Bua kinyi ba Temwe ba Yehowa t’abakitaa fete a efuku dia kutandjikua?
Atue ba Temwe ba Yehowa t’atukitaa fete a efuku dia kutandjikua muanda atuku’shi aa ma fete t’asangasha Efile Mukulu nya. Sunga mu Bible ta mbaleshe patoka’shi abakandjika kukidta ma fete a mafuku a kutandjikua, muanka abetukuasha bua kuikala na kabingilo akalesha bi mueneno a Efile Mukulu pabitale ano ma fete. Banda kutala mianda inanka ya ku yanka na opushe mayi a kulonda a mu Bible.
Ma fete a mafuku a kutandjikwa ngatukile kui ba mpangano. Muyile abilesha ungi mukanda wa Funk & Wagnalls Standard Dictionary of Folklore, Mythology, and Legend, ano ma fete ngatukile ku lukumino lua’shi muifuku dibatandjikile muntu “bikudi bibubi na bukitshishi buabio mbulombene kukuata yawa muntu” biabia “apafiki ba kuku na bia buntu biabamupa, abimukaluila.” Mukanda wa The Lore of Birthdays aulesha’shi kala, mianda ya mafuku a kutandjikwa ibadi “imene pa lubuko lua horoscope” luimene pa “lubuko lua nyenyenyi.” Uno mukanda awakula dingi’shi “ma buji a muifuku dia kutandjikwa, e mu kuipushena na mianda ya maji bua kuabikisha muntu bibuwa.”
Aku namu Bible mmukandjikie mianda yoso ya maji, lubuko, malenganyi, sunga “bintu bi mumune.” (Miiya Ikitulwe 18:14; Beena-Ngalatea 5:19-21) Biabia, kabingilo kabadi katakule Efile Mukulu buadia kunyoka lupada lua Babilone, kabadi pa muanda wa’shi bantu ba muanka babadi abakitshi lubuko lua nyenyenyi, luikale kingi kipaso kia kubuka. (Yeeshaya 47:11-15) Ba Temwe ba Yehowa t’abatulaa binangu biabo ku nsulo ya kipikua kioso nya; anka nsaa i Bible alesha bia kukita na bipikua bia wawa mushindo, t’atuibilengula nya.
Bena Kidishitu ba kumpala tababadi abakitshi fete a efuku dia kutandjikua nya. Mukanda wa The World Book Encyclopedia awamba’shi “abadi abata kukita fete a efuku dia kutandjikua bu kipikua kia ba mpangano.” Bible alesha’shi batumibwa na bangi bantu babadi balongieshe kui Yesu aye nabene mbalekiele bena Kidishitu kileshesho kiabadia kulonda.—2 Bena-Tesalonika 3:6.
Kitentekiesho penda kimune kiabadi batekie bena Kidishitu bua kukita, t’efuku dia kutandjikua, nyi ndia lufu lua—Yesu. (Luke 22:17-20) Bino ta mbilomene kuitukanyisha muanda Bible amba’shi “efuku dia lufu ndikile dia kutandjikua.” (Mulungudi 7:1) Ku nfudilo kua muwa waye pano pa nsenga, Yesu mmulekie nkumo ibuwa ku meso ku’Efile Mukulu, ayikasha efuku dia lufu luaye bu di na muulo kukila efuku dibatandjikile.—Bena-Ebelu 1:4.
Mu Bible ta mbatemune mufubi a Efile Mukulu badi mukite feete a efuku dia kutandjikua nya. Ta nkuamba’shi ta mutemune bantu bakite ano ma fete nya, muanka mbatemune ma fete abidi a efuku dia kutandjikua ababakitshine kui bantu bashi balanguidi ba Efile Mukulu. Biabia, ino mianda yoso ngitushe nka bipeta bi bubi.—Kibangilo 40:20-22; Maako 6:21-29.
Bana ba ba Temwe abepushaa bu bakutue kintu kampanda muanda wa kukutua kusankila mafuku abo a kutandjikwa su?
Anka abikala ba nambutuile bebuwa boso, ba Temwe abaleshaa bana babo’shi mbebafule pa kuibapa bintu na kukisha nabo nsaa ya muloo pamune. Abalondaa kilesesho kibuwa ki’Efile Mukulu, apeyaa bana baye bintu bibuwa. (Mateo 7:11) Bana ba ba Temwe tabepushaa bu bakutue kintu muyile ano mayi e pano:
“Abikalaa muloo nsaa y’abakupa kantu akunamu tuekatengielanga.”—Tammy, ena bipua 12.
“Sunga tabampeyaa kantu muifuku diande dinatandjikile, baledi bande abangudilaa bintu mu angi mafuku. Kukita biabia akunsakishaa muanda ntanebitengielanga nya.”—Gregory, ena bipua 11.
“Okuminaa kukisha minite ekumi, kudia kapese ka mukate, na kuyimba lono pamune? Fika kuetu ku nshibo omone biatukishaa nsaa pamune!”—Eric, ena bipua 6.