Bangi bantu abamonaa shi bi bukopo bwa kufula Efile Mukulu. Kwabadi’bo, takwi mushindo wa kupusha Efile Mukulu nya na e kula na bantu, sunga shi e na kifita. Banda kutala bino bishima:

• “Naadi mwele luteko kwi Efile Mukulu bwashi ankwashe, kadi mu yaaya nsaa naadi mupushe bu’ye e kula naami, kushii mushindo wa kwifubwila kwadi. Ntshinaadi napwandikisha shi Efile Mukulu apushaa buwa na bubi.”—Marco, Italie.

• “Sunga mbinaadi nakumiina kufubila Efile Mukulu n’eshimba dyande dyooso, baadi amweneka bu e kula kukile. Naadi napwandikisha shi baadi Efile e na eshimba di bubi mukumiine penda kwitunyoka. Ntshinaadi nakumiina shi e na ngikashi ya kalolo nya.”—Rosa, Guatémala.

• “Panaadi nkii mukinga, naadi nakumina shi Efile Mukulu akimbaa pe bilubilo byetu, mwilumbuule bwa kwitunyoka nsaa y’amono shi abitungu kwitunyoka. Kunyima, nabangile kumumona bu e kula na bantu. Efile Mukulu baadi nka bu mukata a guvernema ataluula myanda ya bantu baakwete kukunkusha kushii kwitatshisha bwabo.”—Raymonde, Canada.

Obe namu opwandikisha naminyi? T’abitungu kufula Efile Mukulu su? Beena Kidishitu abaadi beele luno lukonko takudi bipwa nkama. Byabya, mu mafuku a kala abetamina bu Moyen Âge, bantu bebungi ba mu bwina Kidishitu bwa madimi tababaadi sunga abeele nteko kwi Efile Mukulu Sha-bukome booso nya. Bwakinyi? Bantu abaadi abamutshiinyi bwa kupela kufwa. Ungi muntu atalulaa myanda ya kala abetamina bu Will Durant bambile shi: “Mushindo kinyi ulombeene muntu a bisumanga mwina milwisho kutompa kwela luteko lwaye kwi uno muntu e bubi na e kula na bantu?”

Mushindo kinyi ubaabadi balombeene kumona Efile Mukulu bu “e bubi na e kula na bantu”? Bible alongyesha namu kinyi pabitale Efile Mukulu? Kulonga bya binyibinyi pabitale Efile Mukulu nkulombeene nkukwasha naminyi bwa kumufula?

ABYAMBA BANTU

“Ta twi bepusheene su twi kwikala atuteemuna ‘eshina’ dy’Efile Mukulu, sunga tubadya kwikala bepusheene, di kwikala eshina kinyi”—Professor David Cunningham, Theological Studies.

BYA BINYIBINYI BYA MU BIBLE

Efile Mukulu bambile shi: “Naami Yehowa. Dyaadya ngi eshina dyande.” (Yeeshaya 42:8) Yehowa nyi eshina dya mu ki na Ebreeyi adipatuula shi “Yawa afwishaa.—Tala Traduction du monde nouveau, Appendice 1, paragrafe 1.”

Yehowa akumiina shi tuteemune eshina dyaaye. Bible amba shi: “Palakashayi nkumo y’eshina dyaaye. Uukishaayi munkatshy’a miilo mifubo yaaye. Ambaayi dimo shi eshina dyaaye ndyende ntumbo.”—Yeeshaya 12:4.

Yesu baadi muteemune eshina dy’Efile Mukulu. Mu luteko, Yesu balungwile Yehowa shi: ‘Nemwibaukish’eshina dyoobe, nanyiisha kwibawukisha [balondji ba Yesu] dyanka dimo.’ Bwakinyi Yesu baadi muukishe balondji baaye eshina dy’Efile Mukulu? Batungunukile shi: “Bwashi kifulo kyoodi mumfule kiikale mwabadi, ami naamu ngikale mwabadi.”—Yowano 17:26.

