Mushindo ulombene kakongie kuikala na mmueneno a Yehowa pabitale bantu bakite miluisho

1. Nkinyi akikumiina Yehowa bua bantu boso?

YEHOWA bapangile bantu na bulungantu bua kuisanguila. Ofubishaa kiakia kia buntu misusa yoso nsaa yuata bitshibilo. Kitshibilo ki na muulo ukata kilombene muntu oso kuata nkia kuilambula kui Yehowa na kutuela mu Kifuko kia balanguidi Baaye. Yehowa akumiina’shi bantu boso baate kino kitshibilo. Buakinyi? Muanda mmufule bantu na akumiina’shi bekale biya. Akumiina’shi bekale ba kuuku baye na bapete muwa wa loso.​—Miy. 30:19, 20; Nga. 6:7, 8.

2. Yehowa akumiina’shi bantu bakite miluisho bashi babande kuilanga bakite kinyi? (1 Yowano 2:1)

² Anka, Yehowa t’akitshishaa muntu su ngumune pa bukopo buadia kumufubila. Mmutadiile muntu oso buadia kuisanguila kiadia kukita. Kadi su muina Nkishitu mubatshishibue atupilua muiya w’Efile Mukulu, akita muluisho ukata? Su ta mmuilangie, abitungu kumukatusha mu kakongie. (1 Ko. 5:13) Anka, sunga yawa muntu akatushibua mu kakongie, Yehowa akumiina’shi yawa muntu elangie na alukie dingi mu kipuano kibuwa Naye. Kano nyi kabingilo akalesha buakinyi baadi mutuushe nkuulo, bua’shi bantu bakite miluisho abelanga ku mashimba bafuidibue lusa. (Badika 1 Yowano 2:1.) Efile Mukulu etu sha kifulo atekie bankitshishi ba miluisho buabadia kuilanga ku mashimba.​—Sek. 1:3; Lom. 2:4; Yak. 4:8.

3. Nkinyi ki’atulongo mu uno muisambo?

³ Yehowa akumiina’shi tuikale na mmueneno aaye pabitale bubi na mpa na bantu abebukitshi. Mu uno muisambo atulongo mushindo watudia kuibikita. Nsaa y’obadika uno muisambo, tuula binangu biobe ku (1) mushindo ubaabadi batshibe kilumbu kia muntu baadi mukite muluisho ukata mu siekele a kumpala mu kakongie ka Kodinda, (2) buludiki bubaadi Mpoolo mutuushe nsaa ibaadi muntu muilangie, na (3) akilesha uno muisambo wa mu Bible pabitale mmueneno a Yehowa kui bena Nkidishitu abakitshi muluisho ukata.

BIBAABADI BATSHIBE KILUMBU KIA MULUISHO UKATA MU SIEKELE A KUMPALA

4. Mmuanda kinyi ubakitshikile mu kakongie ka Kodinda ka mu siekele a kumpala? (1 Bena Kodinda 5:1, 2)

⁴ Badika 1 Bena-Kodinda 5:1, 2. Mu luendo luaye lua kasatu lua bu misionere, Mpoolo baadi mupushe pabitale muanda ukata ubaadi ukitshikie mu kakongie kapia ka Kodinda. Mungi mukuetu mulume a mu kakongie baadi atambuka lusandi na mukashi a nshaye. Wawa muikelo ubaadi bubi bukile na taubaadi “sunga munkatshi mua bantu ba ingi miilo”! Anka, bena kakongie babaadi bamone’shi bibuwa kutadiila yawa muntu mu kakongie. Pangi bangi mu kakongie babaadi abapuandikisha’shi be na lusa bu lu’Efile Mukulu kui bantu bakutue kupuidika. Anka Yehowa t’akuminaa bubi munkatshi mua muilo waye nya. Pa muanda wa wawa muikelo waye wibubi, bangi bashibaadi abalanguila Yehowa, babaadi bakokole pa kumona’shi muina kakongie e na muikelo wi biabia. Su ashaala mu kakongie, bangi bena Nkidishitu abakisha nsaa pamune naye babaadi balombene kumuambula. Biabia, Mpoolo bapeele kakongie buludiki kinyi?

