“Sangulayi anue banabene . . . yawa anufubila”

1. Nkinyi akitungu’shi tukite bua’shi tuikale na muloo wa binyibinyi, na buakinyi? (Yeeshaya 48:17, 18)

NSHETU e muiyilu muitufule ngofu, na akumiina’shi tuikale na muloo kubanga binobino mpa na mu mafuku aafiki. (Mul. 3:12, 13) Muitupangie na ngobesha ya kukita bintu bia kukaanya, anka ta muitupe ngobesha ya kuikunkusha atue banabene, kuamba’shi kuiyelela miiya pabitale ki buwa na ki bubi. (Mul. 8:9; Yel. 10:23) Auku’shi kilombene kuituikasha na muloo wa binyibinyi nyi kumufubila na kumukookiela.​—Badika Yeeshaya 48:17, 18.

2. Satana akiebe’shi tukumiine kinyi, na Yehowa baadi mukite kinyi?

² Satana akiebe tukumiine’shi tui kuikala na muloo kushi Yehowa, na’shi bantu bekoobesha kuikunkusha abo banabene. (Kib. 3:4, 5) Bua kulesha’shi Satana sha madimi, Yehowa baadi mutadiile bantu bua’shi bekunkushe abo banabene munda mua kipindi kampanda. Lelo uno, abimueka patooka’shi, bantu abakabilua kuikunkusha. Anka, mu Bible mui bileshesho bi bungi bia balume na bakashi abaadi na muloo p’abo kusangula bua kufubila Yehowa. Mu bano bantu, mui Yesu Nkidishitu. Tubandeyi kutala tubingilo tubaadi tumutakule bua kufubila Yehowa. Akupu atutala buakinyi Nshetu e muiyilu mulombene lulanguilo luetu. Ku nfudiilo, atutaluula tungi tubingilo tuitutakule bua kufubila Yehowa.

KIBAADI KITAKULE YESU BUA KUFUBILA YEHOWA

3. Satana baadi mupe Yesu kinyi, na nkitshibilo kinyi kibaadi Yesu muate?

³ Pabaadi pa nsenga, Yesu baadi na kia kusangula muntu adia kufubila. Kunyima kua Yesu kubatshishibua, Satana baadi mumulungule’shi amupa mafumu oso a pa nsenga su amulanguila. Yesu bamualuluile’shi: “Katuka, Satana! Muanda mbifundibue’shi: ‘Nka penda Yehowa Efile Mukulu oobe nyi odia kulanguila, na nkaye bupenka buaye nyi odia kufubila mufubo wa kishila.’” (Mat. 4:8-10) Buakinyi Yesu baadi muate kino kitshibilo? Tala ndambo ya tubingilo.

4-5. Tungi tubingilo kinyi tubaadi tutakule Yesu bua kufubila Yehowa?

⁴ Kabingilo kakata kabaadi katakule Yesu bua kuata kitshibilo kia kufubila Yehowa nyi kifulo, kifulo kikata kibaadi nakio bua Nshaye e muiyilu. (Yo. 14:31) Na dingi, Yesu baadi musangule bua kufubila Yehowa, muanda baadi auku’shi nyi kintu ki buwa kukita. (Yo. 8:28, 29; Kbf. 4:11) Auku’shi Yehowa nyi Nsulo ya muwa, na’shi nga kukulupila na e na kalolo. (Mis. 33:4; 36:9; Yak. 1:17) Yehowa baadi alungula Yesu nka mianda ya binyibinyi na kumupa bintu bioso bibaadi nabio. (Yo. 1:14) Anka, Satana nyi mufuishe lufu. Sha madimi, e na kiutu na akimbaa nka buwa buaye’ye nabene. (Yo. 8:44) Bu bibaadi muukie ino yoso mianda, Yesu ta baadi mukumiine kuambula Satana bua’shi atombokiele Yehowa nya.​—Fid. 2:5-8.

⁵ Kangi kabingilo kabaadi katakule Yesu bua kuata kitshibilo kia kufubila Yehowa nka’shi, baadi anangushena ku bintu bi buwa abikitshika pa muanda wa lulamato luaye. (Eb. 12:2) Baadi auku’shi su bashala na lulamato, ekasha eshina dia Nshaye dia kishila, na kukita bia’shi muluisho na lufu bifuishe Diabulu tabikalanga dingi kuanka.

