Bantu boso abeamba bu “Bena Kidishitu” mbena Kidishitu ba binyibinyi su?

KUI bena Kidishitu bungi kinyi pa nsenga? Muyile ungi mukanda, (Atlas of Global Christianity) mu 2010 kuikeele bena Kidishitu bafikie ku midiyala ibidi na kipindi pa nsenga ishima. Kadi wawa mukanda umune aulesha’shi baba bena Kidishitu boso, be mu bipuilo bikile pa 41 000​—kioso kia kuabidi ki na akio malongiesha na yakio miiya. Bu bikale’shi kui bino bipuilo bioso bia bena “Kidishitu,” tui balombene kupusha buakinyi bangi bantu abatuele mu kabulakanyi bua kuuka kipuilo kia binyibinyi. Mbalombene kuiipusha’shi ‘Bantu boso abeamba bu bena Kidishitu, mbena Kidishitu binyibinyi su?’

Binobino, tubande kutala mianda mu mushindo wilekene. Misango ibungi abatekaa muntu bua kutusha mikanda yaaye ya bu muntu kui bantu abalamaa ku mikalo ya kibundi. Dingi, abitungu ashinkamishe’shi biabia biakula mbieyondo pa kutusha kintu kampanda, bu passeport. Mu mushindo umune, tabitungu muina Kidishitu a binyibinyi akule penda’shi ne mukumiine mui Kidishitu nya. Abitungu akite ingi mianda ayibilesha. Bu mianda kinyi?

Bababangile kufubisha kishima “Bena Kidishitu” bua musango wa kumpala, mafuku apeela kunyima kua kipua kia 44 B.B. Luka muntu a kala bafundile Bible bakuile’shi: ‘Kwakwa ku Antyoshe ngi kubaapeteele balongi, bwa musuusa wa kumpala, eshina bu Beena-Kidishitu.’ (Bikitshino 11:26) Lamina’shi baaba babaabadi abetanyina bu bena Kidishitu babaadi balongi ba Kidishitu. Kuikala bu mulongi a Kidishitu akulesha kinyi? Ungi mukanda aupatuulaa bishima (The New International Dictionary of New Testament Theology) awamba’shi: “Kulonda Yesu bu mulongi aaye akulesha kuipaana mu mianda yoso ya mu nshalelo buaye . . . mu muwa woso ushima wa muntu.” Biabia, muina Kidishitu a binyibinyi mmuntu alondo malongiesha na mayi a kulonda a Yesu, aye muikale nsulo ya buina Kidishitu, mu mianda yoso ya mu nshalelo aye kushii kuela mikalo.

Tui balombene kupeta bantu be biabia munkatshi mua bantu bebungi abeamba bu bena Kidishitu lelo uno su? Nkinyi kibakuile Yesu aye nabene, kilombene kutuikuasha bua kutundula balongi baye ba binyibinyi? Atukutekie bua kutaluula mushindo awaluula Bible ku ino nkonko. Mu miisambo ayilondo, atukataluula mianda itano ibakuile Yesu ayilesha na ikuasha bua kutundula balongi baye ba binyibinyi. Atukataluula bibaadi bena Kidishitu ba mu siyekele a kumpala balombashe ino mianda. Akupu, atukataluula bua kuuka su mbantu kinyi bakuete kulombasha yaya mianda, munkatshi mua bantu bebungi bakuete kuiamba lelo uno bu bena Kidishitu.

‘Lamayi mayi ande’

‘Su nwalama mayi ande, nwi balongi bande eyendo. Anukawuku biinyibiinyi, na biinyibiinyi abinwikasha bantu balungantu.’​—YOWANO 8:31, 32.

Akilesha ano mayi: “Mayi” a Yesu aalesha malongiesha aye abaadi aafiki kui Efile Mukulu. Yesu bakuile’shi “Yaaya baantumine ngi mumfundjile kya kwakula, naa kya kuukisha patooka.” (Yowano 12:49) Mu luteko lubaadi mukite kui Nshaye a muiyilu, Yehowa Efile Mukulu, Yesu bambile’shi: “Eyi dyoobe ndya biinyibiinyi.” Baadi akamba kutemuna Eyi di’Efile Mukulu bua kulesha kubaadi akufiki malongiesha aye. (Yowano 17:17; Mateo 4:4, 7, 10) Bena Kidishitu ba binyibinyi namu ‘abalama mayi aye​—bino abilesha’shi abakumina’shi Bible Eyi di’Efile Mukulu ndia “biinyibiinyi,” na’shi abitungu malongiesha aabo na bikitshino biabo bipushene na mianda i mu Bible.

