Bena Kolose 3:23​— ‘Kioso kianudia kukita, ekikiteyi n’eshimba dioso’

“Mianda yoso y’anukitshi eyikiteyi na anyima enu oso bu’nue abeyikitshina Yehowa, kushi bu’nue abeyikitshina bantu.”​—Bena Kolose 3:23, Traduction du monde nouveau.

“Kioso kianudia kukita, ekikiteyi n’eshimba [dimune], nka bu [abakitshina] Mfumu kushii bwa bantu.”​—Bena Kolose 3:23, Kilombeno kipya 2014.

Akipatuula Bena Kolose 3:23

Muina Kidishitu abitungu akite muaye mooso bua kuikala mufubi mukata muanda mmueneno aaye pabitale mufubo mmuipushene na lulanguilo luaye kui Yehowa Efile Mukulu.

“Kioso kianudia kukita.” Boso abakumiina kulanguila Yehowa abatompaa kulonda abiamba Bible mu mianda yoso y’abakitshi. Abetatshishaa bua kuikala bafubi be bukopo, ba sha kululama, na ba kukulupila mu midimo yabo ya kuifuku n’efuku ku nshibo, ku mudimo, na ku kalasa.​—Nkindji 11:13; Bena Loma 12:11; Bena Ebelu 13:18.

“Ekikiteyi n’eshimba dioso [anyima enu oso].” Muaku “n’eshimba dienu dioso” mbewaluluile ku muaku wa mu kina Greke “aulesha muntu e na kitshibilo kia kulombasha mudimo w’Efile Mukulu na bukome buaye boso.”a

Biabia, uno mufubi, afubisha ngobesha yaaye ya ku mbidi na binangu bua kukita muaye moso nsaa y’alombasha mudimo. Angi ma Bible ngaluule uno muaku bu “n’eshimba dimune” (New Catholic Bible) sunga “n’eshimba” (King James Version).​—Tala “Bena Kolose 3:23 Mu angi ma Bible.”

“Abeyikitshina Yehowa, kushi bu’nue abeyikitshina bantu.” Sunga bekala abakitshi mudimo kinyi, bena Kidishitu abewataa na muulo ukata muanda abashinguula’shi mmueneno aabo pabitale mudimo e na bukitshishi ku kipuano kiabo na Yehowa Efile Mukulu. Kia kumpala be na lukalo lua kumusankisha, kushi bua kusankisha mukata a mudimo sunga mungi muntu. Nsaa i muina Kidishitu afubu ngofu na e na mmueneno ebuwa pabitale mudimo, bantu t’abamuelela binangu bibuwa penda bupenka buaye nya abekala na mmueneno ebuwa pabitale Efile Mukulu alanguila. Mu uno mushindo, muina Kidishitu akitshi muaye moso “bwa’shi eshina di’Efile Mukulu . . . Tadiikalanga disabuulue.”​—1 Timote 6:1, NWT; Bena Kolose 3:22.

Kiabakuila mu Bena Kolose 3:23

Mukanda wa mu Bible wa Bena Kolose Mpoolo baadi muiufundile kibundi kia kala kia Kolose.b Baadi muiufunde pangi mu mafuku a ku nfudiilo kua kuedibua kuaye kua kumpala mu lukano mu Loma, pepi mu 60-61 B.B.

Mukanda wa Bena Kolose wi na malango aakuasha bena Kidishitu abatuukila mbalo yoso sunga be na nshalelo kampanda buabadia kulanguila Efile Mukulu mu buumune. (Bena Kolose 3:11) Awibanyingisha buabadia kuambula ngikashi y’Efile Mukulu bu, kifulo, kalolo, na lusa. (Bena Kolose 3:12-14) Aupatuula dingi mushindo autungu’shi lulanguilo lu’Efile Mukulu luikale na bukitshishi ku mianda yoso ya mu nshalelo a muntu.​—Bena Kolose 3:18–4:1.

Mukanda wa Bena Kolose 3:23 mu angi ma Bible

“Kyoso kyanukitshi, nwikikite n’eshimba, bu kumwanda wa Fumu kushii ku mwanda wa bantu.”​—Esambi dipya 2015

“Mufubo oso wawa w’anufubu, nwiufube n’eshimba dyoso bu’new abafubila Nfumu kushi bu abafubila bantu.”​—Ebuku di’Efile Mukulu.

“Kioso kianudia kukita, ekikiteyi n’eshimba [dimune], nka bu [abakitshiina] Mfumu kushii bwa bantu.”​—Kilombeno kipya 2014, nnabo beele mu tuboko.

Tala uno video muipi bua kumona mu kikoso mianda i mu mukanda wa Bena Kolose.