Bia kuiwubidishena na kakongie kapia

Nicolas na Céline mbapete nkalakashi ilekeenelekeene. Betele a mu France baadi muibatume mu kakongie kapia, na abo namu nkukumiina na muloo ooso. Abamba’shi: “Ku mbangilo tubaadi na muloo ukile, anka tubaadi bewushimishe nsaa ibatubangile kunangushena pabitale bakuuku betu bashaale mu kakongie ka kala. Ta tubaadi babande kuiwubidishena na bakuetu balume na bakashi ba mu kakongie kapia nya.”a Bu bibatumono’shi bi bukopo, tui kuiwubidishena na kakongie kapia naminyi? Bakuetu ba mu kakongie kapia be kuitukuasha naminyi? Nui kuinyingishena naminyi mu kikudi na bakuenu ba mu kakongie kapia?

MIANDA INANKA ILOMBENE NKUKUASHA BODIA KUIWUBIDISHENA NA KAKONGIE KAPIA

1. Kulupila mui Yehowa. (Mis. 37:5) Kazumi a mu Japon, baadi mufilukie mu kakongie kabaadi mupue kukita bipua 20, nsaa ibaabadi batume mulune aaye mu kufuba ingi mbalo. Mmushindo kinyi ubaadi mutûle myanda [yaye] mwi Yehowa’? Amba’shi: “Naadi na moo na naadi nepusha bu e bupenka na mukalakashue. Kadi naadi nalungula Yehowa bioso binaadi napusha nsaa yooso, aye namu baadi ampa bukome bunaadi nabo lukalo.”

We kunyiisha kukulupila mui Yehowa naminyi? Nka bu abikalaa mutshi na lukalo na meema na bidibua biawo mu nsenga bua’shi ukule, na lukumiino luetu namu lui na lukalo na kudishibua bua’shi lutame. Nicolas atudi bateemune kunundu, mmusangane’shi, kunangushena ku bileshesho bu kia Abalahama, kia Yesu, na kia Mpoolo, bana balume babaadi bepaane ngofu bua kukita kikiebe ki’eshimba di’Efile Mukulu, nkunyiishe kunyingisha lukulupilo luaye lua’shi Yehowa mmulombene kumukuasha. Kuneemeka programe oobe a kuilongiela Bible pa bupenka t’akukukuasha nka penda bua kukambila nkalakashi ya mu nshalelo oobe nya, kadi akukupa dingi bia buntu bia mu kikudi biodi mulombene kulungula namu bakuenu ba mu kakongie kapia.

2. Topuandikishanga kakongie kapia na kakongie kakulu. (Mul. 7:10) Jules bakatukile mu Benin enda mu kushaala mu États-Unis baadi musangane’shi kipikua kia kuakua, nkilekeene ngofu na kia kuabo. Amba’shi: “Naadi napusha bia kulungula muntu muenyi ooso anfumankana naye mianda ya mu nshalelo ande.” Pa muanda wa’shi mianda i baadi ilekeene ngofu na yaye, babangile kuikala kulaakula na bakuabo ba mu kakongie kapia. Kunyima ku’aye kuiwukeena kalolo na bakuabo balume na bakashi ba mu kakongie kapia, baadi mushintule mueneno aaye. Amba’shi: “Ne mumone’shi, sunga tuekala mbalo kinyi pano pa nsenga bantu be nka mumune. Nka penda kuakula na bikitshino ngi bilekeene. Kukumiina bantu nka biabia biabadi bekale, kui na muulo.” Biabia, leka kupuandikisha bantu ba mu kakongie kapia na ba mu kakongie ka kala. Ungi mukuetu mukashi mbala-mashinda bakuile’shi: “Ntshi mukatukie bua nkapeta mianda yandi mulekie’mi, anka nemukatukie bua kuwuka namu ingi mianda ipia.”

