Ne kwela nteko kwi bansantu su?

Lwaluulo lwa Bible

Nya. Bible amba’shi abitungu twele nteko penda kwi Efile Mukulu mwishina dya Yesu. Yesu balungwile balondji baye: “Tekaayi bino: Yaaya’etu ee mwiyilu eshina dyoobe dyende ntumbo.” (Mateo 6:9) Takwifuku su ndimune dibadi Yesu mulungule balondji baye’shi bele ntko kwi bansantu, mikeyilu, sunga mungi muntu kukatusha Efile Mukulu.

Yesu balungwile dingi balondji baye’shi: “Ami nee eshinda, nee binyibinyi, nee muwa. Muntu su ngumune taakwenda kwi Yaaya, kushii kukiila kwandji.” (Yowano 14:6) Anka penda Yesu nyi abadi bakpe matalwa kwi Efile Mukulu a kwitwakwila kwadi.​—Bena-Ebelu 7:25.

Twi kwamba naminyi su nekala nele nteko kwi Efile Mukulu na kwi bansantu?

Mu miiya ekumi Efile Mukulu bambile’shi: “Naami, MFUMU, EFILE MUKULU, oobe sha mukao.” (Efilu 20:5) Mushindo kinyi wikale Efile Mukulu na “mukao”? Mayi e kuushi kw’esaki mu Bible a New American Bible aamba’shi “akuminaa bamulangwile penda aye.” Efile Mukulu atekye’shi myanda yoso itale lulangwilo yende penda kwadi.​—Yeeshaya 48:11.

Atulwishisha Efile Mukulu su twalangwila mungi muntu, sunga byekala bansantu sunga mikeyilu. Yowano mutumibwa pabadi mutompe kulangwila mwikeyilu, yawa mwikeyilu bamulungwile’shi: “Tokumanga kukita byabya! Ami nyi mufubi a Efile Mukulu pamune bu’be. Na bu bakwenu boso balamate ku bya binyibinyi bifumbulwe Yesu. Efile Mukulu nyi odya kulangwila.”​—Kibafumbwilwe 19:10, EEM.