MWANDA WI NA MUULO

“Ungi mwina teoloji abetamina bu Walter Lowrie bafundjile shi: Muntu shy’auku eshina dy’Efile Mukulu tamwiuku kalolo bu muntu, na ta mulombeene kumufula su amuuku bu bukome kampanda kushii bu muntu.”

Ungi mulume abetamina bu Victor baadi ende ku kipwilo ku lubingo looso, kadi tabaadi apusha shi amuuku kalolo nya. Amba shi: “Kunyima nalongyele shi eshina dy’Efile Mukulu nyi Yehowa, na bibaadi nka bu abamulubula kwandi, napushishe nka bu’mi bafumankana na muntu ampushaa takudi mafuku e bungi. Nabangile kumumona bu muntu a binyibinyi na kutamisha kipwano kyande naaye.”

Yehowa naamu, efubwilaa pepi na bantu abateemuna eshina dyaaye. Pabitale baaba “abadingi eshina dyaaye,” Efile Mukulu mmulee shi: “Neebabombelesha bu nambutwile mulume abombelesha mwan’aye mulume amufubila.” (Malakii 3:16, 17) Dingi, Efile Mukulu apa booso abedidi eshina dyaaye efuto. Bible amba shi: “Muntu ese aketamina eshina dya Yehowa akapashibwa.”—Beena-Looma 10:13, Kilombeno kipya.

ABYAMBA BANTU

Kipwilo kya beena Kidishitu “mu mishindo yaakyo yooso isatu ikata ya Katolike ka ku Looma, kipwilo kya Orthodoxe, na beena mishonyi abakumiina shi kwi Efile e mu basatu: Efile Yaya, Efile Mwana, n’Efile Kikudi Eselele. Muyiile malongyesha a teoloji a beena Kidishitu, luno lukumiino ta ndutale b’efile basatu nya kadi bano bantu booso basatu mbakite muntu umune.”—The New Encyclopædia Britannica.

BYA BINYIBINYI BYA MU BIBLE

Kasha Yesu, Mwana a Efile Mukulu tabaadi mutompe kwimona bu e mumune na Nshaaye. Anka bambile shi: “Nende kwi Yaya, mwanda Yaya nyi munkile ami bukata.” (Yowano 14:28, Kilombeno kipya) Balungwile ungi mulondji aaye shi: “Nakaamina kwi Yaya, aye mwikale nsheenu, kwi Efile Mukulu ande, mwikale Efile Mukulu eenu.”—Yowano 20:17.

Kikudi kiselele ta mmuntu nya. Beena Kidishitu ba mu siekele a kumpala “babaawudile booso na kikudi kiselele,” na Yehowa bambile shi: “Naakasukumuna kikudi kyande pa bipangwa byooso.” (Bikitshino 2:1-4, 17) Kikudi kiselele ta nkimune kya ku b’efile basatu nya. Nyi mbukome bw’Efile Mukulu bwafubaa nabo.

MWANDA WI NA MUULO

Bangi bantu babetamina bu Karl Rahner na Herbert Vorgrimler abapatulaa myanda ya beena Katolike abalesha shi, lulangwilo lwa Busatu bwiselele “muntu ta mulombeene kwiluuka su ta mbamufumbwile lwanka, na sunga kunyima kwa kumufumbwila lwanka ta mulombeene kwilupusha looso kalolo nya.” We mulombeene kufula muntu oshii na mushindo wa kuuka sunga kupusha byadi su? Byabya, lulambukisho lwa Busatu bwiselele, lukwete kushikiila bantu bwashi tabaukanga na kufula Efile Mukulu.

