Myanda i mu Bible mbeyishintuule sunga kwiyilwisha?

Nya. Patupwandikisha Bible na mifungofungo ya bifundwe bya kala atumono shi Bible ta mmushintulukye nya sunga mbyabidi shi munda mwa bipwa binunu bantu abaadi abafunduula ku maboko ku bintu bikumbeene kulwila.

Nyi kwamba shi pabaadi abafunduula tababaadi bakite bingi bilema nya?

Mbafumbule binunu bya mifungofungo ya kala. Ingi ya ku ino mifungofungo ayikutwena mu ingi mbalo, na bino abilesha shi kubaadi kutwele bingi bilema mu kufunduula. Bilema bibungi mbipeela na tabishintuula kipatulwilo kya bifundwe. Kadi, kwi mbalo ipeela yakudi kwikutwena kukata mu mifungofungo, na ingi mbalo ayimweneka shi mbatompe kutwesha bilema pa bukopo bwa kushintuula mukandu wa Bible. Twate bileshesho bibidi:

1. Mu 1 Yowano 5:7, mu ma Bible ababadi baluule kala mwi ano mayi: “Mwiyilu mwi Yaaya, Eyi, na Mukishi Wiselele: na bano basatu be umune.” Anka, mu mifungofungo ibuwa, ano mayi ta e mu bifundwe bya kala nya. Mbeakumbashe kunyima.a Byabya, mu Bible ibuwa yabaadi baluule ano mafuku mbakashe ano mayi.

2. Eshina dy’Efile Mukulu adimweneka misango binunu mu mifungofungo ya Bible ya kala. Anka, mu Bible ibungi yabadi baluule ano mafuku mbedikashe na kufunda myasu “Mwanana” sunga “Efile Mukulu” pa mbalo yaadio.

Mushindo kinyi watudya kushinkamisha shi takwi bingi bilema byabashi babande kutundula?

Ano mafuku, mifungofungo ya bifundwe bya kala yabadi bapwe kufumbula ngikile bungi na mbibofule kutundula bilema byooso bilombeene kwikala mu Bible.b Kupwandikisha kwa myanda i mu ino mifungofungo nkuleshe kinyi pabitale kukutwa kwa bilema mu Bible yatudi nayo lelo?

• Sha binangu abetanyina bu William H. Green bambile bino pabitale myanda ifundjibwe mu Bifundwe bya Kina Ebelu (byatwitanyina bu “Kilombeeno kya Kala”): “Twi kwamba kushi kwidimba shi takwi ungi mukanda wa kala ulamibwe kano kalolo.”

• Sha binangu mu myanda ya Bible abetanyina bu F. F. Bruce bafundile bino pabitale myanda ifundjibwe mu Bifundwe bya kina Greke bya Beena Kidishitu, sunga “Kilombeeno Kipya”: “Kileshesho kya kukutwa kwa bilema mu myanda ifundjibwe mu Kilombeeno Kipya ki bukata kukila kileshesho kya kululama kwa mikanda ibungi ya bafundji ba kala byatushi balombeene kwela mpaka.”

• Frederic Kenyon, mulongi mukata a mifungofungo ya kala ya Bible, bambile shi muntu “mmulombeene kukwata Bible mushima mu maboko na kwamba kushi kutshina sunga mpaka shi mmukwate Eyi dy’Efile Mukulu, dibaadi difunduulwe kushi kushimisha kantu mu bipungo na bipungo munda mwa nkama na nkama ya bipwa.”

Mmyanda kinyi ingi ayishinkamisha shi baadi mulamibwe kalolo mpa na kufika kwatudi?

• Bano babaadi abafunduula mikanda ya kina Ebelu na kina Greke abaadi bemulame mpa na miisambo ayilesha milwisho ikata ibakitshine bafubi b’Efile Mukulu.c (Mbadiko 20:12; 2 Samwele 11:2-4; Bena-Ngalatea 2:11-14) Na dingi, abaadi bafunduule mpa na bipindji abilesha kukutwa kwa kukokyela kwa mwilo wa beena Yunda na kulesha patooka nkumiino ayifiki kwi bantu. (Osea 4:2; Malakii 2:8, 9; Mateo 23:8, 9; 1 Yowano 5:21) Pa’bo kufunduula ino myanda kalolo, bano bafundji abaadi baleshe shi abaadi batuule lukulupilo Mwiyi diselele dy’Efile Mukulu na kwidinemeka.

• Ta mbilombane kwamba shi Efile Mukulu aye baadi mufundishe Bible ku bukwashi bwa kikudi kisele, baadi na kya kumulama?d (Yeeshaya 40:8; 1 Mpyeele 1:24, 25) Na dingi, tabaadi akumiina shi Bible akwashe penda bantu ba kala nya, mpa n’atwe namu lelo uno. (1 Beena-Kodinda 10:11) Bible amba shi, “Byabya byoso bibafundjilwe mu Bifundwe kala, bibafundjilwe pa mwanda wa kwitulambukwisha byatudya kwikala na lwishinko na kukankamana bilombene twekala na lukulupilo.”​—Bena-Looma 15:4.

• Yesu na balondji baaye abaadi batemune bipindji bya Bifundwe bya kina Ebelu kushi kwikalakasha su bibaadi bilwishibwe.​—Luka 4:16-21; Bikitshino 17:1-3.