YEHOWA MULOMBENE LULANGUILO LUETU

6-7. Buakinyi bantu be bungi lelo uno tabafubila Yehowa, na buakinyi Yehowa mulombene lulanguilo luetu?

⁶ Bantu be bungi lelo uno t’abafubilaa Yehowa muanda t’abauku ngikashi yaye na bioso biadi muibakitshiine. Bino nyi bibaadi bantu ba mu Atene babaadi Mpoolo mulungule mukandu wi buwa.​—Bik. 17:19, 20, 30, 34.

⁷ Mpoolo baadi mupatuluile abaadi abamuteemesha bia binyibiyni pabitale Efile Mukulu‘shi: “Aye nyi apeyaa bantu boso muwa na kuyooka na bintu bioso.” Akumbasha’shi: “Muanda kukidila kuadi, tui na muwa, atusanasana, na tui kuanka.” Efile Mukulu mmupangi, “na ku muntu umune, mmukite miilo yoso ya bantu,” biabia aye nyi mulombene lulanguilo luetu.​—Bik. 17:25, 26, 28.

8. Yehowa ta kukita kinyi? Patuula.

⁸ Pa muanda shi Yehowa nyi Mupangi na Nfumu eyilu na nsenga, badia kukitshisha bantu buashi bamulanguile. Anka, Yehowa ta mulombene kukita biabia nya. Pa mutue pa biabia, muitupe bishinkamiisho’shi e kuanka na mufule oso a kuatudi ngofu. Akumiina’shi bantu be bungi bekale ba kuuku baye bua loso. (1 Ti. 2:3, 4) Nyi buakinyi Yehowa kuete kuitulongiesha, bua’shi natue namu tulongieshe bantu pabitale mianda i buwa yakakitshina bantu na mushindo wakebikitshi. (Mat. 10:11-13; 28:19, 20) Muitupe tukongie buatudia kumulanguila na atupetaa bukuashi bua kifulo abufiki kui bakulu.​—Bik. 20:28.

9. Nkinyi akilesha‘shi Yehowa mufule bantu boso?

⁹ Yehowa alesha kifulo kiaye pa kutuusha bintu mpa na kui bantu ba shi na lukumiino muadi. Bu kileshesho: Kubanga kala, bantu be bungi abaadi basangule bua kukita kiakia kiabamono bu ki buwa sunga bu ki bubi ku meso kuabo’bo banabene. Sunga mbiabia, Yehowa baadi muibape bintu bibabadi nabio lukalo bua kuikala na muwa na muloo. (Mat. 5:44, 45; Bik. 14:16, 17) Baadi muibape ngobesha ya kuikala mu kipuano ki buwa na bangi, ngobesha ya kukusha bana, na kupeta efuto bua mudimo wabo. (Mis. 127:3; Mul. 2:24) Abimueka patooka’shi Nshetu e muiyilu mufule bantu boso. (Efi. 34:6) Binobino tutaleyi tungi tubingilo atuitutakula bua kufubila Yehowa na bielela boso abamufubila miabi.

AKITUTAKULAA BUA KUFUBILA YEHOWA

10. (a) Nkabingilo kinyi ke na muulo aketutakula bua kufubila Yehowa? (Mateo 22:37) (b) Mbukuashi kinyi boodi mupetele ku luishinko lua Yehowa? (Misambo 103:13, 14)

¹⁰ Nka bu Yesu, atufubilaa Yehowa muanda tuibamufule ngofu. (Badika Mateo 22:37.) Atuifubuila peepi na Yehowa patulongo nyikashi yaye. Bu kileshesho, tala mushindo awitufuila Yehowa lusa. Nsaa i baadi bena Isalele bakutue kumukookiela, baadi muibesendeele amba’shi: ‘Muntu ese a kwanudi alekie namu mwikeelo wi bubi.’ (Yel. 18:11) Yehowa auku’shi tui bakutue kupuidika na’shi tui lufufi. (Badika Misambo 103:13, 14.) Nsaa yatunangushena ku luishinko lua Yehowa na ku nyikashi yaye, bino ta bikutakula namu bua kumufubila bua loso su?

11. Tungi tubingilo kinyi atuitutakula bua kufubila Nshetu e muiyilu?

¹¹ Tui na kisukusuku kia kufubila Yehowa muanda nyi kintu ki buwa kukita. (Mat. 4:10) Na dingi su tuekala na lulamato kui Yehowa, akukitshika mianda i bungi i buwa. Lulamato luetu aluikasha eshina dia Yehowa dia kishila, na kulesha’shi Satana sha madimi, na bino abisankisha eshimba dia Nshetu e muiyilu. Na su tuasangula bua kufubila Yehowa lelo uno, abitukuasha bua kumufubila bua loso​—Yo. 17:3.

