Kifulo ki’Efile Mukulu nkia ikalayika

1-2. Nkalakashi kinyi ayipetaa bena Nkidishitu be bungi?

BANDA kupuandikisha mashuwa e mu kipapi ki bukopo. Mbundambuda i bukopo ikuete kuiatenkiesha. Ano mashuwa aende koso akuiayiisha mbundabunda, mpa na apayisha muntu nyindo mu mema. Nyindo ayimika mashuwa bua’shi tabeayishanga aku naku kui kipapi ki bukopo.

² Nsaa yodi mu nkalakashi i bukopo, we kuipusha nka bu ano mashuwa. Biopusha mbilombene kushintuluka bukidi bukidi. Adi’efuku we mushinkamishe’shi Yehowa mukufule na akukuasha, anka efuku adilondo obanga kuialashena su Yehowa kuete kumona nkalakashi yodi nayo. (Mis. 10:1; 13:1) Pangi kuuku oobe mukunyingishe, na wepusha biya bua kapindi. (Nki. 17:17; 25:11) Anka kunyima bobanga dingi kuialashena. We mulombene kubanga kuiyipusha su Yehowa bakusumbushena. Mu ngakuilo a mu kifuanyi, mbikunyi biodia kuyisha nyindo nsaa yodi mu nkalakashi? Kuamba’shi, mbikunyi biodia kuikala mushinkamishe’shi Yehowa mukufule na akukuasha?

3. “Kifulo kia lulamato” kiabakuila mu Misambo 31:7 na 136:1 akilesha kinyi, na buakinyi atuamba’shi Yehowa nyi muikale kileshesho ki buwa? (Tala dingi kifuatulo.)

³ Mushindo odia kushala munyingie mu nkalakashi nyi kutentekiesha kifulo kia lulamato kia Yehowa. (Badika Misambo 31:7; 136:1.) Kishima “kifulo kia lulamato” akilesha kulamata muntu bua loso. Yehowa muikale kileshesho ki buwa kia kifulo kia lulamato. Bible amba’shi “muule ndaa na kifulo kia lulamato.” (Efi. 34:6, 7) Bible amba dingi pabitale Yehowa’shi: ‘We muule ndaa na kifulo kia lulamato kwi bano booso abakwiyaayila.’ (Mis. 86:5, BB.) Bino bifundue abikiebe kuamba bino: Yehowa t’asumbushenaa bafubi baye ba sha lulamato! Kutentekiesha’shi Yehowa e na kifulo kia lulamato kui kuitunyingisha nsaa yatudi mu nkalakashi i bukopo.​— Mis. 23:4.

TENTEKIESHA’SHI KIFULO KIA YEHOWA NYI NDILONGIESHA DIA KITAKO DIA MU BIBLE

4. Tuusha bileshesho bia malongiesha a kitako a mu Bible, na buakinyi bi bukopo bua’shi muntu etutoshe kuiakumiina.

⁴ Ungi mushindo odia kushala munyingiile mu nkalakashi, nyi pa kutentekiesha’shi kifulo kia Yehowa nyi dilongiesha dia kitako dia mu Bible. P’opusha abamba’shi “dilongiesha dia kitako dia mu Bible” onangushena kinyi? Pangi onangushena ku bia binyibinyi bibodi mulongie muiyi di’Efile Mukulu. Bu kileshesho, bolongiele’shi eshina di’Efile Mukulu nyi Yehowa, Yesu muan’eleka a Efile Mukulu, bafue tabauku kintu, na’shi akukekala mpaladiso pa nsenga na bantu abakemushala bua loso. (Mis. 83:18; Mul. 9:5; Yo. 3:16; Kbf. 21:3, 4) Kunyima kobe kushinkamisha’shi ano malongiesha nga binyi, bi bukopo bua’shi muntu akutoshe kuiakumiina. Buakinyi? Muanda we mushinkamishe’shi ano malongiesha e na bishinkamiisho. Tutaleyi buakinyi kumona’shi kifulo kia lulamato kia Yehowa ndilongiesha dia kitako dia mu Bible, kui kuitukuasha bua kupela kuialashena’shi Yehowa t’etumono sunga kuitupasukila nsaa yatudi na nkalakashi.

