MUISAMBO WA KULONGA 4
LOONO 18 Lutumbu bwa nkuulo
Nkuulo ayitulongiesha kinyi?
“Mu uno mushindo nyi mubaadi muleshibue kifulo.”—1 YO. 4:9.
KI’ATUISAMBILA
Nkuulo ayilesha ngikashi i buwa ya Yehowa na Yesu.
1. Miabi kinyi y’atupete pa kutuela ku Kitentekiesho kia lufu lua Nkidishitu?
KUSHI MPAKA, okumiina’shi nkuulo nyi kia buntu ki na muulo ukata! (2 Ko. 9:15) Pa muanda Yesu baadi mutuushe muwa waye, we mulombene kuikala kuuku a Yehowa. We na dingi lukulupilo lua muwa wa loso. Tui na tubingilo tui bungi tua kutumbula Yehowa p’aye kutuusha nkuulo, muanda muitufule ngofu! (Lom. 5:8) Bua kutungunuka na kulesha lutumbu, na bua’shi tatubepuulanga nkuulo, Yesu muitutumine eyi dia kutuelanga ku Kitentekiesho kia lufu luaye kipua kioso.—Luk. 22:19, 20.
2. Kinyi kiatumono mu uno muisambo?
2 Kino kipua, Kitentekiesho akikitshika mu dia Mpooso 12/4/2025. Kushi mpaka, atue boso atuilumbula bua kuikituela. Atunyisha kupeta bukuashi, su mu kipungo kia Kitetenkieshio tua nangushenaa ngofu pabitale bitukitshine Yehowa na Yesu. Mu uno muisambo, atumono akitulongiesha nkuulo pabitale Yehowa na Muana aaye. Muisambo aulondo, awitukuasha bua kuuka mushindo wa kupetela miabi ku nkuulo, na biakulesha lutumbu.
AKITULONGIESHA NKUULO PABITALE YEHOWA
3. Mushindo kinyi wi lufu lua muntu umune lukuule midiyo ya bantu? (Tala dingi kifuatulo.)
3 Nkuulo ayitulongiesha pabitale kululama kua Yehowa. (Det. 32:4) Mmushindo kinyi? Bu kileshesho: Pa muanda wa kukutua kukookiela kua Adama, tuibapiane muluisho autuala ku lufu. (Lom. 5:12) Bua kuitufungusha ku bupika bua muluisho na lufu, Yehowa baadi mutume Yesu bua kutuusha nkuulo. Biabia, mulambu wa muntu umune mupuidikie, wi kukuula midiyo ya bantu naminyi? Mpoolo mutumibua apatuula’shi: “Anka bu bikale’shi kukiila ku kukutua kukookiela kua muntu umune [Adama], bantu be bungi mbafikie ba sha miluisho, mu mushindo umune, kukiila ku kukookiela kua muntu umune [Yesu], bantu be bungi abakafiki balulame.” (Lom. 5:19; 1 Ti. 2:6) Mu ungi ngakuilo, Mpoolo baadi amba’shi, bantu boso mbena miluisho na mbalombene lufu muanda wa kukutua kukookiela kua muntu umune. Anka, kukookiela kua muntu umune mupuidikie nkuitufungushe mu buno bupika.
Pa muanda wa muntu umune, atue boso tui ku bupika bua muluisho na lufu. Ku bukuashi bua muntu umune Yesu, tui kufungushua ku bupika bua muluisho na lufu (Tala kikoso 3)
4. Buakinyi Yehowa ta mutadiile bana ba Adama abamukookiela buabadia kuikala na muwa wa loso?
4 Bibaadi abitungu nka’shi Yesu afue bua kuitupaasha su? Buakinyi Yehowa ta baadi mutadile bana ba Adama abamukookiela bua kuikala na muwa wa loso? Bua bantu bakutue kupuidika, kino nyi kintu kibaadia kuikala buwa kukita. Bua Yehowa, kukita bino ta kubadia kuikala buwa. Muanda bibadia kuikala nka bu’shi Adama ta mukite muluisho, mpa na bana baye.
5. Buakinyi tui balombene kushinkamisha’shi Yehowa akakitshi nka kiakia ki buwa?
5 Na dingi, su Yehowa tabadia kutusha nkuulo bua’shi bana ba Adama sunga biabadi bakutue kupudika bekale na muwa wa loso, badia kukutua kutumikila mayi aaye a kulonda pabitale ki buwa na ki bubi. Bu kipeta, bantu abadia kuikala abekalakasha pa muanda wa’shi ta mutumikile dingi mayi aaye a kulonda, na’shi ta mukite bibaadi muambe’shi akitshi mu mafuku aafiki. Bu kileshesho, bantu abadia kuiyipusha su Yehowa alombasha milayilo yaye yoso. Tatuikalakashanga pabitale uno muanda. Buakinyi? Muanda Yehowa baadi mukite kiakia kibaadi kilulame, sunga biabibadi abitungu’shi alambule Muana aaye. Biabia tushinkamishe’shi akakitshi nka kiakia ki buwa.
