Binangu bia binyibinyi abiende na kuela misaase

1. Bantu be bungi bakuete kukita naminyi pabitale malango a binangu aatukila mu Bible? (Nkindji 1:20, 21)

MU MA mbalo e bungi atuikalaa na muloo wa kumona balungudi ba Bufumu, mbepaane mu bilayi bua kupa bantu mikanda ayakuila Bible. Toodi muipaane mu uno mudimo wa bulungudi wi na muulo mu uno mushindo su? Su toodi muibikite, kushi mpaka we munangushene pabitale mayi a mu kinfuanyi e mu mukanda wa Nkindji aamba’shi; binangu bya biinyibiinyi, abyende na kwela misaase mu lupata, kui bantu bua’shi bapushe malango abio. (Badika Nkindji 1:20, 21.) Bible na mikanda yetu i na binangu bia binyibinyi, binangu bia Yehowa. Bino binangu ngi binabio bantu lukalo bua’shi bapete muwa wa ikalayika. Atuikalaa na muloo nsaa ayikumiina muntu umune wa ku mikanda yetu. Anka ta mbooso abakumiina nya. Bangi t’abakumiinaa kulonga pabitale abiamba Bible. Bangi abetusepaa. Abanangushena’shi, Bible mukanda wa kala ushi ulombene kufubishua. Bangi namu ababepuula malongiesha a mu Bible pabitale muikeelo ululame. Na abanangushena’shi bakuete kuialonda mbantu bashi na binangu bikuatshikie. Anka Yehowa na kifulo kioso kuete kutungunuka na kulesha binangu biaye bia binyibinyi kui bantu booso. Mu mushindo kinyi?

2. Nkunyi kuatudi balombene kupeta binangu bia binyibinyi lelo uno, anka bantu be bungi abasangula bua kukita kinyi?

² Mushindo umune ukuete Yehowa kuitupa binangu bia binyibinyi, nku bukuashi bua Eyi diaye Bible. Uno mukanda wi kuanka bua bantu booso. Na tui kuamba naminyi pabitale mikanda yetu ayakuila Bible? Nangushena pabitale miabi ya Yehowa, ino mikanda yetu i kuanka mu ndimi ikile pa 1 000. Booso abeyiteemesha sunga abeyibadika na kutumikila biabalongo, abakapete miabi. Anka bantu be bungi bakuete kuata kitshibilo kia kupela kuteemeesha Yehowa. Nsaa yabakiebe kuata kitshibilo, abakumiinaa kuikulupila abo banabeene sunga kutemesha abiamba bangi bantu. Abapelaa na kuitunemeka muanda tui basangule kulonda kiakia akiamba Bible. Mu uno muisambo atukataluula buakinyi bantu be na uno muikeelo. Kia kumpala, tubandeyi kutaluula mushindo watudi balombene kupeta binangu abifiki kui Yehowa.

KUUKA YEHOWA AKUITUPA BINANGU

3. Abitungu tukite kinyi bua kuikala na binangu bia binyibinyi?

³ Binangu abilesha ngobesha yatufubisha na mianda yatuuku, bua kuata bitshibilo bibuwa. Anka binangu bia binyibinyi, abilesha mianda ibungi kukila paapa. Bible amba’shi: “Kutshina Yehowa, mbangilo a binangu. Na kuuka Eselele akupaanaa lushinguluilo.” (Nki. 9:10, NWT) Biabia, nsaa yatukiebe kuata kitshibilo ki na muulo, abitungu tunangushene bi binangu bia Yehowa. “Na kuuka Eselele mukile booso” akuitukuasha bua kuata bitshibilo bibuwa. Tui balombene kuibikita p’atuilongiela Bible na mikanda yetu ayipatuula Bible. Patuibikitshi atulesha binangu bia binyibinyi.​—Nki. 2:5-7.