12-13. Nkinyi kibatulongiela ku kileshesho kia Jane na Pam?

¹² Pa tu ki bakinga, tui kulonga bia kufula Yehowa ngofu na kunyingisha kiakia kifulo patuende na kukula. Tala kileshesho kia bakuetu babidi bakashi ba tata na muina, Jane na Pam.a Jane baadi na bipua 11 na Pam namu na bipua 10 pabababangile kulonga Bible. Baledi babo ta babaadi bakumiine kulonga Bible, anka abaadi bape Jane na Pam matalua a kutuela mu bisangilo bia Tumonyi tua Yehowa, kadi bekale dingi abende na baledi babo mu kipuilo ku fudilo kua lubingo. Jane amba’shi, “bindongieshe Tumonyi tua Yehowa mu Bible, mbinkuashe bua kukambila bukitshishi bua ba nsongua abaadi abantakula bua kutoma bintu abikoluana na kuikala na muikeelo wi butete.”

¹³ Kunyima kua bipua bipela, bano bakuetu bakashi babibi abafikile balungudi. Na kunyima, ababangile mudimo wa bu mbala-mashinda, aku abaadi dingi abapasukila baledi babo banunu. P’atentekiesha uno muanda, Jane amba’shi: “Nemumone’shi, Yehowa apasukilaa ba kuuku baye na lulamato, na nka bu abiakula 2 Timote 2:19: ‘Yehowa auku baaba be bu baye.’” Kushi mpaka, Yehowa apasukilaa boso abasangula bua kumufula na kumufubila!

14. Ngakuilo na bikitshino bietu mbilombene kukuasha mu kuikasha eshina dia Yehowa dia kishila naminyi? (Tala dingi bifuatulo.)

¹⁴ Atukumiina kukuasha mu kuikasha eshina dia Yehowa dia kishila. Bu kileshesho: Nangushena’shi we na kuuku e na kalolo na afuilaa bangi lusa. Dingi efuku, bopusha muntu amba’shi, yawa kuuku oobe ntomboshi na te na kululama. Okitshi kinyi? Omuakuila. Mu mushindo umune, nsaa i Satana na bantu baye abaluisha nkumo ya Yehowa pa kupalakasha mianda ya madimi, atuakuila Yehowa pa kulungula bantu bia binyibinyi na kukaluila eshina diaye. (Mis. 34:1; Yesh. 43:10) Atulesha’shi tuibasangule bua kufubila Yehowa mu ngakuilo eetu na mu bikitshino bietu.

15. Miabi kinyi ibaadi Mpoolo mupete pa kuleka muasu ubaadi nao? (Bena Fidipe 3:7, 8)

¹⁵ Atukumiina kushintuula nshalelo eetu bua kufubila Yehowa mu mushindo w’akumiina. Bu kileshesho, Mpoolo baadi mukumiine kuleka muasu ubaadi nao mu kipuilo kia buina Yunda bua kulonda Nkidishitu na kufubila Yehowa. (Nga. 1:14) Bu kipeta, mupete miabi i bungi mu mudimo wa Yehowa, na mupete mushindo wa nkamunana na Nkidishitu muiyilu. Ta muinyongole bua kitshibilo kibaadi muata kia kufubila Yehowa, mpa natue namu tatukenyongola.​—Badika Bena Fidipe 3:7, 8.

