“Tentekyeshayi bakunkushi beenu”

BINO bishima bya Mpoolo mutumibwa, bi mu Beena-Ebelu 13:7, mbalombeene kwibyaluula dingi’shi: “Tentekyeshayi baaba bakwete kwinuludika.” Kubanga mu Mpantekoote a mu kipwa kya 33 bipungo byetu (B.B.) mpaa na bipwa bibalondele, batumibwa ba Mwanana Yesu Kidishitu babaadi balombashe uno mudimo bu kasaka ka bakunkushi-bakulu kabaadi na mudimo wa kuludika tukongye tupya twa beena Kidishitu. (Bik. 6:2-4) Peepi na kipwa kya 49 B.B., babaadi batamishe kano kasaka ka bakunkushi-bakulu takabaadi penda na batumibwa ba Yesu nya. Pa baabadi baate kitshibilo pabitale kilumbu kya bantu bashii basadibwe, mu kasaka ka bakunkushi-bakulu mubaadi “batumibwa na bakulu [ba ku Yeelusaleme].” (Bik. 15:1, 2) Babaadi na mudimo wa kutala myanda ya beena Kidishitu ba mbalo yooso. Abatumine mikanda na mayi a kulonda, ibaadi inyingishe tukongye na abo nkukita bya’shi balondji batungunukye na kwikala na binangu mpaa na bikitshino bimune. Tukongye tubaadi tukookyele na kulamata ku bukunkushi bwa kasaka ka bakunkushi-bakulu na, pa mwanda wa byabya, abapetele myabi ya Yehowa abo nkutungunuka na kwikala bibuwa.​—Bik. 8:1, 14, 15; 15:22-31; 16:4, 5; Eb. 13:17.

² Kunyima kwa lufu lwa batumibwa, kusumbula kwa lukumiino kukata kubabangile. (2 Tes. 2:3-12) Anka bu bibatemukile Yesu mu lukindji lwaye lwa mbyo ibuwa na lubishi lubi, mbyo ibuwa (beena Kidishitu bedibwe mwimu) munkatshi mwabo abaadi bemukune lubishi lubi (beena Kidishitu ba madimi). Munda mwa bipwa nkama, bino bisaka abaadi bebitadiile bwa’shi bikule pamune mpaa na mu nsaa ya kuumbula, ku “nfudiilo a bya pano.” (Mat. 13:24-30, 36-43) Yesu batungunukile na kukumiina beena Kidishitu bedibwe mwimu, anka kasaka ka bakunkushi-bakulu takabaadi kwanka nya. Takubaadi bantu pa nsenga babaadi Yesu atumika nabo bwa kukunkusha balondji baaye nya. (Mat. 28:20) Anka, baadi mutemukye’shi, myanda ayikashintuluka mu mafuku a kuumbula.

³ ‘Nnanyi e bu mpika a lulamato na mudimukye?’ Yesu babangile lukindji lwaye na luno lukonko, sunga na kino kileshesho, bu kipindji kya ku “kitundwilo” kibatushile pabitale “nfudiilo a bya pano.” (Mat. 24:3, 42-47, EEM) Yesu baadi muleshe shi, uno mpika a lulamato akyebe kwikala na bi bungi bya kukita mu kupa kwa mwilo w’Efile Mukulu bidibwa bya mu kikudi “pa nsâ ikumbane.” Bu bibaadi Yesu mwate kisaka kya balume​—kushii kusangula muntu umune​—bwa kukunkusha mu siekele a ku mpala, mpika a lulamato na mudimukye abakwete kutumika naaye kwi Yesu mu mafuku a ku nfudiilo kwa bya pano ta mmuntu umune nya.

