Malongiesha e na muulo atupetela kui Banfumu ba Isalele

1-2. Bible etulungula kinyi pabitale bangi banfumu ba Isalele?

MU BIBLE mui mashina a bana balume bakile pa 40 babaadi bakunkushe Isalele bu banfumu.a Na Bible etulungula pa butooka mianda ibaabadi bakite kui bangi banfumu ba Isalele. Bu kileshesho, sunga mbibaadi bangi banfumu be buwa bakite mianda i bubi. Tutaleyi muanda wa Nfumu e buwa Davide. Yehowa bakuile’shi: “Mufubi ande Davide . . . bandondele n’eshimba diaye dioso, bakitanga nka kiakia kilulame ku meeso kuande.” (1 Bf. 14:8) Anka, Davide baadi mutambukie lusandi na mukashi a muntu na nkudiila mulume aaye lukuku lua kumuipayisha ku ngoshi.​—2 Sam. 11:4, 14, 15.

² Ku lungi lupese namu, banfumu be bungi bashi baadi na lulamato babaadi bakite ingi mianda i buwa. Tu bandeyi kutaluula kileshesho kia Roboame. Ku meeso kua Yehowa, “baakitshiine bubi.” (2 Mya. 12:14) Anka, Roboame bakitshine ingi mianda i buwa. Bu kileshesho, baadi mukookiele nsaa ibamulunguile Yehowa’shi toluanga na bisamba ekumi bia Isalele, anka ebatadiile basangule nfumu abakumiina abo banabene. Baadi dingi munyingishe bibundi bi bungi mu bufumu buaye bua kukaluila muilo w’Efile Mukulu kui beshikuanyi baabo.​—1 Bf. 12:21-24; 2 Mya. 11:5-12.

3. Ndukonko kinyi lui na muulo, na nkinyi ki’atukesambila mu uno muisambo?

³ Bi buwa kukimba lualuulo ku luno lukonko alulondo. Su banfumu ba Isalele babaadi abakitshi mianda i bubi na i buwa, Yehowa baadi ayimeena pa kinyi buadia kumona nfumu bu sha lulamato ku meeso kuaye? Lualuulo lua luno lukonko aluitukuasha buatudia kuwuka akitungu’shi tukite buatudia kusankisha Yehowa. Atukataluula mianda isatu ibaadi Yehowa ataluula kui banfumu ba Isalele: bibaadi mu mashima aabo, bibaabadi abelanga, na bibaabadi balamate lulanguilo lua binyibinyi.

BABAADI BAFULE YEHOWA NA MASHIMBA AABO OOSO

4. Nkuilekeena kinyi kubaadi pankatshi pa bafumu ba sha lulamato na banfumu bashi baadi na lulamato?

⁴ Banfumu babaadi abasankisha Yehowa pa kumulanguila na mashimba aabo ooso.b Nfumu e buwa Yeoshafate “baakimbanga Yehowa n’eshimba dyaaye dyooso.” (2 Mya. 22:9) Pabitale nfumu Yoziase, eyi diyokielue adiamba’shi: “Takubaadi kwikale nfumu buu’ye . . . beealwishe kwi Yehowa n’eshimba dyaaye dyooso.” (2 Bf. 23:25) Tui kuamba naminyi bua Salomone, baadi mukite mianda i bubi ku nfudiilo kua bipua biaye? “Ta baadinyi mufule Yehowa n’eshimba dyê dyoso” nya. (1 Bf. 11:4, EEM) Pabitale Abiyame, ungi nfumu shi baadi na lulamato, Bible amba’shi: “Eshimba dyaaye tadibaadi dilamate dyooso kwi Yehowa nya.”​—1 Bf. 15:3.

5. Patuula akipushisha kufubila Yehowa n’eshimba dioso.

⁵ Kufubila Yehowa n’eshimba dioso akupushisha kinyi? Muntu alanguila Efile Mukulu n’eshimba diaye dioso, ta mmulombene kuibikita penda bu bibamufikila mu binangu nya. Anka, alanguilaa Yehowa muanda mmumufule ngofu na amuneemekaa. Na atungunukaa na kufula Yehowa ngofu na kumuneemeka mu muwa waye ooso.

6. Tui kulama eshimba dietu dioso kui Yehowa naminyi? (Nkindji 4:23; Mateo 5:29, 30)

⁶ Tui kuambula banfumu babaadi bafule Yehowa na mashimba aabo ooso naminyi? Pa kuleka bukitshishi bui bubi. Bu kileshesho, kukisha kapapi mu mushindo wi bubi, kui kulubisha eshimba dietu. Biabia, bakuuku be bubi na mushindo w’atunangushena pabitale bintu bia ku mbidi, bi kulubisha eshimba dietu. Su tuamona’shi kui kintu kampanda kibabanga kubofusha kifulo kietu bua Yehowa, abitungu tuikitshishe bukidibukidi bua kuikikatusha.​—Badika Nkindji 4:23; Mateo 5:29, 30.