5. Bibaadi abitungu’shi kakongie kakite kinyi, na bibaadi abipatuula kinyi? (1 Bena Kodinda 5:13) (Tala dingi kifuatulo.)

⁵ Badika 1 Bena Kodinda 5:13. Ku bukuashi bua kikudi ki’Efile Mukulu, Mpoolo bafundile mukanda atuusha buludiki bua’shi, abitungu nkitshishi a miluisho sh’elanga akatushibue mu kakongie. Bena Nkidishitu ba sha lulamato babaadi balombeene kumumona naminyi? Mpoolo bebalunguile bua “kupela kuikala mu kipuano” naye. Bino bibaadi abipatuula kinyi? Mpoolo baadi mupatuule’shi uno muiya ngutale mpa na kupela mpa na ‘kudia na yawa muntu.’ (1 Ko. 5:11) P’atushaala bua kudia na muntu kampanda, mbibofule buatudia kukisha nsaa pamune naaye na kuisamba naaye. Abipushika kalolo’shi, Mpoolo baadi akiebe kuamba’shi kakongie ta nkalombene kukisha nsaa pamune na yawa muntu. Bino mbilombene kukaluila kakongie ku muikelo waye wibubi. (1 Ko. 5:5-7) Kukatusha biabia, kupela kuabo kua kuikala mu kipuano na yawa muntu nkulombene kumukuasha buadia kumona mushindo wadi mutape Yehowa, na mmulombene kupusha buufu na biamutakula mu kuilanga.

6. Mukanda wa Mpoolo ubaadi na bukitshishi kinyi kui kakongie na kui muntu mukite muluisho?

⁶ Kunyima kuaye kutumina bena Nkidishitu ba mu Kodinda mukanda, Mpoolo babangile kuiyipusha mushindo ulombene kukita bena kakongie na mukanda ubaabapete. Ku nfudiilo, Tite bamutuadiile mukandu ubaadi umusankishe. Kakongie kabaadi kasangeele mukanda wa Mpoolo. (2 Ko. 7:6, 7) Kabaadi katumikile buludiki bubaadi muibape. Na dingi, munda mua mieshi ibaadi ikile kunyima kua Mpoolo kutuma mukanda, yawa nkitshishi a miluisho baadi muilangie ku muluisho waye! Baadi mushintuule muikelo na mueneno aaye na abanga kulonda miiya ya kululama ya Yehowa. (2 Ko. 7:8-11) Binobino Mpoolo baadi mulungule kakongie buakadia kukita kinyi?

MUSHINDO UBAADI ULOMBENE KAKONGIE KUKITSHINA NKITSHISHI A MILUISHO BELANGA MIANDA

7. Kukatusha muntu mukite muluisho mu kakongie kubaadi kutuushe kipeta kinyi kibuwa? (2 Bena Kodinda 2:5-8)

⁷ Badika 2 Bena Kodinda 2:5-8. Mpoolo bambile’shi: “Dinyoka [dibaabadi] batuushe kui bantu bebungi, ndilombane bua yawa muntu.” Mu ungi ngakuilo, dinyoka dibaadi dilombashe kepatshila kadio kuadi. Kepatshila kinyi? Kumukunkusha mu kuilanga.​—Eb. 12:11.

8. Mpoolo balunguile dingi kakongie bua kukita kinyi?

⁸ Akupu Mpoolo balunguile kakongie bua ‘kumufuila lusa na kalolo koso na kumunyingisha,’ na ‘kumushinkamiisha’shi [mbamufule].’ Lamiina’shi Mpoolo tabaadi akumiina’shi kakongie kemeene penda pa kutadiila’shi yawa muntu alukiile munkatshi mua muilo wa Yehowa nya. Mpoolo baadi akumiina’shi baleshe yawa muntu mu ngakuilo na bikitshino biabo’shi, mbamufuile lusa binyibinyi na’shi mbamufule. Babaadi balombene kulesha patooka’shi be na muloo wa kumutambula dingi mu kakongie.

