Otentekyesha paboodi mupone mufuko obe ki mukinga su? Pangi boodi mutshokokye mboko sunga kutapika mu makunungu. We kutentekyesha namu mushindo ubaadi aukusamba nyin’obe su? Baadi mukusuule kwilonda na nkwanyina bandaje. Boodi odidi, kadi pa mwanda wa bishima byaye bya kalolo na bibaadi akusemuna, boodi opusha bibuwa. Yaya nsaa boodi musambibwe mu muwa oobe.

Anka nsaa yatwende na kukula, nshaleelo anyishaa kwela bukopo. Myanda ayende na kutama, na kusambibwa akwende namu na kupeela. Myanda ya bantu bakulu i mpa na bukopo kwakula, nkusemuna kwa nyin’obe sunga kwanyina kwa bandaje ta nkulombeene kwiyipwa nya. Tubande kutala bino bileshesho.

• Tobandile kupusha bi lukalakashi lwa kushimisha mudimo su? Julian akula’shi nsaa ibaabadi bamubingye ku mudimo, uno mwanda ubaadi umutabukye mmutwe. Baadi eyipusha’shi: ‘Nalombasha nkalo ya ba mu nshibo yande naminyi? Bwakinyi bakata ba mudimo babamono’shi ntshi na muulo, aku namu napu kufuba munda mwa bipwa bibungi?’

• Pangi we mukalakashwe pa mwanda wa eyibakishi dyenu ditshibikye. Raquel apatuula’shi: “Pabaadi mulume ande mundekye munda mwa myeshi 18, napushishe bubi bukile. Naadi mupushe nka bu eshimba dyande dibatanyika pabidi. Naadi mukyengye kumbidi mpa na mu binangu. Bibaadi abinkalakasha ngofu.”

• Pangi we kwikala na mukumbo ushi’aupanda. Ingi nsaa we kupusha nka bibapushishe Yoobo, baadi mwidile’shi: “Ntakôkanga namu, ntakyebe kwikadidîla na muw’ami.” (Yoobo 7:16, EEM) Pangi we kwipusha nka bu Luis, ungi Yaya e na bipwa 80, bambile’shi: “Ingi nsaa napushaa’shi nkwete kutengyela nka penda lufu.”

• Pangi namu nyi ndufu lwa muntu oodi mufule alukutakula bwa kukimba kusambibwa. Robert akula’shi: “Pabafwile mwan’ande a nkumpala ku masaku a ndekye batembele kaalo, mwanda wa nkumpala ubaadi unfikile mu binangu kuleka kulangwila. Kunyima napushishe kinyongwa, kinyongwa kyabapwandikisha mu Bible na lupete lula alukusaana mwita.”​—Luka 2:35.

Robert, Luis, Raquel, na Julian babapetele kusambibwa ku ino nkalakashi ya mu nshaleelo aabo. Babapetele Muntu ebuwa mulombeene kwibasamba​—uno muntu nyi Efile Mukulu a bukome booso. Asambanaa naminyi? Akakusamba namu noobe su?

Mpoolo mutumiibwa bafundjile’shi Yehowaa nyi “Efile Mukulu sha kusambana mu byooso, etusambaa mu malwa eetu booso.” (2 Beena-Kodinda 1:3, 4) Bible etushinkamisha’shi ta kwi muntu shii mulombeene kusambibwa n’Efile Mukulu na ta kwi mwanda ulombeene kukambila Nshetu a mwiyilu ku bukata bya kukutwa kwitusamba nya.

Mu binyibinyi, kwi mwanda autungu’shi tukite su atukumina busambi abufiki kwadi. Munganga e kwitukwasha su tatwi bepusheene bya kwimonena naye naminyi? Mutemuki Amose bakwile’shi: “Bantu babidi abendaa eshinda dimune su tambeepusheene’nyi?” (Amose 3:3) Byabya Bifundwe abitulungulala’shi: “Efubwileeyi kwi Efile Mukulu, byaabya aye naamu eefubwila peepi neenu.”​—Shake 4:8.

Twi kushinkamisha naminyi’shi Efile Mukulu efubwila pepi n’eetu? Kya kumpala, kumwanda etulungula misusa i bungi’shi etukwasha. (Tala kashibo ke kuushi.) Na kya kabidi, twi na bukamonyi bwa bantu babadi basambe kwi Efile Mukulu​—bantu ba binyibinyi, ba kala mpaa na ba ano mafuku eetu.

