“Milwisho yoobe ibalekyeelwa”

Bantu ba mu ma mbalo elekeene e kula abapusha binobino nkumo ya Yesu. Bebungi ba mu maumbo e kula abafiki mu kupusha kw’alongyesha, na kumona mifubo ya bukome bwaye. Anka mafuku apeela kunyima, balukiile ku Kapernaume, kubadi mushalele. Nkumo ya kwalukiila kwaye ibapalakana bukibukidi mu kibundji kyabo ki ku bukunkula bwa Kalunga ka Ngalileya. Bantu be bungi nkufika mpa na ku nshibo ibadi. Bangi abadi Bafadisee na balambukishi ba Mwiiya abafikile mu Ngalileya eese na mu Yudeya, mpa na mu Yelusaleme.

“N’anka paapa bantu bebungi babebuungile kwanka, mu kipaso kishibadi kimwekwe mbalo, sunga mpeepi na kibelo; n’aye bebalungulanga eyi.” (Maako 2:2, Kilombeeno kipya 2014) Binobino kipindji kya kukita mwanda wa kukaanya kibalombana. Uno nyi mwanda ulombeene kwitukwasha bwatudya kuuka shi Yesu e na bukome bwa kukatusha kyakya akifwishisha bantu makyenga na kwalwisha bantu basangula mbidi bukome.

Pabadi Yesu kwete kulongyesha kibumbu kibadi mu nshibo, bantu bananka nkumutwadila muntu badi kishetshi ku kalusala. Abakumina shi Yesu apaashe kuukw’abo. Pamwanda wa kibumbu, takubadi kipaso kya “kumufisha kwadi.” (Maako 2:4) Bibadi bibakalakashe ngofu. Abo nkukaamina ku musaka wa nshibo, nkutubula mwasa. Akupu abo nkuyisha kalusala kababadi baladile kwi kishetshi mu nshibo.

Yesu badi mufiite munda pa mwanda wa shi abamutshibi mwisambo? Nya! Pamutwe pa byabya, bakanyine bikata pa mwanda wa lukumiino lwabo lukata na aye nkulungula kishetshi shi: “Milwisho yoobe ibalekyeelwa.” (Mateo 9:2) Yesu e kufwila binyibinyi muntu lusa ku milwisho yaye su? Bafundji na Bafadisee abo nkwata uno mwanda na kubanga kunangusheena shi: “Mbwa-kinyi abwakwila uno muntu bino? Ee na kapeesha. Mulombeene kulekana milwisho nnanyi, kukaasha penda Efile bupenka bwaye?”—Maako 2:7.

P’aye kushinkamisha bi binangu byabo, Yesu nkwibayipusha bino: “Mbwakinyi nwi balame ino nnangunangu mu mashimba eenu? Kikile kubofula nkinyi, nkulungula kishetshi shi: ‘Milwisho yoobe ibashimishibwa,’ su nkwamba shi: ‘Ebwe, ata lusala loobe wende’?” (Maako 2:8, 9) Binyibinyi, ku bukwashi bwa mulambu aukyebe Yesu kutuusha, mmulombeene kufwila yawa muntu lusa ku milwisho yaaye.

Kunyima, Yesu nkuleesha kibumbu, mpa na baba abamuyipula shi, shi badi na matalwa a kufwila bantu lusa ku milwisho pa nsenga. Aye nkwialuula kwi kishetshi na kumulungula bino: “Ebwee, ata ka lusala koobe; na nda mu shibo mwobe.” Na yawa muntu nkukita byabya musango umune, bende afwatambukanga mmutwale ka lusala kaye kumpala kwa booso abadi paapa. Bantu abadi abakeme! Abo nkutumbisha Efile Mukulu na kukema shi: “Kashaa tatwamwene kintu kii bino!”—Maako 2:11, 12, Kilombeeno kipya 2014.

Bibuwa kushinguula shi nsaa ayiteemuna Yesu milwisho, ateemuna dingi mikumbo na aleesha kwipusheena kwi pankatshi pa kufwila bantu lusa ku milwisho yabo na kupaashibwa ku mbidi. Bible alongyesha shi nkambw’etu a kumpala, Adame, bakitshine mulwisho na ooso a kwatudi mmupyane bipeta bya wawa mulwisho, bikale mikumbo na lufu. Kadi mu kumunana kwa Bufumu bw’Efile Mukulu, Yesu akafwila bantu booso bafule na abatumikila Efile Mukulu lusa ku milwisho yabo. Ku nfudiilo, mikumbo abakeyikaasha bwa looso.—Beena-Looma 5:12, 18, 19.