Myabi y’atupete pa kukookyela teokrasi

KUKOOKYELA kw’Efile Mukulu, Nfumu mukata a eyilu na nsenga kwi na muulo ukata su atukyebe kushaala belumbuule bwa kukita akikyeb’eshimba dyaye. Atushinguula bukunkushi bwa Mwan’aaye mu kakongye ka beena Kidishitu na kukookyela mwiya utale bukunkushi mu ingi myanda ya mu nshalelo eetu. Kuno kukookyela kwa teokrasi nkutale muntu ooso.

² Mwanda utale kukokyela bukunkushi ubabangile mu lupango lwa Edene. Atwiusangana dingi mu mayi abadi bafunde mu mukanda wa Kibangilo 1:28 na 2:16, 17. Nyema na toonyi bibaadi na kya kukookyela bantu, Adame na Eeva namu abaadi na kya kukita akikyebe Efile Mukulu na kukookyela bukunkushi bwaye. Kukookyela ku ano matalwa a Efile Mukulu kubaadi na kya kufwisha kufukama na kuyiisha myanda mu mulongo. Uno mwiya abaadi bewakwile dingi mu 1 Beena-Kodinda 11:3. Mu uno mukanda Mpoolo mutumibwa bafundjile’shi: “Nakyebe’shi nuwukye bino: Kidishitu nyi mfumu a muntu ooso; na mulume mfumu a mukashi; na mfumu a Kidishitu Efile Mukulu.” Bino abilesha’shi, mu ino mpángo yooso, kukaasha Yehowa, muntu ooso e na kya kukookyela bukunkushi.

³ Bantu bebungi lelo uno tabakwete kushinguula sunga kukookyela mwiya utale bukunkushi nya. Bwakinyi? Bino bibaabangile nsaa ibatshile bankambwa beetu ba kumpala kitshibilo kya kutombokyela bukunkushi bw’Efile Mukulu. (Kib. 3:4, 5) Kuno kutomboka ta nkwibekashe mbulungantu nya. Anka abafikile mu kwikala ku matalwa a Satana Dyabulu, kipangwa kya mu kikudi kibaadi kitombokye. Buno buntomboshi bwa kumpala bubaadi butuukye mbwikashe bantu kula n’Efile Mukulu. (Kol. 1:21) Ngi bwakinyi, bantu bebungi lelo uno bakwete kukunkushiibwa na yawa mwikeyilu ebubi.​—1 Yo. 5:19.

⁴ Kulonga na kutumikila kw’Eyi dy’Efile Mukulu nkwitukwashe bwa kupoosoka ku matalwa a Satana. Bu byatudi belambule kwi Yehowa bu ba Temwe baaye, atukumiina’shi Yehowa akunkushe nshalelo eetu. Anka bu Nfumu Daviide, atushinguula’shi Yehowa nyi “Nfumu e pa nundu pa byoso.” (1 Mya. 29:11, EEM) Oolo, atwamba na kwiyisha kooso’shi: ‘Shinguulaayi’shi Yehowa nyi Efile Mukulu. Nnê betupangile, twi mwilo wê. Twi bu lombe lwê lwa mikoko ya mu kidîlo kyaye.’ (Mis. 100:3, EEM) Atushinguula’shi Yehowa nyi Nfumwetu atudi balombeene kukokyela, mwanda nnaye mupangye bintu byooso. (Kibaf. 4:11) Bu byatudi bafubi b’Efile Mukulu, tukwete kwambula kileshesho kibuwa kya Yesu Kidishitu pabitale kukookyela Efile Mukulu.

⁵ Nkinyi kibaadi Yesu mulongyele ku makyenga abamukwete pa nsenga? Mukanda wa Beena-Ebelu 5:8 awaluula bino: “Sunga mbibaadi Mwan’Efile, bayiyile bya kukookyela mu kufwambuka kwaye.” Oolo, Yesu baadi akookyela Nshaye e mwiyilu mpaa na mu nkalakashi ibukopo. Na dingi, Yesu tabaadi ekitshina kintu sunga nkimune muu’ye nabeene nya, sunga kwakula myanda yaye na kukimba ntumbo yaye’ye nabeene ooo. (Yo. 5:19, 30; 6:38; 7:16-18) Pabaadi alungula mukandu wibuwa, baadi na disanka dya kukita akikyebe Nshaye sunga byekala’shi kukita byabya kubaadi na kya kumufwishila bulwishi na makyenga. (Yo. 15:20) Anka Yesu baadi nka akookyela Efile Mukulu. Na ‘bepeeleeshe’ byamufikisha mpaa na “ku lufu, lufu lwa pa mutshi.” Pa mwanda wa kukokyela Yehowa n’eshimba dimune, Yesu abaadi bamufute mu mishindo ibungi; nkupetesha bantu lukulupilo lwa kipandjilo kya ikalayika, aye nkupeta ntumbo na nkutumbisha Nshaye.​—Fid. 2:5-11; Eb. 5:9.

