Kasaka ka Bakunkushi-Bakulu ka Tumonyi tua Yehowa nkinyi?

Kasaka ka Bakunkushi-Bakulu nyi nkasaka kapeela ka bena Nkidishitu banyingie akapeyaa Tumoyi tua Yehowa tua mu nsenga ishima bukunkushi. Mudimo ya bena Kasaka ka Bakunkushi-Bakulu ngutshibuulue mu bipindi bibidi:

• Ke na mudimo wa kulumbuula kua malongiesha a mu Bible atupetaa mu mikanda, bisangilo, na mu tulasa tua Tumonyi tua Yehowa.​—Luka 12:42.

• Abakunkusha mudimo wa Tumonyi tua Yehowa tua mu nsenga ishima pa kulumbuula mudimo wa bulungudi na kukunkusha mushindo wa kufubisha bia buntu.

Kasaka ka Bakunkushi-Bakulu akalondaa kileshesho kia “bakulu na batumibua [ba mu Yelusalema]” mu siekele a kumpala, babaadi abaata bitshibilo bikata bua kakongie kashima ka bena Nkidishitu. (Bikitshino 15:2) Anka bibaadi baba balume ba sha lulamato, bena Kasaka ka Bakunkushi-Bakulu ta mbakata ba ndumbuluilo etu nya. Abalondaa bukunkushi bua mu Bible, abashinguula’shi Yehowa Efile Mukulu mmutuule Yesu Nkidishi bu Mutue wa kakongie.​—1 Bena Kodinda 11:3; Bena Efeso 5:23.

Mba nanyi be mu Kasaka ka Bakunkushi-Bakulu?

Be mu Kasaka ka Bakunkushi-Bakulu mbano: Kenneth Cook, Jr., Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane, na Jeffrey Winder. Abafubilaa ku biro bietu bikata bia nsenga ishima ku Warwick, New York, mu États-Unis.

Kasaka ka Bakunkushi-Bakulu nkalumbuulue naminyi?

Kasaka ka Bakunkushi-Bakulu nkatuule ma komite asamombo bua kukunkusha midimo yetu ilekene, na oso a ku bena Kasaka ka Bakunkushi-Bakulu afubaa mu komite umune sunga ibungi.

• Komite a bakunkushi: Akunkushaa mudimo utale mianda ya miiya na kutuusha bukuashi apatuku masaku, nsaa y’ababingabinga Tumonyi tua Yehowa muanda wa lukumiino luabo, na ingi mianda ayikuata Tumonyi tua Yehowa ayitungu kutuusha bukuashi bukidibukidi.

• Komite a bena Betele: Akunkushaa mianda itale bena Betele.

• Komite a mikanda: Akunkushaa kutuusha na kutuma kua miakanda mu tukongie na kuibaka kua ma mbalo a lulanguilo, ma biro a kualuula mikanda, ma mashibo a ma filiale.

• Komite a mudimo: Akunkushaa mudimo wa kulungula “mukandu wibuwa wa Bufumu.”​—Mateo 24:14.

• Komite a malongiesha: Akunkushaa kulumbula kua malongiesha a mu kikudi atupetaa mu bisangilo, tulasa, na mu mayi akobolue na ma video.

• Komite a bafundi: Akunkushaa mudimo wa kulumbuula malongiesha a mu kikudi atupetaa mu mikanda ya ku maasa sunga mu site etu na kukunkusha mudimo wa kualuula mikanda.

Kukatusha mudimo wa Kasaka ka Bakunkushi-Bakulu mu ano ma komite, ku lubingo loso Kasaka ka Bakunkushi-Bakulu akebungaa bua kutaluula nkalo ya ndumuluilo a Tumonyi tua Yehowa. Mu bino bisangilo, bena Kasaka ka Bakunkushi-Bakulu abataluulaa abiamba Bifundue, na kulamata ku bukunkushi bua kikudi kiselele ki’Efile Mukulu, na kuitashisha bua kuata kitshibilo kiabadi bakumiine boso.​—Bikitshino 15:25.

Mba nanyi abakuashaa Kasaka ka Bakunkushi-Bakulu?

Bano nyi mbena Nkidishitu ba kukulupila abakuashaa ma komite a Kasaka ka Bakunkushi-Bakulu. (1 Bena Kodinda 4:2) Bena ngobesha na abauku bia kukita mudimo w’abakunkushaa kui komite abadi bebatuule, na abatuelaa mu kisangilo kia yawa komite akikitshikaa ku lubingo loso. Sunga abo t’abataa bitshibilo, bakuashi abatushaa malango e na muulo na ingi mianda ibuwa, abafubisha bitshibilo bia komite na kulondesha bipeta abituuku ku bino bitshibilo. Kasaka ka Bakunkushi-Bakulu nkalombene dingi kuibatuma mu kutala bakuetu ba mu maumbo elekene sunga kukita miisambo mu bisangilo bu kisangilo kia ku kipua na pa kupa kua bena kalasa ka Galade ma diplome.