Nka bu bebungi lelo uno bakwete kukimba kusambibwa n’Efile Mukulu, Nfumu Davide baadi mufumankane na makyenga, baadi mwisendele Yehowa’shi: “Teemesha kukwiyaayila kwande pano pankwele musaase.” Efile Mukulu ba mwalulwile su? Oolo. Davide amba’shi: “Eshimba dyande dibaakulupiile kwadi, aye nkunkwasha. Naasepeela mwishimba dyande.”​—Misambo 28:2, 7.

MUDIMO WA YESU MU KUSAMBA KWA BANTU ABADIDI

Efile Mukulu mmupe Yesu mudimo ukata pabitale kusamba bantu. Munkatshi mwa midimo yooso yabadi bamupe kwi Efile Mukulu, Yesu baadi na kya “kubuka batapikye ku mashimba” na “kunyingisha mashimba a booso be mu maalo.” (Yeeshaya 61:1, 2) Nka bu bibadi mwakule, Yesu bafubile mudimo ukata munkatshi mwa bantu babaadi “bafwambukye na bushito.”​—Mateo 11:28-30.

Yesu baadi musambe bantu pa kwibapa elango dibuwa, na kwibakitshina myanda na kalolo, na ingi nsaa baadi apudisha mikumbo yaabo. Dingi efuku muntu sha maladi a nsudi baadi mwididile Yesu bino: “Su okumiina we mulombeene kumpaasha.” Bu byadi na lusa, Yesu bamwalulwile’shi: “Nakumiina, ikala mupaashiibwe.” (Maako 1:40, 41) Yawa muntu sha maladi a nsudi bapandile.

Lelo uno, Mwan’Efile Mukulu te pano pa nsenga bwa kwitusamba pa bupenka nya. Anka, Nshaye, Yehowa, “Efile Mukulu sha kusambana mu byooso,” atungunuka na kusamba booso be na lukalo. (2 Beena-Kodinda 1:3) Tubande kutala bino bintu binanka bikwete kufuba n’Efile Mukulu bwa kusamba bantu.

• Bible. “Byabya byooso bibafundjilwe mu Bifundwe kala, bibafundjilwe pa mwanda wa kwitulambukisha byatudya kwikala na lwishinko na kukankamana, bilombene twekala na lukulupilo.”​—Beena-Looma 15:4.

• Kikudi kiselele ky’Efile Mukulu. Mafuku apeela kunyima kwa lufu lwa Yesu, kakongye kooso ka beena Kidishitu kabaadi mu kipungo kya butaale. Bwakinyi? ‘Kabendanga na kunyinga, mu kutshina kwa Yehowa na kabendanga na kutama ku bukwashi bwa kikudi kiselele.’ (Bikitshino 9:31) Kikudi kiselele, bukome abufubaa nabo Efile Mukulu, mbukile bukata. Efile Mukulu mulombeene kutumika nabo bwa kusamba bantu be mu nkalakashi yooso.

• Luteko. Bible etulungula’shi: “Tanwikalanga mashimba kwiyilu pa kintu su nkimune.” Etulungula dingi’shi: “Anka, nguba ooso, mu nteko, mu kwiyaaya, na mu ntumbu, ukishaayi Efile Mukulu nkalo yeenu. Na butaale bw’Efile Mukulu abo butabukile binangu byooso, abulama mashimba eenu na binangu byeenu munda mwa Yesu Kidishitu.”​—Beena-Fidipe 4:6, 7.

• Beena Kidishitu neetu. Mbalombeene kwikala bakuuku ba p’eshimba batudi balombeene kukulupila’shi abetusamba nsaa yatudi mu nkalakashi. Mpoolo mutumiibwa bakwile pabitale bakwabo’shi: mbekale bu ‘bakumusamba’ mu nsaa ya “twinyongoshi na bitompwanga.”​—Beena-Kolose 4:11; 1 Beena-Tesalonika 3:7.

Kadi we mulombeene kwiyipusha mushindo ulombeene kukumbana bino byooso. Tubandeyi kutala bileshesho bya bantu babaadi bafumankane na myanda ibatukatuka mu kulesha. Anka bu’bo we mukumbeene kusangana’shi Efile Mukulu kwete kutungunuka na kulombasha ano mayi aaye ebuwa: “Anka byabasambaa mwana kwi nyin’ê, nyi byankenusamba’mi.”​—Yeeshaya 66:13, EEM.

NSAA YATUDI BAKUTWE MUDIMO

Setha atentekyesha’shi: “Ami na mukashi ande tubaadi bashimishe midimo yetu mususa umune munda mwa bipwa bibidi, tubaadi atulombasha nkalo ya mu kifuko penda ku midimo ya maasa. Pa mwanda wa byabya, Priscilla baadi mubofule, ami nkwimona bu shii na muulo.