Bibaadi bena Kidishitu ba mu siekele a kumpala bebileshe: Mpoolo mutumibua, muntu baadi mufunde mikanda ibungi ya mu Bible baadi anemeka Eyi di’Efile Mukulu nka bu Yesu. Bafundile’shi: “Bifundwe byoso, mbiyokyelwe n’Efile Mukulu na bi na muulo.” (2 Timote 3:16, NWT) Abitungu bana balume babadi basangule bua kulongiesha bakuabo bena Kidishitu ‘balamate bii bukopo ku myanda ya biinyibiinyi.’ (Tite 1:7, 9) Bibaadi abitungu’shi bena Kidishitu ba mu siekele a kumpala badimukile ‘binangu bia bantu, na madimi aatukila ku byuubishi bya bantu, ku bintu bya pano, biishi bya Kidishitu.’​—Bena-Kolose 2:8.

Ba nnanyi bakuete kulonda kiakia kileshesho lelo uno?: Ungi mukanda (Dogmatic Constitution on Divine Revelation) ngutemune ungi muiya ubaadi bipuilo bikumine mu kipua kia 1965 awamba’shi: “Bua kukumina muanda kampanda awakula Bible, kipuilo kia Katolike takimenaa penda pa kutala abiamba bifundue bia kishila nya. Biabia, biabikala bifundue bia kishila sunga biubishi bia kipuilo bioso binka mumune.” Muisambo ubaadi utukie mu ungi journale (Maclean) ubaadi uleshe mayi a ungi pastere mukashi a mu Toronto, mu Canada baadi muambe’shi: “Buakinyi tuibalombene kuleka malongiesha a Yesu na a mu Bible abaapu kukita bipua bikile pa 2 000 bua’shi etukunkushe? Atue banabene tui na binangu bibuwa, anka ingi nsaa atuibiluishaa patukiebaa bipushene na malongiesha a Yesu na bifundue.”

Ungi mukanda (New Catholic Encyclopedia) ubaadi uleshe pabitale ba Temue ba Yehowa’shi: “Ba Temue ba Yehowa abamonaa’shi nka penda mu Bible nyi muabadi balombene kuata malongiesha aabo, na’shi nka penda Bible nyi mulombene kuludika nshalelo aabo.” Mu mafuku ashale, pabaadi ungi Temue a Yehowa akiebe kuilubula kui ungi muana mulume, yawa muana mulume baadi mumutshibe ku mayi. Kunyima kuaye kumfuka munue ku Bible, bamulunguile’shi “Nenuuku kalolo penda panamono Bible, nanguku musango umune kipuilo kienu.”

“Ta mba pa nsenga”

“Ba pa nsenga abebashikwa, mwanda’shi abo ta mba pa nsenga.”​—YOWANO 17:14, Kilombeno kipya 2014.

Akilesha ano mayi: Bu bibaadi Yesu shi a pa nsenga, tabaadi atuelakana mu mianda ya politike sunga mu mianda ya buntomboshi ya aa mafuku. Bakuile’shi “Su bufumu bwande bubaadia kwikala bwa yino nsenga, bafubi bande babaadia kulwa, bwa’shi ntshiikalanga mulubulwe kwi beena Yuda; anka binobino bufumu bwande ta mbwa pano nya.” (Yowano 18:36, Kilombeno kipya 2014) Dingi, balunguile balongi baye bua kupela ngakuilo na bikitshino biabadi bakandikie muiyi di’Efile Mukulu.​—Mateo 20:25-27.

