Yehowa e kuitukuasha bua kuikala na muloo wa binyibinyi

1-2. (a) Bantu be bungi lelo uno bakuete kuipusha naminyi? (b) Nkinyi kiatuisambila mu uno muisambo?

BANTU be bungi lelo uno bakuete kukita muabo moso bua kuikala na muloo. Anka sunga mbiabia, ta be na muloo. Bantu be bungi mbenyongole ngofu na abamono’shi mianda tayina ilumbulukie. Bangi bafubi ba Yehowa bekuipusha nka bino. Pa muanda tui mu “mafuku a ku nfudiilo,” atufumankana na nkalakashi “ibukopo.”​—2 Ti. 3:1.

² Uno muisambo awitukuasha bua kutundula bintu abituibaa muloo wetu na kiakukita bua kuiupetuula su tueushimisha. Kia kumpala, tubandeyi kutundula nsulo ya muloo wa binyibinyi.

NSULO YA MULOO WA BINYIBINYI

3. Bipangua bia Yehowa abitulongiesha kinyi pabimutale? (Tala dingi bifuatulo.)

³ Yehowa ekalaa nka na muloo. Biabia akumiina’shi natue namu tuikale na muloo. Nyi buakinyi t’abitukanyisha p’atumono muloo waye mu bipangua biaye, bu Planete e buwa, malangi elekenelekene, nyema ayasha maasha, na biakudia bi buwa bi bungi. Binyibinyi, Efile Mukulu muitufule na akumiina’shi tuikale na muloo.

Kana ka ngiefu: Image © Romi Gamit/​Shutterstock; tonyi tua pingouins: Vladimir Seliverstov/​500px via Getty Images; tuana tua mbushi: Rita Kochmarjova/​stock.adobe.com; mishipa ya dauphin ibidi: georgeclerk/​E+ via Getty Images

4. (a) Sunga biakudi makienga mu nsenga, buakinyi Yehowa mulame muloo waye? (b) Nkia buntu kinyi kitupe Yehowa? (Misambo 16:11)

⁴ Sunga biabidi’shi Yehowa nyi “Efile Mukulu a muloo,” auku kalolo makienga e mu nsenga. (1 Ti. 1:11) Anka, tamutadile’shi bino bipeeleshe muloo waye. Auku’shi makienga nga kapindi kapela, na auku efuku diaakapu. Dingi auku efuku adikapu tuinyongoshi toso na makienga bua loso. Nsaa yatukiengie, Yehowa etupasukilaa na kuitukuasha. Ebikitaa mushindo kinyi? Etupeyaa muloo. (Badika Misambo 16:11.) Tutaleyi mushindo ubaadi kuuka Yehowa kukuashe Yesu bua kuikala na muloo.

5-6. Buakinyi Yesu muntu sha muloo?

⁵ Kukatusha Yehowa, Yesu muntu sha muloo. Buakinyi? Tutaleyi tubingilo tubidi. (1) “Mmuikale kifuanyi ki’Efile Mukulu shamuekaa” na alesha ngikashi ya Nshaye mu mianda yoso. (Kol. 1:15; 1 Ti. 6:15.) (2) Yesu baadi mukishe nsaa i bungi na Nshaye, muikale nsulo ya muloo.

⁶ Yesu baadi nka na muloo wa kukita kiakia kioso kibaadi akimutekie Nshaye. (Nki. 8:30, 31; Yo. 8:29) Pa muanda wa lulamato luaye, baadi mukuminyibue na Yehowa.​—Mat. 3:17.