5. Patuula bilombene muntu kupela malongiesha a madimi.

⁵ Nsaa ibolongiele Bible, nkinyi kibaadi kikukuashe bua kupela malongiesha a kala a madimi? Abaadi bakukuashe bua kupuandikisha bibabaadi abenulongiesha mu kipuilo kienu na abilongiesha Bible. Tuate kileshesho: Puandikisha’shi bodi okumiina’shi Yesu nyi Efile Mukulu Sha bukome boso. Kadi pobodi wende na kulonga Bible, bodi muiyipushe’shi, ‘Bino biankumiina mbia binyi su? Kunyima kobe kutaluula bishinkamisho bi mu bifundue, bodi mualuule’shi nya. Paapa bodi mupianyishe diadia dilongiesha dia madimi na bia binyibinyi bi mu Bifundue, kuamba’shi: Yesu nyi “Muana mbedi a ku bipangua bioso,” “Muana eeleka a Efile Mukulu.” (Kol. 1:15; Yo. 3:18) Eyendo, malongiesha a madimi ngalombene kuikala ‘amene mishi bi bukopo’ na mbilombene kuikala bukopo bua kuiashuula. (2 Ko. 10:4, 5, mayi e kuushi ku’esaki.) Anka, kunyima kobe kuibikita, tuemukumiine dingi ku aa malongiesha a madimi.​—Fid. 3:13.

6. Buakinyi we kushinkamisha’shi “kifulo kia lulamato kia Yehowa nkia ikalayika”?

⁶ We kukita nka bino bua malongiesha a mu Bible pabitale kifulo kia Yehowa. Nsaa yodi na lukalakashi, na wealashena pabitale kifulo kia Yehowa, eyipushe’shi, “Bino bianangushena bi buwa su?’ Puandikisha mpaka yobe pabitale kifulo kia Yehowa na mayi e mu Misambo 136:1, kifundue kia mutue wa muanda wa uno muisambo. Buakinyi Yehowa alesha kifulo kiaye bu “kia lulamato?” Buakinyi kishima “Kifulo kiaye kia lulamato nkia ikalayika” bekifubishe misango 26 mu uno musambo? Nka bu bibatuibimono, kifulo kia lulamato kia Yehowa bua muilo waye nyi dilongiesha dia kitako dia mu Bible, nka bu angi malongiesha atudi bakumiine e muiyi di’Efile Mukulu. Binangu bia’shi Yehowa tetuataa na muulo sunga’shi ta muitufule mbia madimi. Tokumiinanga bino binangu, nka bu biopelaa angi malongiesha oso a madimi.

7. Temuna bifundue abitushinkamisha kifulo kia Yehowa.

⁷ Mu Bible mui bishinkamiisho bi bungi pabitale kifulo kia Yehowa. Bu kileshesho, Yesu balunguile balongi baye’shi: “Nui na muulo ukata kukila bimusodia bibungi.” (Mat. 10:31) Yehowa aye nabene bakuile pabitale muilo waye’shi: “Nakupa bukome, oolo nakukuasha, nakuka-nkamika na mboko yande ilume ya bululame.” (Yesh. 41:10) Bino bifundue abipushika kalolo. Yesu tamba’shi ‘Nuikuikala na muulo ukata,’ na Yehowa tamba’shi ‘Ne kuinukuasha.’ Anka, abamba’shi : “Nui na muulo ukata” na “nakukuasha.” Su wealashena pabitale kifulo kia Yehowa nsaa yodi na lukalakashi, bino bifundue tabikukuashe penda bua kuipusha kalolo, abikukuasha dingi bua kushinkamisha’shi Yehowa mukufule. Bino bifundue bi na bishinkamiisho. Su oteka Yehowa pabitale mpaka yodi nayo na kunangushena pa bino bifundue, papa we kuakula mayi e mu 1 Yowano 4:16, aamba’shi: “Tui bafikie mu kuuka na kukumiina kifulo ki nakio Efile Mukulu buetu.”a