4. Buakinyi nka penda Yehowa ngi mulombene kuitupa binangu bia binyibinyi?

⁴ Nka penda Yehowa ngi mulombene kuitupa binangu bia binyibinyi. (Lom. 16:27) Buakinyi aye ngi Nsulo ya binangu? Kia kumpala, bu biadi Mupangi, e na kiukilo kishi na mfudiilo na auku bipangua biaye bioso. (Mis. 104:24) Kia kabidi, bikitshino bioso bia Yehowa, abilesha bi binangu biaye. (Lom. 11:33) Kia kasatu, elango dia binangu bia Yehowa adikuashaa misuusa yooso booso abeditumikila. (Nki. 2:10-12) Su atukumiina kuikala na binangu bia binyibinyi, abitungu tukumiine bia binyibinyi bia kitako, na kuibitadiila bua’shi bitukunkushe mu bitshibilo na mu bikitshiino bietu.

5. Mbipeta kinyi abitukaa nsaa ayipele bantu’shi binangu bia binyibinyi abitukiilaa nka kui Yehowa?

⁵ Bantu be bungi batufumankana nabo mu bulungudi, abakanyaa pa kumona buwa bui bipangua. Anka abakula’shi ta kui Mupangi, bintu mbitukiile. Bangi naamu abakumiina mui Efile Mukulu, anka abamono mayi a kulonda a mu Bible bu a kala. Na abakumiina kulonda abo’bo banabene. Bino bikuete kutuusha bipeta kinyi? Nsenga, ngikale mbalo i buwa muanda bantu mbakulupile binangu biabo abo banabene pamutue pa kukulupila mui Efile Mukulu su? Bakuete kupeta muloo wa binyibinyi sunga lukulupilo lui bukopo bua mafuku aafiki su? P’atutala bantu betuifunyishe atushinkamiisha bino bia binyibinyi abiamba’shi: “Ta kui binangu, ta kui kapatupatu, sunga elango, su mbikutuene na abikumiina Yehowa.” (Nki. 21:30, NWT) Bino abitutakula buatudia kuteka Yehowa bua’shi etupe binangu bia binyibinyi! Bi malua, muanda bantu be bungi t’abebikitaa. Buakinyi?

BUAKINYI BANTU ABAPELAA BINANGU BIA BINYIBINYI

6. Muyile Nkindji 1:22-25, mbantu kinyi abapele kuteemesha binangu bia binyibinyi?

⁶ Bantu be bungi ta bakuete kutemeesha nsaa i binangu bia binyibinyi “abiele misaase mu kilayi.” Muyile Bible, kui bisaka bia bantu abapele kutemeesha binangu: “Bapatakane, abasepesheenaa, na babulakane.” (Badika Nkindji 1:22-25.) Tutaluuleyi dingi kalolo ngikashi ayifuisha mu kupela binangu bi’Efile Mukulu. Na mushindo watushi balombene kuibefuana.

7. Buakinyi bangi abakumiinaa kushaala bu “bapatakane”?

⁷ “Bapatakane” nyi mbantu abakumiina muanda ooso wabapusha, na mbibofule bua kuibadimba. (Nki. 14:15) Atufumankanaa na bantu be bino mu bulungudi. Banda kunangushena, bu kileshesho, kui midiyo ya bantu ba bakuete kudimba kui bakata ba bipuilo na bakata ba politike. Bangi bikuete kuibenyongosha nsaa yabakauku’shi bano bakata mbebadimbe. Anka bano babadi baleshe mu Nkindji 1:22, mbasangule bua kushaala bapatakane muanda abakumiina yaya mianda. (Yel. 5:31) Bangi abakumiina kulonda binangu biabo abo banabene, na abapele kulonda abiamba Bible, sunga kupela kukokiela mayi a kulonda. Be bungi abepusha nka bibepushishe uno muana mukashi a mu kipuilo kia mu Quebec, mu Canada, ababadi abatembela kui ba Tumonyi tua Yehowa bambile’ shi, “su ba mumpeele abetudimbaa, kilema nkiabo, ta nkietu!” Ta tukumiina kuambula uno ngielelo a binangu mupatakane nya.​—Nki. 1:32; 27:12.