7. Buakinyi abitungu tulekie kintu kioso kilombene kubofusha kifulo kietu bua Yehowa?

⁷ T’abitungu’shi tutadiile eshimba dietu diyabuule nya. Su ta tui badimukie, tui balombene kunangushena’shi muanda tui na bi bungi bia kukita mu mudimo wa Yehowa, bukitshishi bui bubi ta bui bia kuitukambila. Banda kupuandikisha’shi we paasha, musango umune kubeele mashika na lupapi lui bukopo. P’ofiki ku nshibo, bosangana’shi kui kibobo. We kupusha naminyi su oshitula ku kibelo? Lupapi lui mashika aluwulu mu nshibo lubilolubilo. Mmuanda kinyi wi na muulo pano? Abitungu tukite bi bungi kukila penda kudia biakudia bia mu kikudi abilumbuula kipuano kietu na Yehowa. Abitungu dingi tufungie kibelo ki’eshimba dietu bua kupela’shi tala bukitshishi bui bubi na mianda ya uno ndumbuluilo “lupapi” sunga binangu bishi bia buin’Efile Mukulu biemutuela na biabuula eshimba dietu.​—Ef. 2:2.

BABAADI BELANGIE KU MILUISHO YABO

8-9. Nfumu Davide na Nfumu Ezekiya babakitshine naminyi nsaa ibabebatopekiele? (Tala kifuatulo.)

⁸ Nka bu biatumuene mu kikoso kia kumpala, Nfumu Davide baadi mukite bilubilo bikata. Anka nsaa ibaadi mutemuki Natane mumulungule bibaadi Yehowa mupushe, Davide baadi muilangie kuishimba na kuiyisha kooso. (2 Sam. 12:13) Bishima bia Davide bifundibue mu Misambo 51, abitulesha’shi baadi muilangie muishimba mu binyibinyi. Davide ta baadi muilangie bua kusankisha Natane sunga bua kusuuka dinyooka nya.​—Mis. 51:3, 4, 17, mayi a mbangilo.

⁹ Nfumu Ezekiya baadi muluishiishe Yehowa. Bible akula’shi: “Beekeele na kwitatula mwishimba dyaaye, ngi Efile Mukulu nkumufiitshila munda, pamune na beena Yuuda na Yeelusaleeme mushima.” (2 Mya. 32:25) Buakinyi Ezekiya bafikile muntu sha kuitatula? Pangi mpa muanda’shi Yehowa baadi mumuikashe mpeta, amukuasha bua kutshokola bena Asiri, sunga kumupaasha ku lufu. Pangi kabingilo kabaadi kamutakule bua’shi aleeshe bena Babilone bupeta buaye booso nkuitatula, p’aye kukita biabia, mutemuki Yeshaya bayile akamulungula’shi Yehowa bamufitshila munda. (2 Bf. 20:12-18) Anka bu Davide, Ezekiya baadi muilangie na kuiyisha kooso. (2 Mya. 32:26) Nfudiilo a bioso, Yehowa bamuene uno nfumu bu muntu sha lulamato “batungunukile na kukita mianda ilulame.”​—2 Bf. 18:3.

10. Nfumu Amasiase bakitshine naminyi pa baabadi bamutopekie?

¹⁰ Mu kuilekeena na Nfumu Davide na Nfumu Ezekiya, Nfumu Amasiase a mu Yunda bakitanga mianda i buwa “anka ta bebikitshîne n’eshimba dyê dyoso.” (2 Mya. 25:2, EEM) Mbubi kinyi bubaadi mukite? Kunyima kua Yehowa kumukuasha ku ngoshi na bena Edome, Amasiase babangile kulanguila befile baye dingi.c Dingi nsaa ibafikile batemuki ba Yehowa bua kumutopeka pabitale kuakua kulanguila kua befile baye, ta baadi muibateemeshe nya.​—2 Mya. 25:14-16.