“Twi boobeshe naminyi? Nsaa yooso Priscilla baadi atentekyesha mayi a Yesu e mu Mateo 6:34. Bambile’shi tatwikalakashanga bwa malooba, mwanda efuku dyooso di na yaadyo nkalakashi. Nteko ibaadi eele n’eshimba dyaaye dyooso ibamupeele bukome bwa kunyingiila. Bwande’mi mukanda wa Misambo 55:22 ubaadi unyingishe. Anka bu mufundji a misambo, naadi musumbwile Yehowa bushito bwande, na ami nkumona’shi baadi anyingisha. Sunga ne na mudimo ano mafuku, twi balame nshalelo mupeelepeele mu kulonda kwa malango a Yesu e mu Mateo 6:20-22. Mu byooso, twi befubwile peepi ngofu n’Efile Mukulu na peepi na ooso a kwatudi.”

Jonathan amba’shi: “Naadi mukalakashwe pabitale mafuku ande e kumpala nsaa ibaapwile makuta atubasunganga nao mu kifuko kyetu. Pa mwanda wa makuta abaadi apeele munda mwa bipwa 20 na kukutwa kwa mushindo wa kufuba ngofu. Ami na mukashi ande tubaadi atutontoola pa mwanda wa makuta. Tatubaadi na mushindo wa kuula bintu na karte ka ku banke mwanda wa’shi mbalombeene kwikapela.

Kadi Eyi dy’Efile Mukulu na kikudi kyaye mbitukwashe bwa kwata bitshibilo bibuwa. Nalongyele bya kukumiina kufuba midimo ya bipaso byooso, atwe nkupela kutuusha makuta ku bintu bishii na muulo. Bu byatudi Batemwe ba Yehowa, twi bapete dingi bukwashi kwi bakwetu beena Kidishitu. Babaadi betunyingishe na kwitukwasha nsaa ibaadi ikambe kwitwelela myanda bukopo.”

NSAA AYITSHIBIKA EYIBAKISHI

Raquel atentekyesha’shi: “Pabandekyele mulume ande mu kabasamushi, naadi mupushe kinyongwa na nsungu kumune, na naadi mukalakashwe ngofu. Anka naadi mwifubwile peepi n’Efile Mukulu, aye namu nkunsamba. Butaale bw’Efile Mukulu bubaadi bukalwile eshimba dyande bu binaadi namutekye efuku dyooso. Bi nka bu’ye baadi mulumbuule eshimba dyande ditapikye.

“Ne na lutumbu lukata bw’Eyi dyaye Bible, mwanda ndinkwashe bwa kukambila twinyongoshi, nsungu mpa na nkalakashi yande yooso. Ne mulamiine mwishimba dyande ano mayi a Mpoolo mutumiibwa e mu mukanda wa Beena-Looma 12:21 aamba’shi: ‘Tanukuminanga kukambilwa na bubi, mbikile buwa kwibukambila pakukita bi buwa.’

“Ungi lool’ande baadi munkwashe bwa kwela binangu ku ingi myanda. Baadi mundeshe mukanda wa Mulungudi 3:6 aye nkundungula na kalolo kooso’shi kwi ‘kipungo kya kushimisha.’ Dino elango dibuwa na ndinaadi nadyo lukalo. Dyadya elango dibadi bukopo, kadi byabya ngi binadi nabyo lukalo. Binobino ne na kitshibilo kipya mu shalelo ande.”

Elizabeth akula’shi: “Nsaa ayitshibika eyibakishi dyenu, abitungu kuteka bukwashi. Naadi na lool’ande baadi ampa elango, efuku n’efuku. Baadi adidi nami pamune, kunsamba, na kumpa lukulupilo pamutwe pa kunsumbusheena. Nashinkamisha’shi Yehowa mumufubishe bwadya kumpasha ku myanda yande yooso.”

NSAA YA MUKUMBO SUNGA BUNUNU

Luis, atudi bakwile mu mwisambo wa mbangilo, baadi mu shalelo ebukopo, na baadi mukyebe kufwa misusa ibidi. Binobino e na lukalo lwa kupeta lupapi lwabadi beele oxygène ebungi lwi mu mulangi munda mwa nsaa 16 kwifuku. Akula’shi: “Nkwete kuteka Yehowa kushi kukooka. Kunyima kwa’mi kukita luteko kwi Efile Mukulu, nampusha’shi kikudi kyaye akimpa bukome. Luteko alunyingishaa eshimba dyande bwandya kwenda kumpala kumwanda ne na lukumiino mwadi na nawuku’shi ankalwilaa.”

