Lesha bangi kanemo

1. Buakinyi bantu abakumiina’shi bebanemekie? (Nkindji 22:1)

ABIKUSANKISHAA nsaa yabakunemeka kui bangi su? Oolo. Bantu boso abakumiina’shi bebanemekie. Atupushaa muloo pabetunemeka kui bangi. Nyi buakinyi Bible amba’shi “Kunêmekibwa nkukile buwa pe kwikala na mmono i bungi”!​—Badika Nkindji 22:1.

2-3. Buakinyi ta mbibofule kulesha bangi kanemo nsaa yoso, na nkinyi kiatulongo mu uno muisambo?

² Ingi nsaa t’abikalaa bibofule bua kulesha bangi kanemo. Muanda atumonaa bilubilo bia bangi. Na dingi, tui bashale mu nsenga mui bantu be bungi bashi na kanemo. Anka abitungu tuikale belekene nabo. Buakinyi? Muanda Yehowa akumiina’shi tunemekie “bantu ba mishindo yoso.”​—1 Mp. 2:17.

³ Mu uno muisambo atulongo akipushisha kulesha bangi kanemo na mushindo watudia kuikalesha kui (1) bena kifuko netu, (2) bena Nkidishitu netu, na (3) baaba bashi bena Nkidishitu netu. Atulongo bikishekishe bia kulesha kanemo mu nkalakashi.

KULESHA BANGI KANEMO AKUPUSHISHA KINYI?

4. Kunemeka bangi akupushisha kinyi?

⁴ Kishima kanemo akipushisha kinyi? Kanemo akalesha mushindo watumono bantu na w’atuibakitshina mianda. Nsaa yatumono’shi muntu e na ngikashi i buwa, akitshi mianda i buwa sunga e na matalua kunuundu kuetu, atumuleshaa kanemo. Bi na muulo kukita bino muanda atukumiina kuibikita.​—Mat. 15:8.

5. Nkinyi kilombene kuitukuasha bua kulesha bangi kanemo?

⁵ Yehowa akumiina’shi tuleshe bangi kanemo; bu kileshesho akumiina’shi tuikaleshe baba basha “matalua.” (Lom. 13:1, 7) Bangi abamba’shi, “Nalesha muntu kanemo nka su akitshi mianda i buwa.” Kunangushena bino kui buwa su? Atue Tumonyi tua Yehowa atunemakaa bantu kushi pa muanda wa bikitshino biabo. Atuibanemekaa muanda tui bafule Yehowa, na atukumina kumusankisha.​—Yos. 4:14; 1 Mp. 3:15.

6. Tuikulesha muntu kanemo sh’etulesha nkaka su? Patuula. (Tala dingi kifuatulo.)

⁶ Bangi bekuiyipusha’shi: ‘Nekulesha muntu kanemo sh’ekandesha?’ Oolo. Tala ndambo ya bileshesho. Nfumu Saule baadi muishe muana aaye Yonatane milongo kumpala kua bantu boso. (1 Sa. 20:30-34) Anka, Yonatane batungunukile na kulesha nshaye Saule kanemo na kumukuatshishena mu ngoshi mpa na pabafuile. (Efi. 20:12; 2 Sa. 1:23) Tshite muakuidi mukata Eli baadi mudimbiile Ana’shi mukolue. (1 Sa. 1:12-14) Anka, Ana batungunukile na kulesha Eli kanemo mu ngakuilo aaye, sunga bibaadi bena Isalele boso abauku’shi Eli ta baadi munyookie bana baye, aku namu baadia kuibikita muanda baadi nshabo na tshite muakuidi mukata. (1 Sa. 1:15-18; 2:22-24) Na bantu ba mu Atene abaadi bakee Mpoolo mutumibua, pakumuitamina bu “mbalakanyi.” (Bik. 17:18) Sunga mbiabia, Mpoolo baadi muibaleshe kanemo. (Bik. 17:22) Bino bileshesho abilesha’shi kifulo bua Yehowa na moo wa kumuinyongosha wi kuitutakula mu kulesha bangi kanemo, kushi penda nsaa yabidi bibofule kadi mpa na nsaa yabidi bukopo. Tutaleyi bantu abatungu’shi tuleshe kanemo na buakinyi abitungu tuibaleshe kanka.