11. Muyile mukanda wa 2 Bena Kodinda 7:9, 11, abitungu tukite kinyi bua’shi tufuidibue lusa (Tala dingi kifuatulo.)

¹¹ Bino bileshesho abitulongiesha kinyi? Abitungu tuilangie ku miluisho yetu na tukite muetu mooso bua kupela kuiyikita dingi. Bi kuikala naminyi su betulanga kui bakulu bamu kakongie, sunga winyi muanda wamueka bu ushi na muulo? Tatunangushenanga’shi Yehowa ta mmuitufule sunga’shi bakulu mbetushikue nya. Sunga banfumu be buwa ba Isalele babaadi na lukalo na elango na kutopekibua. (Eb. 12:6) Nsaa y’abetutopeka abitungu kia (1) tukumiine na kuiyisha kooso, (2) tulekie yaya mianda y’abetutopeka, na (3) tutungunukie na kufubila Yehowa n’eshimba dietu dioso. Su tubelanga ku miluisho yetu, Yehowa etufuila lusa.​—Badika 2 Bena Kodinda 7:9, 11.

BABAADI BALAMATE NKA KU LULANGUILO LUA BINYIBINYI

12. Nkuilekeena kinyi kui pa buako kubaadi pankatshi pa banfumu ba sha lulamato na banfumu bashi baadi na lulamato?

¹² Banfumu babaadi Yehowa amono bu ba sha lulamato babaadi balamate ku lulanguilo lua binyibinyi. Babaadi banyingishe muilo wa Yehowa bua’shi nawo namu ukite nka biabia. Sunga mbiabia, babaadi bakite bilubilo nka bu biatudi bebiteemune kunundu. Anka babaadi abalanguila nka penda Yehowa na bakita muabo mooso bua kusoosa mankishi ooso abaadi muiwumbo.d

13. Buakinyi Yehowa bamuene Nfumu Akabe bu shi na lulamato?

¹³ Tui kuamba naminyi pabitale banfumu babaabadi abamono kui Yehowa bu bashi na lulamato? Mu binyibinyi, mianda yooso ibaabadi abakitshi ta ibaadi nka bubi nya. Bu kileshesho, Nfumu Akabe baadi bubi baadi muleeshe kuiyisha kupeela na kuinyongola kunyima kua kuipayisha Nabote. (1 Bf. 21:27-29) Baadi dingi muibakie bibundi na kutshokola beshikuanyi ba Isalele. (1 Bf. 20:21, 29; 22:39) Anka kui kingi kintu kikile bubi kibaadi Akabe mukite. Kubukitshishi bua mukashi aaye, baadi mutadiile lulanguilo lua befile ba madimi sunga’shi lua mankishi. Pa muanda wa bino, ta baadi muilangie kuishimba nya.​—1 Bf. 21:25, 26.

14. (a) Buakinyi Yehowa baadi mumone Nfumu Roboame bu shi na lulamato? (b) Banfumu be bungi bashi baadi na lulamato babaadi abanyingisha bangi bua kukita kinyi?

¹⁴ Tubandeyi kutala ungi nfumu shi baadi na lulamato Roboame. Nka bu biabidi bileshibue mu kikoso kia 2, baadi mukite mianda i bungi i buwa mu bufumu buaye. Anka pabalongamine bufumu buaye, balekiele Miiya wa Yehowa aye nkubanga kulanguila befile ba madimi. (2 Mya. 12:1) Kunyima kua biabia, baadi ingi nsaa alanguila Yehowa, ingi nsaa namu alanguila befile ba madimi. (1 Bf. 14:21-24) Ta nka penda nfumu Roboame na nfumu Akabe babalekiele kulanguila Yehowa mu mushindo wi buwa nya. Biabia, banfumu be bungi bashi baadi na lulamato babaadi abalanguila befile ba madimi, babaadi abanyingisha bangi bantu buabadia kulanguila befile ba madimi. Abipushika patooka’shi, ku meeso kua Yehowa, kumulanguila mu mushindo wi buwa, ngi kubaadi na muulo buadia kuata kitshibilo kia kumona’shi nfumu kampanda e buwa sunga’shi e bubi.

15. Buakinyi kulamata ku lulanguilo lua binyibinyi kui na muulo kui Yehowa?

¹⁵ Buakinyi muanda utale lulanguilo ubaadi na muulo kui Yehowa? Kabingilo kamune nka’shi, banfumu ngi babaadi na bushito bua kukunkusha muilo ku lulanguilo lua binyibinyi. Dingi, lulanguilo lua madimi lubaadi alutakula bantu nka ku miluisho ikata na mu kukutua kua kululama. (Yos. 4:1, 2) Kintu ki na muulo, banfumu ba Isalele na bena Isalele babaadi belambule kui Yehowa. Anka, Bible mmupuandikishe lulanguilo luabo lua madimi na kutambuka kua lusandi. (Yel. 3:8, 9) Nsaa i muntu atambuka lusandi baluishiisha mulume aaye sunga mukashi aaye. Mu mushindo umune, su muntu akutua kushaala na lulamato kui Yehowa, bamutapa kuishimba ngofu.e​—Miy. 4:23, 24.