Bibaadi bena Kidishitu ba mu siekele a kumpala bebileshe: Jonathan Dymond, mufundi a mianda itale bipuilo bakuile pabitale bena Kidishitu ba kumpala’shi “babaadi abapele kutuelakana mu ngoshi, sunga bebakula bi bubi, kuibela mu lukano sunga kuibayipaa.” Babaadi abakumina kukienga pamutue pa kutuelakana mu mianda ya pa nsenga. Dingi, bikitshino biabo bibaadi bikite bia’shi bekale belekene na bangi bantu. Mpyele mutumibua balunguile bena Kidishitu’shi: “Pa uno mwanda, abakaanya pa kumona’shi taanwende nabo dimo ku bwabwa bukitekite bwabo bumune bushii kwisaka, ngi paapa paabenukaa.” (1 Mpyeele 4:4) Ungi mufundi a mianda ya kala abetanyina bu Will Durant bafundile pabitale bena Kidishitu’shi “babaadi abakalakasha kondo k’eshimba ka ba mpangano pa muanda wa muikelo wabo wi buwa na ushi matope.”

Ba nnanyi bakuete kulonda kiakia kileshesho lelo uno? Pabitale kupela kutuelakana mu mianda ya pa nsenga kua bena Kidishitu, ungi mukanda (New Catholic Encyclopedia) ubambile’shi: “Kupela kusemuna ma mputu kui bubi.” Muisambo wa mu ungi jurnale (Reformierte Presse) ubaadi uleshe rapore ya ungi ndumbuluilo akuashaa bantu mu Afrike. Yaya rapore ibaadi ileshe’shi, pabaadi bantu bebungi beyipayishene mu Rwanda mu kipua kia 1994, bipuilo bioso bibaadi bituelakane mu ngoshi “kukatusha nka ba Temue ba Yehowa.”

Pabaadi ungi mulongieshi a ku kilongielo kikata esambila bibaadi basalayi ba bena Nazi bayipee bena Yuda bebungi, baadi muidile’shi “takubaadi kipuilo sunga ndumbuluilo a ban’akibundi baadi muakule bibubi pabitale mianda ya madimi, ya buntomboshi na ibubi ibaadi ayikitshika.” Kunyima kua kuipusha bantu abafubaa ku Musée de l’Holocauste mu États-Unis, bafundile’shi: “Binobino nampete lualulo.” Babamulunguile’shi ba Temue ba Yehowa babaadi bashale balamate ku malongiesha aabo sunga mbibaabadi abebakiengiesha bi bukopo.

Tui kuamba naminyi pabitale miiya y’Efile Mukulu yabalondaa? Ungi jurnale (U.S. Catholic) amba’shi: “Lelo uno bansongua bebungi ba mu Katolike tabakuminaa angi malongiesha a kipuilo kiabo, bu pabitale kushala pamune kushi kuiyibakishena muyile miiya na kusangisha mbidi kumpala kua kutuela mu dibaka. Yawa jurnale baadi muleshe mayi a ungi diakre bakuile’shi: “Namono’shi bantu bebungi, bakile pa 50% abekalaa bapue kushala pamune mu dibaka kumpala kuabadia kuiyibashena muyile miiya.” Ungi mukanda (The New Encyclopædia Britannica) awakula’shi ba Temue ba Yehowa “abashimikaa kasele pabitale kulonda miiya y’Efile Mukulu mu nshalelo a muntu ooso.”

‘Efuleneeyi kifulo munkatshi mwenu’

“Ami nenupa mwiiya upya, eshi, nwifuleene kifulo muntu na muntu; bu binanenufulu kifulo, anwe namu nwifuleene kifulo muntu na muntu. Ku bino booso abakashinguula’shi nwi balongi bande, su nwi na kifulo munkatshi mwenu.”​—YOWANO 13:34, 35.

Akilesha ano mayi: Kidishitu balunguile balongi baye buabadia kuifulena ku muntu na muntu nka bu bibaadi muibafule namu. Yesu baadi muibafule naminyi? Baadi mufule bantu booso, sunga biekala’shi mu mafuku aye babaadi abakamba kufula nka bantu banudi nabo kabila kamune, na tababaadi abakamba kuata bakashi na muulo. (Yowano 4:7-10) Kifulo nyi kibaadi akitakula Yesu bua kutuusha nsaa na bukome buaye na kuisumuna ingi mianda bua kukuasha bangi bantu. (Maako 6:30-34) Mfudiilo a bioso, Kidishitu baadi muleshe kifulo mu mushindo ukile bukata. Bakuile’shi “Nee mulami eebuwa: mulami a mikooko eebuwa apaanaa muuwa waye bwa mikooko yaaye.”​—Yowano 10:11.

