Tobandile kwela binangu bya kubadika Bible kadi obofula pa mwanda wa kupusha bibapushishe bano bantu batubateemune kunundu su? Bantu bebungi abonaa’shi kubadika Bible akukokyesha. Biabia we kukita naminyi su bakulungula’shi Bible mulombeene nkukwasha bwa kwikala na nshalelo e buwa? Na dingi we kukita naminyi su ouka mishindo ya kumubadika ilombeene nkukwasha bwa kuuka myanda ibungi mu kubadika koobe? We bya kukumiina kwela eyiso ku myanda ilombeene nkupetesha Bible su?

Banda kupusha ano mayi apeela a bantu bapete myanda ibungi nsaa ibababangile kubadika Bible.

Ezekiel, e mu bipwa 20, akula’shi: “Kala, naadi nka bu muntu atambusha mootoka shawuku kwinyi kwende mu binangu. Anka, kubadika Bible nkunkwashe bwa kwikala na nshalelo ebuwa. Bible e na malango a kinangu andi mulombeene kufubisha efuku dyooso.”

Frieda e na bipwa 20 apatuula’shi: “Naadi nabatuka na myanda kushii kwela binangu. Anka, ku bukwashi bwa kwibadikila Bible, ne mulongye bya kwikala na lwishinko. Bino mbinkwashe bwandya kwikala muntu a bantu, na binobino ntandi na bakuuku bebungi.”

Ungi mwana mukashi e na bipwa 50 abetanyinaa bu Eunice akula bino pabitale Bible: “Kwete kunkwasha bwa kwikala muntu e buwa, na kuleka byubishi bibubi.”

Nka bu baaba bantu babatuteemuna na bangi bantu bebungi ababadikaa Bible, kubadika Bible nkulombeene nkukwasha bwa kunyiisha kulumbuula nshalelo oobe. (Yeeshaya 48:17, 18) Mu myanda ibungi yoodi mulombeene kupeta mu kubadika koobe, Bible e nkukwasha bwa (1) kwata bitshibilo bibuwa, (2) kupeta bakuuku bebuwa, (3) kukambila twinyongoshi, na (4) kintu kikilekile buwa, nkulonga bya binyibinyi pabitale Efile Mukulu. Malango a mu Bible aafiki kwi Efile Mukulu, ngi bwakinyi su weatumikila twe mulombeene kwidimba nya. Efile Mukulu ta mulombeene nkupa elango dibubi.

Kintu ki na muulo nkubanga kumubadika. Mmalango kinyi alombeene nkukwasha bwa kubanga na nkupa muloo wa kutungunuka na kumubadika?

Mmyanda kinyi ilombeene nkukwasha bwa kusankila kubadika Bible na kupeta masanka aatuukila mu kumubadika? Banda kutala ino myanda itano ikwashe bantu bebungi.

Kimba mbalo ibuwa. Kimba mbalo ishii tuleo. Katusha bintu bilombeene kutuma binangu byoobe kungi bwa’shi otuule binangu ku byobadika. Etaata dibuwa na kapapi kataale mbilombeene nkukwasha bwa kupusha myanda yobadika kalolo.

Lumbuula binangu byoobe kalolo. Bu bi Bible mmukanda aufiki kwi Nshetu e mwiyilu, kwikala na binangu bu bya mwana mukinga e na lukalo lwa kulonga myanda ayimulongyesha nshaye e na kifulo nkulombeene nkukwasha ngofu. Su we na binangu bibubi, sunga’shi we mulamiine myanda yabadi bakulungule pabitale Bible, banda kwiyituula ku lupese bwa’shi Efile Mukulu akulongyeshe.​—Misambo 25:4.

Ikala wele luteko kumpala kwa kubadika. Mu Bible mwi binangu by’Efile Mukulu, ngi bwakinyi bibuwa tumutekye bwa’shi etukwashe bwa kumupusha. Efile Mukulu mmulee’shi akyebe kupa “baaba abamutekye kikudi kiselele.” (Luka 11:13) Kikudi kiselele nkilombeene nkukwasha bwa kupusha bi binangu by’Efile Mukulu. Na dingi, akikubuula binangu bwa’shi omone bya kupusha ‘mpaa na [bintu] bifwame by’Efile Mukulu.’​—1 Beena-Kodinda 2:10.

Badika na kitshibilo kya kupusha. Tobadikanga nka penda bwa kupudisha masaki ebungi nya. Nangusheena ngofu ku myanda yobadika. Eyipushe nkonko bu ino: ‘Eyikashi kinyi dibaadi dileeshe uno muntu anabadika? Ne kufubila uno mwanda mu nshalelo ande naminyi?’