LESHA BENA KIFUKO NOBE KANEMO

7. Buakinyi bi kuituelela bukopo bua kulesha bena kifuko netu kanemo?

⁷ Lukalakashi. Atukishaa nsaa i bungi na bena kifuko netu. Bu kipeta, atuuku nyikashi yabo i buwa na i bubi. Bangi mbalobene kuikala na mukumbo na abituelela bukopo bua kuibapasukila, sunga’shi mbalombene kuikala na kenyongoshi kakilekile. Bangi mbalombene kuakula sunga kukita mianda ayitutapa kuishimba. Pamutue pa kuikasha kifuko kiabo bu mbalo ya kuikisha na ya butaale, bangi mbeyikashe bu mbalo ya tuleo, bilumbu, muanda tabenemekieshena. Bu kipeta, ta be mu buumune. Tui kupuandikisha kifuko na mbidi. Mukumbo ngulombene kukita biashi mbidi tayifubanga kalolo. Mu mushindo umune, su bena kifuko t’abenemekieshena, kifuko t’akifubu mu buumune. Nka bu biabadi balombene kubuka mikumbo i bungi, bena kifuko mbalombene kulonga bia kuileshena kanemo.

8. Buakinyi abitungu tuleshe bena kifuko netu kanemo? (1 Timote 5:4, 8)

⁸ Buakinyi abitungu tuleshe kanemo? (Badika 1 Timote 5:4, 8.) Mu mukanda wa kumpala ubaadi mutumine Timote, Mpoolo baadi mupatule mushindo ulombene muina kifuko oso kupasukila nkalo ya bangi bena kifuko naye. Apatuula’shi akitutakula bua kulesha bena kifuko netu kanemo ta pamuanda’shi nyi kitungo, kadi pa muanda tui na ‘lulamato [kui] Efile Mukulu.’ Bino abilesha’shi atuibikitshi muanda tuibafule Yehowa na atuibimono bu kipindi kia lulanguilo luetu kuadi. Yehowa nyi baadi mupangie kifuko. (Ef. 3:14, 15) Biabia nsaa yatunemeka muina kifuko netu, atunemeka Yehowa. (1 Ti. 5:4.) Kano nyi kabingilo kakata aketutakula bua kulesha bena kifuko netu kanemo!

9. Mulume na mukashi be kuileshena kanemo naminyi? (Tala dingi bifuatulo.)

⁹ Bia kulesha kanemo. Mulume anemeka mukashi aaye alesha pabadi bubidi sunga munkatshi mua bantu be bungi’shi mukashi aaye e na muulo kuadi. (Nki. 31:28; 1 Mp. 3:7) Tamukupila, kumuisha milongo, sunga kukita bia’shi epushe bu shi na muulo. Ariel,a mushale mu Argentine, amba’shi: “Pa muanda wa maladi a mukashi ande, ingi nsaa akulaa mianda ayintapa kuishimba. Yaya nsaa natentekieshaa’shi, biabia bibakula tanyi biakiebanga kuakula. Nsaa yandi mukalakashue, natentekieshaa 1 Bena Kodinda 13:5, anyingishaa bua kuakula mianda na kanemo pamutue pa kuakula mianda ayimuyisha milongo.” (Nki. 19:11) Mukashi alesha’shi anemeka mulume aaye pa kumusamuna munkatshi mua bantu. (Ef. 5:33) Tamusabuula, kumusepa, na kumudika mashina; auku’shi kukita bino nkulombene kuluisha eyibakishi diabo. (Nki. 14:1) Ungi mukuetu mukashi a mu Italie sha mulume e na kenyongoshi kakile, amba’shi: “Ingi nsaa namonaa’shi mulume ande ekalakashaa bikile bua ingi mianda. Kala, ngakuilo ande baadi alesha’shi ntshi nadi namulesha kanemo. Anka panadi nakisha nsaa na bantu abaadi na kanemo, nabangile kulesha mulume ande kanemo.”

