Yobo
24 Buakinyi Sha Bukome Boso tamutshibe efuku diaye dia kiimu?
Buakinyi baba abamuuku t’abamono efuku diaye?*
2 Bantu abatentula bitunduilo bia mikalo;
Abayibi bisaka bia mikooko bua kuenda nabio ku mbalo yabo yakudishila nyema.
3 Abanyengie mpunda a bana ba nshiye*
Na abakuata ngombe a mukashi kilele bu kieeko bua kintu kiadi muiyapule.
4 Abakatusha balanda muishinda pa bukopo;
Bantu bashi na bukuashi ba pa nsenga abitungu bebafuame.
5 Balanda abakimbi bia kudia nka bu mpunda ya mu kisuku i mu kabaaka;
Abakimbi bia kudia mu kabaaka bua bana babo.
6 Abitungu baumbule muifuba* dia ungi muntu
Na bapumbuule muifuba dia nfinyo dia bantu bebubi.
7 Bufuku abalala musua, kushi kilamba;
Ta be na kilamba kia kuiputa bua mashika.
8 Mpeshi a ku miengie bebatopo;
Abakuata ku mabue ngofu pa muanda wa kukutua mbalo ya kufuama.
9 Muana a nshiye mmukatushue kuibeele;
Na bilamba bia balanda mbiatshibue bu kieeko bua kintu kiabadi beapule.
10 Abebatakula bua kuenda musua, kushi kilamba
Na nsala, pabasemuna bisaasa bia ntete.
11 Abakitshi mufubo wi bukopo munkatshi mua midimba ya mafuba a nfinyo;*
Abafuntu tukuba tua nfinyo ku mbalo ya kuenga tukuba tua nfinyo.
12 Mu kibundi bantu be pepi na kufua bakuete abadidi;
Be na malonda a lufu* bakuete kuela misaase bua kuteka bukuashi,
Anka Efile Mukulu takuete kuibimona bu bi bubi.*
13 Kui baba abatombokiela etaata;
Tabatundula mashinda aadio,
Na tabalondo tushinda tuadio.
14 Ngipayishanyi abuuku ku namashika buee;
Ayipaa bantu bashi na bukuashi na balanda,
Aku namu bufuku ayibi.
15 Eyiso dia ntambushi a lusandi aditengielaa kamuilua nshobe
Eakuilanga’shi: ‘Takui muntu ammono!’
Na abuikila mpala yaye.
16 Mu mufito abatuele mu mashibo pa bukopo;*
Mu kaanya abeshitshila muanka.
Tabauku etaata’shi nkinyi.
17 Kuabadi namashika emumune na mufito wi bukopo;
Mbeubidishene na bintu abitshinyishaa bia mufito wi bukopo.
18 Anka mema aebalaasha bukidibukidi.*
Kipindi kiabo kia nsenga akikedibua mulua.
Tabakalukiila ku mafuba aabo a nfinyo.
19 Nka abikalaa eshipo na kibobo abiumishaa neje mupue kusunguluka,
Mashama* aashimisha bantu bakite miluisho!
20 Nyinaye* akamuiluankana; bifinyo abikamudi na muloo.
Takatentekieshua dingi.
Na kukutua kululama akukatshokolua nka bu mutshi.
21 Adi mukashi nkunga bintu,
Na kukiengiesha mukashi kilele.
22 Efile Mukulu akafubisha bukome buaye bua kubutula basha bukome;
Sunga bebua ta be na kishinkamisho kiashi abekala na muwa.
23 Efile Mukulu ebatadiila buashi bekulupile na bepushe mu butaale,
Anka meso aaye aatala bioso biabakuete kukita.*
24 Abebatumbisha bua kapindi kapeela akupu tabe kuanka dingi.
Abebayisha na kuibabunga nka bu bantu boso;
Abebatshibi nka bu miepu ya ntete.
25 Binobino nnanyi mulombene kushinkamisha’shi ne sha madimi
Sunga kupela eyi diande?”