16. Nkinyi kibatulongiela ku kileshesho kia Julia? (Tala dingi bifuatulo.)

¹⁶ Su tuepaana mu kufubila Yehowa mu nshalelo eetu, etuelela miabi kubanga binobino mpa na mu mafuku aafiki. Tala kileshesho kia mukuetu mukashi Julia. Kumpala kua kulonga bia binyibinyi, Julia baadi kayimba mu kipuilo kiabo kubanga ku bukinga buaye. Muntu ayimbaa kalolo, baadi mumone’shi Julia e na ngobesha ya kuyimba kalolo, nyi aye nkubanga kumulongiesha bua’shi afikie kayimba kende nkumo. Munda mua mafuku apeela, Julia baadi muende nkumo na aye nkubanga kuyimba mu ma mbalo ende nkumo. Pa babangile kuenda ku kalasa kende nkumo ka tuyimba, ungi muina kalasa naye baadi muisambe naye pabitale Efile Mukulu, amulungula’shi eshina di’Efile Mukulu nyi Yehowa. Kunyima kua mafuku apeela, Julia babangile kulonga Bible misango ibidi ku lubingo. Muenda mafuku, Julia baatshile kitshibilo kia kuipaana mu kufubila Yehowa, pe kukimba kuenda nkumo bu kayimba. Kino kitshibilo takibadi kibofule kuata. Amba’shi: “Bantu be bungi abaadi abangamba’shi, nakutua binangu p’ami kuleka kuyimba, anka nadi nakiebe kufubisha muwa wande bua kufubila Yehowa.” Epusha naminyi pabitale kino kitshibilo kibaadi muate takudi bipua bikile pa 30? Amba’shi: “Ne na butaale na nemukulupile’shi Yehowa akakumbasha nkalo i muishimba diande mu mafuku aafiki.”​—Mis. 145:16.

TUNGUNUKA NA KUFUBILA YEHOWA

17. (a) Kinyi akitungu’shi bantu bashatshile kitshibilo kia kufubila Yehowa bakite, na buakinyi? (b) Nkinyi akiuku baaba bapue kuata kitshibilo kia kufubila Efile Mukulu?

¹⁷ Tatudi ku nfudiilo ngofu kua uno ndumbuluilo. Mpoolo mutumibua bafundile’shi: “Muanda kubashala ‘kapindi kapela,’ na ‘yawa afiki akekala na kia kufika na tayisha nya.’” (Eb. 10:37) Bino abilesha kinyi? Abilesha’shi, nsaa ya kusangula bua kufubila Yehowa bua baaba bashabandile kuata kitshibilo kia kumufubila ibashala ipeela ngofu. (1 Ko. 7:29) Anka su tuibapue kuata kitshibilo kia kufubila Efile Mukulu, atuuku’shi atukapete nkalakashi, anka bua “kapindi kapeela.”

18. Yehowa na Yesu abakumiina’shi tukite kinyi?

¹⁸ Yesu baadi mulungule bantu buabadia kuikala balongi baye na bua’shi batungunukie na kuibikita. (Mat. 16:24) Biabia, su tukuete kufubila Yehowa takudi mafuku e bungi, tuikaleyi na kitshibilo kia kutungunuka na kumufubila. Abitungu tuitatshishe ngofu bua kutungunuka na kufubila Yehowa. Sunga biabishi bibofule, tui kupeta miabi na muloo mu kufubila Yehowa kubanga binobino!​—Mis. 35:27.

19. Nkinyi kibatulongiela ku kileshesho kia Gene?

¹⁹ Bangi abamono’shi kufubila Yehowa nkukile bukopo. Su we nsongua, omono’shi oshimisha kintu kampanda su ofubila Yehowa? Ungi mukuetu nsongua abetamina bu Gene, amba’shi: “Nadi namono’shi su nekala Kamonyi ka Yehowa, tangikala na bulungantu. Nadi namono’shi bana be bungi bandi mukule nabo, abaadi abakitshi misangeelo, kuiyileena, sunga kuasha masha a video e na bu ntomboshi, anka ami nadi nka mu bisangilo sunga mu bulungudi.” Uno mueneno baadi na bukitshishi kinyi kui Gene? Amba’shi: “Nabangile kuikala na nshalelo a mpala ibidi, nabangile kukita mianda i bubi ibaadi ayikitshi ba nsongua nami. Anka tayibadi intuadile muloo su nkapeela. Nabangile kunangushena ku bia binyibinyi bia mu Bible binaadi musumbushene, na ami nkuata kitshibilo kia kufubila Yehowa n’eshimba dioso. Kubanga nka paapa, abimueka’shi Yehowa mualuule nteko yande yoso yandi mumutekie.”

20. Nkitshibilo kinyi akitungu’shi tuikale nakio?

²⁰ Ungi mufundi a misambo bayimbile’shi: “Sha muloo nguno oosangula [bua] kushaala mu nshibo yoobe.” (Mis. 65:4) Biabia tutungunukieyi na kuikala na kitshibilo bu kia Yoshua bambile’shi: “Anka ami na ba mu nshibo muande, atufubila Yehowa.”​—Yos. 24:15.