Edene​—Ibaadi mbalo ya kumpala ibashadile bantu?

BANDA obe nabeene kupwandikisha’shi we mu lupango lw’efuba dibuwa. Tamui myanda ayikalakasha binangu, tamui tuleo atupushika bu atutuuku mpa na mu midimba mu bingi bibundji bikata. Luno lupango lui bukata, na tamutuele kintu su nkimune kilombene kuluisha butaale bui muanka. Kukila paapa, mu binangu byobe tamui kintu su nkimune kiotshinyi, mbidi yoobe tayi na katoba ka mukumbo, sunga busungu. Bipindji byoso bya mbidi yoobe mbilombeene kuipushena na byooso byofumankana nabyo mu lupango.

Meso obe e na muloo wa kutala malangi elekene a bilongo, akupu aatala muela wiselele awalala, akupu aatala midiyala ya masaki na lubishi lui bulese mushi mua nsembue ya nguba na myesheshi. Opusha ndambo ya lume alukuikupila na opusha mapembue alo. Opusha tuleo tua masaki, na mema aakupila ku mbuebue, tuleo tua tonyi atuitanyina na kuyimba, na tua tuishi. Pomono bino byoso mu binangu, tomono shi wekala na lukalo lua kushala mbalo i byabya?

Bantu bebungi abakumiina shi bantu ku mbangilo babaadi mu mpalo i byabya. Munda mua bipua nkama, beena bipwilo bya Judaisme, bia buina Kidishitu, na Islam abalongyeshibua pabitale luno lupango lua Edene, mubaadi Efile Mukulu mutuule Adame na Eva buashi bashale. Muyile abyamba Bible, babaadi muanka na nshalelo a muloo na butaale. Babaadi bashale mu butaale abo banabeene, mu butaale na nyema mpa na Efile Mukulu, aye baadi muibape lukulupilo lua kuikala na muwa wa looso mu mbalo i buwa byabya.​—Kibangilo 2:15-24.

Ba Hindu namu be na ungi mpushisho pabitale mpaladiso a kala. Ba Buddhiste abakumiina shi bakata ba myanda ya mu kikudi, sunga ba Buddha, abaadi batuukye mu bino bipungo bibuwa pabaadi nsenga bu mpaladiiso. Na bipuilo bibungi mu Afrike abilongyesha miisambo ayende pamune na muisambo wa Adame na Eva.

Tuambe shi, binangu bya mpaladiiso a kumpala mbilombeene kusanganyibua mu bipuilo na miisambo ya kala ya bantu ba mbalo yooso. Mufundji umune bambile shi: “Bantu ba mu bipungo bibungi abaadi bakumiine shi kubaadi mpaladiiso kala, mubaadi kupwidika, bulungantu, butaale, muloo, bidibwa bikile bungi, na mushibaadi myanda ibukopo, kwilwilena sunga ngoshi. . . . Luno lukumiino ndupe bantu booso kinyongwa kya mpaladiiso mushimine kadi shi mulubibwe na lukalo lukata lwa kumupeta dingi.”

Ino yooso miisambo na myele ya kala ayifiki mbalo imune su? Bi kwikala shi bino binangu bi na bantu ba mu bipungo bilekenelekene mbitukye ku mwanda umune w’eyendo? Kubaadi lupango lw’efuba dimune mu Edene kala na bantu b’eyendo Adama na Eva?

Basha mpaka abasepe pabitale uno mwanda. Mu kino kipungo kya siyanse, bantu bebungi abamono shi ino miisambo nyi myeele ya bisumanga. Mwanda wa kukaanya, boso basha mpaka ta mbampangano nya. Bakata bebungi ba bipwilo bakwete kulwisha lukumiino lwa bantu pabitale lupango lwa Edene. Abamba shi kasha takwekele mbalo i byabya nya. Abamba shi uno mwisambo nyi mpenda ngakwilo a mu kifwanyi, mmwele, mpenda lukindji.

