Tukumineyi mudimo wi nao Kidishitu mu mpángo y’Efile Mukulu

“KU MBANGILO, Efile Mukulu baapangil’eyilu na nsenga,” na bintu byooso bibakitshine bibaadi “buwa bukabe.” (Kib. 1:1, 31) Yehowa baadi mupangye bantu na lukulupilo lwi buwa bwa mafuku e kumpala. Kadi, buntomboshi bwa mu Edene mbulwishe muloo wa bantu bwa kapindji kapeela. Sunga mbyabya, mpángo ya Yehowa bwa nsenga na bwa bantu ta ngishintulukye nya. Efile Mukulu baadi muleshe’shi akwikala kipandjilo bwa bana ba Adame baasha kukookyela. Lulangwilo lwa binyibinyi alukalukiila, na Efile Mukulu akabutula bantu be bubi na midimo yaabo yooso ibubi. (Kib. 3:15) Paapa dingi, bintu abikekala “buwa bukabe.” Yehowa akalombasha bino byooso ku bukwashi bwa Mwanaaye, Yesu Kidishitu. (1 Yo. 3:8) Byabya, abitungu nka’shi tushinguule mudimo wa Kidishitu mu mpángo y’Efile Mukulu.​—Bik. 4:12; Fid. 2:9, 11.

MUDIMO WA KIDISHITU

² Nsaa y’atunangusheena pabitale mudimo wa Kidishitu mu mpángo y’Efile Mukulu, atushinguula’shi, mudimo waaye wi mu bipindji bibungi. Yesu e na mudimo wa bu Mukuudi a bantu, Tshiite-mwakwidi mukata e panundu, Nfumu a kakongye, na binobino mmwikale Nfumu a Bufumu bw’Efile Mukulu. Kunangusheena ku ino midimo akutamisha lutumbu lwatudi nalo bwa mpángo y’Efile Mukulu na kunyingisha kifulo kyetu bwa Yesu Kidishitu. Bible alesha ingi midimo yaaye ilekeene-lekeene.

³ Kidishitu pabaadi afubu pa nsenga, bibamwekyele kalolo’shi kwalusha kwa bantu baasha kukookyela mu kipwano n’Efile Mukulu akukyebe kulombana ku bukwashi bwaaye. (Yo. 14:6) Bu byadi Mukuudi a bantu, Yesu baadi mutuushe muwa waaye bwa kukuula bantu bebungi. (Mat. 20:28) Byabya, Yesu ta mpenda kileshesho kya kulonda pabitale mwikelo wa bantu b’Efile Mukulu nya. Aye ndufungula lwa kulombasha kwa mpángo ya Yehowa bwa bantu. Anka penda ku bukwashi bwaye nkwatudi balombeene kwikala dingi bakuminyibwe n’Efile Mukulu. (Bik. 5:31; 2 Kod. 5:18, 19) Lufu lwa Yesu bu mulambu na kusanguka kwaaye, nkupe bantu baasha kukookyela mushindo wa kupeta myabi ya losoo mu bukunkushi bwa Bufumu bwa mwiyilu bw’Efile Mukulu.

⁴ Bu byadi Tshiite-mwakwidi mukata e panundu, Yesu e na mushindo wa “kufwambuka netu mu kubofula kwetu” na kutuusha mulambu wa kubwikiila milwisho ya balondji baaye belambule kwadi pano pa nsenga. Mpoolo mutumibwa baadi mupatuule’shi: “Tshiite-mwakwidi etu e panundu eûku kupusha bi kubofula kwetu mwanda ê nabêne batompelwe mu bipaso byoso byatudi batompibwe, anka ta mmukite mulwisho, ooo.” Na dingi, Mpoolo anyingisha baaba booso abalesha lukumiino mwi Yesu Kidishitu bwa kutambula ino mpángo ya kwalusha kipwano kyabo n’Efile Mukulu, amba’shi: “Twifubwileyi na lwishinko ku lupuna nsulu lwa buntu, bwa kupeta lusa na kalolo, na kukwashibwa apakumbana kipungo.”​—Eb. 4:14-16, EEM; 1 Yo. 2:2.

⁵ Na dingi, Yesu nyi Nfumu a kakongye ka beena Kidishitu. Anka byabibaadi bwa balondji baaye mu siekele a kumpala, atwe namu tatwi na lukalo na bukunkushi bwa muntu lelo uno nya. Yesu akunkusha ku bukwashi bwa kikudi kiselele na ku bukwashi bwa balami balombane, abakayimuka kumpala kwaye na kwa Nshaaye e mwiyilu pabitale mushindo wabakwete kulama loombe lw’Efile Mukulu. (Eb. 13:17; 1 Mp. 5:2, 3) Ku bukwashi bwa mutemuki, Yehowa bakwile bino pabitale Yesu: “Naadi mumutule bu kamonyi munkatshi mwa bisamba, namupa bufumu na matalwa pa bantu.” (Yesh. 55:4) Yesu baadi mushinkamishe kulombana kwa buno butemuki nsaa ibalungwile balondji baaye’shi: “Tanwitanyinwanga bu bakunkushi, mwanda kwi mukunkushi enu umune, Kidishitu.”​—Mat. 23:10, Kilombeno kipya 2009.

⁶ Bwa kulesha bi binangu byaaye na lukalo lwaye bwa kwitukwasha, Yesu etwitanyina’shi: “Fikayi kwandji, anwe boso abapuungila, na basemune mashito, n’ami nankenupa kwikisha. Twalayi kikumbo kyande na [nulongyele] kwandji’mi, mwanda ne mupopeele na ne mwiyishe kwishimba; n’anwe anukasangana kwikisha kwa bikudi bienu. Mwanda kikumbo kiande nkipeelepeele na kiita kyande nkipeelepeele.” (Mat. 11:28-30, Kilombeno kipya 2009) Bu byakwete kukunkusha myanda ya mu kakongye na kalolo kooso mu mushindo awitufukamisha mashimba, Yesu Kidishitu mwileeshe bu “mulami ebuuwa” kwete kulonda kileshesho kya Nshaye e mwiyilu, Yehowa Efile Mukulu.​—Yo. 10:11; Yesh. 40:11.

