We kuikala na muloo wa binyibinyi

1. ‘Lukalo luetu lua mu kikudi’ nkinyi, na mushindo kinyi waludi lulombene kuituikasha na muloo?

MULOO wa binyibinyi, ta ndisanka diatupushaa bua kapindi kapeela, akupu ditukatukie nya. Ngulombene kushadidiila mu nshalelo ooso a muntu. Mmushindo kinyi? Yesu baadi mupatuule mu muisambo waye wa pa muengie’shi: ‘Basha mulo, mbaba abashinguula lukalo luabo lua kuuka Efile Mukulu.’ (Mat. 5:3, EEM) Yesu baadi muukie’shi bantu abekala na lukalo lukata lua kuiuka na kulanguila Mupangi aabo Yehowa Efile Mukulu. Nyi nkuamba’shi “lukalo luetu lua mu kikudi.” Na bu bi Yehowa mmuikale Efile Mukulu a muloo, na booso abamulanguila namu, mbalombene’nyi kuikala nao.​—1 Tim. 1:11, Kilombeeno Kipya 2014.

2-3. (a) Muyile Yesu, mbantu kinyi balombene kuikala na muloo? (b) Nkinyi ki’atuisambila mu uno muisambo na buakinyi tui na lukalo na ino mianda isatu?

² Tui balombene kuikala na muloo nka penda nsaa yatushi na muanda su ngumune mu nshalelo eetu? Nya. Mu muisambo waye wa pa muengie, Yesu bakuile kingi kintu kibaadi akikanyisha. “Baaba bakuete kudila maalo” pangi pa muanda wa kutondekua kuishimba na miluisho yabo, sunga pa muanda wa mianda ayibenyongosha ya bakuete kufumankana nayo mu nshalelo aabo, mbalombene kuikala na muloo. Yesu bakuile uno mmuanda umune bua “baaba ababingwabingwa pa muanda wa kululama” sunga bua baaba bakuete kukienga pa muanda wa “kukayibua” muanda’shi abalondo Kidishitu. (Mat. 5:4, 10, 11, Kilombeeno Kipya 2014) Bi kuitubofuila bua kuikala na muloo wa binyibinyi mu ino mianda mushindo kinyi?

³ Yesu baadi muitulongieshe’shi muloo wa binyibinyi t’autukilaa ku mianda i buwa y’atumono mu nshalelo eetu nya, anka autukaa p’atolombasha lukalo luetu lua mu kikudi na p’atuifubuila peepi n’Efile Mukulu. (Shak. 4:8) Tui kuibikita naminyi? Mu uno muisambo, atuisambila mianda isatu ikata ayitutuala ku muloo wa binyibinyi.

DIA BIDIBUA BIA MU KIKUDI

4. Mmuanda kinyi wa kumpala autungu’shi tukite bua kuikala na muloo wa binyibinyi? (Misambo 1:1-3)

⁴ MUANDA WA 1: Bua kuikala na muloo wa binyibinyi, abitungu tudie bidibua bia mu kikudi. Bantu booso na nyema, be na lukalo na bidibua bia ku mbidi buabadia kuikala na muwa. Kadi nka penda bantu ngi balombene kudia bidibua bia mu kikudi. Na tui nabio lukalo. Ngi buakinyi Yesu bakuile’shi: “Muntu takeekala na muwa peenda ku mukate nya, anka ku eyi dioso adituuku kukanwa kwa Yehowa.” (Mat. 4:4, Kilombeeno Kipya 2014) Biabia, t’abitungu’shi tutadiile efuku su ndimune diatush’abadi bidibua bia mu kikudi abituuku muiyi di’Efile Mukulu di na muulo ukata Bible. Kayimba ka misambo baadi mushinkamishe’shi: “Sha muloo ngiawa muntu musangeele mu muiya wa Yehowa, na eubadika bufuku na kaanya.”​—Badika Misambo 1:1-3, NWT.

