Mukanda wa kumpala wa Kuilondena kua Mianda
12 Bano nyi bantu babafikile kui Davide ku Sikelage pashibaadi na mushindo wa kuenda koso ku’akumiina pa muanda wa Saule muana a Kishe, babaadi munkatshi mua bilobo bia ngoshi bibaadi bikuatshishene Davide mu ngoshi. 2 Babaadi na mata a mikietue, na babaadi abauku bia kufubisha mboko ibalume sunga ibakashi bua kuasa mabue na ndundo* a tonyi, sunga kuasa mikietue na buta. Babaadi ba ku bakuabo na Saule, ba ku Benyamine. 3 Nfumu a kifuko baadi Ahiezere pamune na Yoashe, boso babaadi bana ba Shema muina Gibeya. Munkatshi mua bilobo bia ngoshi mubaadi Yeziele na Pelete bana ba Azemawete, Belaka, Yehu a mu Anatote. 4 Ishimaya muina Gibeone baadi kilobo kia ngoshi kia ku bilobo makumi asatu, na baadi mukata a biabia bilobo makumi asatu. Kubaadi dingi Yelemiya, Yahaziyele, Yohanane, Yosabade muina Gedera. 5 Eluzai, Yerimote, Bealiya, Shemariya, Shefatia muina Arife, 6 Elkana, Ishia, Azarele, Yoezere na Yashobeame babaadi bena Kora. 7 Na Yowela na Zebadia bana ba Yeroame a ku Gedore.
8 Bangi ba ku bena Gade babayile ku lupese lua Davide nsaa ibaadi mu kabaaka mu kifuamino. Babaadi bilobo bia ngoshi, basalayi balongieshibue bia kulua ngoshi, babaadi abauku bia kufubisha kalolo ngabo ikata na milumbu, mapala aabo abaadi nka bu a ntambue na babaadi abasuuku lubilo nka bu nkondolo i ku miengie. 9 Esere baadi nfumu, Obadia baadi mumulondele na Eliabe baadi a kasatu, 10 Mishimana a kananka, Yelemiya a katano, 11 Atai a kasamombo, Eliyele a musambobidi, 12 Yohanane a muanda, Elezabade a kitema, 13 Yelemiya a ekumi, Makabanayi a ekumi na umune. 14 Baba nyi babaadi bena Gade, bakata ba kiluilo. Mukile bupeela a kuabadi baadi mumune na bantu 100, na mukile bukata a kuabadi baadi mumune na bantu 1 000. 15 Abo nyi babasabukile Yordane mu mueshi wa kumpala, pabaadi muule mpa na ku biese, na abo nkubinga bantu boso babaadi bashale mu mabanda, dia kutunduka nguba na kupona nguba.
16 Bangi bana balume bena Benyamine na bena Yunda babafikile namu kui Davide mu kifuamino kiaye. 17 Biabia Davide batuukile kuabadi ebalungula’shi: “Su nubafiki kuandi mu butaale bua kunkuasha, paapa nenukukila bua’shi tuikale kintu kimune. Kadi su nuibafikie bua kumpana kui beshikuanyi bande, aku namu ntshi mukite muanda wi bubi, Efile Mukulu a bamashetu amone uno muanda na atshibe kiimu.” 18 Paapa kikudi ki’Efile Mukulu nkuyikila Amasayi baadi mukata a bilobo makumi asatu, aye nkuakula’shi:
“Ô Davide tui bantu bobe na tui nobe, Ô muana a Yesee!
Butaale, butaale buikale nobe, na butaale buikale kui yawa akukuasha,
Muanda Efile Mukulu oobe kuete kukukuasha.”
Biabia Davide nkuibatambula na nkuibatuula munkatshi mua bisaka bia bakata ba basalayi.
