Ambula kisumi kia Yesu mu bulungudi

1. Kuilekena kinyi kui pankatshi pa bafubi ba Yehowa na bantu abeambaa bu bena Nkidishitu?

BAFUBI ba Yehowa be na kisumia mu bulungudi, bino abilesha kuilekena kuabo na bangi bantu abeamba bu bena Nkidishitu. (Tt. 2:14) Anka, ingi nsaa we kumona’shi, bi bukopo bua kuikala na kisumi mu bulungudi. Pangi ingi nsaa we kuipusha nka bu ungi mukulu mu kakongie, amba’shi: “Ingi nsaa tanyikalaa na kisumi kia kulungula mukandu wi buwa.”

2. Buakinyi ingi nsaa bi kuikala bukopo bua kulama kisumi mu mudimo wa bulungudi?

² Tui kuikala na muloo wa kufubila Yehowa mu ungi mushindo, kukila kulungula mukandu wi buwa. Buakinyi? Muanda tui kumona bipeta musango umune, bu patuibaka sunga kulumbuula mashibo a Ndumbuluilo, kukuasha apatuuku masaku sunga kunyingisha bakuetu. Nsaa yatufubu na bakuetu, atufubu mu butaale, na atuileshena kifulo. Dingi atuuku’shi, bakuetu be na lutumbu bua bi’atuibakitshina. Anka, tubapu kulungula mukandu wi buwa mu terituare umune munda mua bipua bi bungi, kadi kushi kukamba kupeta bipeta bi buwa. Pangi, tukuete kufumankana na bantu bash’abakumiina kuteemesha mukandu wetu. Na dingi, atuuku’shi, bu bikuete kuenda na kuifubuila nfudiilo, bantu abaketubingabinga. (Mat. 10:22) Nkinyi ki kuitukuasha bua kulama sunga kufuimisha kisumi kietu bua mudimo wa bulungudi?

3. Tui kulongiela kinyi ku kileshesho kia Yesu ki mu Luka 13:6-9?

³ Kileshesho kia Yesu ki kuitukuasha bua kuikala na kisumi mu bulungudi. Pa baadi pa nsenga, ta baadi mubofushe kisumi kiaye mu bulungudi. Muenda mafuku, baadi mpa na mufuimishe kisumi kiaye. (Badika Luka 13:6-9.) Nka bu mufubi a muifuba dia nfigiye baadi mukite bipua bisatu na kuelela mutshi wa nfigiye bufukie ushibaadi aupa bikuba, Yesu baadi mukite bipua bisatu, alungulanga bena Yunda mukandu wi buwa, anka be bungi ba kuabadi ta babaadi abakumiina mukandu wi buwa. Nka bu mufubi a muifuba shi baadi mukookie kuela bufukie ku mutshi wa nfigiye, Yesu namu ta baadi mukookie sunga kupeelesha kisumi kiaye mu bulungudi. Baadi mpa na muikitamishe bua kukuma mashimba a bantu.

4. Mianda kinyi inanka yatulongiela ku kileshesho kia Yesu?

⁴ Mu uno muisambo, atulongo mushindo ubaadi Yesu muleshe kisumi, bikishekishe munda mua mieshi isamombo ya nfudiilo ya mudimo waye wa bulungudi. Kulonga bibaadi mukite na kuambula bibaadi mukite, akuitukuasha bua kulama kisumi kietu lelo uno. Atutaluula mianda inanka yatudia kulongiela ku kileshesho kia Yesu: (1) Baadi mutuule binangu mu kukita kikiebe ki’eshimba dia Yehowa, (2) baadi mupushe na kukita mianda mu kuipushena na matemuki a mu Bible, (3) baadi mukulupile’shi Yehowa amukuasha, na (4) baadi akulupila’shi bangi bantu abamuteemesha.

BAADI MUTUULE BINANGU BIAYE MU KUKITA KIKIEBE KI’ESHIMBA DIA YEHOWA

5. Mushindo kinyi ubaadi Yesu muleshe’shi mutuule binangu biaye mu kukita kikiebe ki’eshimba di’Efile Mukulu?

⁵ Na kisumi kioso, Yesu baadi mulungule “mukandu wi buwa wa Bufumu,” muanda baadi auku’shi nyi mudimo ubaadi aukumiina Efile Mukulu’shi akite. (Luk. 4:43) Yesu baadi mutuule mudimo wa bulungudi pa mbalo ya kumpala mu nshalelo aaye. Mpa na mu mieshi ya nfudiilo ya mudimo waye, Yesu baadi ende mu “bibundi bikata na bipela,” bua kulongiesha bangi. (Luk. 13:22) Baadi mpa na mulongieshe bangi balongi bua kulungula mukandu wi buwa bu’ye.​—Luk. 10:1.