5-6. (a) Nkinyi kiatudi balombene kulonga mu Bible? (b) Mmu mishindo kinyi muatudi balombene kubadika Bible bua’shi etukuashe?

⁵ Pa muanda Yehowa mmuitufule, muituleshe mu Bible akitungu’shi tukite buatudia kuikala na muloo wa binyibinyi mu nshalelo eetu. Atulongo kikale kepatshila kaaye bua muwa wetu. Atulongo mushindo watudi balombene kuifubuila kuadi na biadia kuitufuila lusa ku miluisho yetu. Na atulongo’nyi pabitale lukulupilo lui buwa bukile luadi muitulee bua mafuku aafiki. (Yel. 29:11) Bino bia binyibinyi bi’atulongo p’atuibadikila Bible, abiwusha mashimba eetu na muloo!

⁶ Nka bu biatuiwuku, Bible e na dingi malango e buwa e bungi bukile alombene kuitukuasha mu nshalelo eetu a kuifuku n’efuku. P’atulondo ano malango, tui balombene kuikala na muloo. Sunga wekala na mianda ayikuinyongosha mu nshalelo oobe, kisha nsaa i bungi mu kubadika Eyi dia Yehowa na kunangushena ku biobadika. Yesu bambile’shi: “Anka penda, baaba abapusha eyi di’Efile Mukulu n’abedilama ngi baasha muloo!”​—Luk. 11:28, Kilombeeno Kipya 2014.

7. Mmushindo kinyi oodi mulombene kupeta bukuashi buibungi na nsaa y’okisha mu kubadika Eyi di’Efile Mukulu?

⁷ Nsaa y’obadika eyi di’Efile Mukulu, ata nsaa yodia kusangeela mianda ibobadika muanka. Tubande kuata kileshesho, tobomuene namu uno muanda su? Muntu kampanda bakuteekiela bingi bidibua bi’okuminaa. Kadi pa muanda wa’shi okitshi mianda lubilo-lubilo sunga’shi we na bi bungi bia kukita mu binangu biobe, we kuibidia lubilo-lubilo okutua kupusha buinyi buwa buabio. Kunyima obe bapudisha kudia, bomono’shi w’ekidianga lubilo-lubilo na kunyima bokumiina’shi w’ebidie namu bipeela-bipeela bua kupusha buinyi buwa buabio. Bi kuikala bi mumune na nsaa y’atubadika Bible. Ingi nsaa tuikubadika Bible lubilo-lubilo, na tuakutua kusangeela winyi mukandu wi muanka. Ata nsaa ya kusangeela bi’obabadika Muiyi di’Efile Mukulu, emone bu’be baadi pa wawa muanda obadikanga, otompe kupusha diadia eyi mu binangu, na onangusheene pabitale bi’obadikanga. Su bokitshi bino, onyisha kuikala na muloo.

8. “Mpika a lulamato na mudimukie” kuete alombasha mudimo waye kalolo mushindo kinyi? (Tala dingi mayi e kushi ku’esaki.)

⁸ Yesu mmutule “mpika a lulamato na mudimukie” buadia kutusha bidibua bia mu kikudi pa nsaa ilombane, na tukuete kudishibua mu kikudi kalolo kakile.b (Mat. 24:45, NWT) Bifundue biyokielue ngi bikadikie kitako kia bintu bioso biabatushaa kui mpika a lulamato na mudimukie. (1 Tes. 2:13) Bino bidibua bioso bikuete kuitukuasha buatudia kuiuka bi binangu bia Yehowa biadi muitufumbuile muiyi diaye Bible. Ngi buakinyi atubadikaa Kitenta kia Mulami na Réveillez-vous ! na mikanda yooso mpaa na miisambo i mu jw.org. Atuilumbuulaa bua bisangilo bia mu kakongie bia munkatshi a lubingo na bia mu dia lubingo. Na dingi atutalaa muisambo autukaa ku mueshi ooso, wa mu Televizion a JW nkao ukiautuku. Kudia bidibua bia mu kikudi akuitukuasha buatudia kukita muanda wa kabidi awitutuala ku muloo wa binyibinyi.