8. Nkinyi kilombene kuitukuasha bua kupeta binangu?

⁸ Tui na kabingilo ke buwa, muanda Bible etunyingisha biatusha kushaala bapatakane. Anka, mu ‘mpushisho [eetu] tuikaleyi bantu bakulu.’ (1 Kod. 14:20, Kilombeeno Kipya 2014) Atupete binangu pa kutumikila mayi a kolonda mu nshalelo eetu. Ku kapeela-kapeela su tubakitshi biabia atukamono abitukuasha Bible bua kusuuka mianda na kuata bitshibilo bibuwa. Abitungu tuitaluule bua kumona biatuende kumpala mu uno muanda. Bu kileshesho, su buelongiela Bible na kutuela mu bisangilo bioso, anka t’obandile kulambula muwa oobe kui Yehowa na kubatshishibua. Abitungu onangushene pabitale kiodi mulombene kukita bua kulombasha kano kepatshila. Su tui bapue kubatshishibua, tukuete kuenda kumpala mu kulongiesha na kulungula mukandu wibuwa su? Bitshibilo bietu bikuete kulesha’ shi tukuete kukunkushibua na mayi a kulonda a mu Bible su? Okitshinaa naamu bangi mianda mu mushindo ulombene Yesu kuibakitshina su? Su bomono’shi kui mbalo ayitungu’shi oshintuule, tuula binangu biobe ku ntentekieshi ya Yehowa ayamba’shi ‘Apeya bashi na lushingulwilo binangu.’​—Mis. 19:8, EEM.

9. Mmushindo kinyi wi “bantu abasepeshenaa” abalesha’shi mbapele binangu?

⁹ Kisaka kia kabidi kia bantu abapele binangu bi’Efile Mukulu, nkia baaba “abasepesheenaa.” Ingi nsaa atufumankanaa na bantu be bino mu mudimo wetu wa bulungudi. Abakumiinaa kusepa bangi. (Mis. 123:4) Bible mmupue kulesha’shi mu mafuku a ku mfudiilo, amuikala bantu be bungi abasepeshenaa. (2 Mp. 3:3, 4) Nka bu bako ba Loota muntu mululame, bangi bantu lelo uno t’abakuete kutuula binangu ku kudimusha ku’Efile Mukulu. (Kib. 19:14) Bantu be bungi bakuete kusepa baaba booso be na nshalelo muipushene na mayi a kulonda a mu Bible. Bakuete kukita bino, muanda abakumiina kulonda “ngabiabi yabo ibi.” (Yu. 7, 17, 18, Kilombeeno Kipya 2014) Bible alesha bantu abasepanaa bu bantu basumbule lukumiino, na bangi bantu abasumbushenaa Yehowa.

10. Nka bu abibilesha Misambo 1:1, mushindo kinyi watudi balombene kuleka kuikala bu bantu abasepeshenaa?

¹⁰ Mushindo kinyi watudi balombene kushinkamisha atue banabene’shi t’atulondo bantu abasepeshenaa? Mmushindo umune, nkuleka ba kuuku abalesha kinangu kia kuakula mianda i bubi pabitale ndumbuluilo. (Badika Misambo 1:1.) Bino abipushisha’shi, ta tui balombene kuteemesha sunga kubadika kintu kampanda akituukila kui bantu basumbule lukumiino. Na dingi bino abilesha’shi su ta tui bamdimukie, abikala bibofule bua kuikala na kikudi kia kuakula bibubi na kubanga kuikala na mpaka pabitale Yehowa na buludiki buatupete mu ndumbuluilo aaye. Bua kusumbula uno muikeelo, abitungu tuiyipushe atue banabene’shi: ‘Ne mushinkamishe’shi kui muanda kampanda wi bubi wandi mulombene kuakula nsaa yatupete buludiki bupia sunga mpatuluilo mupia? Ne na kinangu kia kumonanga nka bilubilo bia bano booso bakuete kukunkusha?’ Su tubalekie kuikala na kino kinangu musuusa umune, Yehowa asanka neetu.​—Nki. 3:34, 35.

11. “Bantu babulakane” abamonaa mayi a kulonda alulame a Yehowa naminyi?

