ibaabadi abandongyesha’shi ibubi kwi mama. Mwikeelo wande ubaadi auleesha myanda inaadi natwesha mu binangu. Nabangile kwikala na ngakwilo ebubi, na kufula miseku ibubi. Nabangile kwikala na mweneno ebubi pabitale kutamabuka kwa lusandji. Sunga mbinaadi pamune na mukashi ande, nabangile kutambuka masandji na bangi bakashi. Dingi efuku nelobele mu lumweno ami nkwamba’shi: ‘Ntshi mukufule’mi.’ Pamutwe pa kwinemeka ami nabeene, naadi nemono bu muntu abisumanga.

Dibaka dyetu dibafwile, na nshalelo ande baadi mulwile. Kunyima nabangile kuteka Yehowa n’eshimba dimune. Nabangile kulonga dingi Bible sunga mbinaadi mwimikye takudi bipwa makumi abidi. Pabafwile papa mu aa mafuku, mama baadi mupwe kubatshishibwa bu Temwe a Yehowa.

MUSHINDO UBAADI BIBLE MWALUULE NSHALELO ANDE: Kubaadi kwilekeena kukata pankatshi pa mwikeelo wande na miiya ilulame ya mu Bible. Kadi bwa uno mususa naadi mwate kitshibilo kya kupeta butaale bwa mu binangu bwabadi balee mu Bible. Nabangile kulumbuula ngakwilo ande na kukambila nsungu yande ibubi. Natshile dingi kitshibilo kya kuleka mwikeelo wa lusandji, kwimika kuta kalata ka makuta, kuleka kukwatshika malofu, na kuleka kwiba mukata ande a mudimo.

Beena mudimo nami tababaadi abapusha bwakinyi naadi nashintuula mwikeelo wande bino nya. Kunyima kwa bipwa bisatu, bababangile kunsukuma dingi bwa’shi ngalushe wawa mwikeelo wande wa kala. Su nalukiile mu wanka su nkapindji kapeela, bu kwikala na nsungu ikilekile sunga kwakula myanda ya butesha, babadya kwamba’shi: “Ah! mulopwe baluka.” Ano mayi abadya kuntapa kwishimba ngofu! Naadi namono nka bu’mi akabilwa.

Mbalo inaadi nafubila ibaadi yule na bintu bya pornografi, mu bintu bikobolwe mu bisashi na mu mikanda. Beena mudimo nami babaadi na kyubishi kya kwitumisheena bifwanyi mu ma ordinatere, bu binaadi nakitshi kumpala. Naadi natompo kwibasuuka bwa kupela kukwatshika maalwa, anka babaadi nka na kitshibilo kya kumbeleka bwa’shi mpone. Nalungwile muntu anaadi nalongo naye Bible bwa’shi ankwashe na kunkankamika. Bantemeeshe na lwishinko looso nsaa inaadi namulondela myanda. Ku bukwashi bwa maverse a mu Bible, bandesheshe bya kukambila bu nkolwenkolwe, na kunkankamika bwandya kukimba bukwashi bwa Yehowa nsaa yooso mu luteko.​—Misambo 119:37.

Dingi efuku natwesheshe kisangilo na beena mudimo nami. Nsaa ibatwibungile, nebalungwile’shi bape bantu babidi ba munkatshi mwabo babaadi na maladi a bunkolwenkolwe mulangi wa maalwa. Bantu booso babelele kiila bapela’shi: “Tokumanga wawa mwanda! Bano bantu bakwete kwitatshisha bwa kupela bunkolwenkolwe!” Ami namu nebalulwile’shi: “Eyendo, n’ami namu.” Kubanga nka dyadya efuku, baaba bantu babashingulwile’shi nkwete kwitatshisha bwa kuleka kubandila pornografi na kukolwa kwa maalwa na dingi tambantakule bwa kwalukiila ku mwikeelo wande wa kala nya.

Kubanga nka paapa, na bukwashi bwa Yehowa, nemukambile kyubishi kya kubandila pornografi. Naadi mubatshishibwe na kwikala Temwe a Yehowa mu kipwa kya 1999, nekeele na lutumbu lwibungi mwanda napetele mwabi wa kwikala dingi na nshaleelo ebuwa e na muloo.

Binobino nashinguula bwakinyi Yehowa mmushikwe bintu binaadi mufule munda mwa mafuku ebungi. Bu byadi Nshe bana e na kifulo, baadi akumiina kunkumbila masaku aatuukila ku pornografi. Mayi e mu mukanda wa Nkindji 3:5, 6 nga binyibinyi! Uno verse amba’shi: “Kulupila kwi Yehowa n’eshimba dyoobe dyooso, olekye kulonda binangu byoobe’be nabeene. Mu mwikeelo oobe ooso omutentekyeshe, aye alumbuula mashinda oobe ooso.” Miiya ya mu Bible ta ngikale nka penda bu bulami kwandi nya, kadi ngintuule na mu bulungantu.​—Misambo 1:1-3.

MILOO YANDI MUPETE: Mu mafuku ashaale, naadi nemono bu muntu abisumanga, kadi binobino nemono bu muntu e na kineemo na e mu butaale bwa binyibinyi. Ne na nshaleelo mutookane na, nashinkamisha’shi Yehowa mmunfwile lusa na ankwatshisheena. Mu kipwa kya 2 000, nayibakiile Karolin, mukash’ande mwina Kidishitu ebuwa bwi kasha mufule Yehowa nka bu’mi nabeene. Mu nshibo yeetu mmuule butaale nka bu mwiyilu. Twi na kineemo kikata kya kwikala munkatshi mwa kifuko kya bakwetu beena Kidishitu batookane na be na kifulo be mu nsenga ishima.

Bantu ngi batuushe mwanda wa kulangwila su?

BANGI BANTU ABAKULA’SHI Bantu ngi batuushe mwanda wa kulangwila. Bangi namu’shi, Efile Mukulu afubishaa bipwilo bwa kukwasha bantu bwa’shi bifubwile peepi naye. Obe namu omono naminyi?

AKYAKULA BIBLE

Kwi “lulangwilo lwabamono kwi Nshetu Efile Mukulu bu lwa binyibinyi, lushii na matope.” (Shake 1:27, EEM) Lulangwilo lushii na matope, na lwa binyibinyi alufiki kwi Efile Mukulu.

NKINYI DINGI AKITULONGYESHA BIBLE?

• Bwa kusankisha Efile Mukulu, abitungu’shi lulangwilo lwetu lwikale lwimeene mu Bible.​—Yowano 4:23, 24.

• Lulangwilo lwimeene pa binangu bya bantu lwi butete.​—Maako 7:7, 8.

Kwikala mwina kipwilo kampanda kwi na muulo su?

WE KWALUULA NAMINYI?

• Oolo

• Nya

• Nkitshibilo kya muntu nabeene

AKYAKULA BIBLE

“Twikwasheneeyi ku muntu na muntu na kwinyingisheena mu kifulo na mu mifubo ibuwa, tatupungilanga [kukooka] kufika mu bikongeeno.” (Beena-Ebelu 10:24, 25) Efile Mukulu akumiina’shi balangwidi baaye bekale abebungu pamune.

NKINYI DINGI AKITULONGYESHA BIBLE?

• Bantu abalangwila Efile Mukulu pamune abitungu bekale mu buumune mu lukumiino lwabo.​—1 Beena-Kodinda 1:10, 11.

• Bantu be mu lulangwilo alusankisha Efile Mukulu be mu kifuko kya bana na bana mu nsenga ishima.​—1 Mpyeele 2:17.