Marco, atwikalanga besambile mu mwisambo ubashaala, bamwene lulambukisho lwa Busatu bwiselele bu kintu akimushikiila. Alesha shi: “Naadi napwandikisha shi Efile Mukulu kwete kunfwama takumina shi muukye nya, byabya bibaadi abimwikasha bu e kula, e bukopo kupusha, na bu oshii mulombeene kwifubwila pepi naaye.” Byabya, “Efile Mukulu t’Efile Mukulu a kapatakanyi” nya. (1 Beena-Kodinto 14:33) Ta mufwamishe byadi kwatudi nya. Akumiina’shi tumuukye. Yesu bakwile shi: “Atulangwila kyatuwuku.”—Yowano 4:22.

Marco amba shi: “Nsaa inaadi mulongye shi Efile Mukulu te mu basatu, naadi na mushindo wa kwikala mu kipwano naaye.” Su atumono Yehowa bu Muntu a binyibinyi pamutwe pa kumumona bu e bukopo kupatuula, abiikala bibofule bwashi tumufule. Bible amba shi: “Yaawa shyafulu mukwabo taawuku Efile Mukulu, mwanda Efile Mukulu nyi nkifulo.”—1 Yowano 4:8.

ABYAMBA BANTU

“Mususa umune kunyima kwa lufu lwa booso abaadi abakitshi milwisho abende mu kunyokiibwa mu, ‘kaalo ka losoo.’” (Catechism of the Catholic Church) Bangi banfumu ba bipwilo abamba shi mu kaalo ka losoo mbalo ya bupenka na ii kula na Efile Mukulu.

BYA BINYIBINYI BYA MU BIBLE

“Akitshi mulwisho nyi afu.” (Ezekyele 18:4) Bafwe “taabawuku kintu su nkimune.” (Mulungudi 9:5) Su muntu baafu tauku kintu nya, mushindo kinyi waadi mulombeene kukyenga mu “kaalo ka looso” sunga kukyenga pa mwanda wa kwikala kula n’Efile Mukulu?

Bible akula pabitale “mwishiba dya kaalo na suufule.” (Bifumbulwe 20:10, Kilombeno kipya) Byabya, Bible namwinyi alesha patooka kyabipatuula. Amba shi: “Dino eshiba dya kaalo nyi ndufu lwa kabidi.” (Bifumbulwe 20:14; 21:8) Byabya, ta mbalo ya binyibinyi ayitembe kaalo nya, sunga bu kaalo k’eyendo nya. ‘Kukyengyeshwa bwa losoo’ mwishiba dya kaalo akulesha kwikala mu “lufu lwa kabidi” lushi’na lusangukilo.

MWANDA WI NA MUULO

Kifita takitwikasha pepi n’Efile Mukulu nya; akiitwikasha kula naaye. Rocío mushalele mu Mexique alesha shi: “Kubanga ku bukinga, naadi mulongyeshwe lulambukiisho lwa iferno, naadi na moo ukata ntshinaadi na mushindo wa kupwandikisha shi Efile Mukulu e na ngikashi ibuwa nya. Naadi napwandikisha shi e na nsungu na t’alekyelaa bantu nya.”

Kipatulwilo kya mu Bible pabitale biimu by’Efile Mukulu na mushindo wi bafwe kibaadi kishintuule bibaadi Rocío amono Efile Mukulu. Amba shi: “Ne mwipushe mulungantu nka bu ababankaasha kiita ki bushito, ami nkubanga kukumiina shi Efile Mukulu akuminaa shi twikale bi buwa na’shi mwitufule, mpa na’shi ne mulombeene kumufula. E nka bu nsha baana akwata baana baaye ku maboko na akumina’shi bekale bibuwa.”—Yeeshaya 41:13.

Bantu bebungi bakwete kwitatshisha bwa kwikala been’Efile pa mwanda wa kutshina kwedibwa mu iferno, kadi Efile Mukulu t’akumina’shi omufubile mwanda okwete kumutshina nya. Anka Yesu bambile shi: “Ofule Yehowa Efile Mukulu oobe.” (Maako 12:29, 30) Byabya, p’atushinguula shi Efile Mukulu t’akitaa myanda na kukutwa kwa kululama lelo uno, twi balombeene kutuula lukulupilo mu biimu byaaye bya mu mafuku e kumpala. Twi balombeene kwakula bibambile Eliwu kuuku a Yoobo na kushinkamisha kooso shi: “Efile Mukulu tammulombeene kwikala na kifita, Sha-bukome booso tee kukutwa bululame nya.”—Yoobo 34:10.