Ikala na biipatshila. Bodya kupeta masanka mu kubadika koobe kwa Bible, etatshishe bwa’shi olongye mwanda ulombeene nkukwasha mu muwa oobe. We kwiatshila biipatshila bu bino: ‘Nakyebe kulonga myanda ibungi itale Efile Mukulu nabeene.’ ‘Nakyebe kwikala muntu ebuwa, mulume sunga mukashi ebuwa.’ Akupu osangule kipindji kya mu Bible kilombeene nkukwasha bwa kulombasha byabya biipatshila.a

Ino myanda itano ayikukwasha bodya kubanga kubadika Bible. Anka we mulombeene kukita kinyi bwa’shi wekale na muloo wibungi wa kumubadika? Mu mwisambo aulondo okapete malango e bya nkukwasha.

Opushaa naminyi nsaa yobadika Bible? Akukalakashaa? Su akusankishaa? Kipaso kyomubadika ngi ki na mwanda. Tubande kutala myanda yoodi mulombeene kukita bwa kunyiisha kutamisha muloo oobe wa kubadika Bible.

Sangula Bible ebuwa, abadi baluule mu ngakwilo a kano kabidi. Nsaa yobadika mukanda wi na bishima bibukopo sunga bishima bya kala byoshii mulombeene kupusha kalolo, twekala na muloo wa kwiubadika nya. Ngi bwakinyi abitungu okimbe Bible e na ngakwilo mubofule kupusha mulombeene nkukuma kwishimba. Na dingi, abitungu ekale mwaluulwe kalolo e na myanda nka byayidi mu bifundwe bya kala.a

Fuba na byamo bituukye kano kabidi. Lelo uno Bible ta mwikale kwanka nka penda bu mukanda wabadi batuushe nya, anka e mu ingi mishindo i bungi. We kubadika angi ma Bible ku Internete sunga kwiata mu ordinateur oobe’be nabeene, mu tablete, sunga mu telefone. Angi ma Bible e na bintu bya kukimbuula bi bya nkukwasha bwa kukimba bukidi angi ma verse aesambila mwanda obadika sunga kutala byabadi bealuule mu angi ma Bible. Su okumina kuteemesha pamutwe pa kubadika, Bible e kwanka dingi mu mayi abadi bakobole. Bantu bebungi bakwete kusankila kumutemesha nsaa yabende mu motooka, nsaa yabatumpu bilamba, sunga pabakitshi ungi mudimo awibalekyela mushindo wabadya kumutemesha. Abitungu kufuba na mayele oodi mubofushe.

Fuba na mikanda ya kulonga nayo Bible. Mikanda ya kulonga nayo Bible ngilombeene nkukwasha bodya kuuka myanda ibungi nsaa ywebadikila Bible. Kwi ma kalata ka bipindji bya nsenga byabadi bateemune mu Bible, bino mbilobeene nkukwasha bodya kushinkamisha ma mbalo abakitshikile myada yopete mu kwibadikila koobe na kuuka myanda i mwanka. Miisambo, i mu ma jurnale sunga mu masaki a kulonga e mu site eetu a jw.org, pa mbalo ifunde’shi “Qu’enseigne réellement la Bible?” ngalombeene nkukwasha bodya kuuka akipatuula ingi myanda i mu Bible.

Fubisha mayele elekeenelekeene. Su kubadika Bible ooso mushima wekumonaa bu akukookyesha, bwakinyi twe mulombeene kwata kipindji kampanda kya mu Bible akikambaa kusankisha? Su okyebe kuuka myanda ibungi pabitale bantu ba mu Bible, abitungu obangye kubadika kipindji kya mu Bible kyabadi bebesambile. Mu kashibo ke kunundu akamba’shi “Kimbuula myanda ya mu Bible pa kuuka bantu be mwanka,” mwi mishindo ayileesha byoodi mulombeene kukita. Sunga’shi we kukumiina kubadika Bible muyiile mitwe ya mwanda sunga muyiile kwilondeena kwa myanda. We mulombeene kutompa umune wa ku ino mishindo.

Bible mmwilekeene na ingi mikanda yooso, mwanda mwi malango aafiki kwi Mupangi eetu. (2 Timote 3:16) Myanda i mwanka ngilombeene kwitukwasha ngofu. Anka Bible nabeene amba’shi: ‘Eyi dy’Efile di na mûwa na bukome.’ (Beena-Ebelu 4:12, EEM) Bible e na bukome bwa kulongamisha nshalelo eetu mu myanda ibidi ikata—etupa buludiki bwibuwa mu nshalelo eetu a kwifuku n’efuku, kubanga binobino, na etukwasha bwatudya kuuka Efile Mukulu na milayilo yaaye.​—1 Timote 4:8; Shake 4:8.