6. Nkuipushena kinyi kui pankatshi pa mudimo wa bulungudi na ingi midimo ya teokrasi? (Tala dingi kifuatulo.)

⁶ Lelo uno, kulungula mukandu wi buwa nyi mudimo wa kumpala aukiebe Yehowa na Yesu’shi tukite. (Mat. 24:14; 28:19, 20) Kui kuipushena pankatshi pa mudimo wa bulungudi na ingi midimo ya teokrasi. Bu kileshesho, atuibaka mashibo a teokrasi sunga kufuba ku Betele bua kukuatshishena mudimo wa bulungudi. Nsaa ayituuku masaku, atukuashaa bakuetu bua’shi bekale na bintu biabadi nabio lukalo, bua’shi babanguule kutuela mu bisangilo na kulungula mukandu wi buwa. Nsaa y’atushinguula muulo wa bulungudi na kuuka’shi nyi mudimo wi na muulo aukumiina Yehowa’shi tukite, abitutakula bua kuiulungula pa kiubishi. János, ungi mukulu a mu Hongrie, amba’shi: “Natentekieshaa’shi, ta kui mudimo wa kupiana bulungudi; nyi mudimo wa kumpala.”

7. Buakinyi Yehowa akumiina’shi tutungunukie na kulungula mukandu wi buwa? (1 Timote 2:3, 4)

⁷ Tui kutamisha kisumi kietu mu bulungudi, su atumono bantu mu mushindo awibamonaa Yehowa. Akumiina’shi bantu be bungi bapushe mukandu wi buwa na beukumiine. (Badika 1 Timote 2:3, 4.) Nyi buakinyi, kuete kuitulongiesha bua’shi tulumbuule mayele eetu akulungula uno mukandu aupaasha miuwa. Bu kileshesho, broshire a Fula bantu bua kuibekasha bu balongi, e na mayele aetukuasha bua kubanga muisambo na kepatshila ka kuikasha bantu bu balongi. Su bantu tabakumiine binobino, balombene nkapeta mushindo wa kuibikita kumpala kua’shi mpombo ikata ipue. Bi’atuibalungula binobino, mbilombene nkebatakula bua nkafubila Yehowa mu mafuku aafiki. Bino bikukitshika nka su tuatungunuka na kulungula mukandu wi buwa.

BAADI APUSHA NA KUKITA MIANDA MU KUIPUSHENA NA MATEMUKI A MU BIBLE

8. Mbikunyi bibaadi matemuki a mu Bible akuashe Yesu bua kufubisha nsaa yaye kalolo?

⁸ Yesu baadi mupushe mushindo ubaadi na kia kulombana matemuki a mu Bible. Baadi auku’shi mudimo waye wa bulungudi aukitshi penda bipua bisatu na kipindi. (Nda. 9:26, 27) Baadi dingi auku bibaadi abiakula matemuki pabitale nsaa na mushindo wakafu. (Luk. 18:31-34) Bu bibaadi auku matemuki, Yesu baadi mufubishe nsaa yaye mu mushindo wi buwa. Bu kipeta, baadi mulungule mukandu wi buwa na kisumi bua kupua mudimo ubabaadi bamupe bua kukita.

9. Kupusha matemuki a mu Bible akuitukuasha bua kutungunuka na kulungula mukandu wi buwa na kisumi naminyi?

⁹ Kupusha kua matemuki a mu Bible kui kuitukuasha bua kulungula mukandu wi buwa na kisumi. Atuuku’shi uno ndumbuluilo afudiila binobino. Mianda ikuete kukitshika na bikitshino bia bantu lelo uno, abilesha bibaadi bitemukie Bible pabitale mafuku a nfudiilo. Tukuete kumona kuikakena kui pankatshi pa Bukome bua nsenga ishima bua Anglo-Americaine na Russie na maumbo aamukuatshishena, abikumbasha butemuki pabitale nfumu a kunuundu na nfumu a kuushi “mu mafuku a ku nfudiilo.” (Nda. 11:40) Atupusha dingi’shi, Bukome bua nsenga ishima bua Anglo-Americaine nyi buabadi baleshe bu ngua ya nkishi emu Ndanyele 2:43-45. Mu kuilongiela kuetu kua matemuki, tuibashinkamishe’shi, binobino Bufumu bu’Efile Mukulu abubutula mbulamatadi ya bana ba bantu. Ano oso matemuki, aalesha’shi tubefubuila ngofu ku nfudiilo, biabia abitungu tufubishe nsaa yetu mu mushindo wi buwa bua kulungula mukandu wi buwa na kisumi.