8. We kukita kinyi su ingi nsaa otungunuka na kuialashena pabitale kifulo kia Yehowa?

⁸ We kukita kinyi su ingi nsaa otungunuka na kuialashena pabitale kifulo kia Yehowa? Puandikisha biabia biopusha na biabia biouku. Biabia biatuipusha ta mbia kukulupila muanda ta bi na bishinkamisho, anka kifulo kia Yehowa ki na bishinkamisho mu Bible. Su tatuibashinkamishe’shi Yehowa muitufule, paapa tubayilua eyikashi diaye dikata dia kifulo.​—1 Yo. 4:8.

NANGUSHENA NGOFU PABITALE “KIFULO KI NOBE YEHOWA”

9-10. Yesu baadi akuila kinyi nsaa ibakuile mayi e mu Yowano 16:26, 27 aamba’shi: “Yaya nabene mmuinufule”? (Tala dingi kifuatulo.)

⁹ Tui kulonga bi bungi pabitale kifulo kia Yehowa, pa kutaluula bibaadi Yesu mulungule balongi baye’shi: “Yaya nabene mmuinufule.” (Badika Yowano 16:26, 27.) Yesu ta baadi muakule ano mayi bua penda kusankisha balongi baye. Patubadika ma verse e kunuundu kua ano mayi, atumono’shi Yesu ta baadi akuila abipusha balongi baye. Baadi akuila ungi muanda, kuamba’shi luteko.

¹⁰ Yesu baadi kiakatuka mu kulungula balongi baye bua’shi batekie muishina diaye kushi kumuteka aye. (Yo. 16:23, 24) Bibaadi na muulo bua’shi balongi baye baukie bino. Kunyima kua lusangukilo luaye, balongi abaadia kuikala na binangu bia kuteka Yesu. Muanda Yesu baadi kuuku aabo. Abaadia kunangushena’shi bu biadi muibafule, ateemesha nteko yabo na atekie Yaya bua kuibakuasha. Anka Yesu baadi muakule’shi t’abitungu banangushene mu uno mushindo. Buakinyi? Muanda bebalunguile’shi: “Yaya nabene mmuinufule.” Kino kishinkamisho nyi ndilongiesha dia kitako pabitale luteko. Tala biabipushisha bobe: Mu kulonga kobe kua Bible, we mufikie mu kuuka na kufula Yesu. (Yo. 14:21) Anka, nka bu balongi ba mu siekele a kumpala, we kuteka Efile Mukulu, mushinkamishe’shi aye ‘nabene mukufule.’ Olesha lukumiino mu ano mayi nsaa yoso yotekie Yehowa.​—1 Yowano 5:14.

UUKA AKUFIKA MPAKA

11. Buakinyi Satana ekala na muloo su tuealashena pabitale kifulo kia Yehowa?

¹¹ Mpaka pabitale kifulo bua Yehowa ayifiki kunyi? Su wamba’shi ayifiki kui Satana, tue mudimbe. Diabulu kuete ‘kukimba kuitudia,’ na ekala na muloo su tuealashena pabitale kifulo kia Yehowa. (1 Mp. 5:8) Dingi Yehowa baadi mutushe nkuulo, anka Satana akiebe tukumiine’shi tui ba sha miluisho na’shi nkuulo ta ngitulombene. (Eb. 2:9) Anka, nanyi ekala na muloo su tuealashena pabitale kifulo kia Yehowa? Satana. Nnanyi ekala na muloo su tuabofula na tualeka kufubila Yehowa? Satana. Satana akiebe tunangushene’shi Yehowa ta muitufule. Aku namu mbia madimi. Satana nyi abashi bafule kui Yehowa. Amune a ku “mayele e bubi” aaye nga kuitutakula mu kunangushena’shi, ta betufule kui Yehowa na muitusumbushene. (Ef. 6:11) Patutundula akikiebe muishikuanyi eetu, atuikala na kitshibilo kia ‘kukambila Diabulu.’​—Yak. 4:7.

