Nadi mukumine kwasha ndundo a ku maboko kukila bingi bintu byoso!

BINAADI KALA

Ne mukudile mu Puerto Limón, kibundji ki mu kisangi ki ku lupese lwa kutunduka nguba kwa Costa Rica. Baledi bande abadi na bana mwanda, na ami ne mwana a musambo. Nshami bafwile panadi na bipwa mwanda. Kunyima nyinetu betukushishe bupenka bwaye.

Mu muwa wande nadi nakumina kwasha ndundo ya ku maboko. Panadi mwana mukinga nadi nakumina kalashishi ka mbidi. Panadi na bipwa ekumi na bungi, natwelele mu ka kisaka kapeela ka ndundo. Panadi nasha mu kano ka kisaka kapela, ami tadi na bipwa 20, ungi muntu badi akimbi bana abauku kwasha bandungwile bwandya kwenda mu kwasha mu kisaka kikata kya mu Nicaragua. Anka, pa mwanda wa’shi nadi nalama nyinami badi na maladi, napelele kwenda mu Nicaragua. Ngi bwakinyi napelele kukookyela bino bibandungwile. Kunyima kwa mafuku, ungi muntu badi akimbi bana abauku kwasha bangitanyine bwandya kwenda mu kwasha mu kisaka kikata ky’eumbo dya Costa Rica, mu kino kisaka mubadi bantu bababadi basangule bu abaasha kalolo mu bisaka bipeela. Wawa masusa, nakuminyine bino bibandungwile. Nadi nasha mu kisaka kikata ky’eumbo kubanga mu kipwa kya 1949 mpa na mu kipwa kya 1952, na nadi nasha ndundo misusa ibungi mwiumbo dya Cuba, mu Mexique, na mu Nicaragua. Nadi naasha kalolo pa mbalo ya kasatu, nadi mulombene kwasha misango 17 kushii kwasha bibubi su musango umune. Nakuminyine kupusha kwabayimbi eshina dyande kwi bantu ababandila!

Mwanda wa malwa, nadi na muwa wa kutambuka lusandji. Sunga mbinadi na penda nsongwakashi umune anadi nayiila, nadi mwipaane mu kutambuka masandji na bangi bakashi, na kutoma bintu abikolwanaa ngofu. Dingi efuku nadi mukolwe ngofu; botokye, panabuukile ku lusala, tshinadi nauku kipaso kyangikalanga mwalukye ku nshibo nya! Na dingi nadi naasha maasha a makuta abetanyina bu domino na masha a loteri.

Mu mafuku anadi na nshalelo e bino, nyinami bafikile Temwe a Yehowa. Badi atompo kundongyesha myanda ibadi mulongye. Anka kumbangilo tamobeshe nya mwanda nadi mwipaane mu myanda ya maasha. Nsaa inadi ku mbalo ya kulonga bya kwasha, ntshinadi napusha sunga nsala nya! Binangu byande bibadi bipaane nka ku maasha. Nadi mukumine kwasha ndundo a ku maboko kukila bingi bintu byoso!

Anka, panalombeshe bipwa 29, natapikile elonda dikata nsaa inadi nakyebe kukwata ndundo munkatshi mwa maasha. Kunyima kw’elonda kupanda, nalekyele kwasha ndundo mu kisaka kikata. Sunga mbyabya, nadi nka mwipaane mu ndundo p’ami kulongyeshanga bantu abadi abaasha mu bisaka bipeela bi pepi na nshibo yeetu.

MUSHINDO UBAADI BIBLE MWALUULE NSHALELO ANDE

Mu kipwa kya 1957, nakuminyine lwitanyino lwa ku kikongeno kya ba Temwe ba Yehowa kibakitshikile mu kipalwe kinadi nashila ndundo kumpala. Panadi munkatshi mwa bantu abateemesha, nadi mumone kwilekeena kukata pankatshi pa mwikelo wibuwa na wa kanemo wi na ba Temwe ba Yehowa na mwikelo wa kafuutakanyi unadi namono kwi bantu abadi abetubandjila kwatwasha ndundo. Myanda inamwene ku kino kikongeno, ibantakwile bwa kubanga kulonga Bible na ba Temwe ba Yehowa na kutwelaa mu bisangilo byabo bya mu kakongye.