10. Ba nsongua be kulesha naminyi’shi abanemeka baledi babo?

¹⁰ Ba nsongua, kookielayi miiya yabadi benuelele kui baledi benu. (Ef. 6:1-3) Lesha baledi bobe kanemo nsaa yu’esamba nabo. (Efi. 21:17) Pabende na kukula, baledi bobe mbalombene kuikala na lukalo lua bukuashi bobe. Kita mobe moso bua kuibapasukila. Tala kileshesho kia María, sha nshaye shi Kamonyi ka Yehowa. Pabaadi na maladi, baadi akitshina María mianda i bubi, bino bibaadi abimuelela bukopo bua kumupasukila. María amba’shi: “Nadi natekie kushi penda bua’shi ngikale na kanemo, kadi ngikale dingi na mushindo wa kuikalesha nshami. Nadi namba’shi su Yehowa antekie bua kunemeka baledi bande, ankuasha bua kuibikita. Muenda mafuku namuene’shi, abitungu ndeshe nshami kanemo sunga biashashintuluka.” Nsaa yatunemeka bena kifuko netu mpa na nsaa yabidi bukupo, atunema Yehowa Nfumu a kifuko.

LESHA BENA NKIDISHITU NOBE KANEMO

11. Buakinyi mbilombene kuikala bukopo bua kunemeka bena Nkidishitu netu?

¹¹ Lukalakashi. Bena Nkidishitu netu abakookiela mayi a kulonda e mu Bible; anka ingi nsaa mbalombene kuitukitshina mianda i bubi, kuitutshibila biimu, sunga kuitufiitshisha munda. Su muina Nkidishitu netu etupa “kabingilo ka kumufiitshila munda,” mbilombene kuituelela bukpo bua kumunemeka. (Kol. 3:13) Nkinyi ki kuitukuasha bua kutungunuka na kulesha kanemo?

12. Buakinyi abitungu tuleshe bena Nkidishitu netu kanemo? (2 Mpiele 2:9-12)

¹² Buakinyi abitungu tuleshe kanemo? (Badika 2 Mpiele 2:9-12.) Mu mukanda waye wa kabidi, Mpiele alesha’shi bangi bena Nkidishitu ba mu siekele a kumpala ta babaadi na kanemo kui ba sha “matalua,” kuamba’shi bakulu. Nkinyi kibakitshine mikeyilu i sha lulamato pabayimuene bino? “Muanda wa kanemo kayidi nako bua Yehowa,” tayibadi yakule bano bantu mianda i bubi. Nyi muanda wa kukaanya! Ba mikeyilu bapuidikie babapelele kuakula bano bantu ba sha kuitatula mianda i bubi. Abaadi batadile’shi Yehowa ebatshibile kiimu na ebasashile. (Lom. 14:10-12; tala Yuda 9.) Tui kulongiela kui ba mikeyilu. Su atunemeka bantu betushikue, tui na kabingilo ka kunemeka bakuetu balume na bakashi bafule Yehowa. Ku lungi lupese, abitungu tuikale “ba kumpala” mu kuileshena kanemo. (Lom. 12:10) Su tubakitshi bino, atulesha’shi atunemeka Yehowa.

13-14. Tui kulesha bena kakongie netu kanemo naminyi? Tuusha kileshesho. (Tala dingi bifuatulo.)

¹³ Bia kulesha kanemo. Bakulu, nsaa yanulongiesha bangi ebikiteyi nka na kifulo. (Filemone 8, 9) Su anukiebe kupa muntu elango, ebikiteyi na kalolo, kushi nsaa yanudi na nsungu. Bakuetu bakashi, nuikukita bia’shi mu kakongie muikale kanemo pa kuleka tuiipu. (Tit. 2:3-5) Atue boso tui kulesha bakulu kanemo pa kufuba nabo pamune na kuibatumbula bua mudimo wi bukopo wabakitshi, bu kukunkusha bisangilo, kulumbuula mudimo wa bulungudi, na kukuasha baaba bakite “kilubilo.”​—Nga. 6:1; 1 Ti. 5:17.

¹⁴ Mukuetu mukashi abetamina bu Rocío baadi amono’shi bi bukopo buadia kunemeka ungi mukulu baadi mumupe elango. Amba’shi “Nadi mufiite munda muanda nadi mumone’shi ta baadi mumpe elango na kalolo. Pandi ku nshibo, nadi namuakula mianda i bubi. Sunga binadi nakitshi muande moso bua kupela kuibilesha, namuene’shi yawa mukulu baadi akiebe kunkuasha, ami nyi shi baadi akiebe kupusha elango diaye.” Nkinyi kibaadi kikuashe Rocío? Amba’shi: “Nabadikile 1 Bena Tesalonike 5:12, 13. Panamuene’shi ntshi nadi nalesha yawa mukuetu mulume kanemo, kondo kande k’eshimba kababangile kuntompeka. Natekiele Yehowa na ami nkukimbula mu mikanda yetu bua kupeta muanda ulombene kunkuasha bua kushintuula binangu biande. Bino bibaadi binkuashe bua kutundula’shi yawa mukuetu tabaadi na muanda, ami nyi baadi na kuitatula. Binobino natundula’shi kui kuipushena pankatshi pa kuiyisha na ngobesha ya kulesha bangi kanemo. Nkianekitshisha bua kulesha bangi kanemo, anka nepusha mu butaale na Yehowa.”