7. Mbikunyi biatudia kupeta muloo?

⁷ Natue namu tui kupeta muloo wa binyibinyi su tuefubuila pepi na Yehowa, Nsulo ya muloo. Su atukisha nsaa i bungi pa kulonga pabitale Yehowa na kumuambula, atunyisha kuikala na muloo. Atupete dingi muloo pa kukita kikiebe ki’eshimba di’Efile Mukulu na pa kuuka’shi tuibakuminyibue naye.a (Mis. 33:12) Eyendo’shi ingi nsaa tuikuinyongola munda mua mafuku apela sunga pangi munda mua kipungo kila. Su opusha bino, tomonanga’shi tokiosankisha dingi Yehowa nya. Yehowa auku’shi muno mu nsenga atuikala nka na tuinyongoshi ingi nsaa. (Mis. 103:14) Tuisambileyi bintu bilombene kuiba muloo wetu na kiakukita bua kuiupetuula su tueushimisha.

TOTADILANGA’SHI KINTU SU NKIMUNE KIKUIBE MULOO OOBE

8. Mianda ya mu nshalelo ngilombene kuikala na bukitshishi kinyi kuatudi?

⁸ Ngifi a kumpala: Mianda ya mu nshalelo. Bakuete nkubingabinga su, we mupete masaku aatukila ku bipangua, bulanda, maladi sunga bununu? Ino mianda i kuituiba muloo wetu, bikishekishe su tatuina kia kukita. Bible alesha patooka’shi “kwinyongola akutshoboloshaa muntu.” (Nki. 15:13) Babis, mukulu baadi mufuishe mukuabo mulume, nshaye na nyinaye munda mua bipua binananka, amba’shi: “Nadi muipushe bupenka na’shi ta kui muntu akunkuasha. Ingi nsaa nadi nenyongola muanda ntshinadi na nsaa i bungi ya kukisha pamune na baledi bande na mukuetu mulume kumpala kua’shi bafue.” Mianda ya mu nshalelo ngilombene kuitukokiesha na kuitubofusha.

9. Nkinyi ki nkukuasha bua kupetuula dingi muloo? (Yeelemiya 29:4-7, 10)

⁹ Nkinyi ki nkukuasha bua kupetuula dingi muloo? Tuikupetuula dingi muloo su tuekala na lutumbu bua bintu biatudi nabio. Tui kuikala na muloo sunga tuekala na nshalelo atush’atusangeela. Bino mbilekene na abipuandikisha bantu ba mu uno ndumbuluilo. Bu kileshesho, Yehowa baadi mulungule bena Isalele bababadi bende nabo pa bukopo mu Babilone, buabadia kuubiila nshalelo mupia muiumbo dipia, na kukita muabo moso bua’shi bekale na muloo mu nkalakashi. (Badika Yeelemiya 29:4-7, 10.) Abitulongiesha kinyi? Kumiina nshalelo oobe mupia na wekale na lutumbu bua bintu bi buwa biodi nabio mu nshalelo oobe. Tentekiesha’shi Yehowa takulekiela bupenka, akukuasha. (Mis. 63:7; 146:5) Mukuetu mukashi abetamina bu Effie, baadi mupete masaku na tabaadi dingi na mushindo wa kutambuka, amba’shi: “Nemupete bukuashi bui bungi kui Yehowa, kifuko kiande, na bena kakongie. Ne na lutumbu bua biabadi bankitshine na nakumiina kukita muande moso bua kuikala na muloo.”

10. Buakinyi abitungu tuikale na muloo sunga tuafumankana na nkalakashi?

¹⁰ Nsaa yatufumankana na nkalakashi, tuikulama muloo wetu.b (Mis. 126:5) Buakinyi? Muanda akituikashaa na muloo ta mianda ya mu nshalelo nya. Ungi mbala-mashinda abetamina bu Maria, amba’shi: “Kulama muloo nsaa yatufumankana na nkalakashi tabipushisha’shi tubalubu yanka nya. Anka abipushisha’shi tatuibalube milayilo ya Yehowa. Nshetu etukuasha bua kulama muloo wetu.” Tentekiesha’shi, makienga na mianda yatukuete kufumankana nayo lelo ngia kapindi kapela. Kubashala kapindi kapela bua’shi Yehowa akatushe mianda yoso ayifuisha makienga na tuinyongoshi.