9. Buakinyi bibaadi bukopo kui bangi bua kufuila muntu baadi mukite muluisho belanga lusa?

⁹ Bangi bena kakongie babaadi balombene kupusha bubi pa kumona’shi nkitshishi a miluisho belanga, balukiila dingi munkatshi muabo su? Bible t’ebiakula nya, kadi mbilombene kuikala biabia. Eyendo’shi, bikitshino biaye bibaadi biluishishe kakongie pangi na kukuatshisha bangi buufu pa bupenka. Bangi babaadi balombene kupusha’shi ta bibuwa bua’shi yawa muntu bamukuukile na muloo dingi mu kakongie bu mukuabo, aku namu abo mbakite muabo moso bua kushaala beselele mu muikelo. (Puandikisha na Luka 15:28-30.) Biabia, buakinyi bibaadi na muulo bua’shi bena kakongie baleshe mukuetu belanga ’shi mbamufule?

10-11. Nkinyi kibadia kukitshika su bakulu babadia kupela kualusha muntu mukite muluisho belanga mu kakongie?

¹⁰ Banda kupuandikisha kibadia kukitshika su bakulu babaadi bapele kualusha mu kakongie muntu belanga mu binyibinyi, sunga’shi su kakongie kabaadi kapele kulesha yawa muntu’shi nkamufule. Baadi mulombene kukuatshibua na “kenyongoshi kakile bukata.” Baadi mulombene kuipusha’shi ta mmulombene dingi kualushibua mu kakongie. Baadi mulombene mpa na kuleka kuitatshisha bua kulongamisha kipuano kiaye n’Efile Mukulu.

¹¹ Muanda ukile bubi, su bakuetu balume na bakashi ba mu kakongie babaadi bapele kufuila muntu belanga lusa, babadia kutuula mpa na kipuano kiabo na Yehowa mu masaku. Buakinyi? Muanda tababadia kuambula Yehowa afuilaa bantu bakite miluisho abelanga lusa. Pamutue pa biabia, babadia kuambula Satana, e na eshimba di bubi na shi na lusa. Babadia kutadiila Diabulu buadia kuibafubisha bua’shi bakutshishue yawa muntu kufubila Yehowa.​—2 Ko. 2:10, 11; Ef. 4:27.

12. Kakongie kabadia kuambula Yehowa naminyi?

¹² Biabia, mmushindo kinyi ubaadi ulombene kakongie ka mu Kodinda kuambula Yehowa pamutue pa kuambula Satana? Mpa kufuila muntu belanga lusa nka bu abikitaa Yehowa. Pusha bibaadi biambe bangi banfundi ba Bible pabitale Yehowa. Davide bambile’shi e na “kalolo na lusa.” (Mis. 86:5) Mika bafundile’shi: ‘Bakupwandikishe n’Efile Mukulu kinyi, obe akaasha milwisho, obe akumbu etombo meso?’ (Mik. 7:18) Na Yeeshaya bambile’shi: “Muntu-mubi alekye eshinda dyaaye, naa sha-bukitekite atadiile mpaango yaaye. Aalukiile kwi Yehowa, aye amuleesha kifulo kyaaye; eealushe kui Efile Mukulu eetu, mwanda nsha-lusa.”​—Yesh. 55:7.

13. Buakinyi tabibaadi abitungu kuyisha bua kualusha muntu belanga mu kakongie? (Tala kashibo akamba’shi: “Nsaa kinyi ibaabadi balushe mu kakongie muana mulume a mu Kodinda?”)

