We “mulongie bia kusanka” na biodi nabio su?

1. Kusanka na kiodi nakio akupushisha kinyi, na ta kupushisha kinyi?

WE MUNTU asankaa na biodi nabio su? Muntu asankaa na biadi nabio ekalaa na muloo na butaale muanda atuulaa binangu biaye ku miabi ikuete kumuelela Yehowa. Tʼekalakashaa sunga kuinyongola bua bintu biashi nabio. Anka, kusanka na biatudi nabio takupushishaʼshi tʼatui na lukalo lua kupasukila nshalelo eetu. Bu kileshesho, ta bi bubi su muina Nkidishitu akumiina kukita bi bungi mu mudimo wa Yehowa. (Lom. 12:1; 1 Ti. 3:1) Sunga mbiabia, tʼatushimisha muloo wetu su ta betuitamina bua kukita mudimo kampanda mu mudimo wa Yehowa watukumiinanga kukita.

2. Buakinyi kukutua kusanka na biatudi nabio kui masaku?

² Kukutua kusanka na biatudi nabio kui kuitutuadila bipeta bi bubi. Boso bashʼabasankaa na biabadi nabio, abafubaa nsaa i bungi bua kupeta bintu bia ku mbidi biabashi nabio lukalo. Muanda wa malua, bangi bena Nkidishitu bayibe mpa na makuta sunga bingi bintu bibabadi nabio lukalo. Abaadi pangi bambeʼshi, ‘Nemuialombene,’ ‘Nenao lukalo,’ sungaʼshi ‘Nalusha makuta kunyima.’ Anka, kuyiba kintu kioso kuakua tʼakusankishaa Yehowa na akumukuatshishaa buufu. (Nki. 30:9) Bangi ta mbapete mashito abakumiinanga mu mufubo wa Yehowa, nyi buakinyi abaadi babofule na nkuleka kumufubila. (Nga. 6:9) Mulanguidi a Yehowa mulombene kukita muanda wi bino naminyi? Lualuulo luiʼshi uno muntu mubangie kuleka kusanka na biadi nabio.

3. Ndilongiesha kinyi diatulongiela mu Bena Fidipe 4:11, 12?

³ Atue boso tui kusanka na biatudi nabio. Mpoolo mutumibua bafundileʼshi mmulongie bia “kusanka na biadi nabio, sunga [bibaadi] mu nshalelo e naminyi.” (Badika Bena Fidipe 4:11, 12.) Baadi mufunde ano mayi pabaadi mu lukano. Sunga mbiabia, ta baadi mushimishe muloo waye. Baadi “mulongie bia kusanka” na bibaadi nabio. Su abituelela bukopo bua kusanka na biatudi nabio, mayi a Mpoolo na mianda imufikile, abishinkamishaʼshi natue namu tui kusanka na biatudi nabio. Ta mbibofule bua kusanka na biatudi nabio. Nyi buakinyi abitungu tulongie bia kusanka na biatudi nabio. Mushindo kinyi? Tuisambileyi nyikashi ayitukuasha bua kulonga bia kusanka na biatudi nabio.

IKALA NA LUTUMBU

4. Buakinyi kuikala na lutumbu akuitukuasha bua kusanka na biatudi nabio? (1 Bena Tesalonike 5:18)

⁴ Muntu sha lutumbu, asankaa na biadi nabio. (Badika 1 Bena Tesalonike 5:18.) Bu kileshesho, su tuekala na lutumbu bua bintu biatudi nabio, tʼatuikalakasha ngofu bua bintu biatudi nabio lukalo kadi biatushi na mushindo wa kupeta. Nsaa yatudi na lutumbu kui Yehowa bua mushindo wʼatumufubila binobino, abitukuasha bua kuipaana ku wawa mudimo, pamutue pa kudila nka’shi tupete angi mashito. Nyi buakinyi Bifundue abitunyingisha bua kutumbula Yehowa nsaa yʼatumutekie! Kuikala na lutumbu akuitukuasha bua kupeta “butaale buʼEfile Mukulu bukile binangu bioso.”​—Fid. 4:6, 7.