Mpaa na bakulu namu, abitungu balekie kupuandikisha mianda ya mu kakongie kaabo ka kala na ya kakongie kaabo kapia. Su bosangana’shi bakuenu balume na bakashi abakitshi mianda mu kakongie kenu kapia ilekeene na ya mu kakongie koobe ka kala, tuambanga’shi bakuete kukita nka bi bubi. Bi buwa kubanda kuwuka kalolo mianda i mu terituare oodi kalolo, kumpala kua kuibalungula kia kukita. (Mul. 3:1, 7b) Bi buwa kulongiesha bakuenu balume na bakashi ba mu kakongie kapia ku kiila ku kileshesho kiobe ki buwa, pa mutue pa kuibakitshisha pa bukopo oobe mueneno.​—2 Ko. 1:24.

3. Ikala na bi bungi bia kukita mu kakongie kenu kapia. (Fid. 1:27) Sunga kuenda mu kakongie kapia akutekie mianda i bungi, bi buwa kuenda mu bisangilo bia kakongie kapia pa nsaa su kui mushindo. Bakuenu balume na bakashi ba mu kakongie kapia, abakumiina nkumona nsaa yooso bua’shi bekale nobe mu kipuano na bamone bia nkukuasha. Lucinda baadi mufilukie na tusonguakashi tuaye tubidi, enda mu kibundi kikata kia mu Afrique du Sud, atentekiesha’shi: “Bakuuku bande babaadi bandangie’shi paapa puende, kekuateene nka na bakuenu balume na bakashi ba mu kakongie kenu kapia, otuukie nabo mu bulungudi na kutuelanga mu bisangilo nsaa yooso nabo. Tubaadi batuushe mpaa na nshibo yetu bua’shi tuikale atukitshina kisangilo kia bulungudi muanka.”

“Mu kuitatshisha bua kufuba pamune” midimo ya teokrasi na bakuetu balume na bakashi ba mu kakongie ketu kapia, uno ngi mushindo wi buwa bukile wa kukuatshishena “lukumiino lua mukandu wibuwa.” Anne-Lise atudi bateemune kunundu, baadi munyingishibue na bakulu bamulungula bua’shi ekitshishe buadia kulungula mukandu wi buwa na bantu booso ba mu kakongie kaabo kapia. Bu kipeta, amba’shi: “Uno ngi mushindo wi buwa bukile bua kuiwubidishena na kakongie ketu kapia.” Dingi, nsaa yuetukila bua kutumpa Nshibo ya Bufumu na kuiyilama na mankenda, wekasha kaaka kakongie kenu kapia bu koobe. Mu kapindi kapeela bakuenu balume na bakashi ba mu kakongie kenu kapia abanyiisha kuiwubidishena nobe, na wepusha’shi we mu kifuko kienu.

4. Kimba bangi bakuuku bapia. (2 Ko. 6:11-13) Su bakuenu ba mu kakongie kapia bawuka’shi okuete kuibapasukila, abikala bibofule buabadia kuikala bakuuku bobe. Biabia, ata mpango ya kuenda ku Nshibo ya Bufumu kumpala kua’shi bisangilo bibangie, na su bibaapu, ata nsaa ya kutentekiesha na bantu. Ekitshishe bodia kuwuka mashina aabo. Nsaa y’otentekiesha mashina a bantu na kuikala muntu musangale, abikubofuila bua kutentekiesha na bantu na abafiki bakuuku bobe.

Pa mutue pa kuikalakasha bua kiodia kukita bua’shi bantu bakukumiine mu kakongie kenu kapia, tadiila bakuuku bobe bakuwukie namu kalolo kiinyi kiodi. Nka bu abitulondela Lucinda’shi: “Binobino tui na bakuuku be bungi, muanda tui baate mpango ya kuitanyina bangi ku nshibo kuetu.”