Dingi efuku, mu Yeelusaleme Yesu baadi akula pabitale Nshaye Yehowa, na kulesha madimi a bakata ba bipwilo patooka mu mafuku aaye. (Yowano 8:12-30) Bibaadi mwakule abitulongyesha mushindo watudi balombeene kumona malongyesha apalakane lelo uno pabitale Efile Mukulu. Yesu bambile shi: “Su nwalama bishima byande, nwi balondji bande eyendo. Anukawuku bya biinyibiinyi, na biinyibiinyi abinwikasha bantu balungatu.”—Yowano 8:31, 32.

“Kulama bishima byande.” Mu ano mayi, Yesu etulesha shi abitungu kutaluula malongyesha a bipwilo su nga “biinyibiinyi.” Byabya, nsaa yopusha abaakula mwanda kapanda pabitale Efile Mukulu, eyipushe shi: ‘Uno mwanda, ngwipushene na mayi a Yesu na angi a Bifundwe Biiselele su?’ Ambula kileshesho kya bantu abaadi bapushe Mpoolo mutumibwa na “efuku dyooso, babaadi abataluula Bifundwe, bwa kumona su bibaadi byaabya eyendo.”—Bikitshino 17:11.

Marco, Rosa, na Raymonde batudi baakule mu miisambo ibashaala, abaadi abataluula kalolo myanda ibaabadi abakumiina ku bukwashi bwa kulonga kwa Bible na Batemwe ba Yehowa. Nkinyi kibaabadi balongye?

Marco: “Muntu baadi alongo netu Bible baadi atumika na Bible bwa kwaluula ku nkonko yooso ibatudi nayo na mukashi ande. Kifulo kyetu bwa Yehowa kibabangile kutama, na atwe nkutamisha kipwano kyetu mu dibaka.

Rosa: “Kumpala naadi napwandikisha shi Bible nyi mpenda mukanda wi nka bi ingi mikanda i na binangu bya bantu ayipatuula bi Efile Mukulu. Byabya, mu kwenda kwa mafuku, nasangene shi Bible aluula ku nkonko yande. Binobino namono Yehowa bu muntu a binyibinyi. Aye nyi mmuntu andi mulombeene kutuudila lukulupilo.”

Raymonde: “Naadi mwele nteko kwi Efile Mukulu bwashi ankwashe ndongye bya kumuuka. Kunyima kwa mafuku apeela, ami na mulume ande tubabangile kulonga Bible. Atwe nkulonga bya binyibinyi pabitale Yehowa! Tubaadi na muloo ukata wa kufumbula mushindo waadi bu Efile.”

Bible ta mwimene penda mu kulesha patoka madimi abakwete kudimbiila Efile Mukulu nya; afumbula bya binyibinyi pabitale ngikashi yaaye ibuwa. Bible nyi Eyi dyaaye difundjibwe ku bukwashi bwa kikudi kiselele na etukwasha bwatudya “kwiuka byabya byoso bibetupeele Efile Mukulu.” (1 Beena-Kodinto 2:12, Kilombeeno kipya) Bwakinyi twe mulombeene kutala obe nabeene bwa kumona mushindo awaluula Bible ku nkonko ikata pabitale Efile Mukulu, mpàngo yaaye, mpa na pabitale mafuku etu e kumpala su? We mulombeene kuteka ku Internet mu site a www.pr418.com bwashi bafikye mu kulonga noobe Bible sunga kulungula ungi Temwe a Yehowa bwashi afikye mu kulonga noobe. Atukulupila shi su bokitshi byabya okyebe kumona shi mbibofule bodya kufula Efile Mukulu kukila biboodi opwandikisha.