Petra e na bipwa bikile pa 80 akula’shi: “Nakumina kukita myanda ibungi, anka ntshi na ngobesha’nyi nya. Nsaa yontala omono bukome bwande bubapeele ngofu. N’epusha ne mupwe kukooka na ntandi kuku a penda bwanga. Kebungi nanangushenaa ku mayi a Yesu abatekyele Nshaye’shi su bi mushindo angi makyenga akiile kula nami. Kadi Yehowa bapele Yesu bukome, na aye namu anyingisha. Luteko ngi bwanga bwande bukata. Napusha buwa bukile kunyima kwa’mi kwisamba n’Efile Mukulu.”​—Mateo 26:39.

Julian, baadi mukumbe maladi a sclérose munda mwa bipwa 30, bapushishe nka byabya. Akula’shi: “Naadi mushintuule nkwasa inadi nashala ami nkukimba nkwasa i na bipombo. Byabya muwa wande wi na muulo mwanda ne mwipaane mu kukwasha bangi bantu. Kupaana sunga kulungula mukandu wibuwa akunsamba ku dikyenga dyande, na Yehowa kwete kulombasha mulayilo waye wa kwitunyingisha pa nsaa yatudi nako lukalo. Nka bu bibakwile Mpoolo mutumibwa’shi: ‘Ne mulombeene kukita byoso munda mwa uno aanyingisha.’”​—Beena-Fidipe 4:13.

MU NSAA YATUDI BAFWISHE

Antonio atentekyesha’shi: “Pabafwile nshami ku masaku a mootoka, ntshinaadi mwibipushe kalolo nya. Naadi mwibimone nka bu Efile Mukulu bakitshi mwanda wa kukutwa kululama, mwanda Papa baadi muntu shii musoole na baadi lwa ngwa. Anka ntshinaadi na kintu su nkimune kya kukita. Baadi akolo munda mwa mafuku atano kumpala kwa kufwa. Naadi nadidi kumpala kwa Mama, kadi pandi bupenka naadi napono paashi. Naadi nka neyipusha’shi: ‘A kinyi? A kinyi?’

“Munda mwa ano mafuku ooso abatudi na maalo, naadi natekye Yehowa bwa’shi ankwashe mmone bya kutaadisha binangu byande na kumpa butaale. Kunyima nabangile kupeta butaale. Natentekyeshe’shi Bible akula’shi ‘myanda yabashabatengyela’ ngilombeene kufwila muntu ooso. Bu bi Efile Mukulu tadimbanaa, ne mushinkamishe’shi nakemoneena na Papa dingi mu mafuku a kusanguka kwa bafwe.”​—Mulungudi 9:11; Yowano 11:25; Tite 1:2.

Robert, abadi bateemune mu mwisambo wa mbangilo, bapetele bino binangu bimune. Akula’shi: “Ami na mukashi’ande twi bapete butaale bwa mu binangu bwabadi bakwile mu mukanda wa Beena-Fidipe 4:6, 7. Twi bebupete ku bukwashe bwa nteko ibatudi atwele kwi Yehowa. Buno butaale bubaadi bwitupe ngobesha ya kulungula bantu abafikile mu kukobola bifwanyi bya nkaleeseha ku kisashi pabitale lukulupilo lwa lusangukilo. Sunga mbibafwile mwan’etu mulume mu ndekye batembele kaalo, twi na myanda ibungi ya muloo yatutentekyesha nsaa ibatudi naye pamune. Atwitatshishaa bwa kwimeena pa yaya myanda.

“Pabaadi apetulungula bakwetu Batemwe’shi babetumono ku televizion patukwete kupatulwila bantu mu butaale bi lukumiino lwetu, tubaadi atwibalungula’shi kushii mpaka atwinutumbula ngofu bwa ntekoko yeenu ibanudi anwitwelela. Ne mushinkamishe’shi Yehowa mmwitusambe ku bukwashi bwa mikanda ibungi ayitunyingisha.”

Nka bu bibatwibimono mu bino bileshesho bi kunundu, Efile Mukulu e kusamba bantu be na myanda ikile bungi na nkalakashi ibungi. Obe namu omono naminyi? Sunga ofumankana na mwanda wibukopo naminyi mu muwa oobe, kwi busambi bulombeene nkukwasha mu ano mafuku oodi na myanda ibukopo.b Byabya bwakinyi twe mulombeene kuteka Yehowa bwa’shi akukwashe? Aye nyi “Efile Mukulu sha kusambana mu byooso.”​—2 Beena-Kodinda 1:3.