Efile Mukulu badi mufubishe évolution bua kupanga ingi mishindo ya muwa su?

Lualuulo lua Bible

Nya. Bible akula kalolo’shi Efile Mukulu bapangile bantu na ‘mishindo’ ilekenelekene ya nyema na ya mitshi.a (Kibangilo 1:12, 21, 25, 27; Kibafumbwilwe 4:11) Akula’shi kifuko kioso kia bantu nkitukile kui Adame na Eve, baledi betu ba kumpala. (Kibangilo 3:20; 4:1) Bible takuatshishenaa binangu bia’shi Efile Mukulu badi mufubishe évolution bua kupanga mishindo ilekenelekene ya muwa nya. Kadi, Bible tapelaa abiamba bena Siyanse’shi kushintuluka nkulombene kukitshika ku mushindo woso wa bintu bi na muwa.

• Efile Mukulu baadi mufubishe évolution su?

• Évolution e mu kuipushena na Bible su?

• Tui kuamba naminyi pabitale ngobesha i nayo mitshi na nyema ya kushintuluka bua kuiubidishena na mbalo kampanda?

Efile Mukulu baadi mufubishe évolution su?

Bantu abakumina’shi Efile Mukulu baadi mufubishe évolution bua kupanga muwa, be na binangu bilekenelekene pabitale bibadi muibikite. Muyile ungi mukanda wa (Encyclopædia Britannica) bangi bantu abakumina’shi Efile Mukulu baadi mufubishe bintu bibaadi bipue kuikala kuanka bua kupanga bingi bintu.”

Bantu abakumina mianda ya évolution abakuminaa dingi’shi:

• Bipangua bioso bi na muwa abitukila kui bankambua betu ba kala.

• Kintu kampanda nkilombene kushintuluka kiafika kingi kintu kilekene.

• Efile Mukulu nyi akitaa bia’shi bino bintu bioso bikitshikie mu uno mushindo.

Évolution e mu kuipushena na Bible su?

Bantu abakuminaa mianda ya évolution abalesha’shi abiakula Bible pabitale kupangibua kua bintu mu mukanda wa Kibangilo mbia madimi. Anka, Yesu baadi muleshe’shi mianda yabakula mu mukanda wa Kibangilo ngia binyibinyi. (Kibangilo 1:26, 27; 2:18-24; Mateo 19:4-6) Bible alesha’shi kumpala kuadia kufika pa nsenga, Yesu baadi muiyilu pamune n’Efile Mukulu na baadi muipane mu kukuasha Efile Mukulu buadia kupanga “bintu bioso.” (Yowano 1:3) Biabia, binangu bia’shi Efile Mukulu baadi mufubishe évolution bua kupanga bingi bintu bioso bi na muwa, ta bi mu kuipushena na abilongiesha Bible nya.

Tui kuamba naminyi pabitale ngobesha i nayo mitshi na nyema ya kushintuluka bua kuiubidishena na mbalo kampanda?

Bible tapatuula bungi bua misango ilombene kipangua kampanda kushintuluka. Dingi tapele binangu bia’shi mishindo ilekenelekene ya nyema na mitshi ibabaadi bapangie kui Efile Mukulu ngilombene kushintuluka na kuiubidishena muyile mbalo yabidi. Sunga biekala’shi bangi bantu abamono kuakua kushintuluka bu évolution, kuno kushintuluka takutuushaa kingi kipangua kipia nya.