Nadi mukumine mueneno a Efile Mukulu pabitale mase
MUNGANGA UMUNE ALONDO MWISAMBO WAYE
NAADI mu nshibo ya bisangilo ya lupitalo, napatulwila kisaka kya ba doktere bipeta bya autopsie. Uno muntu baadi mufwe baadi na mukumbo wa tumeur maligne, na nambile shi: “Mu kikoso twi kwamba shi kibafwisha uno muntu nyi hemolyse [kulwila kwa bipindji bya mase byatwitanyina bu globules rouges na kutshibika kwa mudimo wa nfiyo pa mwanda wa mase ebungi edibwa mu mbidi nsaa yabekeele bamwalushe mase.”
Mulongyeshi umune baadi mwibwe asama na nsungu shi: “Okyebe kwamba shi twi bamwalushe mase ashi epushene na aye?” Nalulwile shi, “Ntshi mwambe byabya nya.” Kunyima kwa kulesha bifwatulo bya tupindji twa nfiyo, nambile shi, “Twi balombeene kumone mushindo ubutulwe ma globules rouges ebungi na kwamba shi bino nyi bilwishe na kutshiba mudimo wa nfiyo.”a Bantu babaadi na nsungu ikile, na mukanwa mwande nkuuma. Nsunga mbinaadi doktere mukinga na aye baadi mulongyeshi, namwine shi ntshi na kya kwiyalusha ku mongo nya.
Pabaadi pakitshikye uno mwanda, ntshinaadi Kamonyi ka Yehowa nya. Ne mutandjikie mu 1943 mu Sendai, kibundji kikata ki kunundu kwa Japon. Bu bibaadi nshami doktere abukaa mikumbo ya ku mbidi na ya mu binangu, naadi mwate kitshibilo kya kulonga bu munganga. Mu kipwa kyanda kya kabidi mu kalasa kakata ka bu munganga, mu 1970, nayibakiile nsongwakashi abetanyina bu Masuko.
Kutwela mu myanda itale mikumbo
Masuko baadi afubu bwa kunkwasha panaadi ntambandile kupudisha kalasa. Myanda ya minganga ibaadi ayinsankisha ngofu. Naadi nakanya ngofu pakumona mushindo ikitshibwe mbidi ya muntu! Sunga mbyabya, ntshinaadi nele binangu pabitale Mupangi nya. Naadi namono shi kukimbuula kwa myanda ya minganga nkulombeene kumpa muwa wi na nsongo. Kunyima kwa kufika doktere, naadi mwate kitshibilo kya kutungunuka na kulonga myanda itale mikumbo—kulonga kwa myanda itale mikumbo, akifwisha mikumbo, kyayikitshi mu mbidi.
Panaadi nakitshi autopsie ya bantu bafwe na mukumbo wa cancer, nabangile kwela mpaka pabitale bipeta bibuwa bya kwalusha kwa bantu mase. Bantu basha mikumbo ya cancer kabayisha mbalombeene kwikala na mase apela mwanda abashimisha mase. Bu byabidi shi kubukwa kwa bantu na chimiotherapie akupelesha dingi mase, nsaa ibungi ba doktere abafundjila bantu bwashi bebalushe mase. Kadi, naadi mufikye mu kumona shi kwalusha kwa bantu mase akupalakasha cancer mu mbidi. Sunga nnaminyi, lelo uno atuuku shi kwalusha kwa mase aulwisha ma kwikalwila kwa mbidi, bino abitamisha mushindo wa’shi cancer kalukye dingi na kupelesha mwabi wa kupanda kwa basha cancer.b
Mu 1975, naadi na mufumankane na mwanda yangikalanga mulonde ku mbangilo kwa mwisambo. Yawa mulongyeshi nyi baadi alondo uno sha mukumbo na aye nyi baadi specialiste a myanda itale mase. Nyi bwakinyi baadi mufiite munda ngofu panaadi mwambe shi kwalusha kwa mase nyi kubaadi kwipe uno muntu. Sunga mbyabya, naadi mutungunukye na kuisamba na aye nkubanga kwishinka.