¹³ Bua kuambula Yehowa, kakongie ka mu Kodinda kabaadi kalombene kukuukila muntu belanga na kumushinkamiisha’shi nkamufule. Pa kutumikila buludiki bua Mpoolo bua kukuukila muntu belanga , kakongie kabaadi kaleshe’shi ‘akakookiela mu mianda yoso.’ (2 Ko. 2:9) Eyendo’shi, kubaadi kukile penda mieshi kipeela n’aye kukatushibua mu kakongie, anka dinyoka dibaadi diobeshe kumukunkusha mu kuilanga. Biabia takubaadi kabingilo ka kuyisha bua kumualusha mu kakongie nya.

MUSHINDO WATUDIA KUAMBULA KULULAMA NA LUSA LUA YEHOWA

14-15. Nkinyi kiatubalongiela ku mushindo ubaabadi batshibe kilumbu kia mu Kodinda a kala? (2 Mpiele 3:9) (Tala dingi kifuatulo.)

¹⁴ Pabitale mushindo ubaabadi batshibe kilumbu kia mu Kodinda a kala ubaadi ufundibue na ulamibue bua “kuitulongiesha.” (Lom. 15:4) Mu uno muisambo atulongo’shi, Yehowa t’atadiilaa bantu abakitshi miluisho bash’abelanga munkatshi a muilo waye nya. T’ekalaa na mueneno a’shi, muntu mukite muluisho sh’elanga abitungu “kumufuila lusa” na kumutadiila ebungu pamune na balanguidi baaye ba sha lulamato nya. Sunga Yehowa ekala sha lusa, t’atadiilaa muikelo wibubi wa mushindo oso nya. Miiya yaaye pabitale kibuwa na kibubi tayishintulukaa nya. (Yu. 4) Eyendo’shi, su atadiila nkitshishi a bubi sh’elanga mu kakongie, lualua ta ndusa dingi nya muanda kakongie nkalombene kuluishibua.​—Nki. 13:20; 1 Ko. 15:33.

¹⁵ Kadi, tubalongo’shi Yehowa t’akumiina’shi muntu su ngumune abutudibue nya. Akumiina kupaasha bantu nsaa yoso yakudi mushindo. Aleshaa lusa kui bantu abashintuula mashimba aabo na abakumiina kulumbuula kipuano kiabo naaye. (Es. 33:11; badika 2 Mpiele 3:9.) Pabaadi muana mulume a mu Kodinda muilangie na ashintuula muikelo waaye, Yehowa baadi mufubishe Mpoolo bua kupatuluila kakongie’shi abitungu kumufuila lusa na kumutambula dingi mu kakongie na muloo.

16. Opusha naminyi pabitale mushindo ubaabadi batshibe kilumbu kia mu Kodinda?

¹⁶ Kutaluula kuetu kua mushindo ubaabadi batshibe kilumbu kia mu Kodinda a kala kubetukuasha bua kumona mushindo wikale Yehowa na kifulo na kululama. (Mis. 33:5) Bino t’abikutakula bua kutungunuka na kutumbisha Efile Mukulu ngofu su? Tui na lutumbu lukata bu biadi na lusa, muanda atue boso atukitaa miluisho na tui na lukalo lua kufuidibua lusa. Oso a kuatudi e na kabingilo kakata ka kuikala na lutumbu kui Yehowa bua nkuulo, muanda ngikuashe bua’shi tufuidibue lusa. Abitunyingisha ngofu pa kuuka’shi Yehowa mmufule bantu baaye binyibinyi na akumiina’shi bekale biya!

17. Atukataluula kinyi mu miisambo ayilondo?

¹⁷ Tui kuamba naminyi pabitale kutshiba kilumbu kia muluisho ukata lelo uno? Bakulu ba mu kakongie mbalombene kuambula Yehowa naminyi, aye akumiina’shi bakunkushe muntu mukite muluisho mu kuilanga? Su bakulu abaata kitshibilo kia kukatusha muntu sunga kumualusha mu kakongie, kakongie nkalombene kukita kinyi? Atukaluula ku ino nkonko mu miisambo ayilondo.