Kuikala muina Nkidishitu akupatuula kinyi?​—Bible akula kinyi?

Bantu bebungi mu nsenga lelo uno bakuete kuakula na kuitatula koso’shi mbena Nkidishitu; aku namu bakuete kukita mianda ayitapa bangi ku mashimba. Bangi abakimbi penda buwa buabo, ta be na kululama, sunga kalolo. Bangi ta be na lulamato kui muina dibaka nabo. Muikelo wabo autakula bantu mu kuiyipusha’shi: ‘Kuikala muina Nkidishitu akupatuula kinyi?’

Kuikala muina Nkidishitu akupatuula kinyi binyibinyi

Mbibofule bua’shi muntu eambe bu muina Nkidishitu. Anka ta mbimeene nka paapa nya. Muyile abiamba Bible, muina Nkidishitu nyi mmulongi a Nkidishitu. (Bikitshino 11:26) Yesu bambile’shi: “Su nuatungunuka na kukookiela mayi ande, nui balongi bande binyibinyi.” (Yowano 8:31) Eyendo’shi ta kui muntu mulombene kukookiela mayi a Yesu mu kipaso kipuidikie. Anka muina Nkidishitu abitungu atumikile malongiesha a Yesu na kuibilesha mu nshalelo a kuifuku n’efuku. Banda kutala bingi bileshesho.

Bena Nkidishitu t’abakimbaa penda buwa buabo

Bibakuile Yesu: “Nenupa muiya upia wa’shi nuifulene; nka bu biandi muinufule, n’anue namu nuifulene. Bua biabia bantu boso abakauku’shi nui balongi bande: Su nui na kifulo munkatshi muenu.”​—Yowano 13:34, 35.

Bibakitshine Yesu: Yesu baadi Alesha bantu boso kifulo, sunga bekala abatuukila mbalo kinyi, be na makuta ebungi sunga bakutue makuta. Baadi mupaashe ba sha mikumbo, adiisha ba sha nsala, mpa na kutuusha muwa waye bua bangi.​—Mateo 14:14-21; 20:28.

Abikitaa bena Nkidishitu: Bena Nkidishitu abeleshenaa kifulo pa kuikala na kalolo, kukutua ntondo, na kuifuilena lusa. Abakuasha bantu be mu lukalo, na abakumiina kuisumina ingi miloo bua buwa bua bangi.​—1 Yowano 3:16.

Bena Nkidishitu mba sha kululama

Bibakuile Yesu: “Ne . . . binyibinyi.”​—Yowano 14:6.

Bibakitshine Yesu: Mianda yoso ibaadi Yesu muakule na ibaadi mukite ibaadi ayilesha kululama. Tabaadi adimbi bantu buabadia kukita kiakumiina sunga kuibatakula mu kukumiina mianda yauku’shi ngia madimi. Bantu abaadi abamuuku bu muntu sha kululama, sunga nsaa ibaakudi kulombene kumufuishila nkalakashi.​—Mateo 22:16; 26:63-67.

Abikitaa bena Nkidishitu: Bena Nkidishitu t’abadimbaa. Abafutaa bitadi, t’abayibaa, na abafubaa ngofu ku mudimo efuku dioso kushi kudimba mukata aabo. (Bena Loma 13:5-7; Bena Efeso 4:28) T’abadimbaa bangi, kuiba ku mateta, sunga kudimba mianda nsaa y’abatekie mudimo sunga ku ingi mikanda.​—Bena Ebelu 13:18.

Bena Nkidishitu abakitaa mianda na kalolo koso

Bibakuile Yesu: “Fikayi kuandi anue boso bakokie na batuale bushito, na nakenunyingisha. Semunayi kikumbo kiande na nulongiele kuandi, muanda ami ne mupopele na ne muiyishe kuishimba, na anukanyingishibua. Muanda kikumbo kiande nkipelepele kutuala na bushito buande mbupelepele.”​—Mateo 11:28-30.

Bibakitshine Yesu: Yesu baadi na kalolo, na bantu abaadi abafiki kuadi kushi kutshina. Baadi atambula bana, anyingisha be mu nkalakashi, na kukitshina bangi mianda na kanemo koso.​—Maako 10:13-15; Luka 9:11.

Abikitaa bena Nkidishitu: Bena Nkidishitu abesamba na bangi na kanemo koso; ta be na mutue bukopo sunga na ngakuilo e bubi. (Bena Efeso 4:29, 31, 32) Abapasukilaa bangi na kukimba mishindo ya kuibakuasha.​—Bena Ngalateya 6:10.

Bena Nkidishitu abashalaa na lulamato muiyibakishi diabo

Bibakuile Yesu: “Kiakia kibungie Efile Mukulu pamune, muntu teki’abuulanga nya.”​—Maako 10:9.

Bibakitshine Yesu: Sunga Yesu tabaadi muibakile, baadi munyingishe bena dibaka buabadia kuikala na lulamato muiyibakishi diabo. (Mateo 19:9) Baadi muibadimushe ku mianda ilombene kutakula muntu mu katumbuka lusandi na kuluishisha muina dibaka nabo.​—Mateo 5:28.

Abikitaa bena Nkidishitu: Bena Nkidishitu abashikuaa kukita mianda ayilesha’shi ta be na kanemo kui muina dibaka nabo. (Bena Ebelu 13:4) Bena dibaka abekitshishena mianda na kifulo na kanemo koso.​—Bena Efeso 5:28, 33.