Kushi mukumbo sunga lufu
Mu aa mafuku nyi mubaadi mukashi ande bamutembele kwi mukashi umune mununu baadi Kamonyi ka Yehowa. Mu mwisambo waaye baadi atemuna kishima “Yehowa,” na mukashi ande baadi mumwipushe kibakidi akilesha. Uno Kamonyi ka Yehowa balulwile shi, “Yehowa nyi eshina dya Efile Mukulu a binyibinyi.” Masuko baadi abadika Bible kubanga ku bukinga, kadi mu Bible abaadi abadika pa mbalo y’eshina dy’Efile Mukulu mbafunde “MWANANA.” Binobino baukile shi Efile Mukulu mmuntu e na eshina!
Masuko babangile musango umune kulonga Bible na uno Kamonyi. Panakatukile ku lupitalo naluka ku nshibo pepi na nsaa ya 1h00 a ku nakashika, mukashi ande bandungwile na muloo ooso shi, “Bible amba shi mikumbo na lufu tabikala dingi kwanka nya!” Nalulwile shi, “Mwanda wibuwa bukile!” Batungunukile amba shi, “Bu bi ndumbulwilo mupwa taadi pepi na kufika, ntankyebe shi okishe nsaa yoobe nya.” Napushishe bu amba shi ndekye mudimo wa bu doktere, naadi mufite munda na kipwano kyetu kibaadi kilwile.
Sunga mbyabya, mukashi ande tabaadi mulekye kwisamba naami bwashi nsangeele bya binyibinyi nya. Baadi ele nteko kwi Efile Mukulu bwashi amukwashe amone bifundwe bibuwa bya kundesha. Mayi a mu mukanda wa Mulungudi 2:22, 23 abaadi ankume kwishimba ngofu: “Akishala nkinyi bwa uno muntu kya ku mufubo waaye ooso naa kya ku lukalakasho lwaye’ye nabeene looso byaayikala mukite, aye, muushi mwa nguba? . . . Mpaa na bufuku, eshimba dyaaye tadii na diikisha. Na kyaakya naamu mbisumanga.” Ano mayi ngatale binaadi nakitshi—kwipana ngofu ku mudimo wande wa munganga bufuku na kanya kushi kupeta muloo wa binyibinyi.
Dingi efuku mu dia lubingo ku nakashika mu mweshi wa musambo mu 1975, pabayile mukashi ande ku Nshibo ya Bufumu ya Batumonyi ba Yehowa, naadi mwate musango umune kitshibilo kya kumulonda. Mukashi ande baadi mukeme pa kummona kwakwa, na Batumonyi abaadi bankukile kalolo kakile. Kabanga paapa naadi nende mu bisangilo byooso ya mu mposo. Kunyima kwa mweshi umune, umune a ku Batumonyi babangile kulonga naami Bible. Myeshi isatu kunyima kwaye kufumankana na Batumonyi twa Yehowa, mukashi ande baadi mubatshishibwe.
Kukumiina kwa mweneno a Efile Mukulu pabitale mase
Kunyima kwa mafuku apela naadi mulongye shi Bible amba shi beena Kidishitu ‘kuleka kudia mase.’ (Bikitshino 15:28, 29; Kibangilo 9:4) Bu bibandi naadi na mpaka pabitale bipeta bibuwa bya kwalusha mase, tabibaadi bukopo bwandia kukumiina mweneno a Efile Mukulu pabitale mase.c Nadi mwele bino binangu, ‘Su kwi Mupangi na su aye nyi bamba bino, byabya mby’eyendo.’
Naadi dingi mulongye shi kifwishe milwisho na lufu nyi mulwisho wa Adame. (Bena Loma 5:12) Mu aa mafuku, naadi nakimbuula pabitale mukumbo wa arteriosclérose. Patununupa, mishila yetu ayifiki bukopo na kunyana, na bino abifwisha mikumbo y’eshimba, abilwisha nfubilo a boongo, na kufwisha mukumbo wa nfiyo. Bino abilesha kalolo shi mpa mwanda wa kukutwa kwetu kwa kupwidika. Kunyima kwa byabya, katshintshi kanaadi nako pabitale myanda ya munganga kababangile kutshimba. Nkapenda Yehowa Efile Mukulu nyi mulombeene kupudisha mikumbo na lufu!
