Tulongamishe mudimo wetu wa bulungudi—Kulubuula binangu bya muntu bwa kwalukiila mu nkamutala mususa aufiki

Bwakinyi bi na muulo: Su tubapete muntu baleesha lukalo, abitungu twalukiile nsaa yaadi ku nshibo, byabya, twi balombeene kumyamina meema ku mbyo ya binyibinyi yatwikalanga bakune. (1 Kod. 3:6) Bino abitungu shi kumpala kwashi tukatukye, tulubuule binangu bya yawa muntu bwa kwalukiila mu nkamutala mususa aufiki. Na dingi, bibuwa kumulekyela lukonko alutungu shi tutaluule mususa aufiki. Bino abikyebe kutakula muntu bwashi abangye kunangusheena kyanukyebe kutaluula mususa aufiki, su bwaluula lukonko ku bukwashi bwa mukanda kampanda mulekyele wanka, mulombeene kwiubadika ngofu. Kulumbuula binangu bya muntu bwa kwisamba mususa aufiki akukwasha bwa kwalukiila. Kumwanda, mwanda wanukyebe kwisamba nwibapwe kwiusangula kumpala, na muntu ashinguula kyanukyebe kwisamba. Nsaa yatwimonena naye dingi, twi balombeene kwamba shi tubalukiila bwa kwaluula lukonko lwatwikalanga balekye mususa ushaale na otungunukye na kwakula.

Mushindo wa kwibikita:

Nsaa ywelumbuula bwa kwenda mu bulungudi bwa ku nshibo na nshibo, lumbuula dingi lukonko alwibwesha lukalo lwa muntu loodi mulombeene kwalula mususa aufiki. Ndulombeene kwimeena pa mutwe wa mwanda wanwikalanga besambe wi mu mukanda wekalanga mumulekyele dyadya efuku, sunga shi ndulombeene kwikala lukonko lwabadi baluule kwi umune wa ku mikanda yetu ya kulonga, oodi mulombeene kubanga kulonga naye mususa aufiki.
Nsaa y’ofudiisha mwisambo na muntu baleesha lukalo, muleeshe bi lukalo loobe lwa kwisamba naye dingi na omwele lwalwa lukonko loyikalanga mulumbuule. Mu angi ma mbalo bantu ta be na nsaa nya na abapushaa bukopo bwa kwipusheena na muntu bwashi afikye amutale dingi. Mu yaya nsaa, we kwamba shi: “Ino ndjo nsaa ibuwa yandi mulombeene nkupeta ku nshibo? [Mutadiile aluule.] Lubingo alulondo, nafiki bwa kapindji kapeela bwashi twaluule luno lukonko . . . Su wekala na midimo ikile bungi nsaa yanfiki, we mulombeene nka kundungula.”
Su bolungula muntu shi okyebe kwalukiila nsaa ikampanda, lombasha eyi dyoobe. (Mat. 5:37) Ku nfudiilo kwa dyadya efuku dyofiki mu nkamutala dingi, lumbuula binangu byaye bwa musango aufiki.

Ebitompeyi munda mwa wawa mweshi:

Nsaa ywelumbuula bwa kwenda mu bulungudi, elumbuule dingi bwa lukonko alwibwesha lukalo lokyebe kwaluula ingi nsaa. Ebisambe na bangi balungudi ba mukandu wibuwa bokwete kufuba nabo.