IKALA NA NSHALELO A KUKOKIELA MAYI A KULONDA A YEHOWA

9. Mmuanda kinyi wa kabidi awitutuala ku muloo wa binyibinyi?

⁹ MUANDA WA 2: Bua kuikala na muloo wa binyibinyi, abitungu tuikadikie na nshalelo a kukokiela mayi a kulonda a Yehowa. Kayimba ka misambo bafundile’shi: ‘Baasha-muloo, mbano booso abatshiinyi Yehowa na abatambukila mu mashinda aaye.’ (Mis. 128:1) Kutshiina Yehowa akupushisha kumuneemeka ngofu, na kuleka kukita kintu kioso akimuinyongosha. (Nki. 16:6) Biabia, abitungu tutungunukie na kuikitshisha, buatudia kulonda mayi a kulonda a Efile Mukulu a ki buwa na ki bubi nka bu biabadi bapatuule mu Bible. (2 Kod. 7:1) Atukekala na muloo su tubakitshi mianda yabadi bafule kui Yehowa na kuleka mianda yaadi mushikue.​—Mis. 37:27; 97:10; Lom. 12:9.

10. Muyile mukanda wa Bena-Looma 12:2, mbushito kinyi buatudi nabo?

¹⁰ Badika Bena-Looma 12:2. Muntu mulombene kuuka’shi Yehowa ngi e na matalua a kuata kitshibilo kii buwa na’shi kino kii bubi, biabia abitungu yawa muntu akumiine mayi a kulonda a Efile Mukulu aye nabeene. Bu kileshesho, muntu mulombene kuuka’shi mbulamatadi ngi e na matalua e kunundu a kuela mikalo. Anka ta mulombene kukumiina yaya mikalo yooso aye nabeene nya. Bu kipeta, ekitshisha buadia kukita yaaya imulombene. Atulesha mu muikeelo wetu’shi tui bakumiine binyibinyi kulonda mayi a kulonda Yehowa ngi eshinda dibuwa bua kuikala na muwa. (Nki. 12:28) Davide bapushiishe nka mu uno mushindo, ngi buakinyi bambile pabitale Yehowa’shi: “Okanyiûkisha eshinda adyende ku mûwa. Kwakwa kodi nakaûlwa ndâ na mulô, pa kwikala pepi n’obe nakasepêla ikalaika.”​—Mis. 16:11, EEM.

11-12. (a) Nsaa y’atuikadika na mianda ayitukalakasha sunga kuipusha batshobolokie, nkinyi akitungu’shi tudimukile? (b) Mayi e mu Bena-Fidipe 4:8, e kuitukuasha naminyi nsaa y’atusangula bua kukisha kapapi?

¹¹ Nsaa y’atuikalaa na mianda ayitukalakasha sunga kuipusha bu batshobolokie, tui balombene kuikala na lukalo lua kukita kintu kampanda akitukuasha buatudia kuleka kuinyongola pabitale yaaya mianda ayitukalakasha. Bino abipushisha’shi, abitungu tudimukie bua kupela kukita kintu kampanda kiabadi bashikue kui Yehowa.​—Ef. 5:10-12, 15-17.