10. Mu ungi mushindo kinyi mui matemuki a mu Bible aakunyingisha bua kuikala na kisumi mu bulungudi?

¹⁰ Na dingi, matemuki a mu Bible e na mukandu awitutakula mu kulungula mukandu wi buwa na kisumi. Ungi mukuetu mukashi abetaminaa bu Carrie a mu République Dominicaine, amba’shi: “Nsaa yanangushena ku bintu bi buwa bilee Yehowa’shi akakitshi mu mafuku aafiki, nepusha mu kitungo kia kulungula bangi bianka. Akumba’sha’shi: “Pamono abikiengie bantu lelo uno, namono’shi ino milayilo tayintale penda’mi, anka ngibatale nabo namu. Matemuki a mu Bible aalesha’shi Yehowa kuete kuitukuasha mu uno mudimo, na bino abitungunyingisha bua kutungunuka na kulungula mukandu wi buwa. Leila, mushale mu Hongrie amba’shi: “Yeeshaya 11:6-9 anyingisha bua kulungula mukandu wi buwa mpa na kui baaba abamueka bu bash’abakumiina. Nauku’shi muntu ekushintuluka ku bukuashi bua Yehowa.” Na Christopher, mukuetu mulume a mu Zambie, amba’shi: “Anka bu bibaadi bitemukie Maako 13:10, mukandu wi buwa ukuete kupalakana mu nsenga ishima, dingi ne na kinemo kia kukuasha mu kulombana kua buno butemuki.” Matemuki kinyi a mu Bible ankunyingisha bua kutungunuka na kulungula mukandu wi buwa?

BAADI MUKULUPILE’SHI YEHOWA AMUKUASHA

11. Buakinyi bibaadi abitungu’shi Yesu akulupile Yehowa bua kutungunuka na kulungula mukandu wi buwa na kisumi? (Luka 12:49, 53)

¹¹ Yesu baadi mukulupile bukuashi bua Yehowa bua kutungunuka na kulungula mukandu wi buwa na kisumi. Sunga bibaadi Yesu akula na kanemo, baadi auku’shi mukandu wi buwa wa Bufumu aumutuadila mushikua wi bukopo. (Badika Luka 12:49, 53.) Bakata ba bipuilo ta babaadi abakumiina’shi Yesu ekale alungula mukandu wi buwa, nyi buakinyi abaadi abakimbi ku muipaa. (Yo. 8:59; 10:31, 39) Anka Yesu batungunukile na kulungula mukandu wi buwa muanda baadi auku’shi Yehowa baadi naye. Bambile’shi: “Yaya muntume e nami . . . tammundekiele nya, muanda nakitaa nka mianda ayimusankisha.”​—Yo. 8:16, 29.

12. Mushindo kinyi ubaadi Yesu mulumbuule balongi baye buabadia kutungunuka na kulungula mukandu wi buwa sunga bibakudi mushikua?

¹² Yesu baadi mulungule balongi baye’shi mbalombene kukulupila bukuashi bua Yehowa. Misango na misango baadi muibashinkamishe’shi Yehowa ebakuasha sunga bafumankana na kubinguabingua kui bukopo. (Mat. 10:18-20; Luk. 12:11, 12) Anka baadi muibanyingishe bua kuikala na budimu. (Mat. 10:16; Luk. 10:3) T’abakitshishanga muntu bua’shi ateemeshe mukandu wabo. (Luk. 10:10, 11) Na baadi muibalungule bua kusuuka su bebabingabinga. (Mat. 10:23) Sunga bibaadi Yesu na kisumi na mukulupile Yehowa, ta baadi atuulu muwa waye mu masaku.​—Yo. 11:53, 54.

13. Nkinyi akikushinkamisha’shi Yehowa akukuasha?

¹³ Lelo uno, tui na lukalo lua bukuashi bua Yehowa bua kuikala na kisumi mu bulungudi, muanda bantu be bungi mbetushikue. (Kbf. 12:17) Nkinyi akikushinkamiisha’shi Yehowa akukuasha? Tala luteko lua Yesu lui mu Yowano shapitre 17. Yesu baadi mutekie Yehowa bua’shi alame batumibua baye, na Yehowa baadi mumualuule. Mukanda wa Bikitshino aulesha mushindo ubaadi mukuashe batumibua bua kulungula mukandu wi buwa sunga bibakudi kubinguabingua. Mu luteko luaye, Yesu baadi mutekie Yehowa bua’shi alame baaba boso abakalesha lukumiino mu mukandu wa batumiba. Mpa n’obe. Yehowa ki’atungunuka na kualuula luteko lua Yesu; akukuasha nka bu bibaadi mukuashe batumibua.​—Yo. 17:11, 15, 20.

14. Buakinyi tuibashinkamishe’shi atutungunuka na kulungula mukandu wi buwa na kisumi sunga tuekala mu nkalakashi? (Tala dingi kifuatulo.)