Eyendo, mu Bible mwi nkindji. Yesu aye nabeene baadi mutuushe nkindji yende nkumo. Kadi, Bible talesha mwisambo utale Edene bu lukindji nya, kadi alesha shi mmwisambo w’eyendo wa kala, ushi mpaka. Byabya, su myanda ifundjibwe mwanka tayibaadi ikitshikye, mushindo kinyi watudia kukumiina bingi byooso bifundjibwe mu Bible? Tubande kutala bwakinyi bangi abele mpaka pabitale lupango lwa Edene na kumona su binangu byabo bi mwishinda. Akupu atukyebe kumona bwakinyi uno mwisambo wi na muulo ukata bwa oso a kwatudi.

Kubaadi eyendo lupango lwa Edene mbalo kampanda?

OUKU mwisambo wa Adame na Eva, na wa lupango lwa Edene? Bantu bebungi mu nsenga ishima abeuku. Bwakinyi twe mulombeene kwiubadika obe nabeene? Wi mu mukanda wa Kibangilo 1:26–3:24. Uno mwisambo wi bino:

Yehowa Efile Mukulua bakitshine muntu na lufufi, bamupele eshina dia bu Adame, bamutuudile mu lupango lubaadi mbalo ayitanyibwa bu Edene. Efile Mukulu aye nabeene nyi baadi mukune luno lupango. Lubaadi alwedibwa mema kalolo na lubaadi na mitshi ibungi ya bikuba bibuwa. Munkatshi mwalo mubaadi “mutshi wa kushinguula kibuwa na kibubi.” Efile Mukulu bakandikile muntu kudia bikuba bya uno mutshi, na kumulungula shi su bakutwa kukokyela akyebe kufwa. Kunyima, Yehowa bakitshine mukwashi a Adama​—mukashi etaminyibwa bu Eva—​aye nkumukita na lubafu lumune lwa Adama. Efile Mukulu bebapele mudimo wa kulumbuula lupango na kwibalungula shi betandeene na kuusha nsenga.

Nsaa ibaadi Eva bupenka, nyoka bafikile mu kwisamba naaye, kumutompa bwashi adye kikuba kikandjikibwe na kuamba shi Efile Mukulu baadi mumudimbe na kwibafya kintu kibuwa, kintu kilombeene kumwikasha bu efile. Bapono mu kateo na baadi kikuba kikandjikibwe. Kunyima, Adama bamulondo mu kukutwa kwaye kwa kukokyela. Pa wawa mwanda Yehowa batshibiile Adama, Eve na nyoka kiimu. Kunyima kwa bantu kutushibwa mu luno lupango lwa mpaladiiso, ba mikeyilu abaadi bashikye kitwelelo kya mwanka.

Basha binangu bebungi, na bano abauku myanda ya kala abalesha shi mu bipungo bishale bantu abaadi abamba shi myanda ifundjibwe mu mukanda wa Kibangilo mu Bible ngy’eyendo na ibaadi ikitshikye kala. Ano mafuku, bantu bebungi bakwete kwela mpaka pabitale myanda i bino. Kadi nkinyi kifwishe ino mpaka pabitale mwisambo wi mu mukanda wa Kibangilo pabitale Adama, Eva, na lupango lwa Edene? Tutaluula myanda inanka ayitusha ino mpaka.