¹² Mu mukanda waye kui Bena-Fidipe, Mpoolo baadi mulangie bena Kidishitu buabadia kutungunuka na kutaluula kintu kioso kia “kiineemo, . . . kilulame, . . . kiiselele, . . . kyakya kilombene kufudiibwa.” (Badika Bena-Fidipe 4:8.) Sunga Mpoolo ta baadi mufunde mianda yooso pabitale kukisha kua kapapi, bino bibaadi mufunde mbilombene kuikala na bukitshishi, ku mianda yatudi balombene kusangula bua kukisha kapapi. Banda kutompa bino “bintu” abimueka mu uno verse ebipianyikishe na mayi a “ngono, ma filme, bintu bifundibue mu mikanda, sunga na maasha a video.” Kukita bino nkulombene nkukuasha bodia kutundula kiabadi balombene kukumiina ku meeso ku’Efile Mukulu na kiabashii balombene kukumiina. Atukumiina’shi nshalelo eetu ekale muipusheene na mayi a kulonda a Yehowa. (Mis. 119:1-3) Dingi atuikala na kondo k’eshimba katookie, tui balombene kukila ku muanda wa kasatu aulondo awitutuala ku muloo wa binyibinyi.​—Bik. 23:1.

TUULA KULANGUILA YEHOWA PA MBALO YA KUMPALA

13. Mmuanda kinyi wa kasatu awitutuala ku muloo wa binyibinyi? (Yowano 4:23, 24)

¹³ MUANDA WA 3: Ikala mushinkamishe’shi kulanguila Yehowa kui pa mbalo ya kumpala mu nshalelo oobe. Yehowa ngi Muitupangie, ngi buakinyi abitungu tumulanguile. (Kibaf. 4:11; 14:6, 7) Biabia abitungu tumulanguile mu mushindo waadi mukumiine “mu kikudi na mu binyibinyi.” (Badika Yowano 4:23, 24.) Atukumiina’shi kikudi kiselele ki’Efile Mukulu, kitukunkushe mu lulanguilo luetu, bua’shi bikale bipushene na bia binyibinyi abisanganyibua Muiyi diaye. Lulanguilo luetu, abitungu luikadikie pa mbalo ya kumpala, sunga tuekala bashaale muiumbo muabadi bemikie mudimo wetu sunga kuiupela. Lelo uno bakuetu balume na bakashi bakile pa 100, bakuete kuedibua mu nkano penda muanda wa’shi Ntumonyi tua Yehowa.c Sunga mbiabia, be na muloo, muanda be na mushindo wabadi balombene kuteka, kuilongiela, na kulungula bangi pabitale Efile Mukulu na Bufumu buaye! Nsaa yabetukiengiesha sunga kuitubingabinga, tui balombene kuikala na muloo wa kuuka’shi Yehowa e neetu na’shi aketufutu.​—Shak. 1:12; 1 Mp. 4:14.

KILESHESHO KIA MUANDA WA BINYIBINYI UKITSHIKIE MU NSHALELO

14. Nkinyi kibaadi kifikile uno mukuetu nsongualume a mu Tajikistan, na mbuakinyi?

¹⁴ Bangi bakuetu balume na bakashi, mbapete nkalakashi i bukopo bukile mu nshalelo aabo, anka be na muloo wa binyibinyi, muanda mbakite ino mianda isatu ibatukatuka mu kuisambila. Tubandeyi kutala kibaadi kikitshikile ungi mukuetu baadi na bipua 19, abetanyina bu Jovidon Bobojonov a mu Tajikistan, pabaadi mupele kutuela mu busalayi. Muifuku dia 4/10/2019, babaadi bamukuate kuaye, abo nkumuela mu lukano munda a mieshi, na kubanga kumukitshina mianda ya buntomboshi. Ino mianda ya kukutua kululama, ngipalakane mu bibundi bi bungi. Babaadi baleshe’shi babaadi abamukupila, na kumukitshisha pa bukopo bua’shi eele mutshipo wa kutuela mu busalayi na kufuala bilamba bia basalayi. Kunyima kua biabia, babaadi bamukuate na bamutuma mu camp ka midimo mpaa na pabaadi pamufuile président lusa, aye nkutuma eyi bua’shi bamufungule. Munda a kiakia kipungo kioso kia makienga, Jovidon baadi mulame nka kululama kuaye na muloo waye. Baadi mulame ino ngikashi mushindo kinyi? Mpaye kuikalanga efuku dioso na lukalo lua mu kikudi.