Mu mweshi wa Kasatu 1976, myeshi musambo kunyima kwa’mi kubanga kulonga Bible, nalekyele midimo yande ya kukimbuula ku lupitalo lwa université. Naadi na moo shi pangi ntangobesha dingi kufuba bu doktere, kadi napetele mudimo mu lungi lupitalo. Naadi mu batshishibwe mu mweshi wa Katano 1976. Naadi mumone shi mushindo ukile buwa wandi mulombeene kufuba na muwa wande nyi nkwikala mulambukishi a mukandu wibuwa a nsaa yooso, sunga mbala-mashinda; na nabangile kwibikita mu 1977.
Kukalwila mweneno a Efile Mukulu pabitale mase
Mu mweshi wa Ekumi na Umune 1979, ami na Masuko tubayile mu kakongye ka mu kibalo kya Chiba mubaadi lukalo lwa balungudi. Naadi mupete lupitalo munaadi mulombeene kufuba nsaa ipeela. Mwifuku dia kumpala diande dya mudimo, kisaka kya ba doktere ababalaa bantu kibaadi kingifunyishe. Abaadi abangyele luno lukonko, “Bu byodi umune a ku Bakamonyi ba Yehowa, we kukita kinyi su bakutwadila muntu sha mukumbo e na lukalo lwa kwalushibwa mase?”
Na kanemo kooso naadi mwibapatulwile shi nakyebe kulonda akyamba Efile Mukulu pabitale mase. Naadi mwibapatulwile shi kwi ingi mishindo ya kubuka kushi mase na nankyebe kukita mwande mooso bwa kukwasha bantu bambuku. Kunyima kwa kwisamba munda mwa nsaa ishima, mukanda a bano ababalaa balulwile shi, “Napusha. Kadi su kubafiki sha mukumbo bashimisha mase akile bungi, atwe banabeene atumubuku.” Uno mukata a bano ababalaa baadi aukibwa bu muntu e na myanda i bukopo, kadi kunyima kwa uno mwisambo, tubabangile kwipushena ngofu, na baadi nka anemeka nkumiino yande.
Kunemeka kwa mase kubatompibwa
Pabatudi atufubu mu Chiba, buro bikata bya Batumonyi twa Yehowa bibaadi abibakibwa mu Ebina. Ami na mukashi ande tubaadi atwende kwanka dimune ku lubingo bwa nkabuka Batumonyi bepane bwa kwibaka ano mashibo, atwitanyina bu Betele. Kunyima kwa myeshi ipela, abaadi betwitanyine bwa nkafuba ku Betele bwa nsaa yooso. Byabya, mu mweshi wa Kasatu 1981 tubabangile kushala mu nshibo ibaadi ibakibwe bwashi bano abafubu mu kwibaka bashale munda mwa mafuku. Ku nakashika, naadi nakombo mbalo ibaadi ayikitshibwa mudimo wa kwibaka na kusuula mankumba, na kyolwa naadi nabuku bantu.
Umune a ku bantu banaadi nabuku nyi Ilma Iszlaub, mwina Australie baadi mufikye mu Japon bwa kufuba bu misionere 1949. Baadi na mukumbo wa Leucémie na ba doktere babaadi bamulungule shi kubaadi kumushadile nka myeshi ipeela ya kwikala na muwa. Ilma baadi mupele kwalusha mase bwa kushala na muuwa mafuku ebungi na bakuminyine kushala ku Betele mu mafuku a muwa abaadi amushadile. Mu aa mafuku manga a kukwasha mbidi itushe ma globules rouges ebungi, bu kileshesho erythropoiétine, taabaadi abande kutuuka nya. Byabya ingi nsaa hemoglobine aye baadi ayiki ngofu mpa na ku gramme 3 sunga 4! (Aku namu abitungu kwikala na 12 na ku 15.) Kadi nakitshino mwande mooso bwa kumubuka. Ilma batungunukile na kulesha lukumiino lwi bukopo Mwiyi dy’Efile Mukulu mpa na ku lufu lwaye mu mweshi wa Kumpala 1988—bipwa musambo kunyima!