Bibaadi bena Kidishitu ba mu siekele a kumpala bebileshe: Mu siekele a kumpala, bena Kidishitu babaadi abeyitanyishena bu “mukuetu mulume” sunga “mukuetu mukashhi.” (Filemone 1, 2) Babaadi abakukila bantu ba miilo yoso mu kakongie ka bena Kidishitu, muanda babaadi abakumina’shi “takwi kwilekeena munkatshi mwa mwina-Yuuda na mwina-greke: booso bee na Mwanaana umune.” (Bena-Loma 10:11, 12) Kunyima kua Pantekote a mu kipua kia 33 Bino Bipungo bietu, balongi ba mu Yelusalema “babaadi abaudisha nsenga yaabo na bintu byaabo, bwa kwiabisheena kamono munkatshi mwabo booso, muyiile dikyenga dya muntu ooso.” Buakinyi babaadi abakitshi biabia? Mbua’shi baaba bantu bapia babaadi babatshishibue bamone bia kushala mu Yelusalema na buashi batungunukie na ‘kwipaana ku bulambukukishi bwa batumibwa.’ (Bikitshino 2:41-45) Nkinyi kibaadi kibatakule bua kukita biabia? Kunyima kua bipua pepi na 200 kunyima kua lufu lua batumibua, Tertullian baadi muambuule bishima bibaadi bangi bantu bakule pabitale bena Kidishitu’shi “tala biabadi befulene . . . na biabakuminaa mpa na kufua bua bakuabo.”

Ba nnanyi bakuete kulonda kiakia kileshesho lelo uno? Ungi mukanda (The History of the Decline and Fall of the Roman Empire [1837]) aulesha’shi, munda mua bipua nkama, bantu babaadi abeyitanyina bu bena Kidishitu “babaadi bekitshishene mianda i bubi i bungi munkatshi muabo kukila ibaadi bampangano [bantu bashaa balanguilla] bebakitshine.” Mianda yabadi bakimbuule binobino mu États-Unis ayilesha’shi, bantu be bungi abakulaa’shi abasambila, na abeyitanyinaa bu bena Kidishitu ​—mbashikue bantu ba dingi ekoba. Misusa ibungi balanguidi ba mu kipuilo kampanda tabepushenaa na bena kulanguila naabo bashale mu dingi eumbo, nyi buakinyi tabe na mushindo na tabauku bia kukuasha baaba bakuabo su be mu dikienga.

Mu 2004, pabaadi peele kipapi kikata muiumbo dia Floride misango inanka munda mua mieshi penda ibidi, mukunkushi (prezida) a mudimo wa ku kuasha bantu bapete masaku, baadi mukite muaye moso bua kuuka su biakudia na bingi bintu mbifubishue mu mushindo autungu kufubisha. Baadi muakule’shi takubaadi kisaka kibaadi kilumbuule kalolo bu ba Temue ba Yehowa nya, na aye nkutuma eyi buashi bape ba Temue ba Yehowa bioso biabadi nabio lukalo. Mu 1997, kisaka kia ba Temue ba Yehowa kibaadi kituale manga, bidibua, na bilamba mu eumbo dia République démocratique du Congo bua kukuasha bakuabo bena Kidishitu na bangi bantu babaadi mu lukalo. Ba Temue ba Yehowa be mu Europe babaadi batuushe bintu bi na muloo wa mudiyo wa dolare

“Nemwibawukishe eshina dyoobe”

“Nemuwukishe bantu baboodi mumpe eshina dyobe, baaba boboolamwine ku bya pano. . . . Nemwibawukishe eshina dyoobe, nanyisha kuibawukisha dianka dimo.”​—YOWANO 17:6, 26.

Akilesha ano mayi: Yesu baadi muukishe eshina di’ Efile Mukulu paye kuidifubisha mu mudimo waye wa bulungudi. Nsaa ibaadi Yesu abadika bifundue, baadi akamba kutemuna eshina d’Efile Mukulu misango i bungi. (Luka 4:16-21) Baadi mulongieshe balongi baaye bua kuteka’shi: “Yaya eshina dyoobe dyende ntumbo.”​—Luka 11:2.