15. Mmushindo kinyi ubaadi Jovidon apete bidibua bia mu kikudi sunga pabaadi mu lukano?

¹⁵ Sunga mbibaadi mu lukano, Jovidon baadi mutungunukie nka na kulonga pabitale Yehowa. Sunga mbibaadi te na Bible sunga umune wa ku mikanda yetu. Baadi ebikitshi naminyi? Bakuetu balume na bakashi ba mu kiakia kibundi, babaadi abamutuadila biakudia belanga mikanda ifunde kifundue kia kuifuku, muushi mua kipuidi kia bia kudia. Ngi buakinyi baadi na mushindo wa kubadika Bible na kunangusheena ku biabadika efuku dioso. Kunyima kuabo kumufungula mu lukano baadi mupete malango, abaadi alanga namu babaadi abafumankana na nkalakashi ilekenelekene amba’shi: “Bi na muulo bodia kufubisha bulungantu boobe bua kutamisha kiukilo kiobe kia Yehowa ngofu pa kuibadikila Eyi diaye na mikanda yetu.”

16. Jovidon baadi mutuule binangu biaye ku kinyi?

¹⁶ Mukuetu Jovidon baadi na nshalelo muipushene na mayi a kulonda a Yehowa. Pamutue padia kuimeena nka ku nkalo ibubi, sunga ku muikeelo wi bubi, baadi mutuule binangu biaye nka kui Yehowa na kiakia kiabaata na muulo kui Yehowa. Jovidon baadi asankila bipangua bi’Efile Mukulu pabaadi ebibaandila. Namashika ooso baadi abuuku bua kutemeesha mayi a toonyi atuyimbi. Bufuku baadi abandila mueshi na nyenyenyi. Bambile’shi: “Bino bia buuntu bioso abifiki kui Yehowa, mbingikashe na muloo n’eshimba dinyingie.” Nsaa yatuikala na lutumbu bua biakudia bia mu kikudi na bia ku mbidi biabetupa kui Yehowa eshimba dietu adiulu na muloo, na uno muloo ngulombene kuitupa bukome bua kunyingiila.

17. Mayi e mu 1 Mpyeele 1:6, 7, bekuiatumikila naminyi kui muntu apete muanda wi mumune na ubaadi upete Jovidon?

¹⁷ Jovidon baadi dingi mutuule kulanguila Yehowa pa mbalo ya kumpala. Baadi muukie mushindo wa kulama kululama kuaye kui Efile Mukulu a binyibinyi. Yesu bambile’shi: ‘Langwila Yehowa Efile Mukulu oobe, aye buupenka ngi oofubila mudimo wa kishila.’ (Luk. 4:8) Ba komanda na basalayi babaadi abakumiina’shi Jovidon alekie kuikala bu Kamonyi ka Yehowa. Pa muanda wa bino baadi atekie ngofu bufuku na kaanya. Batekanga Yehowa buadia kumukuasha bua’shi ta kokanga, na bua’shi ashaale nka na lulamato. Sunga mbibabaadi abamukitshina mianda ya kukutua kua kululama, Jovidon baadi mushaale nka na lulamato. Bu kipeta, binobino taadi na muloo wi bungi, wa kintu kiadi mupete kiashibaadi nakio kumpala kuashi bamukuate, bamukupile, bamuele mu lukano, kiakia kintu kiadi mupete, nkutompibua kua lukumiino luaye.​—Badika 1 Mpyeele 1:6, 7.

18. Tui kulama muloo wetu mushindo kinyi?

¹⁸ Yehowa auku kiatudi nakio lukalo buatudia kuikala na muloo wa binyibinyi. Su bolondo ino mianda isatu ayituala ku muloo wa binyibinyi, we mulombene kalama muloo oobe sunga wekala mu nkalakashi i bukopo. Na okekadika na ngobesha ya kuakula’shi: “Mwilo wi na Yehowa bu Efile ao wi na muloo!”​—Mis. 144:15, Ñono na malango.