1. Lupango lua Edene nyi mbalo ibaadi kuanka eyendo?

Buakinyi kui mpaka pabitale uno muanda ukata? Abimueneka shi mianda ya filozofi ngikite mudimo ukata pabitale ino mpaka. Munda mua bipua nkama, basha binangu pabitale myanda ya teoloji abaadi abatuusha binangu bilekenelekene shi luno lupango lu’Efile Mukulu lubaadi lukii kuanka mbalo kampanda. Sunga mbyabya, kipuilo kibaadi akilondo binangu bya bena filozofi bena Ngreke, bu kileshesho Platon na Aristote babaadi abamba shi pano pa nsenga tapabaadi kintu su nkimune kipuidikye. Na’shi nkapenda muiyilu nyi mui bintu bipuidikye. Byabya, basha binangu pabitale myanda ya teoloji, abelele binangu shi mpaladiiso a kumpala baadi na kya kuikala pepi n’eulu.b Bangi babambile shi luno lupango lubaadi kuiyilu kula kualushibaadi lulombeene kuluishibua na bubi bua ino nsenga; bangi namu shi lubaadi ku Pôle Nord sunga ku Pôle Sud; mpa na bangi namu shi lubaadi mu mueshi sunga pepi nao. Tatui kukaanya su uno muanda wa Edene taudi bu nangunangu ya bantu. Bangi basha binangu ba ano mafuku abamono shi kuisamba pabitale mbalo ibaadi Edene nkukutua kua binangu muanda talubaadi kuanka nya.

Biabia, Bible t’esambila pabitale luno lupango mu wawa mushindo nya. Mu Kibangilo 2:8-14, atumono myanda ibungi itale ino mbalo. Lupango lubaadi dia kutunduka nguba kua kipindji kya nsenga akitaminyibua bu Edene. Kibaadi na muela ukata ubaadi bu nsulo ya ingi myela inanka. Muela oso wi n’eshinda na mbafunde ingi myanda itale eshinda dyao. Ino myanda ibaadi ikalakashe basha binangu ngofu, abo nkubanga kukimba mu Bible myanda ilombeene kukuasha bua kushinguula mbalo ikumbeene kuikala lelo bu mbalo ibaadi lupango kala. Sunga mbyabya, bebungi nkupuandikisha ma mbalo akile bungi na elekenelekene. Bino abilesha shi myanda ifundjibwe mu Bible pabitale Edene, lupango luaye na myela ibaadi muanka ngya madimi sunga shi ngia mu kifuanyi?

Tubande kuela binangu: Myanda I mu mwisambo wa Edene ibaadi ikitshikye takudi bipua kukila 6 000. Ibaadi ifundjibue kwi Moyise, aye pangi baadi mufunde bibaadi bantu ba kala bamulondele sunga kubadika bingi bifundue bya kala. Sunga nnaminyi, Moyise baadi mufunde myanda ibaadi ikitshikye bipua pepi na 2 500 kumpala. Uno muisambo wa Edene ubaadi upue kuikala muisambo wa kala. Binobino, kui mushindo washi ino myanda itale eumbo bu myela ishintuule mashinda aayo munda mua nkama na nkama ya bipua? Nsenga ayendaa na kushintuluka. Kipindji kya nsenga mubaadi Edene nyi mbalo ayikitshikaa kutshinkatshinka kwa nsenga nsaa na nsaa​—mbalo ayibadikibua ano mafuku pepi na 17 pa lukama lua kutshinkatshinka kukata kua nsenga. Mu mbalo i byabya, nsenga ngilombeene eyendo kushintuluka. Kukasha byabya, Mpeshi a kabutu mu mafuku a Nowa mukumbeene kuikala shi baadi mushintuule bibaadi nsenga mu mushindo watushi balombeene kuuka lelo uno.c

Kadi, ino myanda ipeela ngi yatuuku: Muisambo wi mu mukanda wa Kibangilo aulesha shi luno lubaadi lupango lw’eyendo. Ibidi ya ku myela ikata inanka yabadi besambile muanka​—Efrate na Tigre, ayitaminwa dingi bu Hidekele—​iki kuanka lelo uno, na nsulo yayo tayi kula ngofu nya. Uno muisambo autemuna mpa na mashina a maumbo mubaadi ino myela ayikidi na bintu bi mushi mua nsenga bibaadi abiukibua yaaya mbalo. Kui bantu ba mu Isaleele kala, muanda abo nyi babaabadi bafundjile uno mukanda, ino myanda yooso ibaadi ayibakuasha ngofu bua kuuka mbalo ibaadi lupango.