KUTUNDULA “MPIKA A LULAMATO NA MUDIMUKYE”

⁴ Nnanyi abaabadi basangule kwi Yesu bwa kudiisha balondji baaye? Bibaadi bilombane bwa’shi Yesu asangule penda beena Kidishitu bedibwe mwimu be pa nsenga. Bible ebetamina bu kisaka kya ‘ba tshiite-mwakwidi ba Nfumu’ kyabadi bape mudimo wa “‘kuukisha myanda ya kukaanya yaadi mukite’ Aye [mwibakatushe] ku mufito bwa [kwibatwesha] kwi etaata dyaaye dya kukaanya.” (1 Mp. 2:9, Kilombeno kipya; Mal. 2:7; Kibaf. 12:17) Bedibwe mwimu booso be pa nsenga mbakite mpika a lulamato na mudimukye su? Nya. Yesu pabaadi mukite kilengyeleshi aye nkupa kibumbu kya balume peepi na 5 000, kukaasha bakashi na bana bidibwa bya ku mbidi, bebipeele balondji, abo namu nkupa kibumbu kya bantu. (Mat. 14:19) Baadi mudiishe bantu bebungi ku maasa a bantu bapeela. Lelo uno, kwete kutuusha bidibwa bya mu kikudi mu mushindo wi mumune.

⁵ Byabya, “mulami a bintu sha lulamato na mudimukye,” nyi nkasaka ka balume bedibwe mwimu bepaane mu kulumbuula na kutuusha bidibwa bya mu kikudi mu kipungo kya kwikala kwa Kidishitu. (Luk. 12:42, NWT) Mu mafuku a ku nfudiilo, balume bedibwe mwimu bekale “mpika a lulamato na mudimukye” mbafube pamune ku biro byetu bikata. Lelo uno, bano bakwetu bedibwe mwimu mbakite Kasaka ka Bakunkushi-Bakulu ka ba Temwe ba Yehowa.

⁶ Kidishitu kwete kutumika na kano kasaka bwa kutusha myanda itale kulombana kwa matemuki a mu Bible na kutuusha bukunkushi pa nsaa ilombane pabitale kutumikila mayi a kulonda e mu Bible mu nshaleelo a kwifuku n’efuku. Bino bidibwa bya mu kikudi bakwete kwibyabila ku bukwashi bwa tukongye twa ba Temwe ba Yehowa. (Yesh. 43:10; Nga. 6:16) Mu mafuku a kala, mpika abadi bakulupile sunga mulami, baadi akunkusha midimo ya mu nshibo. Bi mumune, mpika a lulamato na mudimukye mbamupe mudimo wa kukunkusha nshibo ya lukumiino. Byabya, kwete dingi kukunkusha ingi midimo bu, mudimo wa bulungudi, ma programe a bikongeno bya kifunda na bya mafuku asatu, kutuula kwa bakunkushi ba ingi midimo ya ndumbulwilo, na kutuusha mikanda ayipatuula Bible, bino byooso mbwa buuwa bwa “bafubi ba mu nshibo.”​—Mat. 24:45.

⁷ Byabya, “bafubi ba mu nshibo” mba nnanyi? Atwamba’shi, mbano bakwete kudishiibwa. Ku mpala, mu bafubi ba mu nshibo mubaadi penda bedibwe mwimu. Kunyima kwa mafuku, mu bafubi ba mu nshibo mubekeele lombe lukata lwa “ingi mikooko.” (Yo. 10:16) Bisaka byooso bibidi bikwete kudya bidibwa bya mu kikudi byabakwete kutuusha kwi mpika a lulamato na mudimukye.

⁸ Mu mafuku a mpombo ikata, apakafiki Yesu bwa kutshibila ndumbulwilo ebubi kiimu, akatuulu mpika a kishima “ku mutwe kwa bintu byaye [byooso].” (Mat. 24:46, 47) Baaba bakite mpika a kishima abakapete bwedi bwa kwenda mwiyilu. Pamune na bakwabo bedibwe mwimu bakii pa nsenga, abo booso bantu 144 000 abakamunana pamune na Kidishitu. Sunga t’akwikala dingi mpika a lulamato na mudimukye pa nsenga, Yehowa na Yesu abakyebe kukunkusha bantu be pa nsenga balamate ku Bufumu bwa Mesiya ku bukwashi bwa bantu baabakatuulu bu “bakunkushi.”​—Mis. 45:17, EEM.