5. Tubingilo kinyi tubaadia kutakula bena Isalele bua kulesha lutumbu? (Tala dingi kifuatulo.)

⁵ Tala kileshesho kia bena Isalele. Misango i bungi, abaadi abedidi kui Yehowaʼshi ta be na bidibua bibabadi nabio mu Ejipitu. (Mba. 11:4-6) Binyibinyi, nshalelo mu kabaaka ta baadi mubofule nya. Biabia, nkinyi kibaadia kuibakuasha bua kusanka na bibabaadi nabio? Abaadia kunangushena ku bioso bibaadi bibakitshine Yehowa na kulesha lutumbu. Mu Ejipitu mubabaadi bu bapika, abaadi abebakiengiesha, anka Yehowa baadi mufuishishe bena Ejipitu bipupa ekumi bua kuibapososha mu bupika. Nsaa ibaadi bena Isalele batuukie mu Ejipitu, Yehowa baadi muibakuasha buaʼshi bebape kiamo kia arja, ôlo, na bilamba. (Efi. 12:35, 36) Nsaa ibaadi bena Isalele pankatshi pa kiluilo kia Faraone na Kalunga kamonga, Yehowa baadi muabuule kalunga buaʼshi basuukie alua lupese. Na pababaadi mu kabaaka, baadi muibadiishe mana. Biabia, buakinyi bena Isalele abaadi abedidi? Muanda bena Isalele ta babaadi abasanka na bintu bibabadi nabio, kushi muanda waʼshi abaadi bakutue bidibua, kadi muanda abaadi bakutue lutumbu bua bintu bibabadi nabio.

6. Nkinyi ki kuitukuasha bua kulesha lutumbu?

⁶ Biabia, nkinyi ki kuitukuasha bua kulesha lutumbu? Kia kumpala, ata nsaa ya kunangushena efuku dioso ku bintu abikupaa muloo. We kufunda mianda ibidi sunga isatu ayikutakula bua kuikala na lutumbu. (Kwi. 3:22, 23) Kia kabidi, lesha lutumbu. Ikala na kiubishi kia kutumbula bangi bua mianda yabakukitshina. Na muanda wi na muulo, ikala otumbula Yehowa pa kiubishi. (Mis. 75:1) Kia kasatu, ikala na ba kuuku be na lutumbu. Su we na ba kuuku bashi na lutumbu sungaʼshi abekalaa nka abedidi, nobe namu we kuibikala. Kadi su bekala na lutumbu, nobe namu we kuikala nalo. (Det. 1:26-28; 2 Ti. 3:1, 2, 5) Su tuekala na lutumbu, tatukamba kuikalakasha bua bintu biatushi nabio.

7. Nkinyi kibakitshine Aci bua kusanka na biadi nabio?

⁷ Tala kibaadi kikitshikile Aci, mushale mu Indonesie. Ambaʼshi: “Mu kipupa kia COVID-19, nabangile kupuandikisa nshalelo ande na a bena Nkidishitu nami. Bu kipeta, ntshinadi nasanka na binadi nabio.” (Nga. 6:4) Nkinyi kibakuashishe uno mukuetu mukashi bua kushintuluka? Aci ambaʼshi: “Nabangile kunangushena ku bintu bi buwa bibaadi Yehowa ampa efuku dioso. Nadi dingi nanangushena pabitale bintu bioso bi buwa biandi nabio pa muandaʼshi ne mu ndumbuluilo a Efile Mukulu. Akupu natumbula Yehowa. Bino mbinkuashe bua kusanka na biandi nabio.” Su nshalelo oodi naye akuinyongosha, we kukita mianda ibakitshine Aci buaʼshi wekale dingi na lutumbu.