11. Kileshesho kia Mpoolo ki nkunyingisha naminyi?

¹¹ Ingi nsaa atunangushena’shi tukuete kufumankana na mianda i bubi muanda Yehowa takiasanka netu. Su atuipushaa bino, tuibalombene kunangushena pabitale bafubi ba Yehowa basha lulamato abaadi bafumankane na nkalakashi i bukopo. Tubande kutala kileshesho kia Mpoolo mutumibua. Abaadi bamusangule kui Yesu bua kulungula mukandu wi buwa “kui miilo mpa na kui ba nfumu na kui bana ba Isalele.” (Bik. 9:15) Yesu baadi mupe Mpoolo mudimo wi na muulo ukata. Anka Mpoolo baadi mufumankane na nkalakashi i bukopo. (2 Ko. 11:23-27) Bino abipushisha’shi sunga bi baadi Mpoolo mufumankane na nkalakashi Yehowa tabaadi dingi amuata na muulo su? Nyaa! Mu kuilekena na biabia, kibaadi kikuashe Mpoolo bua kunyingiila nkia shi Yehowa baadi naye. (Lom. 5:3-5) Binobino nangushena pabitale muanda oobe. Bu biokuete kutungunuka na kufubila Yehowa na lulamato loso sunga biodi mu nkalakashi, ikala mushinkamishe’shi Yehowa akukuasha na asanka nobe.

12. Nkinyi ki kukitshika su ta tui na mushindo wa kukita bi bungi mu mudimo wa Yehowa?

¹² Ngifi a kabidi: Pabidi bukopo bua kukita bi bungi mu mudimo wa Yehowa. (Nki. 13:12) Kifulo na lutumbu bua Yehowa abitutakula bua kuifundila bipatshila mu mudimo waye. Su tatuibalombashe bipatshila bietu pa muanda wa nkalakashi yatufumankana nayo, tui balombene kubofula. (Nki. 17:22) Ungi mukuetu mbala-mashinda abetamina bu Holly amba’shi: “Nadi nakumiina kutuela mu Kalasa ka Balungudi ba Bufumu, nkafuba mu dingi eumbo, sunga kufuba ku luibako lua Ramapo. Anka nshalelo ande mushintulukie, ntshi biakulombasha dingi bino bipatshila. Bibaadi binkalakashe. Abikalakashaa ngofu nsaa yokiebe kukita mianda kampanda, kadi tue na mushindo wa kuibikita.” Be bungi bakuete kuipusha nka bino.

13. Su ta tui na mushindo wa kukita bi bungi mu mudimo wa Yehowa, mbipatshila kinyi biatudia kuifundila?

¹³ Nkinyi ki nkukuasha bua kupetuula dingi muloo? Tentekiesha’shi Yehowa t’etutekaa biabia biatushi balombene kukita, sunga kuituata na muulo muyile mudimo watumukitshina. Yehowa akumiina’shi tuukie pemeene mikalo yetu na tuikale na lulamato. (Mik. 6:8; 1 Ko. 4:2) Yehowa ekalaa na muloo patudi na nyikashi i buwa sunga tuakutua kumufubila bu biatukumiina. Tatutengielanga’shi tukite biabia biatushi balombene kukita.c Su tuena mushindo wa kukita bi bungi mu mudimo wa Yehowa pa muanda wa nshalelo oobe, kita biabia biodi mulombene kukita. Bu kileshesho, we kukuasha ba nsongua sunga kunyingisha bakuetu balume na bakashi abapu kununupa. We kuenda mu kutembela muntu, kumuitamina ku telefone, sunga kumufundila ka mesaje bua kumunyingisha. Yehowa akupa muloo su ofubu bua kulombasha bipatshila bu bino. Na tentekiesha’shi binobino, atuikala na mushindo wa kufubila Yehowa mu mishindo i bungi mu nsenga ipia. Holly, atatupuile kutemuna afudisha’shi: “Nsaa yandi mubofule, nanangushenaa’shi ‘Nakekala na muwa wa ikalayika.’ Na kubukuashi bua Yehowa, nakakumbasha bingi bipatshila biande mu nsenga ipia.”