BWAKINYI ABITUNGU ‘KUTENTEKYESHA BAKUNKUSHI’?

⁹ Kwi myanda ibungi ayitutakula mu ‘kutentekyesha bakunkushi’ na kulesha lukulupilo lwetu mwabadi. Bwakinyi kukita bino mbwa buwa bwetu? Mpoolo mutumibwa bafundjile’shi: “Mwanda abo bakwete kwinulama bu bantu abakayimuka kwi Efile Mukulu. Byabya mbalombeene kwibilombasha na muloo, kushii mu kwidila, mwanda mbilombeene kwinufwishila nkalakashi.” (Eb. 13:17, NWT) Bi na muulo bwa’shi tukookyele na kulamata ku bukunkushi bwa baaba bakwete kwituludika mwanda bakwete kwitupasukila na kwitulama bwa’shi twikale biya mu kikudi.

¹⁰ Mpoolo bakwile bino mu 1 Beena-Kodinda 16:14: “Kitayi byooso na kifulo.” Bitshibilo abyatshibwa bwa mwilo w’Efile Mukulu abyatshiibwaa ku bukwashi bwa kifulo, eyikashi dikile bukata. Mukanda wa 1 Beena-Kodinda 13:4-8 awamba’shi: ‘Kifulo kii na lwishinko, kifulo akikwashana takii na mukao, takiitatulaa sunga kwisadika, takikitaa kintu ki bubi ku meeso a bantu, takikimbaa mwabi wa bupenka, takikwata nsungu, takilamaa ngo, takisangalaa mu myanda ibi, anka akipetelaa muloo wakyo mu binyibinyi. Akilekyeelaa bilubilo byooso, akikumiinaa byooso, akikulupilaa byooso, akyataa byooso na lwishinko. Kifulo ta kii kupwa nya.’ Pa mwanda kifulo ndjo kikwate bitshibilo byooso abyatshibwa bwa buwa bwa bafubi ba Yehowa, twi na kya kupusha’shi twi mu bulami bwa buno bukunkushi. Na dingi, bino abilesha penda kifulo kya Yehowa.

¹¹ Anka bu bya bibaadi mu siekele a ku mpala, baaba babakwete kutumika nabo kwi Yehowa bwa kukunkusha mwilo waaye mbalume bakutwe kupwidika. Byabya, kala Yehowa baadi mutumikye na bantu bakutwe kupwidika bwa kulombasha akikyeb’eshimba dyaaye. Nowa bayibakile bwato na kulungula bantu pabitale kabutu kabaadi akafiki mu mafuku aaye. (Kib. 6:13, 14, 22; 2 Mp. 2:5) Moyiise abaadi bamupe mudimo wa kutuusha mwilo wa Yehowa mu Ejiipitu. (Efi. 3:10) Bantu bakutwe kupwidika abaadi bafunde Bible ku bukwashi bwa kikudi kiselele. (2 Tim. 3:16; 2 Mp. 1:21) Pa mwanda Yehowa kwete kutumika na bantu bakutwe kupwidika bwa kukunkusha mudimo wa bulungudi na wa kwikasha bantu bu balondji, byabya ta mbilombeene kwitukutshishwa lukulupilo mwi ndumbulwilo a Efile Mukulu nya. Anka, twi banyingishibwe pa mwanda atuuku’shi ndumbulwilo ta mmulombeene kulombasha byooso byakwete kukita kushii bukwashi bwa Yehowa nya. Mu nkalakashi na myanda ikitshikye, mpika a lulamato mmuleshe’shi kikudi ky’Efile Mukulu ndjo kikwete kukunkusha myanda. Lelo uno, myabi ibungi ngipongolokyele kipindji kya ndumbulwilo a Yehowa ki pa nsenga. Byabya, atumukwatshishena na mashimba etu ooso na kutuula lukulupilo lwetu looso mwadi.