MU MYANDA KINYI AMUTUNGU KUKOOKYELA TEOKRASI?

⁶ Nsaa y’atukookyela Efile Mukulu pa kukita akikyebe eshimba dyaye, atwilama ku twinyongoshi na nkalakashi bikwete kukwata bantu abapele kukookyela bukunkushi bwaye. Kushii kukooka, mwishikwanyi n’eetu Dyabulu, kwete kukimba bwa kwitukwata ku mayele aaye na kwitushimisha. Su twamukambila na kwiyisha kumpala kwa Yehowa na kukokyela kooso, atukyebe kukalwilwa ku bitompwanga bya uno mubi.​—Mat. 6:10, 13; 1 Mp. 5:6-9.

⁷ Mu kakongye ka beena Kidishitu tukwete kushinguula bukunkushi bwa Kidishitu na matalwa aadi mupe ‘mpika a lulamato na mudimukye.’ Kukita bino kukwete akwitukwasha bwa kwikala mu kipwano na bangi. Kukookyela Efile Mukulu mu kakongye akukyebe kwitutakula mu kutumikila Eyi dy’Efile Mukulu mu myanda yooso ya mu lulangwilo. Kuno kukookyela nkutale mpaa na kulungula kwa mukandu wibuwa, kutwela mu bisangilo na kutuusha myaluulo, kwikala mu kipwano na bakulu, na kukwatshisheena mpángo ayatshibwa pabitale mushindo wa kwitukunkusha.​—Mat. 24:45-47; 28:19, 20; Eb. 10:24, 25; 13:7, 17.

⁸ Kukookyela Efile Mukulu akutwesha butaale, kufukama na kwitukwasha bwa kutumikila myanda yabetulesha mu kakongye ka beena Kidishitu. Ngikashi ya Yehowa ikwete kumweka mwi bafubi baaye bamulamate. (1 Kod. 14:33, 40) Myanda yatudi bemweene atwe banabeene mu ndumbulwilo a Yehowa ngitutakule mu kupusha nka bu bibapushiishe Nfumu Daviide. Kunyima kwa’ye kumona kwilekeena kwi pankatshi pa bafubi ba Yehowa na bantu babi, Daviide bakwiile na muloo ooso’shi: “Mwabi ngwa mwilo wi na Yehowa bu Efile Mukulu!”​—Mis. 144:15.

⁹ Mu dibaka na mu kifuko “mulume nfumu a mukashi.” Na balume namu abitungu bakookyele Kidishitu, Efile Mukulu namu ndjo Nfumu a Kidishitu. (1 Kod. 11:3) Bakashi be na kya kukookyela balume baabo, na baana bakookyele bebatande. (Ef. 5:22-24; 6:1) Pe muntu ooso alondo mwiya utale bukunkushi, akwikala butaale.

¹⁰ Balume be na kya kutumika na bukunkushi bwabo na kifulo kyooso, bwa kulonda kileshesho kya Kidishitu. (Ef. 5:25-29) Nsaa i mulume t’atumika na bukunkushi bwaye mu kipaso kibubi, sunga kusumbusheena bushito bwaye, abipa mwina’kwaye na baana baaye muloo wa kumukookyela. Mukashi e na mufubo wa kukwasha mulume aaye. (Kib. 2:18) P’ekale mukashi akwatshishena mulume aaye na kaneemo, apete ntumbo, na eshina dy’Efile Mukulu aditumbishiibwa. (1 Mp. 3:1-4) Su balume na bakashi bakwete kutumikila malango e mu Bible pabitale bukunkushi, abalekyela baana kileshesho kibuwa kya kukookyela bukunkushi bw’Efile Mukulu.

¹¹ Kukookyela Efile Mukulu nkutale dingi mushindo watukwete kumona “bamfumu be na matalwa” mwanda “bufumu booso abutuukila’nka kw’Efile Mukulu.” (Lom. 13:1-7) Bu byabakwete kukookyela miiya y’eumbo, beena Kidishitu abafutaa bitadi, bwa kupa “Kezare bya Kezare, by’Efile Mukulu nwibip’Efile Mukulu.” (Mat. 22:21) Dingi, abaneemekaa miiya yabadi bebape bwa kwata mpángo ya kufuba mu teritware mushima. Kukookyela na kulonda bukunkushi bwabadi batuule mu myanda yooso ishii ikutwene na miiya ya Yehowa, akwitukwasha bwa kutuusha bukome bwetu ku mudimo wa kulungula mukandu wibuwa.​—Mak. 13:10; Bik. 5:29.

¹² Kukookyela bukunkushi bwa teokrasi nkutale nshalelo eetu ooso. Na meso a lukumiino, atukulupila efuku adiikala bantu booso abakunkushibwa na Yehowa Efile Mukulu. (1 Kod. 15:27, 28) Eyendo, atukyebe kupeta myabi ibungi su tukwete kushinguula bukunkushi bwa Yehowa na kumukokyela na muloo ooso bwa looso!