Bibaadi bena Kidishitu ba mu siekele a kumpala bebileshe: Mutumibua Mpiele baadi mulungule bakulu ba mu Yelusaleme’shi, Efile Mukulu musangule munkatshi mua bisamba “mwilo wa kineemo bw’eshina dyaaye.” (Bikitshino 15:14) Batumibua na bangi bantu babaadi abalambukisha’shi, ‘yawa ooso eedidi eshina dya Yehowa akapashibwa.’ (Bikitshino 2:21; Bena-Loma 10:13) Babaadi’nyi abafubisha eshina di’Efile Mukulu mu mikanda yabo. Ungi mukanda wa miiya ya bena Yuda (Tosefta) ubaabapuile kufunda peepi mu kipua kia 300 B.B., ubaadi awakula pabitale mikanda ya bena Kidishitu ibabadi bashiikie kui beshikuanyi naabo’shi: “Mikanda ya bantu babafundile ma evanjile na mikanda ya minim [baba babaadi abapuandikisha’shi mbena Kidishitu bena Yuda] babaadi beyipiishe mu kaalo. Babaadi batume eyi buashi beyishiikie kaalo mbalo yoso yabeyipete. . . Ayo na eshina di’Efile Mukulu di muanka.”

Ba nnanyi bakuete kulonda kiakia kileshesho lelo uno? Kumbangilo kua ungi Bible (Revised Standard Version of the Bible), abaabadi bakumiine kui Conseil national des Églises du Christ aux États-Unis mbafunde’shi: “Kumpala kua’shi Kidishitu atandikie, bipuilo bia bena Yuda, bibaadi bipue kuleka kufubisha eshina di’Efile Mukulu umune a binyibinyi, eshina dibaabadi abamono’shi, dibaadi adimuabuula na bangi b’efile, na’shi tabibuwa bua bena Kidishitu boso bedifubishe.” Nyi buakinyi babaadi bashintuule eshina di’Efile Mukulu na muasu wa bu, “MUANANA.” Mu mafuku ashale Vatican ekele mulungule ba eveke shi: “Tabitungu kutemuna sunga kufubisha eshina di’Efile Mukulu YHWHa mu ngono sunga mu nteko.”

Mba nnanyi bakuete kufubisha na kuukisha eshina di’Efile Mukulu lelo uno? Ungi songualume a mu Kirghizistan abetanyina bu Sergey baadi mutale filme abalesha’shi eshina di’Efile Mukulu Yehowa. Kubakidile bipua bifikie ku ekumi kushi’ye kupusha dingi kuabetanyina eshina di’Efile Mukulu. Akupu, kunyima kua Sergey kuenda mu États-Unis, ba Temue ba Yehowa babidi babafikile ku nshibo kuaye abo nkumulesha eshina di’Efile Mukulu mu Bible. Sergey baadi na muloo wi bungi paye kupeta kisaka kia bantu abafubisha eshina dia Yehowa. Dingi, ungi mukanda apatuula bishima (Webster’s Third New International Dictionary) aulesha pabitale eshina “Yehowa Efile Mukulu”’shi, “nyi Efile Mukulu mukile bukata aukibua na nyi Efile Mukulu umune abalanguilaa kui ba Temue ba Yehowa.”

[Mianda i mushi muesaki]

“Uno mukandu wi buwa wa Bufumu aukalungulwa”

“Uno mukuandu wi buwa wa Bufumu aukalungulwa pa nsenga yoso ishaadibwe bwa kulesha bu-kamonyi kwi maumbo ooso na kunyima nfudiilo ayikafiki.”​—MATEO 24:14, Kilombeno kipya 2014.

Akilesha ano mayi: Luka muntu bafundile Evanjile bakuile’shi, Yesu “baîle mu bibalo bikata na bipêla afwalungulanga mukandu wi buwa wa Bufumu bu’Efile Mukulu.” (Luka 8:1. EEM) Yesu aye nabene bakuile’shi: “Nee naa kia kulungula mukandu wi buwa wa Bufumu bw’Efile Mukulu, mwanda ngi kyabadi bantume.” (Luka 4:43) Batumine balongi baye bua kulungula mukandu wi buwa, mu bibundi bikata na bipeela, na kunyima aye nkuibalungula’shi: “Anwikala tumonyi twande . . . mpaa na kufudiile nsenga.”​—Bikitshino 1:8; Luka 10:1.