6. Dingi eyikashi kinyi dibaadi ditakule Yehowa bua kutuma Muana aaye pa nsenga? (1 Yowano 4:9, 10)
6 Sunga biabidi’shi nkuulo ayitukuasha bua kupusha bi kululama kua Yehowa, ayitukuasha bikishekishe bua kumona bukata bua kifulo kiadi muitufule. (Yo. 3:16; badika 1 Yowano 4:9, 10.) Dilongiesha dia nkuulo adilesha’shi Yehowa t’akumiina penda’shi tuikale na muwa wa loso nya, kadi tuikale dingi mu kifuko kiaye. Bu kileshesho: Nsaa ibaadi Adama mukite muluisho, Yehowa baadi mumubingie mu kifuko kiaye. Bu kipeta, atue boso tuibatandikue paasha pa kifuko ki’Efile Mukulu. Anka ku bukuashi bua nkuulo, Yehowa muitufuile lusa ku miluiso yetu na muenda mafuku akatuesha bantu boso abalesha lukumiino na basha kukookiela mu kifuko kiaye. Mpa na binobino tui balombene kuikala mu kipuano ki buwa na Yehowa mpa na be na kulanguila netu. Kushi mpaka, Yehowa muitufule!—Lom. 5:10, 11.
7. Yesu baadi mukiengie ngofu kumpala kua kufua. Bino abitulongiesha kinyi pabitale kifulo kia Yehowa?
7 Tui kupusha kalolo mushindo witufule Yehowa nsaa y’atunangushena ku mushindo ubabidi bimutape kuishimba p’abaadi amono Muana aaye akiengie. Satana amba’shi mufubi su ngumune a Efile Mukulu t’ashala na lulamato kuadi nsaa yabidi bukopo kuibikita. Bua kulesha’shi Satana sha madimi, Yehowa baadi mutadile’shi Yesu akiengie kumpala kua kufua. (Yob. 2:1-5; 1 Mp. 2:21) Yehowa baadi amono ku’abasepe Yesu, ku’abamukupila kui basalayi, na ku’abamukokola ku mutshi. Kunyima, Yehowa baadi mumone abikiengie Muana aaye adi mufule kumpala kua kufua. (Mat. 27:28-31, 39) Yehowa baadi na bukome bua kukita bia’shi bino bioso tabikitshikanga. Bu kileshseho, nsaa ibaadi bantu bambe’shi: “[Efile Mukulu] amupaashengie su mumukumiine,” Yehowa baadia kukita nka biabia. (Mat. 27:42, 43) Anka su Efile Mukulu baadia kukita biabia, nkuulo tayibadia kutuushibua na ta tubaadi kuikala na lukulupilo. Biabia Yehowa baadi mutadile’shi Muana aaye akiengie mpa na ku lufu.
8. Yehowa baadi muinyongole pa kumona Muana aaye akiengie su? Patuula. (Tala dingi kifuatulo.)
8 Tatukumanga kunangushena’shi bu bi Efile Mukulu sha bukome boso, t’akalakashuaa! Tuibapangibue ku kifuanyi kiaye, bapangibue na ngobesha ya kupusha muloo sunga kinyongua, nka bu Yehowa. Bible alesha’shi Yehowa ‘enyongolaa.’ (Mis. 78:40, 41) Tubandeyi kutaluula muanda wa Abrahama na Isaake. Otentekiesha’shi Abrahama abaadi bamutekie bua kulambula muana aaye umune eeleka? (Kib. 22:9-12; Eb. 11:17-19) Banda kunangushena kinyongua kibaadi kipushe Abrahama pabaadi mukuate kapete bua kuipaa muana aaye. Kinyongua bungi kinyi kibaadi kipushe Yehowa pabaadi amono muana aaye abamukiengiesha mpa na ku muipaa!—Tala video amba’shi, Ambulayi lukumiino luabo: Abrahama, Kipindi 2.
