Kikudi kiselele nkinyi?
Lwaluulo lwa Bible
Kikudi kiselele nyi mbukome bw’Efile Mukulu, bukome bwatumikaa nabo. (Mika 3:8; Luka 1:35) Efile Mukulu atumaa kikudi kyaaye mbalo yooso yakumina pa kutuma bukome bwaye bwa kukumbasha kyakyebe.—Misambo 104:30; 139:7.
Mu Bible, mbalo i kishima “kikudi” mbaluule kishima kya mu kiina Ebelu ruʹach na kya mu kiina Greke pneuʹma. Misango ibungi, bino bishima abisambila bukome bw’Efile Mukulu bwatumikaa nabo, kikudi kiselele. (Kibangilo 1:2) Kadi, mu Bible mbafunde dingi bino bishima bwa kupatuula bingi bintu:
Muwa watupuwu.—Abakuke 2:19; Kibafumbwilwe 13:15.
Lupapi.—Kibangilo 8:1; Yowano 3:8.
Muwa, sunga bukome abulama muwa wi mu bipangwa abitala.—Yoobo 34:14, 15.
Nangunangu sunga mwikeelo wa muntu.—Mbadiko 14:24.
Bantu ba mu kikudi, mpa na Efile Mukulu na miikeyilu.—1 Banfumu 22:21; Yowano 4:24.
Bino bipatulwilo byooso abikyebe kulesha kintu kishy’akimweneka ku meso kwa bantu kadi kilombeene kukita myanda ayimweneka. Bi mumune, kikudi ky’Efile Mukulu, “anka bu lupapi, takimwenekaa, taki na mbidi anka ki na bukome.”—An Expository Dictionary of New Testament Words, by W. E. Vine.
Bible etanyina dingi kikudi ky’Efile Mukulu bu “maboko” na bu “minwe.” (Misambo 8:3; 19:1; Luka 11:20; pwandjikisha na Mateo 12:28.) Anka bi bantu abafubaa midimo ya masa abatumikaa na maboko na minwe yaabo bwa kukita mudimo, Efile Mukulu mutumikye na kikudi kyaye bwa kutuusha bino bintu abilondo:
Nsenga n’eyilu.—Misambo 33:6; Yeeshaya 66:1, 2.
Bible.—2 Mpyeele 1:20, 21.
Bilengyeleshi bibakitshine bafubi baaye ba kala, mudimo wabo wa bulungudi ubabakitshine na katshintshi.—Luka 4:18; Bikitshino 1:8; 1 Bena-Kodinda 12:4-11.
Ngikashi ibuwa yabalesha kwi bantu abamukokyela.—Bena-Ngalatea 5:22, 23.
Kikudi kisele ta mmuntu nya
Pa kwitanyina kikudi kiselele bu “maboko,” “minwe,” na bu “muwa,” Bible alesha kalolo shi kikudi kiselele ta mmuntu nya. (Efilu 15:8, 10) Maboko a muntu akitaa midimo ya masa ta ngalombeene kwikitshina midimo kushi binangu sunga mbidi ya yawa muntu nya; bi mumune, kikudi kiselele ky’Efile Mukulu akitumikaa nka ku bukunkushi bw’Efile Mukulu. (Luka 11:13) Bible apwandjikisha dingi kikudi ky’Efile Mukulu na mema na ekisangisha na bintu bu lukumiino na kyukilo. Bino bipwandjikisho byooso abilesha shi kikudi kiselele ta mmuntu nya.—Yeeshaya 44:3; Bikitshino 6:5; 2 Bena-Kodinda 6:6.
Bible etupa eshina dya Yehowa Efile Mukulu na Mwana aye, Yesu Kidishitu, kadi takwi mbalo su ngimune yabalesha eshina dya kikudi kiselele. (Yeeshaya 42:8; Luka 1:31) Pabaadi Etshenne, mwina Kidishitu ababayipayile, bamwene mu kimonwa, penda bantu babidi, tabamwene bantu basatu nya. Bible amba shi: “Aye namu, muwule na bukome bwa kikudi kiselele, bashimikile meso mwiyilu; aye nkumona ntumbo y’Efile Mukulu, na Yesu mwimane ku mboko ilume y’Efile Mukulu.” (Bikitshino 7:55) Kikudi kiselele kibaadi bukome bw’Efile Mukulu bubaadi abufubu mwi Etshene bwa kumukwasha amone kino kimonwa.