LESHA BANTU BASHI BENA NKIDISHITU KANEMO

15. Buakinyi bi kuikala bukopo bua kulesha bantu bashi bena Nkidishitu kanemo?

¹⁵ Lukalakashi. Mu bulungudi, atufumankanaa na bantu bashi bafule bia binyibinyi bi mu Bible. (Ef. 4:18) Bangi bantu abapelaa kuteemesha mukandu wetu pa muanda wabibabaadi bebalongieshe pababadi bukinga. Bangi bena mudimo sunga bena kalasa netu mbalombene kuitukitshina mianda ishi buwa, pangi mukata etu a mudimo sunga balongieshi betu tabasankaa na bioso biatukitshi. Muenda mafuku, kanemo ketu bua bano bantu nkalombene kupeela, na tuikukutua kuibakitshina mianda bu biatukumiina’shi betukitshine namu.

16. Buakinyi abitungu tuleshe bantu bash’abafubila Yehowa kenemo? (1 Mpiele 2:12; 3:15)

¹⁶ Buakinyi abitungu tuleshe kanemo? Tentekiesha’shi Yehowa kuete kumona bioso biatukitshina bantu bashi bena Nkidishitu mianda. Mpiele mutumibua baadi mutentekieshe bena Nkidishitu’shi, muikeelo wabo wi buwa ngulombene kutakula bangi bua “kutumbisha Efile Mukulu.” Nyi buakinyi baadi muibanyingishe buabadia kukaluila lukumiino luabo na “kupopeela na kanemo kakata.” (Badika 1 Mpiele 2:12; 3:15.) Biabekala kumpala kua bakata ba mbulamatadi sunga nsaa yabesamba na bankungishanyi nabo, bibaadi abitungu’shi bena Nkidishitu bebakitshine mianda na kalolo. Muanda, Yehowa kuete kumona na kupusha bioso biatuakula na mushindo watuibiakula. Kano nyi kabingilo kakata aketutakula bua kunemeka bantu bashi bena Nkidishitu!

17. Mbikunyi biatudia kulesha bantu bashi bena Nkidishitu kanemo?

¹⁷ Bia kulesha kanemo. Patudi mu bulungudi, t’atuleshanga bu’shi atubepuula baaba bashi na kiukilo ki bungi kia Bible. Anka abitungu tuibamone bu be na muulo ku meso ku’Efile Mukulu na’shi betukile. (Ag. 2:7; Fid. 2:3) Su muntu betukaa, tatumualuishanga namu, sunga kumuakula mianda ayilesha’shi tauku kintu. (1 Mp. 2:23) Su buakula muntu muanda wi bubi, mutekie lusa musango umune. Mbikunyi biodia kulesha kanemo ku mudimo? Ikala ofubu ngofu na kita mobe moso bua kumona nyikashi i buwa ya bantu bofubu nabo na bakata bobe. (Tit. 2:9, 10) Su we na kululama na ofubaa ngofu, we kusankisha sunga kukutua kusankisha bantu, anka osankisha Efile Mukulu.​—Kol. 3:22, 23.

18. Buakinyi bi na muulo tuleshe bangi kanemo?

¹⁸ Tui na tubingilo tui bungi tua kuikala na kanemo na kuikalesha bangi. Tubamono’shi nsaa yatunemeka bena kifuko netu, atunemaka Nfumu a kifuko, Yehowa. Mu mushindo umune, nsaa yatunemeka bena Nkidishitu netu, atunemeka Yehowa. Na nsaa yatulesha bantu bashi bena Nkidishitu kanemo, atuibakuasha buabadia kutumbisha Efile eetu mukata. Sunga bangi bantu bakutua kuitulesha kanemo, bi na muulo wa’shi atue tuibaleshe kanka. Buakinyi? Muanda Yehowa etuelela miabi. Mulee’shi: “Baba abannemeka nakebanemeka.”​—1 Sa. 2:30.