¹¹ Kisaka kia kasatu kia bantu abapele binangu nyi nkia “bantu babulakane.” Mbabulakane muanda abapele kuikala na nshalelo muipushene na miiya y’Efile Mukulu ya kululama. Abakitshi mianda yabamono ku meeso kuabo’bo banabene bu ilulame. (Nki. 12:15) Bano bantu bakuete kupela Yehowa muikale Nsulo ya binangu. (Mis. 53:1) Nsaa y’atufumankana nabo mu mudimo wa bulungudi, abetusepe ngofu muanda atunemeka mayi a kulonda a mu Bible. Aku naamu ta be bia kuitupa nshalelo e buwa. Bible akula’shi: ‘Mianda ya binangu i bu mwengye ula bwa mupatakane; ta mupwandikiile kubuula sunga mmukanwa ku kiibi kya kibundji.’ (Nki. 24:7) Muntu mubulakane ta mulombene kutusha elango dia binangu bua kuidilungula mungi. Ngi buakinyi Yehowa etudimusha bua “kwenda kula na mupatakane”!​—Nki. 14:7.

12. Nkinyi akiketukuasha bua kupela kuikala na bikitshino bu bia bantu babulakane?

¹² Mu kuilekeena na bano bashikue malango a Efile Mukulu, atue tui bafule mashinda a Efile Mukulu. Mu ano mashinda mui mayi aaye a kulonda alulame. Tui balombene kunyingisha kifulo kietu, pa kupuandikisha bipeta bia baaba abakokiela na bash’abakokiela mayi a kulonda. Atumono kua befuishisha nkalakashi abo banabene muanda mbabulakane, na’shi bakuete kusumbushena malango a binangu a Yehowa. Biabia tala mushindo wi nshalelo eetu buwa muanda tukuete kukokiela Efile Mukulu.​—Mis. 32:8, 10.

13. Yehowa etukitshishaa ku bukopo bua kutumikila elango diaye dia binangu su?

¹³ Yehowa mmutuule binangu biaye bua bantu booso. Anka t’akitshisha muntu su ngumune bua kuibikumiina. Anka alesha bipeta abifikila bantu booso abapele kuteemesha binangu biaye. (Nki. 1:29-32, EEM) Baaba booso abasangula bua kupela kukokiela Yehowa, abakamono ‘malua mupunda bikitshino biabo.’ Kunyima nshalelo aabo t’akebatuadila kintu, anka penda tuinyongoshi, nkalakashi, na ku mfudiilo Yehowa akebabutula. Ku lungi lupese, baaba booso abateemesha elango dia binangu dia Yehowa na kutumikila bioso bi’akula, Yehowa ebalaa’shi: “Ooso akanteemesha, ekala ku matwi talala, mwikishe ku’shi moo wa mpoombo.”​—Nki. 1:33.

BINANGU BIA BINYIBINYI ABITUKUASHAA

14-15. Nkinyi kibatulongiela mu Nkindji 4:23?

¹⁴ Su tubatumikila binangu bi’Efile Mukulu abikala abitukuasha. Anka bu bibatukatuka mu kuibimona, Yehowa mmupe muntu ooso bulungantu bua kupeta mayi aaye a binangu. Bu kileshesho, mu mukanda wa Nkindji, Yehowa etupeya malango aalumbuula nshalelo eetu p’atuiatumikila. Tubandeyi kutala penda bileshesho binanka bi’elango dia binangu.

¹⁵ Lama eshimba diobe dia mu kinfuanyi. Bible amba’shi: “Olame eshimba dyobe kukila bintu bioso, mwanda nyi amutûkâ nsula ya mûwa.” (Nki. 4:23, EEM) Banda kunangushena ki’atukuminaa kukita bua kulama eshimba dietu dia ku mbidi. Tui na lukalo lua kudia bidibua bibuwa, kukita kalashishi ka mbidi, na kuleka biubishi bi bubi. Mu mushindo umune, abitungu tukite biabia bua kulama eshimba dietu dia mu kinfuanyi. Abitungu tudie bidibua bia Muiyi di’Efile Mukulu efuku dioso. Atuilumbuula bua kutuela na kutusha ngaluulo mu bisangilo bia bena Kidishitu. Atushaala banyingie p’atushaala na kiubishi atue banabene kia kuenda mu mudimo wa bulungudi. Na atupele kuikala na bino biubishi bi bubi pa kushaala beselele na pa kupela kukita kintu su nkimune kilombene kuluisha binangu bietu. Bu kukisha kapapi mu mushindo wi bubi na kuikala na ba kuuku be bubi.