Nangunangu na myele ayikalaa wawa mushindo? Nsaa ibungi tayikambaa kukutua kutemuna bingi bintu bikumbeene muntu nkataluula bua kuuka su ngy’eyendo sunga ya madimi? Kadi miisambo wa myanda ya kala, ayisambilaa na bintu na bantu b’eyendo.

2. Eyendo shi Efile Mukulu baadi mukite muntu ku lufufi na Eva na lubafu lua Adama?

Bena sianse mbaleshe shi mbidi ya muntu ngisangishe bintu bilekene​—bu kileshesho hydrogène, oxygène, na carbone—​bino byooso bi mu lufuufi lua nsenga?

Bena siyanse bebungi abamba shi muwa ubaadi wibangile ao unabeene, wabanga bu tuntu tupeela wenda na kushintulukanga kapela kapela, munda mua midiyo ya bipua, bua kufika byooso biatumono lelo. Kadi, kuamba “tuntu tupeela” nkulombeene kupushika mu mushindo wi bubi, muanda bintu byoso bi na muwa​—sunga tuntu tukile bupela tushi atumueneka—​bi na myanda i bukopo kupusha. Takui kintu su nkimune akilesha shi kui muwa witukile ao unabeene. Kadi, bintu byoso bi na muwa abilesha shi mbipangibue na mupangi sha binangu muitukile atue boso.d​—Bena-Loma 1:20.

Opuandikisha shi we kusangeela kutemesha loono luibuwa sunga kusangeela kintu kisole kalolo sunga kintu kikitshibue kalolo na teknoloji na kuamba shi bino byooso tabi na muntu muibikite? Nya! Kadi bino byooso ta mbilombeene kuikala sunga pepi na muwa wa muntu. Mushindo kinyi watudi balombeene kupuandikisha shi tawi na mupangi? Na dingi, mukanda wa Kibangilo awamba shi ku byooso bi na muwa, nkapenda muntu nyi baadi mukitshibwe kuifuanyiko di’Efile Mukulu. (Kibangilo 1:26) Nyi bwakinyi, nkapenda bantu pano pa nsenga nyi be na ngikashi bu ya Efile Mukulu ya kukidtanga bintu, ingi nsaa kutusha misambo ibungi, kukita bintu bya ku maboko, na teknoloji. Tui na kya kukaanya su Efile Mukulu mmupangie bintu ngofu kuitukila?

Pabitale kupangibua kua mukashi na lubafu lua mulume, nkinyi ki bu lukalakashi?e Efile Mukulu baadi mulombeene kuibikita mu ungi mushindo, kadi mushindo ubaadi mupangye mukashi ubaadi na muulo ukata. Baadi mukumiine shi mulume na mukashi beyibakishene na bakite kintu kimune, anka bu’shi be “mbidi imune.” (Kibangilo 2:24) Uno ta ngi mushindo ulombeene mulume na mukashi kwikumbashena, kukita kipwano kya looso na kuikuashena, bilombeene kulesha shi kui Mupangi sha binangu na kifulo?

Kukasha byabya, ba sha binangu pabitale myanda ya kuiambushene mu mase abamba shi mbamone shi bantu booso mbafikye ku mulume na mukashi umune. Binobino, tui kuamba shi muisambo wi mu mukanda wa Kibangilo ta ngw’eyendo?

3. Mutshi wa kiukilo na mutshi wa muwa i bu mitshi ya mu kifuanyi.

Lelo uno, muisambo wa mu mukanda wa Kibangilo tawamba shi ino mitshi muyo inabeene ibaadi na bukome kampanda nya. Kadi, ibaadi mitshi ibaadi Yehowa mupe kipatulwilo kikata.

Bantu tabakitaa byabya lelo uno su? Bu kileshesho, nsushi mulombeene kudimusha bantu pabitale kukita kintu kya kubepuula tumiladi. Bino ta mbitale kukutua kunemeka ma nkuasa, midimba sunga nshibo ya kusambishila, kadi mbitale kukutua kunemaka byooso bitale mudimo wa bansushi. Banfumu ba kala babaadi n’abo namu abata mukombo sunga kifulu bu kitundwilo kya bufumu buabo.

