Kwasha mulungudi nobe
1. Mushindo kinyi watudi balombeene kwambula Mpoolo mutumibwa nsaa yatufubu na bangi balungudi ba mukandu wibuwa?
1 Mpoolo mutumibwa baadi amono shi nsaa ibaadi epaana na benaye ibaadi nsaa ya ‘kwikankamishêna.’ (Lom. 1:12, EEM) Nsaa yofubu na ungi mulungudi a mukandu wibuwa, bwakinyi twe mulombeene kwata yaaya nsaa bwa kumunyingisha na kumukwasha? Pa mutwe pa kwikala mumiine bisunga, bwakinyi twe mulombeene kumuleesha kibaadi kikukwashe bwa kwikala mulungudi munyingye?
2. Nkinyi kyatudi balombeene kukita bwa kunyingisha muntu atudi naye mu mudimo wa bulungudi bwashi tekalanga na moo dingi, na bwakinyi bii na muulo?
2 Twekalanga na moo: Bangi balungudi ba mukandu wibuwa be na moo, mbilombeene kumwenekyela ku byabakitshi sunga mushindo wi eyi dyabo. Twi balombeene kwibanyingisha nsaa yatwibatumbula ngofu. Ingi mishindo kinyi yatudi balombeene kukwasha muntu sha moo? Ungi mukunkushi a kifunda baadi mulungule na kalolo kooso muntu abaadi mutuukye naye mu mudimo wa bulungudi pabitale moo ubaadi nawo na mushindo ubaadi mutekye bwa kupeta bukwashi bwa kwiukambila. Ungi mukwetu aleesha bino pabitale kibaadi kimukwashye bwa kukaasha moo shi: “Abibangaa na tusepo. Ingi nsaa naaadi natekye bukwashi bwa kwikala na twatwa tusepo.” Kwi mwanda ubaadi ukukwashe bwa kupudisha moo su? Eulungule namu mulungudi noobe oodi naye mu mudimo wa bulungudi.
3. Nkinyi kyatudi balombeene kuleesha mukwetu atudi naye mu mudimo wa bulungudi kilombeene kumukwasha bwa kufuba ngofu mu mufubo waye?
3 Muleshe angi Mayele: We mulombeene kwikala na mushindo upeelepeele wa kubanga mwisambo sunga na lukonko, pangi ingi nsaa mpabitale myanda i mu mbalo yanudi bashaleele, ilombeene kukwasha mu mushindo wa kubanga mwisambo? We na ingi myanda ikukwashe bwa kubanga mwisambo kalolo na ituushe bipeta bibuwa su? Lungula mwinobe oodi naye mu mudimo wa bulungudi. (Mye. 27:17) Nsaa ywende mu kutala bantu bwekadinga mwisambe nabo, abitungu omuleeshe bwakinyi walukila mu nkebatala, na mushindo oodi mulumbuule bwa kwibilombasha. Kunyima kwa kulonga Bible na muntu, we mulombeene kumuleesha bwakinyi bosangula ingi myanda, ma verse, sunga mayele kampanda a kulongyesha bwa kukuma eshima dya mulongi.
4. Bwakinyi twi balombeene kwikala na lukalo lwa kukwasha bangi balungudi ba mukandu wibuwa?
4 Balungudi ba mukandu wibuwa ba mu mafuku a batumibwa tababaadi na lukalo lwa kukwasha baaba bashii beena kukumiina nya. Abaadi abashinguula muulo winao kwinyingisheena na kwikankamisheena ku muntu na muntu. (Bik. 11:23; 15:32) Mpoolo mutubibwa baadi mulambukishe Timotee na kumunyingisha bwa kulongyesha bangi myanda ibaadi mulongye. (2 Tim. 2:2) Nsaa yatukitshiina beena Kidishitu netu kyakya kibuwa mu mudimo wa bulungudi, t’atutamisha anka penda muloo na katshintshi kabo nya, kadi atusangasha Nshetu e mwiyilu.—Eb. 13:15, 16.