Bible e kulumbuula nshalelo oobe kubanga binobino. Bible mulombeene nkukwasha mu myanda yoobe’be nabeene. Etupa malango ebuwa na aakwasha mu inomyanda ayilondo:

• Kipwano kyetu na bangi.​—Beena-Efeso 4:31, 32; 5:22, 25, 28, 33.

• Kulama binangu na mbidi yeetu kalolo.​—Misambo 37:8; Nkindji 17:22.

• Mwikeelo wibuwa.​—1 Beena-Kodinda 6:9, 10.

• Kufubisha makuta kalolo.​—Nkindji 10:4; 28:19; Beena-Efeso 4:28.a

Ungi mulume na mukashi bakii ba nsongwa ba mu Asie abaadi basankile malango a mu Bible na kwiata na muulo ngofu. Nka bu bangi balume na bakashi baki’abakatuka mu kwiyibakisheena, abaadi abetatshisha bwabadya kwiubidisheena na bwabadya kwikala abesamba myanda yooso. Abo nkubanga kutumikila myanda ibaabadi ababadika mu Bible. Abapetele bipeta kinyi? Vicent akula’shi: “Myanda inaadi nabadika mu Bible ibankwashishe bwa kupudisha nkalakashi ya mu eyibakishi dyetu na kifulo kyooso. Kutumikila myanda ya mu Bible kubetupa booso bwetu nshaleelo a muloo.” Annalou, mukashi’aye namu amba’shi: “Kubadika bileshesho bya bantu ba mu Bible nkwitukwashe ngofu, binobino ne na muloo mwiyibakishi na twi na biipatshila bibuwa mu muwa wetu.”

Bible e nkukwasha bwa kuuka Efile Mukulu. Kukatusha myanda yadi mwakule pabitale eyibakishi, Vicent akula dingi’shi: “Ku bukwashi bwa kubadika Bible, napusha binobino’shi nanyiisha kwifubwila peepi na Yehowa kukila byangikalanga kumpala.” Ano mayi a Vicent aaleesha mwanda wi na muulo ukata​—Bible mulombeene nkukwasha bwa kunyiisha kuuka Efile Mukulu. Su botungunuka na kumubadika, tokapete nka penda malango e mwanka nya, anka okapete dingi kiukilo na kwikala bu kuuku’Efile Mukulu. Okapete dingi myanda ibungi na ibuwa yadi mwitulee bwa mafuku aafiki. Mafuku okapete “muuwa wa biinyibiinyi”​—muwa wa ikalaika. (1 Timote 6:19) Ungi mukanda ta ngulombeene nkupetesha ino myanda nya.

Su botungunuka na kubadika Bible, n’obe namu we mulombeene kupeta ino myabi—kulongamisha nshalelo oobe kubanga binobino na kuuka Efile Mukulu kalolo. Byabya, nsaa yobadika Bible, nkonko ibungi ayikufikila mu mutwe. Apakufikila ino nkonko, tentekyesha kileshesho kibuwa kya mwina mudimo mukata a mu Etshopi baadi kwanka takudi bipwa bifikye ku 2 000. Baadi na nkonko ibungi pabitale myanda ya mu Bible. Nsaa ibabamwipwishe su kwete kupusha myanda ibaadi abadika, balulwile’shi: ‘A nyi mupwandjikile kwiyishingula naminyi su ta kwi muntu a kwiyimpatulwila?’b Kushii kunyengakana, bakuminyine bukwashi bwa Fidipe, muntu baadi mulongyeshi a myanda ya mu Bible, na baadi mulongi a Yesu. (Bikitshino 8:30, 31, 34, EEM) Mu mushindo umune, su okumina kuuka myanda ibungi pabitale Bible, atukukankamika bodya kuteka kulonga kwa Bible ku Internete mu www.pr418.com sunga kufundjila adrese i peepi nobe ya ku ino yabadi baleeshe mu uno jurnale. We mulombeene dingi kwisamba na ba Temwe ba Yehowa be peepi noobe sunga kwenda ku Nshibo ya Bufumu i peepi. We mulombeene kubuula Bible, na kumutadiila bwa’shi akukunkushe bodya kwikala na nshalelo e buwa.