⁷ Mu mukanda waaye wa kumpala kwi beena Kodinto, Mpoolo baadi mupatuule ungi mudimo wa Yesu Kidishitu mu bino bishima’shi: “Mwanda abitungu Kidishitu abikale mpa na p’abakatûlu beshikwanyi nê boso mûshi mwa matalwa ê kwi Efile Mukulu. Kwibedi, Efile Mukulu akatuulu bintu byoso mûshi mwa matalwa a mwan’ê. Kubaapu, winyi Mwan’ê ê nabêne aketûlu mûshi mwa matalwa a Nsh’ê. Byabya Efile Mukulu akamunana loso panundu pa byoso.” (1 Kod. 15:25, 28, EEM) Kumpala kwa kufika pa nsenga, Yesu baadi bu “mukwashi,” aye nkwikala kipangwa kya kumpala kya ku bipangwa by’Efile Mukulu. (Nki. 8:22-31) Efile Mukulu pabaadi mutume Yesu pa nsenga, Yesu bakitshine akikyebe Efile Mukulu nsaa yooso. Banyingiile kitompwanga kikata, aye nkufwa na lulamato kwi Nshaaye. (Yo. 4:34; 15:10) Pa mwanda Mwana aaye baadi mulamate kwadi mpaa na ku lufu, Efile Mukulu baadi mumusangushe bwa’shi ende mwiyilu na aye nkumupa matalwa a kwikala bu Nfumu a Bufumu bwa mwiyilu. (Bik. 2:32-36) Nyi bwakinyi, Yesu Kidishitu e na mudimo ukata wabadi bamupe kwi Efile Mukulu wa kukunkusha binunu na binunu bya miikeyilu, bipangwa bi na bukome bwa kukatusha bukunkushi bwa bana ba bantu pa nsenga na kusuula nsenga yetu ishima ku bukitekite. (Nki. 2:21, 22; 2 Tes. 1:6-9; Kibaf. 19:11-21; 20:1-3) Akupu, Bufumu bw’Efile Mukulu abukunkushibwa na Kidishitu nka penda’abo ndjo abukakunkusha nsenga ishima.​—Kibaf. 11:15.

AKIPATUULA KUKUMINA MUDIMO WA KIDISHITU

⁸ Yesu Kidishitu, Kileshesho kyetu, mmupwidikye. Mbamupe mudimo wa kwitulama. Bwa’shi tupete bukwashi na kulamibwa naaye kalolo, abitungu tushaale balamate kwi Yehowa na kutambuka pamune na ndumbulwilo aaye kwete kwenda kumpala.

⁹ Balondji ba Yesu ba mu siekele a kumpala abaadi abakumina kalolo mudimo wa Kidishitu mu mpángo y’Efile Mukulu. Abaadi baleshe’shi abeukumina nsaa ibaabadi abafubu mu buumune ku matalwa a Kidishitu, abakookyela bukunkushi bwaye bubaadi atuusha ku bukwashi bwa kikudi kiselele. (Bik. 15:12-21) Mpoolo mutumibwa baadi mwakule pabitale buumune bwa kakongye ka beena Kidishitu bedibwe mwimu nsaa ibafundjile’shi: “Su twekala mu binyibinyi na mu kifulo, atutama mu myanda yooso, tutadile kwi uno mwikale mutwe, Kidishitu. Mwadi ngi amukakumbeena mbidi yooso ishima, mu kwilanga na kwilunga kalolo kwa binyungwa byooso abiyifubila, muyiile mufubo wabikiishwe kipindji kyooso mupunda bukome bwakyo. Byabya mbidi ayikulu ayo yooso na kutama mu kifulo.”​—Ef. 4:15, 16.

¹⁰ Nsaa i mwina kakongye oso afubu pamune na bangi na, booso abafubu mu kipwano ku bukunkushi bwa Kidishitu, akwikala kutama kwa mu kikudi na kifulo akyo ‘akibungu mu buumune bulombanyiine.’​—Kol. 3:14; 1 Kod. 12:14-26.

¹¹ Myanda ikitshikye mu nsenga bwa kulombasha butemuki bwa mu Bible ayilesha kushii mpaka’shi, kubanga mu 1914, Yesu Kidishitu mmutudibwe mu Bufumu na bukome. Kwete kumunana binobino munkatshi mwa beshikwanyi naaye. (Mis. 2:1-12; 110:1, 2) Bino abilesha kinyi bwa bano be na muwa pa nsenga? Kubashaala mafuku apela Yesu akyebe kulesha mudimo waye wa bu Nfumu a banfumu na Mwanana a ba mwanana nsaa y’afwisha kiimu ky’Efile Mukulu kwi beshikwanyi naaye. (Kibaf. 11:15; 12:10; 19:16) Kunyima, mulayilo ubaadi utuushe Yehowa ku mbangilo kw’etombo dya muntu aukalombeena baaba be ku mboko ibalume ya Kidishitu. (Mat. 25:34) Twi na muloo wi kashaa wa kushinguula mudimo wa Kidishitu mu mpángo y’Efile Mukulu! Tushaleyi mu buumune mu kulombasha kwa mudimo wa mu nsenga ishima ku bukunkushi bwa Kidishitu mu ano mafuku a ku nfudiilo.