maumbo e bungi, banambutuile na bana ta mbalombene kukisha nsaa pamune muifuku nya. Banambutuile be kuikadika pangi ku mudimo, na bana namu be kuikadika pangi ku kalasa. Biabia, abitungu banambutuile bekitshishe bua kupeta nsaa, yabadi balombene kuisamba na bana baabo. (Ef. 5:15, 16; Fid. 1:10) Lulanguilo lua mu kifuko ngumune wa ku mishindo ya kuibikita. Ungi mukuetu nsongualume abetanyinaa bu Alexander amba’shi: “Nshami baadi aata mpango nsaa yoso bua kukita lulanguilo lua mu kifuko, na ta baadi atadiila kintu su nkimune bua’shi kitukutshishue ino nsaa y’atuikala pamune nya. Kunyima kua kulonga, atubangaa kuisamba mianda i na muulo kuatudi.”

12. Nkinyi akitungu’shi mfumu a kifuko alame mu binangu nsaa y’abakitshi lulanguilo lua mu kifuko?

¹² Su we mfumu a kifuko, nkinyi kiodi mulombene kukita bua’shi lulanguilo lua mu kifuko lusankishe bana boobe? Bua kinyi ta nuakulonga na bana benu mukanda wetu wi buwa upia ubatuku, wa We kuikala na muloo bua loso! Kuno kulonga, akuinupa mushindo wi buwa bukile wa kuisamba mianda ya mu nshalelo. Anukumiinaa’shi bana benu benulungule pabitale bi’abapusha na mianda ibatale. Biabia, ta nukumanga kufubisha nsaa ya lulanguilo lua mu kifuko, bu ya kuakula bana benu bi bubi sunga kuibatubuila bilema biabo. Na ta nukumanga kufiita munda, su bana benu abakula bishi buwa na bishi bipushene na abiakula Bible. Biabia, nuikadikie anuibatumbula bu bibaabakula bia binyibinyi pabitale biabapusha, na nuibanyingishe buabadia kuikadika na bulungantu buabadia kuakula abo banabene. Nui balombene kukuasha bana benu kalolo nka su nubauuku bi’abapusha kalolo.

13. Ngingi mishindo kinyi i nayo banambutuile bua kukuasha bana baabo bua’shi befubuile kui Yehowa?

¹³ Banambutuile, kimbayi mishindo muifuku yanudi balombene kukuasha bana benu bua’shi befubuile kui Yehowa. Ta nui balombene kutengiela nka nsaa ya kulonga Bible bua’shi nuibalongieshe pabitale Efile Mukulu eetu sha kifulo nya. Talayi kibakuile ungi nyina bana abetanyinaa bu Lisa: “Tui bafubishe kipangua kioso ki patudi, bua kulongiesha bana betu pabitale Yehowa. Bu kileshesho, nsaa i mbua eetu akitshi kintu kampanda akisepesha bana betu, atuibalungulaa’shi uno ngi mushindo aulesha’shi Yehowa, nyi Efile Mukulu sha muloo na mmuituikashe bino buatudia kuikadika na muloo na bua kusangeela bintu bi buwa.

14. Bua kinyi bi na muulo bua banambutuile kukuasha bana baabo buabadia kusangula bakuuku na binangu? (Nkindji 13:20)

¹⁴ Eyi dia kulonda 4: Kuashayi bana benu buabadia kusangula bakuuku be buwa. Eyi di’Efile Mukulu adibipushisha kalolo’shi, bakuuku betu be na bukitshi kuatudi bui buwa sunga bui bubi. (Badika Nkindji 13:20.) Banambutuile, anuuku bakuuku ba bana benu? Wemonenaa nabo na kukisha nabo nsaa pamune? Nkinyi kianudi balombene kukita bua kukuasha bana benu bua’shi bapete bakuuku bafule Yehowa? (1 Kod. 15:33) Nui balombene kukuasha bana benu buabadia kusangula bakuuku be buwa, pa kuitanyina bangi bakuetu banyingie mu kikudi, buabadia kufuba nenu ingi midimo yenu ya mu kifuko.​—Mis. 119:63.