TUULA BINANGU KU AKIKIEBE YEHOWAʼSHI OKITE NA IKALA NA KUIYISHA

8. Nkinyi kibaadi kikitshikile Baruke?

⁸ Mu kipungo kampanda, Baruke sekretere a mutemuki Yelemiya baadi mukutue kusanka na bibaadi nabio mu nshalelo aaye. Baruke baadi na mudimo wi bukopo, kuambaʼshi mudimo wa kukuasha Yelemiya bua kulungula mukandu wi buwa kui muilo wa Isalele, muilo ushibaadi na lutumbu. Anka, pamutue pa Baruke kutuula binangu ku kibaadi akikiebe Yehowaʼshi akite, babangile kutuula binangu ku kibaadi akiebe kukita. Kukiila kui Yelemiya, Yehowa balunguile Barukeʼshi: “Okwete kukyeba kukita myanda ikata. Twelanganyi kyakya kinangu.” (Yel. 45:3-5) Mu ungi ngakuilo, Yehowa baadi alungula Barukeʼshi: “Sanka na biodi nabio.” Baruke baadi mukumiine dino elango, na aye nkutungunuka na kukuminyibua na Yehowa.

9. Muyile 1 Bena Kodinda 4:6, 7, kuiyisha akuitutakula bua kushinguula kinyi? (Tala dingi bifuatulo.)

⁹ Ingi nsaa, muina Nkidishitu e kumonaʼshi mulombene mashito kampanda mu ndumbuluilo a Yehowa. E kuikala na binangu, kufuba ngofu, sunga mupue kufubila Yehowa munda mua bipua bi bungi. Anka, bekupa ungi muntu mudimo wakiebangaʼshi aye eufube. Kinyi ki kumukuasha bua kupela kufiita munda? E kunangushena ku bibafundile Mpoolo mutumibua, mu 1 Bena Kodinda 4:6, 7. (Badika.) Mudimo oso watudia kupeta sunga binangu bioso biatudia kuikala nabio, abifiki kui Yehowa. Yehowa muitupe bino bintu muanda waʼshi muitufule naʼshi e na kalolo.​—Lom. 12:3, 6; Ef. 2:8, 9.

10. Tui kudima eyikashi dia kuiyisha naminyi?

¹⁰ Tui kudima eyikashi dia kuiyisha, pa kunangushena ngofu ku kileshesho kitulekiele Yesu. Tala kibakitshikile bufuku bubaadi Yesu mutumpe batumibua baye ngua. Yowano mutumibua bafundileʼshi: “Yesu bu bibaukangaʼshi [1] Yaya baadi mumupe bintu bioso mu maasa aaye [2] naʼshi baadi mufikie kui Efile Mukulu na [3] baadi ende kui Efile Mukulu, . . . babangile kutumpa ngua ya balongi.” (Yo. 13:3-5) Yesu baadia kumonaʼshi balongi baye nyi be mu kitungo kia kumutumpa ngua. Anka pabaadi Yesu pa nsenga, ta muambeʼshi bu biadi Muana a Efile Mukulu, abitungu ekale na nshibo i buwa, makuta e bungi, na nshalelo mubofule nya. (Luk. 9:58) Yesu baadi muiyishe, na baadi asanka na bibaadi nabio. Muitulekiele kileshesho ki buwa bukile.​—Yo. 13:15.