“EKUUKISHENEYI”

Bangi abapushaa buufu pa kutuela mu Nshibo ya Bufumu muabash’abawuku muntu. We kukuasha beenyi abafiki mu kakongie kenu buabadia kuipusha mu bulungantu naminyi? Mpoolo baadi munyingishe bena Nkidishitu naye’shi: “Ekuukisheneyi,” nka bu “bibaadi Nkidishitu muinukukile namu.” (Lom. 15:7) Bakulu p’abambula Nkidishitu, mbalombene kukuasha bantu beenyi buabadia kuipusha’shi babebakuukila kalolo. (Tala kashibo akamba’shi: “Kiodia kukita bua’shi p’oshintula kakongie mianda ikidikie kalolo.”) Bena kakongie booso mpaa na bana bakinga, mbalombene kukuasha bantu beenyi buabadia kuipusha bu be kuabo.

Mu kukuukila kua bangi, mui kuitanyina bantu ku nshibo koobe mpaa na kuibapa bintu bia ku mbidi. Bu kileshesho, ungi mukuetu mukashi baadi munone ungi muana mukashi ki muenyi mu kibundi kiabo, aye nkumukuasha pa kumuleesha mbalo ya kuatshila miotoka. Bino bibaadi bikume mukuetu mukashi baadi ki muenyi kuishimba ngofu, na bibamukuashiishe buadia kuiwubidishena na nshibo yaye ipia.

MUSHINDO UMUNE WA KUTAMA MU KIKUDI

Mpasu p’ende na kukoma, etootolaa misuusa i bungi kumpala kua’shi mapushi aaye amene na akome kumpala kua kubanga kupapama. Mu mushindo umune, nsaa y’oshintula kakongie, abitungu olekie mianda yooso ilombene nkukutshishua mushindo odia kufubila Yehowa. Nicolas na Céline abamba’shi: “Kuenda mu kakongie kapia, akuitulongieshaa mianda i bungi.” Kuiwubidishena na bantu bapia na ungi nshalelo mupia, akukuashaa bua kudima ingi ngikashi ipia. Jean-Charles atudi bateemune ku mbangilo amba’shi: “Kushintula kua kakongie kapia nkukuashe bana betu buabadia kutama mu kikudi mu kakongie, na mu mieshi ipeela muana eetu mukashi mmubangie kukita bipindi bia bisangilo bia munkatshi mua lubingo, na muana eetu mulume namu ekala mulungudi shabandile kubatshishibua.”

We kukita naminyi su pa muanda wa nshalelo oobe tue na mushindo wa kuenda mu kangi kakongie kapia? We kuikasha kakongie koobe kakulu bu kapia, su otumikila ingi mianda ileshibue mu uno muisambo. Nsaa y’okulupila mui Yehowa, obanga kukita bi bungi mu kakongie bu kuata mpango ya kutuuka na bangi mu bulungudi, kukimba bangi bakuuku bapia, sunga’shi wekala kuuku e buwa bua baaba booso bodi mupue kuiwukishena nabo. Pangi we kuata mpango ya kukuasha bangi baki beenyi na bintu bia ku mbidi, sunga kukuasha be mu lukalo na bukuashi. Kifulo akitundushaa bena Nkidishitu ba binyibinyi, kukuasha bangi akukukuasha bodia kutama mu kikudi. (Yo. 13:35) We kushinkamisha’shi “Efile Mukulu asankaa na milambu ibiabia.”​—Eb. 13:16.

Sunga bikaleshi kuenda mu kakongie kapia kui lukalakashi, bena Nkidishitu be bungi mbobeshe kuiwubidishena na kakongie kaabo kapia, mpaa n’obe namu we koobesha! Anne-Lise amba’shi: “Kushintula kua tukongie, nkunkuashe buandia kuiwukeena na bangi bantu.” Binobino, Kazumi mmufikie mu kushinkamisha’shi: “Kuenda mu kangi kakongie nkulombene nkukuasha biodia kumona bukuashi bua Yehowa mu ingi mishindo bi’oshomonanga kumpala.” Jules namu amba’shi: “Bakuuku bandi nabo, mbankuashe biandia kuipusha bu’mi e ku nshibo kuande. Binobino, naapu kuiwubidishena na kakongie ketu kapia na tabidi bukopo buandia kuimukatuka.”