Muluisho nkinyi?
Lualulo lua mu Bible
Muluisho nyi nkikitshino kioso, bi muishimba, sunga binangu bikutuene na miiya y’Efile Mukulu. Ngutale dingi kuipaa kua miiya y’Efile Mukulu pa kukita kua bubi, sunga mianda ya kukutua kululama ku meso ku’Efile Mukulu. (1 Yowano 3:4; 5:17) Bible atemuna dingi miluisho bu kukutua kua kukita—nyi nkuamba’shi kukutua kua kukita kiakia kibuwa.—Shake 4:17.
Mu bifundue bia kumpala bibabafundile Bible, bishima biabadi baluule bua muluisho nyi “nkutupilua,” sunga kukutua kuasa. Kileshesho kala, kisaka kia basalayi mu Isalele kibadi akiuku kalolo bia kuela mabue mumushindo wabashibaadi “abatupilua.” P’abalula uno muaku kishima ku kishima, be kuiubadika’shi “kushii kutupilua.” (Bansushi 20:16) Biabia, kukita muluuisho, nyi nkutupilua akitekie miiya ipuidikie y’Efile Mukulu.
Bu biadi Mupangi, Efile Mukulu e na miiya ilulame yadi muelele bantu. (Kibafumbwilwe 4:11) Atukayimuka kumpala kuaye bua bikitshino bietu.—Bena-Looma 14:12.
Tui koobesha kukutua kukita muluisho?
Nya. Bible amba’shi “booso mbakite milwisho, mbabulwe ntumbo y’Efile Mukulu.” (Bena-Looma 3:23; 1 Banfumu 8:46; Mulungudi 7:20; 1 Yowano 1:8) Buakinyi bi biabia?
Bantu ba kumpala, Adame na Eva ku kibangilo tababaadi bena miluisho nya. Muanda babaadi bebapangie bapuidikie, kuifuanyiko di’Efile Mukulu. (Kibangilo 1:27) Anka, abashimiishe kupuidika kuabo muanda wa kukutua kua kukookiela Efile Mukulu. (Kibangilo 3:5, 6, 17-19) Nsaa ibaabatanda bana, bana babo babapiana muluisho na kukutua kua kupuidika. (Bena-Looma 5:12) Nka bibambile Mfumu Daavide a mu Isalele’shi, “ami ne mutandibue mu miluisho.”—Misambo 51:5.
Kui miluisho i bubi kukila ingi?
Olo. Bu kileshesho, Bible bantu ba mu Sodome a kala abaadi ‘abakitshi miluisho ikile bukata,’ miluisho yabo ibadi “ikile bukata.” (Kibangilo 13:13; 18:20) Tala mianda isatu ayilesha su muluisho ngukile bukata.
Bukata. Bible etudimusha buatudia kushikua miluisho ikata bu kutambuka lusandi, kulanguila ma nkishi, kuiba, kukolua, kunyenga, kuipayishena, na kukita malenganyi. (1 Bena-Kodinda 6:9-11; Kibafumbwilwe 21:8) Bible alesha kuilekena kua bino bintu na kuluba, kukita miluisho mu masaku, bu kileshesho kuakula bishima sunga kukita mianda ayitapa bangi ku mashimba. (Nkindji 12:18; Bena-Efeso 4:31, 32) Anka, Bible etutekie’shi tatukumanga kubepuula muluisho oso wawa, muanda ngulombene kufuisha mu kutupilua kua miiya y’Efile mukulu.—Mateo 5:27, 28.
Akitakula muntu. Ingi miluisho ayikitshikaa mu kukutua kua kuuka miiya y’Efile Mukulu. (Bikitshino 17:30; 1 Timote 1:13) Sunga Bible ta mmubingishe ino miluisho, kadi alesha kuilekena kuayo na kuipaa kua miiya y’Efile Mukulu pa bukopo. (Mbadiko 15:30, 31) Miluisho ya pa bukopo ayitukila “muishimba dibubi.”—Yeelemiya 16:12.
Misusa. Bible alesha dingi kuilekena kui pankatshi pa kukita muluisho musango umune na kuikala na kiubishi kia kukita munda mua mafuku ebungi. (1 Yowano 3:4-8) Boso abakitshi “miluisho na nkomanga,” sunga kunyima kua’bo kulonga bia kukita mianda ibuwa, abakapono ku kiimu ki’Efile Mukulu.—Bena-Ebelu 10:26, 27.
Baaba bakite miluisho ikata mbalombene kukalakashua na bushito bua bilubilo biabo. Kileshesho, Mfumu Davide bafundile’shi: “Bito byande bibaakidi mutwe wande; abinneemeena ngofu ikile, buu kintu kii bushito.” (Misambo 38:4) Anka mu Bible mui luno lukulupilo: “Muntu-mubi alekye eshinda dyaaye, naa sha-bukitekite atadile mpàngo yaaye. Aalukiile kwi Yehowa, aye amuleesha kifulo kyaaye ealushe kwi Efile Mukulu eetu mwanda nsha lusa.”—Yeeshaya 55:7.