11. Kuiyisha kubaadi kukuashe Dennis bua kusanka na biadi nabio naminyi?

¹¹ Dennis a mu Pays-bas baadi mutompe kulonda kileshesho kia kuiyisha kia Yesu, anka ta bibaadi bibofule. Ambaʼshi: “Ingi nsaa, namueneʼshi kikudi kia kuitatula na kia kupela kusanka na binadi nabio, kibaadi akinfuila, bikishekishe nsaa ibaadi ungi muntu apete mashito anadi nakiebe kupeta mu ndumbuluilo a Yehowa. Nsaa ibaadi bino abinkitshikila, nadi nalongo miisambo ayakuila kuiyisha. Mu JW Library^®, nadi neele bitunduilo ku ma verse aakuila kuiyisha buaʼshi neapete bukidibukidi na buaʼshi neabadikuule. Mu telefone ande, nadi naata miisambo ayakuila kuiyisha, na naadi neyiteemesha misango na misango. Nemulongieʼshi kioso kiatukitshi, mbua kutumbisha Yehowa kushi atue banabene. Na kalolo koso, Yehowa mutadiile oso a kuatudi bua kukita kintu kampanda mu mudimo waye, anka aye nyi kuete akitshi biaʼshi tobeshe.” Su tokiʼosangela biodi nabio, kita mianda kampanda bua kudima eyikashi dia kuiyisha. Bino abinyingisha kipuano kietu na Yehowa na atusanka na biatudi nabio.​—Yak. 4:6, 8.

NANGUSHENA KU MILAYILO YA YEHOWA PABITALE MAFUKU AAFIKI

12. Milayilo kinyi yatutengiela ayitukuasha bua kusanka na biatudi nabio? (Yeeshaya 65:21-25)

¹² Atusankaa na biatudi nabio nsaa yatunangushena ku milayilo ya Yehowa bua mafuku aafiki. Mu mukanda wa Yeeshaya, Yehowa aleshaʼshi auku nkalakashi yoso yatudi nayo. Anka alaaʼshi akatusha yaya yoso nkalakashi. (Badika Yeeshaya 65:21-25.) Atukekala na mashibo e buwa, mudimo wi buwa na bidibua bi buwa. Tʼatukatshinyiʼshi kintu ki bubi kitukitshikile sunga kukitshikila bana betu. (Yesh. 32:17, 18; Esek. 34:25) Tushinkamisheyiʼshi ino yoso milayilo ayikalombana.

13. Nkalakashi kinyi yatudi nayo, na kunangushena ku lukulupilo luetu bua mafuku aafiki kui kuitukuasha naminyi?

¹³ Bi na muulo lelo uno, buaʼshi tunangushene ku milayilo ya Yehowa bua mafuku aafiki. Buakinyi? Muanda tui mu “mafuku a ku nfudiilo,” na atue boso tukuete kupeta nkalakashi. (2 Ti. 3:1) Efuku dioso, Yehowa kuete kuitukuasha bua kunyingiila pa kuitukunkusha, na kuitunyingisha. (Mis. 145:14) Na dingi, lukulupilo luetu, lukuete kuitukuasha mu bipungo bi bukopo. Pangi okuete kufuba ngofu bua kulombasha nkalo ya kifuko kiobe. Bino abileshaʼshi wekala nka mulanda? Nya, Yehowa muleeʼshi akupa biabia biodi nabio lukalo, na akakupa bi bungi, oolo, bintu bi bungi bukile mu mpaladiso. (Mis. 9:18; 72:12-14) Pangi we na mukumbo ushaupu, awende na nkunemeena efuku dioso, sunga lukalakashi lua mu binangu. Bino abileshaʼshi wekala nka okumbu efuku dioso, tuena opanda su? Nya. Maladi na lufu tabikekala kuanka mu nsenga ipia yʼEfile Mukulu. (Kbf. 21:3, 4) Luno lukulupilo aluitukuasha bua kupela kuinyongola sunga kufiita munda bua mianda ayitukitshikila binobino. Tui kuikala na muloo na butaale sunga muntu etukitshina muanda wi bubi, tuafuisha muntu atudi bafule, sunga muanda oso wi bubi wawa wetukitshikila mu nshalelo eetu. Buakinyi? Muanda sunga tuapeta lukalakashi lui naminyi lelo uno, atuukuʼshi “makienga nga kapindi kapeela” na mu nsenga ipia tʼatukakiengie dingi efuku su ndimune​—2 Ko. 4:17, 18.