12-13. Pa muanda wa’shi tui bakutue kupuidika, bi kuitutakula mu kuialashena pabitale kifulo kia Yehowa naminyi?

¹² Kui kingi kintu kilombene kuitutakula mu kuialashena pabitale kifulo kia Yehowa. Nkintu kinyi? Nyi muluisho watudi bapiane. (Mis. 51:5; Lom. 5:12) Muluisho auluishaa kipuano ki pankatshi pa bantu na Mupangi aabo. Auluishaa dingi binangu bietu, biatuipusha mpa na mbidi yetu.

¹³ Muluisho awitutakula mu kuinyongola kukilekile, kuipusha bu be mu masaku na kupusha buufu. Tui kuipusha bino nsaa yatukitshi muluisho. Anka tuikuipusha dingi bino nsaa yatunangushena’shi tui bakutue kupuidika, muanda bino ta nyi bibaadi bitupangie Efile Mukulu. (Lom. 8:20, 21) Nka bu bishi bilombene mupila wa motoka utubukie kutambuka kalolo mu mushindo ubabaadi beupue, mpa na atue bantu bakutue kupuidika tatui balombene kufuba kalolo mu mushindo ubabadi betupangie. Biabia, tabitukanyisha su ingi nsaa tuealashena pabitale kifulo kia Yehowa. Su bino biakitshika, tutentekieshe’shi Yehowa nyi “Efile Mukulu mukata na akutshina, alombashaa kilombeno kiaye na aleshaa kifulo kia lulamato kui baba bamufule na abakookiela miiya yaye.”​—Ne. 1:5.

14. Kunangushena ku nkuulo nkulombene kuitukuasha bua kupela kuialashena pabitale kifulo kia Yehowa naminyi? (Bena Loma 5:8) (Tala dingi kashibo akamba’shi “Dimukila ‘bukome bua madimi bua muluisho.’”)

¹⁴ Binyibinyi, ingi nsaa tui kuipusha’shi ta tui balombene kufudibua na Yehowa. Bua kuakula kalolo, ta tuibalombene kifulo kia Yehowa, na bino nyi abikikasha bu kintu ki pabuakio. Ta tui na kintu kia kupa Yehowa bua’shi etufule. Anka, nkuulo ngibuikile miluisho yetu, na Yehowa baadi muiyituushe pa muanda muitufule. (1 Yo. 4:10) Tentekiesha dingi’shi Yesu bafikile mu kupaasha ba sha miluisho, kushi bantu bapuidikie. (Badika Bena Loma 5:8.) Muntu su umune a kuatudi ta mulombene kukita mianda ipuidikie, na Yehowa tatengiela’shi tukite mianda ipuidikie. Nsaa yatupusha’shi kukutua kuetu kua kupuidika nyi akuitutakula bua kuialashena pabitale kifulo kia Yehowa, atuikala na kitshibilo kia kupela kubofula.​—Lom. 7:24, 25.

ATA KITSHIBILO KIA KUSHALA NA LULAMATO

15-16. Nkinyi kiatudia kushinkamisha su tuashala na lulamato kui Yehowa, na buakinyi? (2 Samuele 22:26)

¹⁵ Yehowa akumiina’shi tuate kitshibilo ki buwa kia “kumulamata.” (Det. 30:19, 20) Su tubakitshi biabia, tushinkamishe’shi naye namu etulesha lulamato. (Badika 2 Samuele 22:26.) Su tui na lulamato kui Yehowa, tumukulupile buadia kuitukuasha mu lukalakashi loso lualua luatudi balombene kupeta mu nshalelo eetu.

¹⁶ Anka bu bibatuibimono, tui na kabingilo ka kushala banyingie mu nkalakashi. Atuuku’shi Yehowa muitufule na etukuasha. Nyi abitulongiesha Bible. Su atuialashena pabitale kifulo kiaye, tunangushene ku biatuuku’shi bia binyi kushi kutuula binangu ku biatuipusha. Biabia, tuikaleyi bashinkamishe’shi kifulo kia lulamato kia Yehowa nkia ikalayika nka bu abiamba Bible.