Bibaadi bena Kidishitu ba mu siekele a kumpala bebileshe: Balongi ba Yesu babakitshine bukidibukidi mianda ibaadi muibalungule. “Efuku dyooso, mu nshibo y’Efile Mukulu na ku mashibo aabo, babaadi’nka abalambukisha na kuwukisha mukandu wi buwa wa Yesu Mesiya.” (Bikitshino 5:42) Bantu boso mu kakongie babaadi abalungula mukandu wi buwa. Neander muntu atalulaa mianda ya kala baadi muleshe’shi “Celsus muntu a kumpala kufunda mianda i bubi pabitale be na Kidishitu baadi muibabepuule’shi, bi buufu kumona’shi bantu abafubaa na buaa bua mikooko, bantu abapuiyaa bilato, bantu abalumbuula misokia ya nyema, bantu bashi balongie, na bantu bashi kapu nyi balungudi ba kishima ba mukandu wi buwa.” Jean Bernardi bafundile mu mukanda waye (The Early Centuries of the Church), shi: [Bena Kidishitu] “babaadi abende mbalo yoso na kui muntu oso bua kuakula. Mu mashinda na mu bibundi, na mu ma mbalo aekala bantu be bungi na ku mashibo. Babaadi abalungula mukandu wi buwa sunga bantu bapela kui bakukila. . . . Mpa na kufidiile nsenga.”

Ba nnanyi bakuete kulonda kiakia kileshesho lelo uno? “Ungi mukata a kipuilo kia Anglican bafundile’shi, bu abipele kipuilo kuata mudimo wa kulungula na kulongiesha na muulo, bino nyi abitakula bantu be bungi bua kupela kufubila Efile Mukulu lelo uno.” Mu mukanda waye (Why Are the Catholics Leaving?) José Luis Pérez Guadalupe bafundile pabitale bipuilo bia ba évangéliques, na bia ba adventistes na bingi bipuilo, alesha’shi “tabendaa ku nshibo na nshibo.” Pabitale ba Temue ba Yehowa bafundile’shi: “Abendaa ku nshibo na nshibo misango yoso.”

Jonathan Turley baadi muleshe mu ungi mukanda (Cato Supreme Court Review, 2001-2002) bino: “Su botemuna’nka ba Temue ba Yehowa, bantu be bungi abatentekieshaa musango umene balungudi ba mukandu wibuwa abafikaa ku mashibo aabo nsaa ayibakalasha. Bua ba Temue ba Yehowa, kulungula mukandu wibuwa ku nshibo na nshibo ta mpenda bua kulungula bantu bi lukumino luabo nya, nyi nkintu ki na muulo ukata.”

[Kashibo]

Botundula bena Kidishitu ba binyibinyi su?

Muyile mianda ayilesha bifundue ibatuisambila mu ino muisambo, omono’shi mba nanyi bakuete kukita mianda ayilesha’shi mbena Kidishitu ba binyibinyi? Sunga biekalashi kui bipuilo binunu na binunu bia bantu abeyamba bu bena Kidishitu ba binyibinyi, lamina bibaadi Yesu mulungule balongi baye’shi: ‘Ta mbaaba booso abangamba’shi, Muanana, Muanana, abakatwele mu bufumu bw’eulu; anka yawa akitshi kikyebe ki’eshimba kya Nshami e muiyilu.’ (Mateo 7:21, Kilombeno kipya 2014) Kutundula baaba abakitshi kikiebe ki’eshimba dia Yaya​—baaba abakitshi mianda ayilesha’shi mbena Kidishitu ba binyibinyi​—na kuibunga nabo pamune mu lulanguilo, nkulombene kukukunkusha ku miabi ya losoo mu Bufumu bu’Efile Mukulu. Atukutekie bua kuipusha ba Temue ba Yehowa bua’shi bakulungule mianda ibungi pabitale Bufumu bu’Efile Mukulu na miabi yabukafuisha.​—Luka 4:43.