¹⁴ Sunga biakekala bukopo bua kulungula mukandu wi buwa na kisumi bu abiende na kuifubuila nfudiilo, atukapete bukuashi buatukekala nabo lukalo. (Luk. 21:12-15) Nka bu Yesu na balongi baye, atutadiila bantu bua’shi baate kitshibilo kia kuituteemesha sunga kupela, na tatuikakena nabo. Mpa na pabadi bakandikie mudimo wetu, bakuetu mbapete mushindo wa kutungunuka na kulungula mukandu wi buwa, muanda mbakulupile mui Yehowa, kushi mu bukome buabo’bo banabene. Nka bu bibaadi Yehowa mupe bafubi baye ba mu siekele a kumpala bukome, lelo uno kuete kuitupa bukome bua’shi “mufubo wa bulungudi ulombashibue kalolo.” (2 Tim. 4:17) Ikala mushinkamishe’shi su bokulupila Yehowa, otungunuka na kulungula mukandu wi buwa na kisumi.

BAADI MUKULUPILE’SHI BANGI BANTU ABAKAMUTEEMESHA

15. Nkinyi akilesha’shi Yesu baadi na binangu bi buwa pabitale mudimo wa bulungudi?

¹⁵ Yesu baadi na binangu bi buwa pabitale mudimo wa bulungudi. Bino bibaadi bimukuashe bua kuikala na muloo na kutungunuka na kulungula mukandu wi buwa. Bu kileshesho, mu 30 B.B., Yesu baadi mumone’shi bantu be bungi abaadi abakumiina kupusha mukandu wi buwa, nyi aye nkuibapuandikisha n’efuba dibaapu kukome bua kumbula. (Yo. 4:35) Kipua kimune kunyima, balunguile balongi baye’shi: “Mufubo wa kuumbula ngukata.” (Mat. 9:37, 38) Kunyima dingi, baadi mushimikie kasele’shi: “Mufubo wa kuumbula ngukata, . . . Biabia, tekayi mukata a mufubo wa kuumbula buadia kutuma bafubi mu mufubo waye wa kuumbula.” (Luk. 10:2) Yesu baadi nka mushinkamishe’shi kui bangi bantu abakumiina kuteemesha mukandu wi buwa, na baadi na muulo pababadi abateemesha.​—Luk. 10:21.

16. Mushindo kinyi aulesha bileshesho bia Yesu’shi abitungu kuikala na binangu bi buwa pabitale mudimo wa bulungudi? (Luka 13:18-21) (Tala dingi kifuatulo.)

¹⁶ Yesu baadi mulongieshe balongi baye buabadia kuikala na binangu bi buwa pabitale mukandu wabo, ubaadi na kia kuibanyingisha bua kuikala na kisumi. Tubande kutala bileshesho bibidi. (Badika Luka 13:18-21.) Yesu baadi mufubishe kileshesho kia lutete lua mutarde bua kulongiesha’shi mukandu wa Bufumu aukapalakana mu mushindo wa kukaanya. Na baadi mufubishe kileshesho kia kitatusho bua kulesha mushindo aukapalakana mukandu wa Bufumu, na kushintuluka kush’akukamueka musango umune. Biabia, Yesu baadi mukuashe balongi baye bua kumona’shi mukandu wabalungula aukatusha bipeta bi buwa.

17. Ntubingilo kinyi atuitutakula bua kuikala na binangu bi buwa pabitale mudimo wa bulungudi?

¹⁷ Nsaa y’atunangushena pabitale mushindo wi mukandu wi buwa aukuasha bantu lelo uno mu nsenga ishima, abitunyingisha bua kutungunuka na kulungula na kisumi. Kipua kioso, bantu midiyo bakuete kutuela ku Kitentekiesho na kukumiina kulonga Bible. Bantu be bungi bakuete kubatshishibua na kubanga kulungula mukandu wi buwa netu pamune. T’atuuku bantu bungi abakumiina kuteemesha mukandu wetu, anka atuuku’shi Yehowa kuete kubunga kibumbu kikata, akikapanda ku mpombo ikata. (Kbf. 7:9, 14) Mukata a mufubo wa kumbula mushinkamishe’shi bantu be bungi abakumiina mukandu wi buwa, biabia tutungunukieyi na kuiulungula.

18. Atukumiina’shi bangi bamone kinyi pabitutale?

¹⁸ Balongi ba Yesu ba binyibinyi abaukikua ku kisumi kiabo mu kulungula mukandu wi buwa. Bu kileshesho, batumibua abaadi abalungula n’eshimba dinyingie na muloo mu mushindo ubaadi bantu ‘babangie kushinguula’shi abekalanga na Yesu.’ (Bik. 4:13) Nsaa ayitumono bantu mu bulungudi, mbalombene kumona’shi natue namu tui bambule kisumi kia Yesu.