14. Nkinyi kingi ki kuituiba muloo?

¹⁴ Ngifi a kasatu: Kukulupila bintu bia ku mbidi bua kuikala na muloo. Mu Internete atumonaa bantu bu be na muloo wi bungi muanda abasankaa nsaa yoso na bintu bia ku mbidi. Abanyingisha bantu buabadia kuikala abaasha masha, kuula bintu sunga kuenda mu nyendo bua’shi bekale na muloo. Ta bi bubi kusanka na bino bintu. Yehowa muitupangie na lukalo lua kusanka na bintu bi buwa. Anka, bantu be bungi abaadi abapuandikisha’shi, bino bintu abibapa muloo, kadi mbibayibe wanka. Eva ungi mbala-mashinda amba’shi, “Su wekala nka onangushena pabitale kusanka na bintu bia ku mbidi, wekala nka okimbi bia kuisankisha.” Su tuakulupila bintu bia ku mbidi bua kuikala na muloo, atukenyongola.

15. Kileshesho kia Salomone akitulongiesha kinyi?

¹⁵ Nfumu Salomone baadi mutompe kukita bintu bilekene bua’shi su abimupa muloo. Bu kileshesho, baadi mutompe bidibua bi buwa bilekene, kuteemesha misambo i buwa sunga kuula bintu bi muulo wi bukopo. Anka bino bintu ta bibaadi bimuikashe na muloo. Bambile’shi: ‘Eyiso tadikooka kumona, sunga etui kuula biabia biadipusha.’ (Mul. 1:8, EEM; 2:1-11) Bantu lelo uno abapuandikisha’shi su bekala na makuta e bungi na kukita nao kioso ki’abakiebe, abekala na muloo. Ano nyi madimi; bino bintu ta mbilombene kuituikasha na muloo wa binyibinyi.

16. Kupaana kui kuitukuasha bua kupetuula dingi muloo naminyi? (Tala dingi bifuatulo.)

¹⁶ Nkinyi ki nkukuasha bua kupetuula dingi muloo? Yesu bambile’shi “Muloo wa kupaana ngukile wa kupebua.” (Bik. 20:35) Ungi mukulu abetamina bu Alekos amba’shi: “Nekitshishaa bua kukuasha bangi. Nsaa yanebakuasha, tanangushena nka penda ku biankumiina kukita, bino abimpeyaa muloo.” We kukitshina bangi kinyi? Su bomono muntu muinyongole, tompa kumunyingisha. Sunga tue mulombene kupua muanda waye, we kumunyingisha pa kumuteemesha na kalolo, na kumutentekiesha’shi asumbuile Yehowa bushito buaye. (Mis. 55:22; 68:19) Na we kumutentekiesha dingi’shi Yehowa tamusumbushena nya. (Mis. 37:28; Yesh. 59:1) We kumukitshina kintu kampanda bu kumuteekiela ka kudia, sunga kukisha naye kapapi. We kumuteka bua kutuka naye mu bulungudi, muanda kulungula mukandu wi buwa nkulombene kumupa muloo. Tadila Yehowa akufubishe bua kunyingisha bangi. Kufubisha nsaa yetu bua kukuasha bangi akuitupa muloo wa binyibinyi!​—Nki. 11:25.

17. Su atukumiina kuikala na muloo wa binyibinyi, nkinyi akitungu’shi tukite? (Misambo 43:4)

¹⁷ Su tuatungunuka na kuifubuila pepi na Nshetu e muiyilu, atuikala na muloo wa binyibinyi. Bible etushinkamisha’shi Yehowa “etupeyaa muloo.” (Badika Misambo 43:4.) Biabia sunga tuekala na nkalakashi i naminyi mu nshalelo eetu, t’abitungu’shi tutshine. Tushinkamishe’shi Yehowa kuuku eetu a p’eshimba, etukuasha bua kuikala na muloo bua loso!​—Mis. 144:15.