Yehowa baadi muinyongole ngofu pabaadi amono Muana aaye akiengie (Tala kikoso 8)
9. Nkinyi kiodi mulombene kulongiela mu Bena Loma 8:32, 38, 39 pabitale kifulo kia Yehowa?
9 Nkuulo ayitulongiesha’shi ta kui muntu su ngumune muitufule ngofu bu Yehowa, sunga ekala kuuku etu a p’eshimba. (Badika Bena Loma 8:32, 38, 39.) Kushi mpaka, Yehowa muitufule kuitukila mpa n’atue banabene. Okumiina kuikala na muwa wa loso? Yehowa ebikumiina nkukila mpa na oobe nabene. Okumiina’shi bakufuile lusa ku miluiso yobe? Yehowa ebikumiina nkukila mpa na oobe. Kioso ki’etutekie nkia’shi tukumiine kia buntu kiaye ki buwa pa kulesha lukumiino na pa kukookiela. Nkuulo ayilesha binybinyi kifulo kikata kia Yehowa. Na mu nsenga ipia, atukalongo ingi mianda i bungi pabitale kifulo kia Yehowa.—Mul. 3:11.
AKITULONGIESHA NKUULO PABITALE YESU
10. (a) Nkinyi kibaadi kinyongoshe Yesu ngofu pabitale lufu luaye? (b) Mu mushindo kinyi mubaadi Yesu mukaluilo eshina dia Yehowa? (Tala dingi kashibo akamba’shi “Lulamato lua Yesu lubaadi lukaluile eshina dia Yehowa.”)
10 Yesu baadi ekalakasha ngofu pabitale nkumo ya Nshaye. (Yo. 14:31) Yesu baadi muinyongole ngofu muanda babaadi na kia kumuipaa bu muntu bakutua kanemo kui Efile Mukulu. Nyi buakinyi batekiele’shi: “Yaya, su kui mushindo, kino kipulu kikile kula nami.” (Mat. 26:39) P’aye kulama lulamato kui Yehowa mpa na ku lufu, Yesu baadi muleshe patooka’shi Satana sha madimi.
11. Mushindo kinyi ubaadi Yesu muleshe’shi mufule bantu ngofu? (Yowano 13:1)
11 Nkuulo ayitulongiesha dingi’shi Yesu ekalakashaa ngofu bua bantu, bikishekishe balongi baye. (Nki. 8:31; badika Yowano 13:1.) Bu kileshesho, Yesu baadi auku’shi kulombasha mudimo waye pa nsenga akuikala bukopo, bikishekishe lufu luaye. Sunga mbiabia, pabaadi pa nsenga, ta baadi mukite uno mudimo nka penda bua kuiukita, baadi eukitshi bikishekishe muanda baadi mufule bantu. Na Yesu baadi muipaane mu mudimo wa bulungudi, wa kulongiesha, na kufubila bangi. Mpa na efuku dia lufu luaye, Yesu baadi musuule ngua ya batumibua baye, na aye nkuibalongiesha na kuibanyingisha. (Yo. 13:12-15) Akupu, sunga bibaadi akiengie ngofu na kufua ku mutshi wa makiengie, Yesu baadi mupe ntomboshi baadi ku lupese luaye lukulupilo lua kuikala na muwa mu Mpaladiso, na baadi dingi muikalakashe bua nyinaye na aye nkuteka Yowano bua kumupasukila. (Luk. 23:42, 43; Yo. 19:26, 27) Yesu baadi muleshe’shi mufule bantu kushi penda pa nsaa ya lufu luaye, kadi mu muwa waye oso pa nsenga.
12. Nkinyi kikuete kuitukitshina Yesu binobino?
12 Eyendo’shi, Nkidishitu baadi mufue “musango umune,” anka ki’atungunuka na kuitukitshina mianda i bungi. (Lom. 6:10) Mu mushindo kinyi? Ki’atungunuka na kufuba bua kuitupa bintu bi bungi biatudi nabio lelo uno pa muanda wa nkuulo. Tala mianda ya kuete kukita. Kuete kufuba bu nfumu, Tshite muakuidi mukata, na bu nfumu a kakongie. (1 Ko. 15:25; Ef. 5:23; Eb. 2:17) E na mudimo wa kubuunga bediibue muimu na kibumbu kikata, mudimo aukapu kumpala kua’shi mpombo ikata ipue.b (Mat. 25:32; Mak. 13:27) Kuete kufubisha mpika a lulamato na mudimukie buadia kutungunuka na kuitupa bia kudia bia mu kikudi mu ano mafuku a ku nfudiilo. (Mat. 24:45) Na mu Bipua Kinunu bia Kumunana kuaye, akatungunuka na kuitukitshina mianda. Kushi mpanka, Yehowa muitupe Muana aaye!