Malongyesha a mu Bible ebungi abadi aankumu kwishimba ngofu. Bu kileshesho, Yesu batemukile’shi mu mafuku a ku nfudiilo, balongi baye abakalungula mukandu wibuwa wa Bufumu bw’Efile Mukulu mu nsenga ishima. (Mateo 24:14) Nalongyele dingi’shi bena Kidishitu ba binyibinyi tabafubaa na mudimo wabo wa bulungudi bwa kupeta makuta nya. Yesu bambile’shi: “Nwi bapete buntu, byaabya paanaayi buntu.”​—Mateo 10:8.

Panadi nalongo Bible, nadi napwandikisha myanda ayakula Bible na myanda inadi namono abakitshi kwi ba Temwe ba Yehowa. Nadi nasankila kipaso kibabadi abetatshisha kushii kukooka bwa kupalakasha mukandu wibuwa wa Bufumu bw’Efile Mukulu mu nsenga ishima. Namwene mwabadi mubaadi kikudi kya kupaana kibabadi balungule bena Kidishitu bwabadya kwikala nakyo kwi Yesu. Ngi bwakinyi nsaa inabadikile mukanda wa Maako 10:21 namwene lwitanyino lwa Yesu lwa’shi ‘Fika ondonde,’ nakuminyine kufika Temwe a Yehowa.

Anka, bibadi bingate mafuku ebungi bwandya kunyingiila mu kitshibilo kyande. Bu kileshesho, munda mwa bipwa bibungi nadi naasha maasha a “mwabi” a loteri ku lubingo looso. Anka, nalongyele mu Bible’shi Efile Mukulu badi mutopekye bantu abadi abalangwila ‘efile . . . ababadi abamono bu ebakokoshâ kâ,’ mpa na bantu basha lwabi. (Yeeshaya 65:11, EEM; Beena-Kolose 3:5) Pa mwanda wa byabya, naatshile kitshibilo kya kwimika kwasha maasha a makuta. Lubingo lumune kunyima kwa’mi kwimika kwasha loteri, abadi bangitanyine ku nimero yande! Bantu bebungi abadi bansepe mwanda napelele kwasha lwalwa lubingo, na ababangile kuntakula bwandya kwenda mu kwasha dingi, anka napelele kwenda. Kubanga nka papa ntshi mwashe dingi maasha a makuta nya.

Nafumankene na ungi mwanda ubadi utompe ngikashi yande ya bu “muntu mupya” dyadya efuku dinadi mubatshishibwe ku kikongeno kya ba Temwe ba Yehowa. (Beena-Efeso 4:24) Kwakwa ku kyoolwa, nadi mwalukye ku nshibo ya benyi kunaadi mushale na ami nkusangana mukashi anadi naye mmushaale antengyela pa kibelo kya kadimbo kunadi nalala. Aye nkundungula’shi: “Sammy fika pano, nafiki bwa’shi twate kapapi pamune!” Anka, namwalulwile nka paapa, ami nkupela’shi, “nya!” Na mulungwile’shi ntandi na nshalelo akunkushibwa na miiya ya mu Bible. (1 Beena-Kodinda 6:18) Bangipwishe’shi, “kinyi?” Kunyima aye nkusabuula binangu bya mu Bible pabitale kutambuka kwa masandji na aye nkushimika nka’shi twalushe kipwano kyetu. Sunga mbyabya, nadi mutwele mu kadimbo kande ami nkushita kiibi. Lelo uno, nee na muloo wa kwakula’shi, kasha nekala Temwe a Yehowa kubanga mu kipwa kya 1958, ne mulame lulamato lwande na kushintula mwikelo unadi nao mu muwa wande.

MUSHINDO WABIDI BINKWASHE

P’ami kulonda buludiki bwa mu Bible, napusha nka bya kufunda mukanda wa miloo yandji mupete. Ingi miloo yandji nayo binobino ngya kupeta bakuuku be buwa, nshalelo ebuwa, na muloo wa binyibinyi.

Nkwete kusangeela ndundo ya ku maboko, anka, ne mushintuule mwikeelo wande. Mu kwasha kwande kwa ndundo a ku maboko, ne mupete nkumo mpa na makuta, anka, bino bintu tabibadi bikite mafuku ebungi nya. Anka, kipwano kyande n’Efile Mukulu na bakwetu akiisha bwa looso. Bible akula’shi: “Byaa pano abikidi, abyo na malaka aabyo; anka yaawa akitshi akikyebe Efile Mukulu akeekala na muuwa bwa looso.” (1 Yowano 2:17) Binobino ne mufule Yehowa Efile Mukulu na mwilo waye kukila bingi bintu byoso!