14. Mushindo kinyi watudi balombene kunyingisha lukulupilo luetu?

¹⁴ Bu biabidiʼshi lukulupilo luetu aluitukuasha bua kusanka na biatudi nabio, nkinyi ki kuitukuasha bua kushinkamishaʼshi milayilo ya Yehowa ayikalombana? Nka bu bilombene muntu e mu kadimbo ke mufito kutembesha kaalo bua kumona kalolo, mu mushindo umune, abitungu tukite mianda kampanda ayitukuasha bua kuimona mu Mpaladiso. Bu kileshesho, nsaa yatuikalakasha pa muanda wa kukutua makuta, tunangushene abikekala nshalelo nsaa yatushʼatukekala na lukalo lua makuta sunga nsaa ishayikekala muntu su umune mulanda. Su tuibakalakashue pa muanda waʼshi ta tuibapete mashito kampanda mu ndumbuluilo a Yehowa, tutentekiesheʼshi ino mianda tayina muulo patuiyipuandikisha na nshalelo mupuidikie atukekala naye na kufubila Yehowa bua loso. (1 Ti. 6:19) Tukuete kuikalakasha bua mianda i bungi lelo uno, biabia bikuituikeela bukopo bua kunangushena ku milayilo ya mafuku aafiki. Anka, su tuekala na kiubishi kia kunangushena ku milayilo ya Yehowa bua mafuku aafiki, abitubofuila bua kupela kutuula binangu bietu ku nkalakashi yatudi nayo.

15. Muanda wa Christa ubakulongiesha kinyi?

¹⁵ Tala bibaadi lukulupilo lukuashe Christa, mukashi a Dennis, atatupuile kutemuna. Ambaʼshi: “Ne na maladi aambofushaa, nyi buakinyi nenka mu ka nkuasha ka bishetshi sunga ku lusala ne mulale. Ne na mitanyo efuku dioso. Dingi, mu mafuku ashaleʼmu, doktere ndunguileʼshi tampanda. Musango umune, nadi munangusheneʼshi, ‘Te na lukulupilo bu luande.’ Ne mutuule binangu biande ku lukulupilo luande, na bino abimpa butaale bua mu binangu. Lelo uno, nkuete kukienga na ano maladi, anka mu Nsenga Ipia nakekala na mbidi ipuidikie.”

“BAABA ABAMUTSHINYI TABAKUTUA KINTU”

16. Buakinyi Nfumu Davide bafundileʼshi boso abatshinyi Yehowa “tabakutua kintu”?

¹⁶ Sunga tuasanka na biatudi nabio, atuikala nka atupete nkalakashi. Tuate kileshesho kia Nfumu Davide. Bible aleshaʼshi bana baye basatu abaadi bafue. Abaadi bamudimbiile mianda ya madimi, kuuku aaye baadi mumuluishishe, na nfumu baadi amukimbi munda mua bipua bi bungi bua kumuipaa. Sunga mbibaadi na ino yoso nkalakashi, Davide bakuile pabitale Yehowaʼshi: “Baaba abamutshinyi tabakutua kintu.” (Mis. 34:9, 10) Buakinyi baadi muakule biabia? Muanda baadi aukuʼshi mpa na bafubi ba Yehowa abapetaa nkalakashi, anka Yehowa baadi mumupe bibaadi nabio lukalo. (Mis. 145:16) Anka bu Davide, tushinkamisheʼshi Yehowa etukuasha bua kunyingiila. Tui kusanka na biatudi nabio, sunga tuekala na nkalakashi i naminyi.

17. Buakinyi okumiina kusanka na biodi nabio?

¹⁷ Yehowa akumiinaʼshi tusankie na biatudi nabio. (Mis. 131:1, 2) Biabia kita mobe moso bua kulonga bia kusanka na biodi nabio. Su okita mobe moso bua kuikala na lutumbu, kutuula binangu ku akikiebe Yehowaʼshi okite na wekala muiyishe, na kunangushena ku milayilo ya Yehowa pabitale mafuku aafiki, we kuambaʼshi: “Ne mulongie bia kusanka na biandi nabio.”​—Fid. 4:11.