15. Nkinyi kilombene banambutuile kukita bua kukuasha bana baabo bua’shi basangule bakuuku be buwa?

¹⁵ Tubandeyi kutala muanda ubabamuene kui ungi nshe muana abetanyinaa bu Tony. Apatuula kiabadi bakite aye na mukashi aaye, bua kukuasha bana baabo buabadia kusangula bakuuku be buwa: “Munda a bipua bikile, ami na mukashi ande, tubaadi betanyine bakuetu balume na bakashi be na bipua bilekeene na bakudile mu ma mbalo elekeene ku nshibo yetu. Tubaadi abadi nabo bidibua pamune na kukita nabo lulanguilo lua mu kifuko. Uno ngi mushindo wi buwa wa kuiukeena na baaba booso bafule Yehowa na abamufubila na muloo. Tui bapete miabi i bungi ya kuikadika na bakunkushi ba bifunda, na ba misionere, na bangi bakuetu bashaale mu nshebo yetu. Kiukilo kiabo, na kisumi kiabo, na kikudi kiabo kia kuipaana, bibaadi na bukitshishi bukata kui bana betu, na mbibakuashe buabadia kuifubuila kui Yehowa.” Banambutuile, ikadikayi na kitshibilo kia kukuasha bana benu buabadia kuikala na bakuuku be buwa.

TOLEKANGA KUKULUPILA!

16. Bi kuikala naminyi su muana oobe amba’shi t’akumiina kufubila Yehowa?

¹⁶ Bi kuikala naminyi su mu kuakua kooso kuikitshisha koobe, umune a ku bana boobe akula’shi t’akumiina kufubila Yehowa? Tuambanga’shi bokambilua kukita mudimo oobe wa bu nambutuile nya. Yehowa mmuitupe booso mpaa na muana oobe kia buntu kia kuisanguila, ngobesha ya kusangula’shi atukumiina kufubila Efile Mukulu sunga’shi t’atukumiina kumufubila. Su muana oobe baata kitshibilo kia kupela kufubila Yehowa, tolekanga kukulupila’shi dingi efuku analukiile kuadi. Tentekiesha kileshesho kia muana mushimine. (Luk. 15:11-19, 22-24) Yawa nsongualume baadi mupambukie enda kula n’eshinda dia kululama, anka ku mfudiilo baadi mualukie. “Kino kibaadi kileshesho bisumanga,” kadi bangi mbalombene kuamba’shi: “Nkilombene kukitshika mu nshalelo a binyibinyi?” Mu binyibinyi, ki kukitshika! Na dingi, ngi bibaadi bimone ungi nsongualume abetanyina bu Elie.

17. Muanda wabadi bamone kui Elie aukunyingisha mushindo kinyi?

¹⁷ Elie amba bino pabitale baledi baye: “Babaadi abekitshisha muabo mooso buabadia kunkuasha bua’shi mfule Yehowa, n’Eyi diaye Bible. Biabia, ami ki mu bipua ekumi, nabangile bu ntomboshi.” Elie babangile kuikadika na nshalelo a mapala abidi, na baadi asumbushena kuikitshisha kooso kua baledi baye, kubaabadi abamukuasha mu mianda ya mu kikudi. Kunyima kuaye kukatuka ku nshibo, babangile muikelo wi bubi bukile. Sunga mbiabia, ingi nsaa baadi esamba pabitale Bible na umune a ku bakuuku baye. Elie baadi mumone’shi: “Pangakula bibungi pabitale Yehowa na kuuku ande, nasangana’shi abinkuasha ami nabene ngofu bua kunangushena pabitale Yehowa. Ku kapeelakapeela, mbio ya bia binyibinyi bia mu Bible ibaadi iuule mbaa muishimba diande mbio ibaabadi bakune muishimba diande ibabangile kukula.” Muenda mafuku, Elie balukiile mu bia binyibinyi.c Banda kunangushena muloo ubaadi nao baledi baye, babaadi abekitshisha bua kumulongiesha aye ki muana mukinga bia binyibinyi bua kufula Yehowa!​—2 Tim. 3:14, 15.

18. Wepushaa naminyi pabitale banambutuile bakuete kuikitshisha bua kulongiesha bana baabo bua kufula Yehowa?

¹⁸ Banambutuile, Yehowa mmuinupe bia buntu bi buwa, bua kukusha kipungo kipia kia balanguidi ba Yehowa. (Mis. 78:4-6) Uno ta mmudimo upeela nya, na atuinutekie buanudia kuiwata n’eshimba dienu dioso buanudia kuikitshisha bua kukuasha bana benu! Su nubatungunuka na kuikitshisha buanudia kukuasha bana benu, bua’shi bafule Yehowa na kuibakusha muyile mayi aaye a kulonda na kumukookiela, nui balombene kushinkamisha’shi Nshetu sha kifulo e muiyilu akasangala.​—Ef. 6:4.