Nangunangu ya madimi pabitale kikudi kiselele
Madimi: “Mukishi Wiselele,” sunga kikudi kiselele, nyi ngumune a ku bantu bakite Busatu bwiselele, bu abilesha 1 Yowano 5:7, 8 mu Bible a King James (Angl.)
Eyendo: Mu Bible a King James (Angl.) mu 1 Yowano 5:7, 8 mbakumbashe mayi “mwiyilu mwi Yaaya, Eyi, na Mukishi Wiselele: na bano basatu mbakite muntu umune. Na kwi basatu bakwete kutuusha bukamonyi pa nsenga.” Anka, bantu abakimbuulaa myanda ya mu bifundwe mbamone shi ano mayi ta abaadi afundjibwe kwi Yowano nya, byabya ta mayi a mu Bible nya. Mulongyeshi mukata Bruce M. Metzger bafundjile shi: “Ano mayi nga madimi na ta e na matalwa a kwikala mu Kilombeeno kipya nya.”—A Textual Commentary on the Greek New Testament.
Madimi: Bible apwandjikisha kikudi kiselele na muntu, bino abilesha shi kikudi kiselele nyi muntu.
Eyendo: Ingi nsaa Bifundwe abipwandikisha kikudi kiselele na muntu, kadi bino t’abilesha shi kikudi kiselele nyi muntu nya. Bible apwandjikisha dingi muntu na binangu, lufu na mulwisho. (Nkindji 1:20; Bena-Looma 5:17, 21) Bu kileshesho, abalesha shi binangu bi na “bikitshino” na “bana,” na abalesha shi mulwisho audimbaa, awipayishenaa, na kutuma ku malaka.—Mateo 11:19; Luka 7:35; Bena-Looma 7:8, 11.
Bi mumune, pabaadi Yowano mutemune mayi a Yesu, baadi mupwandjikishe kikudi kiselele na muntu aye nkwamba shi “mukwashi.” Bino mbilombeene kulesha shi mmuntu akunkusha, akula, atemesha, alungula, atumbisha na kwata kintu. Baadi mwakule kishima “aaye” pabaadi mwisambe pabitale “mukwashi.” (Yowano 16:7-15) Kadi, Yowano baadi mukite byabya mwanda mu ludimi lwa kina Greke kishima kyabadi baluule bu “mukwashi” (pa·raʹkle·tos) akilesha muntu mulume na abitungu kulonda ngakwilo alesha byabya muyile miiya ya ludimi lwa kina Greke. Anka pabaadi esamba pabitale kikudi kiselele, Yowano baadi mufunde kishima pneuʹma, na kwamba shi “akyo,” ngakwilo shalesha muntu mulume sunga mukashi.—Yowano 14:16, 17.
Madimi: Kubatshisha mwishina dya kikudi kiselele akulesha shi nyi mmuntu.
Eyendo: Ingi nsaa Bible atumikaa na mwaku “eshina” bwa kulesha bukome sunga matalwa. (Miiya Ikituulwe 18:5, 19-22; Eshitele 8:10) Bino bi mumune na ngakwilo a mu Anglais atupatuula mu kisongye shi “mwishina dya mwiya”, na shalesha shi mwiya nyi mmuntu nya. Muntu abatshishibwa “mwishina dya” kikudi kiselele akumiina bukome na mufubo wa kikudi kiselele bwa kukumbasha akikyebe Efile Mukulu.—Mateo 28:19.
Madimi: Batumibwa ba Yesu na bangi beena Kidishitu ba kumpala abaadi bakumiine shi kikudi kiselele nyi mmuntu.
Eyendo: Bible sunga mikanda ya myanda ya kala tayikwete kwamba bino nya. Mukanda umune (Encyclopædia Britannica) awamba shi: “Binangu bya’shi Kikudi Kiselele nyi mMuntu e pabwaye . . . bibaadi bitukye mu kisangilo kikata kya Concile de Constantinople mu kipwa kya 381.” Bino bibaadi bipwa 250 kunyima kwa lufu lwa mutumibwa a nfudiilo.