16. Nkuilekeena kinyi kui pabuako kua muntu mululame na shi mululame ku meeso kua Yehowa?

¹⁶ Bino abitulongiesha kinyi? Mu binyibinyi, abitungu tulekie kintu kioso kilombene kuitutakula mu kukita lulanguilo lua madimi. Biabia, abitungu dingi tuikale nsaa yooso atulanguila Yehowa mu mushindo w’akumiina na kutungunuka na kukita bi bungi mu mudimo waye. Mutemuki Malaki baadi muleeshe kalolo kuilekeena kua muntu e buwa na muntu e bubi. Bafundile’shi: “Anumono kwilekeena kwi pankatshi pa mululame na mubi, afubila Efile Mukulu na shyamufubila.” (Mal. 3:18) Biabia, atukumiina’shi Yehowa etumone bu bantu balulame. Ngi buakinyi abitungu tuikale badimukie bua’shi kintu su nkimune, bu kukutua kuetu kua kupuidika na bilubilo bietu, ta bitukutshishuanga kufubila Yehowa. Kuleka kufubila Yehowa nkuikale muluisho ukata.

17. Buakinyi abitungu tuikale badimukie pabitale muntu atusangula bua kuiyibakishena naye?

¹⁷ Su we bukupi na okomiina kutuela muiyibakishi, ano mayi a Malaki pabitale kufubila Efile Mukulu e nkukuasha naminyi bua kusangula muntu a kuiyibakishena naye? Muntu e kuikala na ngikashi i buwa anka t’afubilaa Efile Mukulu a binyibinyi, yawa mulume sunga mukashi Yehowa e kumumona bu mululame ku meeso kuaye su? (2 Ko. 6:14) Su weyibakishena na yawa muntu, enkukuasha bodia kushaala na lulamato kui Yehowa su? Tubande kutala uno muanda: Bakashi ba Nfumu Salomone bampangano babaadi na ingi ngikashi i buwa. Anka ta babaadi abalanguila Yehowa nya, ku kapeelakapeela, babaadi balubishe eshimba diaye abanga kulanguila befile ba madimi.​—1 Bf. 11:1, 4.

18. Banambutuile be kulongiesha bana babo kinyi?

¹⁸ Banambutuile, nui kufubisha bileshesho bi mu Bible bia banfumu bua kukuasha bana benu bua’shi bekale na lukalo lua kufubila Yehowa na kisumi kioso. Ebakuasheyi buabadia kupusha kalolo’shi banfumu babaabadi bakumiine kui Yehowa, babaadi abamulanguila na kunyingisha bangi bantu buabadia kulanguila Yehowa. Longieshayi bana benu mu kuakula na mu kileshesho kia mianda ya mu kikudi, bu kuilongiela Bible, kutuela mu bisangilo, kuenda mu bulungudi, mpaa na kutuula mianda yooso ya mu kikudi pa mbalo ya kumpala. (Mat. 6:33) Dingi abitungu bana benu bekale mu kipuano kia pa bupenka na Yehowa na kukumiina kumufubila abo banabene kushi pa muanda wa’shi baledi babo “Ntumonyi tua Yehowa.” Su ta mbakite bino, be kukutua kutuula lulanguilo lua Yehowa pa mbalo ya kumpala sunga kuimutuuka bua losoo.

19. Yawa ooso mulekie kufubila Yehowa e na lukulupilo kinyi? (Tala dingi kashibo akamba’shi: “We kualuka kui Yehowa!”)

¹⁹ Su muntu mmulekie kufubila Yehowa, bino abilesha’shi t’aanekale dingi kuuku a Yehowa su? Nya, ku muanda e kuilanga muishimba, alukiila dingi kui Yehowa. Buadia kukita biabia, abitungu ekale muiyishe na akumiine elango di’abamupa kui bakulu ba mu kakongie. (Yak. 5:14) Biabia, bua’shi ekale kuuku a Yehowa dingi, abitungu ekitshishe ngofu!

20. Su tubambula banfumu babaadi na lulamato, Yehowa aketumono naminyi?

²⁰ Mmalongiesha kinyi abatupetela kui banfumu ba Isalele? Tui kuikala bu bibaadi banfumu babaadi na lulamato su tualama eshimba dietu dioso dilamate nka kui Yehowa. Binobino, tulongieleyi ku bilubilo bietu, tuilangie ku mashimba, na tushintule mianda ayitungu. Na tutentekiesheyi’shi kulamata ku lulanguilo lua Efile Mukulu a binyibinyi, ngi kui na muulo. Su boshaala na lulamato kui Yehowa pa bupenka bobe, akakumono bu muntu akitaa mianda ilulame ku meeso kuaye.