Munda mwa bipwa bibungi kubaadi bakwetu bebungi bepane ku mudimo wa ku Biro bya Batumonyi twa Yehowa mu Japon babaadi na lukalo lwa kubadibwa. Atutumbula ba doktere bebungi, mwanda babaadi bakumiine kwibabaala kushi kwalusha mase. Misango ibungi abaadi abantwesha mu kadimbo ka kubaala bwashi mmone byabakitshi, ingi nsaa naadi nebakwasha mu kubaala. Natumbula bano ba doktere booso babaadi abanemeka mweneno a Batumonyi twa Yehowa pabitale mase. Kutumika pamune naabo kubaadi kumpe mushindo wa kwibalungula pabitale nkumiino yande. Mu mafuku ashale umune a ku bano ba doktere mubatshishibe bu Kamonyi.
Mwanda wa kukanya, kwitatshisha kwa ba doktere bwa kubuka Batumonyi twa Yehowa kushi kwalusha mase nkulumbuule ngofu mudimo wa munganga. Kubaala kushi kwalusha mase nkuleshe bipeta bibuwa bya kupela kwa kwalusha mase. Bantu abakimbuula mu myanda ya munganga mbamone shi muntu mubadibwe kushi kwalusha mase apanda bukidi kushi nkalakasho ibungi.
Kutungunuka na kulonga kwi Munganga mukata
Netatshisha bwa kuuka myanda ipya ayituuku pabitale mudimo wa munganga. Kadi, natununguka na kulonga kwi Yehowa, Munganga mukata. Tamono penda akimweneka panundu nya kadi amono bi muntu mushima. (1 Samwele 16:7) Bu byandi doktere, netatshisha bwa kubuka muntu mushima, kushi kutala penda mukumbo waye. Bino abinkwasha bwa kubuka sha mukumbo kalolo.
Natungunuka na kufuba ku Betee, na kukwasha bangi balongye pabitale Yehowa—mpa na mwenene aye pabitale mase—ngumune wa ku miloo yande ikata. Luteko lwande kwi Munganga mukata, Yehowa Efile Mukulu, akyebe kupudisha mikumbo na lufu.—Mwisambo wa Yasushi Aizawa.
[Mayi e kuushi kuʼesaki]
a Mu mukanda waaye wa Modern Blood Banking and Transfusion Practices, Dr. Denise M. Harmening amba shi: “kubutudibwa kwa ma globules rouges kunyima kwa kwalusha mase” nkulombeene kukitshika “kwi sha mukumbo sha mbidi ishi ayilesha su ngilombeene kutambula mase pa mwanda wa mase abaabadi balushe kala, pa mwanda wa eyimi sunga mbidi yabadi bele bipindji bya mbidi bya bangi bantu.” Yaaya nsaa, ma anticorps akumbeene kufwisha mbidi mu kukita bibi su abalusha muntu mase “taamweneka mu bipimo byatukita kumpala kwa kwalusha muntu mase nya.” Mukanda wa Dailey’s Notes on Blood, awamba shi hémolyse “mukumbeene kukitshika sunga byekala shi mbalushe muntu sunga ndambo ipela ya mase ashi epushene na aaye . . . Apalekye nfiyo kufuba, muntu ekala bu abalungu kapela kapela mwanda nfiyo tayikasha dingi butshafu bwi mu mase.”
b Journal umune (Journal of Clinical Oncology), a mu mweshi wa mwanda 1988, baadi muleshe shi: “Bantu babadi balushe mase pabebaala tabeyikeela kalolo bu bano babadi babaale bwa cancer kushi kwalusha mase.”
c Bwa kuuka myanda ibungi pabitale malongyesha a Bible pabitale mase, tala broshire a Comment le sang peut-il vous sauver la vie ? wabadi batuushe kwi Batumonyi ba Yehowa.
[Eyi dya kukaka nadyo binangu bya bantu]
“Naadi mwibapatulwile shi kwi ingi mishindo ya kubuka kushi mase na nankyebe kukita mwande mooso bwa kukwasha bantu bambuku”
[Eyi dya kukaka nadyo binangu bya bantu]
“Kubaala kushi kwalusha mase nkuleshe bipeta bibuwa bya kupela kwa kwalusha mase”
[Kifuatulo]
Kunundu: Nakitshi mwisambo wa mu Bible
Ku mboko ibalume: Ami na mukashi ande, Masuko, lelo uno