MUSHINDO WA KULESHA LUKULUPILO LWETU

¹² Baaba babadi bape mudimo wa kukunkusha mu kakongye abaleshaa lukulupilo lwabo nsaa y’abakumiina na kwata mashito aabo na muloo ooso. (Bik. 20:28) Bu byatudi balungudi ba Bufumu, atwipaana na katshintshi kooso mu mudimo wa ku nshibo na nshibo, kwalukiila mu kutala bantu abekalanga bakumiine, na kulonga Bible na bantu ku mashibo aabo. (Mat. 24:14; 28:19, 20) Bwa kupeta bukwashi bwa bidibwa bya mu kikudi byabakwete kutuusha kwi mpika a lulamato, atwilumbuulaa na kutwela mu bisangilo bya beena Kidishitu, mpaa na ku bikongeno bya kifunda na bya mafuku asatu. Atupetaa bukwashi bwibungi mu kwinyingishena nsaa yatudi bebungye pamune na bakwetu beena Kidishitu.​—Eb. 10:24, 25.

¹³ Patukwatshishena ndumbulwilo na bintu byetu byatutuusha bu bya buntu, atulesha’shi twi bakulupile mwadi. (Nki. 3:9, 10) Nsaa y’atumono’shi bakwetu be na lukalo lwa bintu bya ku mbidi, atwibakwasha kushii kunyengakana. (Nga. 6:10; 1 Tim. 6:18) Atukitshi bino na kifulo kya bwina muntu, atukimbi misusa ibungi mushindo wa kulesha Yehowa na ndumbulwilo aaye’shi atusangeela kalolo kabakwete kwitulesha.​—Yo. 13:35.

¹⁴ Atulesha dingi lukulupilo lwetu mwi ndumbulwilo nsaa y’atukookyela bitshibilo byakwete kwata. Bino mbitale kulonda na kwiyisha kooso bukunkushi bwabakwete kwitupa kwi bano babadi batuule bwa kwitukunkusha, bu kileshesho bakunkushi ba bifunda na bakulu mu tukongye. Bano bakwetu be munkatshi mwa “bakunkushi,” batudi na kya kukookyela na kulamata. (Eb. 13:7, 17) Sunga twakutwa kupusha bwakinyi abaata kitshibilo kampanda, atushinguula’shi abekyata bwa buwa bwetu. Nyi bwakinyi, Yehowa kwete kwitwelela myabi bwa kukookyela kwetu kw’Eyi dyaaye na ndumbulwilo aaye. Atulesha dingi’shi twi balamate kwi Nfumwetu, Yesu Kidishitu.

¹⁵ Eyendo, twi na kya kukulupila mwi mpika a lulamato na mudimukye. Satana, efile a bya pano, kwete kukita mwaye mooso bwa kusaabulusha eshina dya Yehowa na ndumbulwilo aaye. (2 Kod. 4:4) Tokwatshiibwanga na kateo ka mayele e bubi a Satana! (2 Kod. 2:11) Awuku’shi kubamushadila penda “mafuku apeela” bwa’shi bamusumbule mu lupongo, na e na lukalo lukata lwa kupambusha bantu ba Yehowa bebungi mwishinda dy’Efile Mukulu. (Kibaf. 12:12) Byabya, twifubwileyi ngofu kwi Yehowa mwanda Satana kwete kutamisha mayele aaye. Tutuleyi lukulupilo lwetu mwi Yehowa na ku mushindo wakwete kutumika nao bwa kukunkusha mwilo waaye lelo uno. Kukita kwetu kwa byabya akwitukwasha bwa kwikala mu buumune.