Byabya, ino mitshi ibidi ibaadi bu bitundwilo bya kinyi? Bantu mbatushe binangu bilekenelekene. Lualuulo luibuwa, na lushi lukambe bukopo, alulesha myanda ikata. Mutshi wa kiukilo kya biiya na bibi ubaadi aulesha matalua e na Efile Mukulu penda aye nabeene​—matalua a kutshiba kibuwa na kibi. (Yeelemiya 10:23) Nyi buakinyi bibaadi bu kibeshi kuiba kikuba kya uno mutshi! Mutshi wa muwa namu, ubaadi aulesha kia buntu kilombeene penda Efile Mukulu nabeene kupa muntu​—muwa wa looso.​—Bena-Looma 6:23.

4. Nyoka akula e bu a mu miele na nkindji.

Eyendo, kino kipindji kya uno muisambo wi mu mukanda wa Kibangilo wi bu kateo, bikishekishe su tatuata abiamba bingi bipindji bya Bible pabitale uno muanda. Kadi, Bifundwe mbileshe kapeelakapeela kipatuluilo kya uno muanda.

Nnanyi sunga shi nkinyi kibaadi kikite buashi nyoka amuenekye bu akula? Bantu ba kala mu Isaleele abaadi abauku bingi bintu bilombeene kukuasha bua kuuka mudimo wa uno nyoka. Bu kileshesho, abaadi abauku shi sunga byekala shi nyema tayakulaa, muntu a mu kikudi mukumbeene kukita buashi nyema amuenekye bu akula. Moyise baadi dingi mufunde muisambo wa Balaame; Efile Mukulu batumine muikeyilu bua kukita buashi mpunda a Balaame akule bu muntu.​—Mbadiko 22:26-31; 2 Mpiele 2:15, 16.

Bingi bikudi, mpa na bino bi bu beshikwanyi n’Efile Mukulu, mbilombeene kukita kilengieleshi su? Moyise baadi mumone batshite muakuidi bampaki ba manga ba mu Ejipitu abakitshi bino bilengieleshi bimune bibaadi bikite Efile Mukulu, bu kileshesho abaluluile mikombo yabo yafika nyoka. Eyendo bino bilengieleshi bibaadi bafikye kui beshikuanyi b’Efile Mukulu.​—Efilu 7:8-12.

Moyise baadi dingi mufunde mukanda wa Yoobo ku bukuashi bua kikudi kiselele. Uno mukanda aulongyesha myanda ibungi pabitale muishikuanyi mukata a Efile Mukulu, Satana, aye baadi mudimbe bua kuluisha bululame bwa bafubi ba Yehowa. (Yobo 1:6-11; 2:4, 5) Beena Isaleele ba kala abaadi bamone shi Satana baadi mutumikishe nyoka mu Edene, buashi amuenekye bu’ye esamba na Eva bua kuluisha kululama kuaye kui Efile Mukulu? Abimueneka shi bibaadi nka byabya.

Satana nyi baadi mukushe nyoka ano madimi? Yesu kunyima baadi muleshe shi Satana nyi “nsha madimi, na nshe basha madimi.” (Yowano 8:44) “Nshe basha madimi” bi kuikala shi aye nyi baadi muisambe madimi a kumpala, ta mbyabya su? Madimi a kumpala e mu mayi abaadi muakule nyoka alungula Eva. Bua kulesha shi mayi a Efile Mukulu aadimusha shi kudia kua kikuba kya mutshi ukandikibue akutuala ku lufu ta ng’eyendo, nyoka bambile shi: “Nya, tanufunwe.” (Kibangilo 3:4) Eyendo, Yesu baadi auku shi Satana baadi mutumikishe nyoka. Mukanda wa Kibafumbuilwe kibaadi Yesu mupe Yowano aupatuula uno muanda, awitanyina Satana bu “nyoka a kala.”​—Kibafumbuilue 1:1; 12:9.