TUNGUNUKA NA KULONGA MIANDA IPIA
13. Mbikunyi biodia kutungunuka na kulonga pabitale kifulo kituleshe Efile Mukulu na Nkidishitu?
13 We kutungunuka na kulonga pabitale kifulo kituleshe Yehowa Efile Mukulu na Nkidishitu Yesu, su otungunuka na kunangushena pabitale biabadi bakukitshine. Pangi mu kipungo kia Kitentekiesho kia kino kipua, we kubadika na kunangushena evanjile umune sunga i bungi. Tokumanga kubadika ma shapitre e bungi musango umune. Anka, badika kapela kapela na okimbe tungi tubingilo atuitutakula bua kufula Yehowa na Yesu. Na dingi, lungula bangi mianda ibobadika.
14. Muyile Misambo 119:97, kukimbuula nkuulombene kuitukuasha bua kutungunuka na kulonga mianda ipia pabitale nkuulo na angi malongiesha naminyi? (Tala dingi kifuatulo.)
14 Su we mubatshishibue takudi bipua bi bungi, we kuiyipusha su kui mianda ipia yodia kulonga pabitale miisambo yueuku kalolo, bu kululama ku’Efile Mukulu, kifulo kiaye na nkuulo. Bua kuakula kalolo, atutungunuka nka na kulonga mianda ipia pabitale ino miisambo na ingi. Biabia we kukita kinyi? Badika na w’elongiele mianda i buwa i mu mikanda yetu. Su bopete kifundue kiosh’opusha kalolo, kimbuula. Akupu, muifuku dishima, nangushena pa yaya mianda yodi mubadikie na ki’ayikulongiesha pabitale Yehowa, Muana aaye, na biabadi bakufule.—Badika Misambo 119:97.
Sunga tu’ekala babatshishibue takudi bipua bi bungi, tui kunyisha kulesha lutumbu bua nkuulo (Tala kikoso 14)
15. Buakinyi abitungu tutungunukie na kukimba mabue a muulo a mu Bible?
15 Tobofulanga su tuemupete kintu kipia nsaa yoso y’obadika sunga y’okimbuula. Mu ngakuilo a mu kifuanyi, we’nka bu muntu akimbaa ôlo. Na luishinko loso, muntu akimbaa ôlo akishaa nsaa sunga mafuku e bungi kumpala kua kupeta sunga kabue kapela ka ôlo. Anka, abatungunuka na kukimba muanda kabue sunga kapela ka ôlo ke na muulo kuabadi. Mianda ipia yatupete mu Bible i na muulo ukata kukila ôlo! (Mis. 119:127; Nki. 8:10) Biabia ikala na luishinko na otungunukie na kubadika Bible efuku dioso.—Mis. 1:2.
16. Mushindo kinyi watudia kuambula Yehowa na Yesu?
16 Nsaa yuelongiela, kimba mishindo ya kutumikila mianda yolongo. Bu kileshesho, ambula kululama kua Yehowa pa kukitshina bangi mianda kushi ntondo. Ambula kifulo kia Yesu bua Nshaye na bua bangi pa kukumiina kukienga bu’eshina dia Yehowa na kukumiina kukuasha bangi sunga biekala bukopo. Dingi, ambula Yesu pa kulungula bangi mukandu wi buwa bua’shi na bo namu bapete mushindo wa kukumiina kia buntu ki na muulo ukata kia Yehowa.
17. Nkinyi ki’atukataluula mu muisambo aulondo?
17 Patunyisha kupusha na kulesha lutumbu bua nkuulo, atunyisha kufula Yehowa na Yesu. Na pa muanda atunyisha kuibafula, abo namu abanyisha kuitufula ngofu. (Yo. 14:21; Yak. 4:8) Biabia, tutungunukieyi na kufubisha kalolo bintu bioso abitupa Yehowa bua’shi tutungunukie na kulonga pabitale nkuulo. Mu muisambo aulondo, atukataluula ingi mishindo yatudi balombene kupeta bukuashi bua nkuulo na mushindo watudia kulesha lutumbu bua kifulo kia Yehowa.
LOONO 107 Kileshesho kya kifulo kya Yehowa
a KISHIMA KIABADI BAPATUULE: “Kunangushena” akulesha kutuula binangu bioso ku muanda okuete kubadika na kunangushena ngofu pabitale wawa muanda bua kuiupusha kalolo.
b Kubungibua kua “bintu bi muiyilu” kubaadi Mpoolo muakuile mu Bena Efeso 1:10, nkuilekeene na kubungibua kua “basangulue baye” kuabakuila kui Yesu mu Mateo 24:31 na mu Maako 13:27. Mpoolo akuila kipungo kibaadi Yehowa musangule bedibue muimu abakamunana na Yesu pa kuibela muimu na kikudi kiselele. Yesu akuila kipungo ki’abakabungu bedibue muimu baki pa nsenga mu mpombo ikata.