Yeeshaya 41:10​—“Totshiinanga mwanda nee noobe”

“Twekalanga na moo, mwanda ne nobe. Twekalakashanga, mwanda ne Efile Mukulu obe. Nakakunyingisha, olo, nakakukwasha, nakukwata ku mboko yande ilume ya kululama.”​—Yeeshaya 41:10, Traduction du monde nouveau.

“Totshiinanga mwanda nee noobe; twekalanga na katshim’a-munda mwanda nee Efile mukulu oobe. Naakupa bukome; oolo, naakukwasha, naakuka-nkamika na mboko yande ilume ya kululama.”​—Yeeshaya 41:10, Biible Bifundwe Biiselele.

Kipatulwilo kya Yeeshaya 41:10

Yehowaa Efile Mukulu apatulwila balangwidi baye basha lulamato’shi ebakwatshishena, sunga bafumankana na mwanda wi naminyi.

“Nee noobe.” Yehowa apatulwila balangwidi baye bwakinyi ta mbalombene kwikala na moo​—tabe bupenka nya. Mwanda kwete kumona nkalakashi yabo na kuteemesha nteko yabo, bi nka bu’shi epa yaaya mbalo yabadi.​—Misambo 34:15; 1 Mpyeele 3:12.

“Nee Efile Mukulu oobe.” Yehowa afukamisha balangwidi baye pa kwibatentekyesha’shi aye enka Efile Mukulu aabo na’shi ebakumina bu balangwidi baaye. Bashinguule’shi takwi lukalakashi su ndumune lulombene kukutshisha Efile Mukulu bwadya kwibakwasha.​—Misambo 118:6; Bena-Looma 8:32; Bena-Ebelu 13:6.

“Naakupa bukome; oolo, naakukwasha, naakukankamika na mboko yande ilume ya kululama.” Penda mu milongo isatu, Yehowa alesha bi binangu byabye bwa kwibashinikamisha’shi ebakwasha. Akula mu ngakwilo a mu kifwanyi bwa kulesha by’akyebe kukita bwa kukwasha mwilo waye nsaa yaudi na lukalo lwa bukwashi. Su muntu apona, Efile Mukulu olola mboko yaye ibalume bwa kumwibwesha.​—Yeeshaya 41:13.

Mushindo wa kumpala aunyingisha Efile Mukul una kukwasha balangwidi babye nyi nku bukwashi bwa Eyi dyaaye, Bible. (Yooshwa 1:8; Bena-Ebelu 4:12) Kileshesho, Eyi dy’Efile Mukulu di na malango ebuwa aakwasha boso be mu nkalakashi, bu bulanda, mikumbo, sunga bafwishe. (Nkindji 2:6, 7) Efile Mukulu mulombene dingi kufuba na bukome bwaye, bwa kunyingisha balangwidi baye ku mbidi na mu binangu bwabadya kunyingiila nkalakashi.​—Yeeshaya 40:29; Luka 11:13.

Myanda yabadi besambile mu Yeeshaya 41:10

Ano mayi aanyingisha bena Yuuda basha lulamato bababadi bakwate benda nabo mu bupika mu Babilone. Yehowa badi mutemkye’shi ku nfudiilo kwa bupika bwa bena Yuuda, akwikala kilobo akikatshokola miilo yoso ipepi na Babilone mpa na kumubutula. (Yeeshaya 41:2-4; 44:1-4) Nsaa ayikala Babilone na miilo imwifunyishe ayipusha moo bwa uno mukandau, bena Yuuda t’abekala dingi na moo nya, mwanda Yehowa ebakalwila. Munda mwa misusa isatu Yehowa badi mwibaningishe na ano mayi “totshinanga.”​—Yeeshaya 41:5, 6, 10, 13, 14.

Sunga ku mbangilo ano mayi abadi atale bena Yuuda basha lulamato babadi mu bupika mu Babilone, Yehowa Efile Mukulu badi mukite bya’shi ano mayi a Yeeshaya 41:10 bealame bwa kunyingisha balangwidi baye boso. (Yeeshaya 40:8; Bena-Looma 15:4) Kwete kwibakwasha lelo uno, nka bibadi mwibakwashe mu mafuku a kala.