16. Buakinyi mukanda wa Nkindji 23:4, 5, awitukuasha lelo uno?

¹⁶ Sanka na biodi nabio. Bible etupa dino elango adiamba’shi: ‘Tofumbakananga bwa kwikala na bupeta . . . anka na kwibumona, kapindji kapeela buubesheete, muanda mbumene mbaba, abupaapama kuiyilu buu kyonyi kya muumba.’ (Nki. 23:4, 5) Bi kuikala bibofule bua bantu kushimisha makuta aabo na bintu biabo. Anka ba mpeta be bungi, na balanda be bungi bakuete kuikalakasha ngofu bua kupeta makuta e bungi. Kuno kuikalakasha kukuete kuibatuadila nkalakashi ku nkumo yaabo, ku bipuano biabo, mpaa na ku mbidi yaabo. (Nki. 28:20; 1 Tim. 6:9, 10) Ku lungi lupese, binangu abitukuasha bua kuikala na nkatshinkatshi pabitale makuta. Uno mmueneno etukaluila ku luabi na kuitukuasha bua kusanka na kiatudi nakio na kuikala na muloo.​—Mul. 7:12.

17. Mmushindo kinyi watudi balombene kupeta “ludjimi lua binangu” bu biabadi bebileshe mu Nkindji 12:18?

¹⁷ Nangusheena kumpala a kuakula. Su ta tui badimukie tui balombene kukitshisha bubi bukata na bishima bietu. Bible amba’shi: “Mbalo i mbalakashi i bu i mwele wa ngoshi. Anka ludjimi lwa baasha binangu nyi ndubuko lukata.” (Nki. 12:18) Atulama bipuano bibuwa nsaa yatulekie kuakula bangi mianda i bubi na bangi. (Nki. 20:19) Su atukumiina’shi bishima bietu binyingishe bangi, na kushii kuibatapa ku mashimba, abitungu tubadikie Eyi di’Efile Mukulu efuku dioso na kunangushena pa dianka. (Luk. 6:45) Nsaa yatunangushena ku abiakula Bible, bishima bietu abikala nka bu ‘nsulo ya binangu’ ayinyingisha bangi.​—Nki. 18:4.

18. Mmushindo kinyi watudia kutumikila mukanda wa Nkindji 24:6, awitukuasha buatudia koobesha mu mudimo wa bulungudi?

¹⁸ Londa buludiki bua ndumbuluilo. Bible etupa dino elango dia kutumikila bua koobesha adiamba’shi: “Tuendanga mu ngoshi koshi mubande kupusha malango e buwa, ngobesha yâyo ayitûkâ mu malango a bantu be bungi.” (Nki. 24:6, EEM) Uno verse etuakuasha naminyi buatudia kuikala balungudi na balongieshi be buwa? Pa mutue pa kulungula na kulongiesha mu mushindo wetu atue banabene, abitungu tuikitshishe bua kulonda buludiki bu’abetupa. Atupetaa buludiki bua binangu mu bisangilo bietu bia buina Kidishitu kui bantu bamonemone mianda, abele misambo ayitukila mu Bible na ku bipindi bia bena kalasa biabakitaa bua kuitulongiesha. Dingi nyi, ndumbuluilo a Yehowa, etupeyaa bina mudimo bibuwa, mikanda yetu na ma video bilombene kukuasha bantu bua kupusha Bible. Obe naamu olongaa biakufubisha bino bina mudimo bibuwa kalolo su?

19. Opushaa naminyi pabitale binangu biabetupa kui Yehowa? (Nkindji 3:13-18)

¹⁹ Badika Nkindji 3:13-18. Tui na lutumbu lukata bua malango e buwa atukuete kupeta Muiyi di’Efile Mukulu! Tubadia kuikala kunyi su ta tui nao? Mu uno muisambo tubamono bingi bileshesho bia malango e buwa atupete mu mukanda wa Nkindji. Biabia, Bible ooso mushima e na malango e buwa aatukila kui Yehowa. Ngi buakinyi tuateyi kitshibilo kia kutumikila malango aaye mu muwa wetu ooso ushima. Uno ndumbuluilo kuete kumona’shi ano malango ta e na muulo kuatudi. Tui bashinkamishe’shi, “baaba booso abakuata pepoo [ku binangu] abakebetanyina bu baasha muloo.”