Yesu badi naminyi?
LUALULO LUA MU BIBLE
Bu bikale’shi Bible talesha bibaadi abimueka Yesu ku mbidi, takui muntu sunga ngumune auku kalolo bi baadi nya. Bino abilesha’shi bibaadi Yesu amueka ku mbidi tabi na muulo. Anka Bible etukuasha buatudia kuuka kapela bibaadi abimueneka Yesu.
Bibaadi: Yesu baadi muina Yuda na abimueka’shi baadi muifuanene na nyinaye. (Bena-Ebelu 7:14) Bi bukopo buatudia kuamba’shi baadi muilekene na bangi bena Yuda. Ungi musango bakatukile ku Ngalileya enda ku Yelusaleme mu bufiefie kushi muntu kumutundula. (Yowano 7:10, 11) Na abimueka’shi, sunga pabaadi munkatshi mua balongi baaye, tababaadi abakamba kumutundula. Dingi efuku pabafikile kisaka kia bantu bena bi na ngoshi bua kukuata Yesu, Yudase Iscariote nyi baadi muibaleshe Yesu.—Mateo 26:47-49.
Bula bua nyene: Abimueneka’shi Yesu tabaadi na nyene ila nya, muanda Bible akula’shi, “bwa muntu mulume kulama nyeene ii bula, takumupa kineemo.”—1 Bena-Kodinda 11:14.
Miefu: Yesu baadi na miefu. Baadi alondo muiya wa bena Yuda, ubaadi aukandika bana balume bua ‘kupela kutshiba miefu ku mpese.’ (Bena-Levi 19:27; Bena-Ngalatea 4:4) Dingi Bible atemuna miefu ya Yesu mu bungi butemuki bubaadi abuakuila makienga aye.—Yeeshaya 50:6.
Mbidi: Mianda yoso ayilesha’shi Yesu baadi na mbidi inyingie. Mu mudimo waye wa bulungudi baadi mutambukie bilometre bikile bungi. (Mateo 9:35) Baadi mutooshe ntempelo a bena Yuda misango ibidi, baadi mufuudikie mesa a bantu babaadi abashintula makuta na kubinga ngombe na mikooko na lufimbo. (Luka 19:45, 46; Yowano 2:14, 15) Ungi mukanda (Cyclopedia) ubabafundile kui McClintock na Strong awamba’shi: “Mianda yoso yabalondo mu ma Evanjile ayilesha’shi [Yesu] baadi na mbidi inyingie.”—Volume IV, esaki 884.
Bibaadi amueka: Yesu baadi na kalolo na lusa, bino bibaadi abimueka ku meso kuaye. (Mateo 11:28, 29) Bantu ba mishindo yoso, babaadi abakimbi busambi na bukuashi kuadi. (Luka 5:12, 13; 7:37, 38) Mpa na bana bakinga babaadi abakimbi kuenda kuadi na abepusha kalolo pabadi naaye.—Mateo 19:13-15; Maako 9:35-37.
Mpushisho e bubi pabitale abimueka Yesu
Mpushisho e bubi: Bangi bantu abakula’shi Yesu baadi a mu Afrique muanda mukanda wa Kibafumbwilwe aupuandikisha nyene yaaye bu butongo, na mikolo yaaye, ngiifwane “kilonda kia muninga akipenyapenya.”—Kibafumbwilwe 1:14, 15, Kilombene kipya 2014.
Bia binyibinyi: Mukanda wa Kibafumbwilwe, mbeuleshe mu “bitunduilo.” (Kibafumbwilwe 1:1) Nyene ya Yesu na mikolo yaaye mbeyifubishe mu ngakuilo a mu kimfuanyi bua kulesha ngikashi ya Yesu kunyima kua lusangukilo luaye, kushi bua kulesha bibaadi amueneka pabaadi ki pa nsenga. Pa kuakula pabitale Yesu’shi “Mutwe waye na nyene yaaye bibaadi bitooka soo bu bwaa butooka bwi soo, bu neeshe,” mukanda wa Kibafumbwilwe 1:14 aufubisha elangi kushi bua kulesha bi baadi nyene yaaye, kadi bua kupuandikisha. Bino abilesha binangu biaye pamuanda wa bipua bibungi biadi nabio. (Kibafumbwilwe 3:14) Uno verse tapuandikisha elangi dia nyene ya Yesu na butongo nya anka edipuandikisha na neeshe sunga mulemba.
Mikolo ya Yesu, “ngiifwane kilonda kia muninga akipenyapenya.” (Kibafumbwilwe 1:15) Dingi mpala yaaye, ibaadi ikuete kupenyapenya “abikalaa kanya ka nguba m’mitwe.” (Kibafumbwilwe 1:16, EEM) Biabia bu bikale’shi ta kui bantu be na elangi bu dino diabakuila pano, abilesha’shi kino kimonua kibaadi mu ngakuilo a mu kinfuanyi, bua kuleesha Yesu mupue kusanguka bu “mushaleele muitaata dishii kutwelwa.”—1 Timote 6:16.
Mpushisho e bubi: Yesu tabaadi bukome nya.
Bia binyibinyi: Yesu baadi mulume munyingie a bukome. Bu kileshesho, baadi muileshe kui kisaka kia bantu babaadi na bi na ngoshi babafikile mu kumukuata. (Yowano 18:4-8) Bu bibaadi afubu mudimo wa mabaya na bi na mudimo bia ku maasa abimueneka’shi Yesu baadi na bukome bui bungi.—Maako 6:3.
Buakinyi Yesu baadi na lukalo lua bukuashi buashi bamutuadile mutshi waye wa makienga? Na buakinyi bafuile kumpala kuashi bantu babaadi bapudikue naaye pamune bafue? (Luka 23:26; Yowano 19:31-33) Kumpala kua’shi bapudikie Yesu ku mutshi, baadi mu kookie ngofu. Buabua bufuku bushima tabaadi mulale, muanda baadi na kinyongua kikata. (Luka 22:42-44) Bufuku be na Yuda babaadi bamukiengieshe, na pa babutokiele bena Loma bababangile kumukiengiesha namu. (Mateo 26:67, 68; Yowano 19:1-3) Pangi biabia bioso nyi bibaadi bikite buashi afue bukidi.
Mpushisho e bubi: Yesu baadi nka na kinyongua nsaa yoso.
Bia binyibinyi: Yesu baadi muleshe mu mushindo upuidikie ngikashi ya Nshaye Yehowa, abetanyina mu Bible bu “Efile Mukulu a muloo.” (1 Timote 1:11; Yowano 14:9) Dingi Yesu baadi mulongieshe bangi bantu bia kuikala na muloo. (Mateo 5:3-9; Luka 11:28) Ino mianda ayilesha’shi Yesu baadi amueneka na muloo nsaa yoso.