Bi bukopo kukumiina shi kino kikudi ki bukopo nkilombeene kutumikisha nyoka, amueneka bu’ye akula? Sunga bantu, abo bashi na bukome bu bua bikudi, mbalombeene kukita bya kutuusha mayi munda mua bintu.

Kishinkamiisho kikile bukata

Okumiina shi mpaka pabitale muisambo wi mu mukanda wa Kibangilo ta i na kya nsongo? Ku lungi lupese, kwi kishinkamiisho kikata akilesha shi uno muisambo ngwa myanda ibaadi ikitshikye kala.

Bu kileshesho, Yesu Kidishitu ayitaminyibwa bu “kamonyi ka kishima na ka binyibinyi.” (Kibafumbuilue 3:14) Bu bibaadi muntu mupuidikye, tabaadi mudimbe nya, sunga kuluisha bya binyibinyi mu ungi mushindo. Na dingi, baadi mulongyeshe shi baadi na muwa kala kumpala kwa’ye kufika bu muntu pa nsenga​—byabya, baadi mushale pamune na Nshaye, Yehowa, “kumpala kwa byapano kwikadika.” (Yowano 17:5) Byabya baadi na muwa pabaadi pabangye muwa kupangibwa pa nsenga. Butemuki kinyi bubaadi butuushe uno kamonyi mukile booso?

Yesu baadi muambe shi Adame na Eva abaadi bantu b’eyendo. Baadi muisambe pabitale dibaka dyabo pabaadi mupatuule pabitale muiya wa kuibakila mukashi umune. (Mateo 19:3-6) Su tababaadi kuanka na su mu lupango mubaabadi bashale nyi mpenda myele ya kala, byabya Yesu baadi mudimbibwe sunga shi baadi sha madimi. Tabi kuikala bino nya! Yesu baadi muiyilu, baadi atala pabaadi pakitshikye ino myanda mu lupango lua Edene. Kishinkamiisho kinyi dingi kilombeene kukuminyisha kukila kino?

Eyendo, kuela mpaka pabitale muisambo wi mu mukanda wa Kibangilo akuluisha lukumiino luetu mui Yesu. Muntu sha ino mpaka ta mmulombeene kupusha mitwe ya muanda ikata i mu Bible sunga milayilo yamo ayinyingisha mashimba. Tubande kutala buakinyi bi byabya

[Myanda i mushi mwesaki]

Buakinyi myanda ya Edene ngikutale

IMUNE ya ku mpaka itushe bangi basha binangu mu myanda ya bipuilo pabitale muisambo wa Edene ngya’shi uno muisambo ta nguipushene na abiamba bingi bipindji bya Bible. Bu kileshesho, Mulongyeshi mukata a myanda ya bipuilo Paul Morris bafundjile shi: “Takui ingi mbalo mu Bible yabesamba patooka pabitale muisambo wa Edene.” Sunga byekala shi ano mayi aye ngakuminyibue kui bangi bantu abamueneka bu basha binangu, ta ngepushene na bi myanda nya.

Mu Bible mui mbalo ibungi yabesambila pabitale lupango lua Edene, Adame, Eva, na nyoka.a Kadi kilema kya bano basha binangu bapeela akifuisha ku bingi bikile bungi na bikile bukata. Pa’bo kuela mpaka pabitale muisambo wa lupango lua Edene wi mu mukanda wa Kibangilo, bakata ba bipuilo na bano balongyeshi ba myanda ya Bible mbekale bu abatusha mpaka pabitale Bible mushima. Buakinyi atuamba byabya?

Kupusha kua kibaadi kikitshikye mu Edene kui na muulo bua kupusha Bible mushima. Bu kileshesho, Eyi dy’Efile Mukulu ndifundjibue bua kuitukuasha tupete myaluulo ku nkonko ikata ya muulo itale bantu. Nsaa yooso, myaluulo ya Bible ku ino nkonko ngitale myanda ibaadi ikitshikye mu lupango lua Edene. Tubande kuisambila ingi nkonko.

