Bilumbu byabadi batshokole kwi Bufumu​—Kunyingisha mukandu wibuwa mu kulonda kwa miiya

NUKWETE kwenda na kulungula mukandu wibuwa ku nshibo na nshibo, nubapusha mayi a bantu abenwitamina kumongo. Bakwete kwisesela pepi. Pamutwe pa kukookola ku kingi kibelo, obe na mulungudi noobe nubayimana nsaa ayifiki ba mpulushi bakwete kwinwitamina. Mpulushi umune besesela pepi nenu benwipusha shi: “Nanwe bakwete kwenda na kwakula myanda ya mu Bible ku nshibo na nshibo su? Mbenufunde!” Nubaluula na kanemo kooso shi: Nwi Batemwe ba Yehowa. Nkinyi akikitshika kumongo?

Bino mbilombeene kukitshika muyiile abimweneka mwanda. Mu bipwa bishaale, guvernema a mbalo yoodi mushaale baadi mukite kinyi na Batemwe ba Yehowa? Nwi mu bulungantu bwa kipwilo su? Su mbyabya, ikala na bibungi bya kukita mumune na bibakitshine beena Kidishitu noobe balume na bakashi mu bipwa makumi bishaale, bwa “kunyingisha mukandu wibuwa mu kulonda kwa miiya.” (Fid. 1:7, NW) Sunga wekala mushaale mbalo kinyi, kunangwila ku bilumbu byabadi batshokole kwi Batemwe ba Yehowa nkulombeene kunyingisha lukumino loobe. Mu kino kipindji, atukyebe kutaluula ndambo ya byabya bilumbu. Bilumbu byatudi batshokole abilesha binyibinyi shi Bufumu bw’Efile Mukulu mbw’eyendo, mwanda tatubadya kwibitshokola ku bukome bwetu nya!