19 Bangi bena Manasee babasuukile namu, abo nkuenda kui Davide pabaadi ende na bena Filistine mu kulua na Saule, anka Davide tabakuashile bena Filistine nya, muanda kunyima kuabo kuipushena, ba nfumu ba bena Filistine babamualuishe bakula’shi: “Tala etusuuka na alukiila kui nfumu aaye Saule na betuipaa.” 20 Bantu ba mu kisamba kia Manasee babasuukile benda kui Davide pabaadi ku Sikelage mbano: Adena, Yosabade, Yediaele, Mikaele, Yosabade, Elihu na Ziletayi, babaadi ba nfumu ba bisaka bia bantu kinunu ba mu kisamba kia Manasee. 21 Babakuashile Davide bua kulua na kisaka kia ba ntomboshi, muanda abo boso babaadi bilobo bia ngoshi, bana balume banyingie mashimba, na babafikile bakata ba kiluilo. 22 Efuku dioso, bantu babaadi’nka abafiki mu kukuasha Davide, mpa na pabatamine kishalelo kiaye, akio nkufika bukata nka bu kishalelo kia Efile Mukulu.
23 Buno nyi bungi bua bakata ba baba babaadi na bina ngoshi babafikile mu kukuasha Davide ku Ebrone, bua kukatusha bufumu kui Saule na kuibupa Davide, muyile eyi dia Yehowa. 24 Mu kisamba kia Yunda, bana balume babaadi abatuala ngabo ikata na milumbu babaadi 6 800, belumbuule bua kulua ngoshi. 25 Mu kisamba kia Simeone, bilobo bia ngoshi, bana balume banyingie mashimba ba mu kiluilo babaadi bantu 7 100.
26 Ba mu kisamba kia Levi babaadi bantu 4 600. 27 Yehoyada baadi mukunkushi a bana ba Alona, na baadi na bantu 3 700, 28 na Zadoke baadi kilobo kia ngoshi, nsongualume munyingie eshimba, pamune na bakata ba basalayi 22 ba mu nshibo ya nshaye.
29 Ba mu kisamba kia Benyamine, bakuabo na Saule, babaadi bantu 3 000, kumpala, bebungi ba kuabadi babaadi abafubila Saule na kifuko kiaye. 30 Ba mu kisamba kia bena Efraime babaadi bantu 20 800, bilobo bia ngoshi, bana balume banyingie mashimba, bantu bende nkumo munkatshi mua bifuko bia bamashabo.
31 Ba mu kipindi kia kisamba kia Manasee babaadi bantu 18 000, babaabadi basangule muyile mashina aabo bua’shi bafikie mu kuikasha Davide bu nfumu. 32 Ba mu kisamba kia Isakare babaadi bakata 200, babaadi abauku nsaa kalolo, na babaadi abauku kilombene bena Isalele kukita, na bakuabo balume boso babaadi ku bukunkushi buabo. 33 Ba mu kisamba kia Zabulone, kubaadi bantu 50 000 balombene kufuba mu busalayi, balongieshibue bia kuilonga kalolo mu ngoshi na bina ngoshi bia mishindo yoso, abo boso babaadi bebungie kui Davide na lulamato loso.* 34 Ba mu kisamba kia Neftali, kubaadi ba nfumu 1 000, na babaadi na bantu 37 000 be na ngabo ikata na milumbu. 35 Ba mu kisamba kia Dane, baba babaadi balongieshibue bia kuilonga kalolo mu ngoshi babaadi bantu 28 600. 36 Ba mu kisamba kia Ashere, baba babaadi balombene kufuba mu busalayi, balongieshibue bia kuilonga kalolo mu ngoshi babaadi bantu 40 000.
37 Ku bantu ba bushiya bua Yordane, bena kisamba kia Rubene, kia Gade na kipindi kia kisamba kia Manasee, babaadi basalayi 120 000 be na bina ngoshi bia mishindo yoso. 38 Bano bantu boso babaadi balume ba ngoshi, belumbuule bua ngoshi. Babafikile n’eshimba dimune ku Ebrone bua kuikasha Davide bu nfumu a Isalele oso mushima, dingi bena Isalele boso babaadi bakumiine n’eshimba dimune bua kuikasha Davide bu nfumu. 39 Na babashalele paapa na Davide munda mua mafuku asatu, abadi na abatomo, muanda bakuabo balume babaadi bebalumbuluile bia kudia. 40 Dingi, baba babaadi pepi nabo, mpa na baba babaadi kula mu bipindi bia nsenga bia bena Isakare, bena Zabulone na bena Neftali, babaadi abafiki na bia kudia ku mpunda, ku tumelo na ku ngombe; babatuadile bukula, tu mikate tua nfigiye na tua tukuba tua nfinyo tuume, nfinyo, muimu, na ngombe na mikooko bikile bungi, muanda babaadi na muloo wibungi mu Isalele.