● Buakinyi atununupa na kufua? Adame na Eva abaadia kuikala na muwa bua looso su abashadile bakokyele Yehowa. Abaadi na kya kufua nka su abamutombokyela. Muifuku dibabamutombokyele, ababangile kufua. (Kibangilo 2:16, 17; 3:19) Abalekyele kwikala bantu bapuidikye na ababangile kupa bana babo nka muluisho na kukutua kupuidika. Bible apatuula shi: “Bu bibatwelele milwisho pa nsenga kwi muntu umune, na bibapetele bantu lufu ku milwisho, bu bibabekele balwishe booso.”​—Bena-Looma 5:12.

● Bwakinyi Efile Mukulu mmutadiile bubi? Mu lupango lua Edene, Satana baadi muambe shi Efile Mukulu nsha madimi na kuete kusumina bipangua byaye bintu bibuwa. (Kibangilo 3:3-5) Byabya baadi mutushe lukonko lutale kululama kua mushindo aukunkusha Yehowa. Adame na Eva abaadi basangule bua kulonda Satana; byabya abaadi batombokyele bufumu bua Yehowa, na kumona shi muntu mulombeene kutshiba aye nabeene ki buwa na ki bubi. Mu kululama kuaye na binangu byaye bipuidikye, Yehowa bamuene shi mushindo penda umune wa kupudisha ino mpaka bua looso nyi nkuleka nsaa, kupa bantu nsaa ya kuikunkusha abo banabeene bu bibabasanguile. Bubi bupalakane lelo, abufiki ingi nsaa ku bukitshishi bubi bua Satana na abulesha kapeelakapeela shi: Muntu ta mulombeene kuikunkusha aye nabeene kushi Efile Mukulu nya.​—Yeelemiya 10:23.

● Mpango kinyi i nayo Efile Mukulu bua nsenga? Mu lupango lua Edene, Yehowa baadi mutuushe muiya buashi nsenga ikale buwa. Baadi mupe Adame na Eva mudimo wa kuusha nsenga na bana baabo na ‘kwiyidiila bufumu’ bwashi bapalakashe buno buwa bua lupango mu nsenga ishima. (Kibangilo 1:28) Byabya mpango y’Efile Mukulu bua nsenga ngya’shi ikale mpaladiiso muule na kifuko kya bekulu ba Adame na Eva bapuidikye na be mu buumune. Myanda yooso i mu Bible ngitale mushindo aukumbasha Efile Mukulu ino mpango yaaye ya kumpala.

● Bwakinyi Yesu baadi mufikye pa nsenga? Kutomboka kua mu lupango lua Edende kubaadi kufuishile Adame na Eva na bana baabo kiimu kya lufu, kadi Efile Mukulu mu kifulo kyaye baadi muibape lukulupilo. Batumine Muana aaye pa nsenga buashi atuushe akitanyina Bible bu nkuulo. (Mateo 20:28) Bino abilesha kinyi? Oolo, Yesu baadi “Adame a nfudiilo”; baadi mobeshe pabaadi Adame mupangye. Yesu baadi mulame muwa wa muntu mupuidikye pa’ye kushala mukokyele kui Yehowa. Akupu baadi aye nabeene mukumiine kutusha muwa waye bu mulambu, sunga nkuulo, bua kupa bantu balulame mushindo wa kulekyelua miluisho na nkapeta muwa ubaadi nao Adame na Eva mu Edene kumpala kwa’bo kukita muluisho. (1 Bena-Kodinda 15:22, 45; Yowano 3:16) Byabya, Yesu baadi mutuushe kishinkamiisho kya’shi mpango ya Yehowa ya kualuula ino nsenga ikale mpaladiiso a mu Edene ayikalombana.b

Mpango y’Efile Mukulu ta yi bu mayi a bisumanga sunga penda bishima abilongyesha bena teoloji nya. Ngy’eyendo. Anka bi lupango lua Edene nyi mbalo ibaadi kuanka eyendo pano pa nsenga na nyema na bantu, byabya mulayilo wa Efile Mukulu bua nafuku e kumpala ngw’eyendo na aukyebe binobino kulombana. Aukumbana koodi mu mafuku e kumpala? Byooso mbikutale nka obe nabeene. Efile Mukulu akumiina shi uno mulayilo bua mafuku e kumpala ukumbane bwa bantu bebungi, mpa na bano bashi bobesha kwikala na nshalelo ebuwa.​—1 Timote 2:3, 4.

Pabaadi Yesu pepi na kufwa, baadi mwisambe na muntu baadi nkitshishi a bubi. Uno muntu baadi ntomboshi; na baadi auku shi baadi na kya kuipayibua. Kadi baadi muisambe na Yesu bua kunyingishibua, bua kupeta lukulupilo. Yesu baluluile naminyi? “Okekala name mu Mpaladiiso.” (Luuka 23:43) Su Yesu akumiina kumona uno muntu baadi ntomboshi buashi asangukye na kupeta mushindo wa kuikala na muwa bwa looso mu mpaladiiso bu a mu Edene, tomono shi e kukumiina nkupa uno muabi no’be namu? Nyi mbyabya! Nshaye akumiina byabya! Su okumiina shi bikukitshikile mu mafuku e kumpala, kita mobe mooso bua kulonga pabitale Efile Mukulu bakitshine lupango lua Edene.

[Myanda i mushi mwesaki]

[Kashibo/​Mafoto]

BUTEMUKI ABUSANGISHA BIBLE MUSHIMA PAMUNE

“Natuulu ngo pankatshi poobe na mukashi, pankatshi pa beekulu boobe na beekulu baaye. Uno akakusooso mutwe, obe namu akamusumu ku kisuulu.”​—Kibangilo 3:15.

Buno nyi mbutemuki bua kumpala bui mu Bible, bubaadi Efile Mukulu mutuushe mu Edene. Bantu be muanka mba’nyi: mukashi, beekulu, nyoka, na beekulu? Mushindo kinyi ubaadi umuekye ngo ibaadi itemukibue?

NYOKA

Satana Diabulu.​—Kibafumbuilue 12:9.

MUKASHI

Ndumbuluilo a Yehowa a bipangwa bi muiyilu. (Bena-Ngalatea 4:26, 27) Yeeshaya baadi muisambe pabitale “mukashi,” atemuka shi uno mukashi akatanda muilo wa mu kikudi.​—Yeeshaya 54:1; 66:8.

BEEKULU BA SATANA

Bano abasangula kukita akikyebe Satana.​—Yowano 8:44.

BEEKULU BA MUKASHI

A kumpala Yesu, aye batukile mu kipindji kya ndumbulwilo a Yehowa ki muiyilu. Mu bano “beekulu” mui dingi bakuabo na Kidishitu mu kikudi, bano abamunana naaye muiyilu. Bano Bena Kidishitu bashingue muimu mbakite muilo wa mu kikudi, “Isaleele a Efile Mukulu.”​—Bena-Ngalatea 3:16, 29; 6:16; Kibangilo 22:18.

ELONDA KU KISUULU

Kukyenga kua Mesiya kadi bua mafuku apeela. Satana baadi mobeshe kuipayisha Yesu pa nsenga. Yesu baadi musangushibwe.

ELONDA KU MUTWE

Kusoosa kua Satana. Yesu akyebe kwipa Satana bua looso. Mpa na kumpala kua byabya, Yesu akyebe kupudisha bubi bubaadi Satana mubangye mu Edene.​—1 Yowano 3:8; Kibafumbuilue 20:10.

Bua kutaluula mu kikoso mutue wa muanda ukata wa Bible, tala broshire a La Bible​—Quel est son message? wabadi batushe kui Tumonyi tua Yehowa.

[Foto]

Adame na Eva abaadi bakyengye pa muanda wa muluisho